2 Corinthians 8

Ika 2018 Bible

← Chapter 7 Jump to: Chapter 9 →

1Umunẹ, ẹnyi chọ nwan nị ụnụ marịn ẹfọma Osolobuẹ mẹni ụka rịsọnmẹ Ẹgbẹrẹ Masẹdonia:

2ọsụọn'a nị wẹ rị imẹ okẹn nsọngbu cheni ogbẹnnyẹ mgbeleke wẹ wụ, okẹn ịghọghọ wẹ nwọn imẹ Di-nwọnni-ẹnyi anịnị ụya wẹ rị imẹ ẹ gbọndọn wẹ, wẹ nọ ye, ye ọda-ọda!

3M rị a shịanị wẹ ẹri nị wẹ gi uche wẹ ye kẹ ẹka wẹ han, yekarịdẹ!

4Wẹ rịọ ẹnyi ọda-ọda, sị ẹnyi mẹ ọhụnma hapụ wẹ nị wẹ sọn ndị ọzọ tụ ihiẹnni wẹ rị a tụnnị ndị ụka Osolobuẹ rị Jerusalẹm;

5ẹlẹdẹ kẹ ẹnyi ro: e bugụọ wẹ ụzọ we enwẹn wẹ ye Di-nwọnni-ẹnyi, ya wẹ nọ nwan we enwẹn wẹ ye ẹnyi nị uche Osolobuẹ rọ.

6Ịya haịn nwan ẹnyi gi sị Taịtọsụ hụn bidọn ihiẹnni ya d'e yeni nwan ụnụ ẹka rụnpụ a.

7Kẹ ụnụ dọn nwan rị e nwọn ihiẹn ile mmagi-mmagi, kẹ okukwe kẹ oyiye oku-ọnụ kẹ amamihiẹn kẹ adụdụ kẹ ihiẹn-ọsụsụọ rị ẹgbata ẹnyi lẹ ụnụ, ẹrịra kẹ ẹnyi chọzị nị ụnụ mẹ ebe ọrụn-eyemẹkanị rị.

8Ẹlẹ ni m rị e ye iwu, kama, m chọkọ nị m ghọsị ụnụ adụdụ ndị ọzọ nwọn, gi ẹ chọpụha kẹ ihiẹn-ọsụsụọ ụnụ nwọn wụ ezigbo ẹ.

9Makẹni, ụnụ a marịnghọ ẹfọma Onyẹ-nwọnni-ẹnyi wụ Jesu Kristi mẹ: nị, ọsụọn'a n'ọ wụ ọdanfịn, o gi ufiri ụnụ họnrin ogbẹnnyẹ kẹni ụnụ gi ogbẹnnyẹ o dan wụrụ ndị ịdanfịn.

10Ndụnmọdụn m imẹ ihiẹnni wụ ọnwan: erere ụnụ rọ nị ụnụ rụnchanrịn nwan ọrụn-eyemẹkanị ụnụ lẹ enwẹn ụnụ ropụha akan-ahụn rụnma.

11Rụnchanrịn n'a nwan; gi ni nwan ihiẹn ụnụ nwọn rụnchanrịn a kẹ ụnụ dọn wepụha obi nị ụnụ rụn a isi-ibuzọ hụ.

12Makẹni, omẹni ịhịan wepụha obi ẹ ile n'o ye, hụn o nwọn kẹ wẹ e lee ẹnya a narịn a ya, ẹlẹ hụn o nwọnlẹni.

13Ẹlẹ ni m chọ n'ọ rịnị ndị ọzọ nfe, mẹ ụnụ buru ibu. Kama, n'ọ wụrụ ahanmahan:

14ọda ụnụ nwọn nwan e gbọnni wẹ mkpa wẹ nwọn; o ruzi, ọda wẹ nwọn e gbọnni ụnụ mkpa; ọ wụrụ ahanmahan.

15Ẹrịra kẹ wẹ de ẹ imẹ Ẹkụkwọ-nsọ, nị “Onyẹ hụn kpọnrin ọda enwọnkẹni; nke onyẹ hụn kpọnrin ẹkẹrẹ emẹkẹni ẹkẹrẹ.”

16Ekele ya rịnị Osolobuẹ hụn bu ọrịrịmma ụnụ che Taịtọsụ obi k'ọ dọn rị mmẹ nwẹn obi.

17Ọsụọn'a nị wẹ gwa a agwa d'a hụn ụnụ, ọ rịzịkwọ ya nwẹn n'o d'a hụn ụnụ.

18Ẹnyi zila ya lẹ nwẹnẹ ẹnyi hụ ndị ụka ile e ku oku ẹ ọhụnma ebe oziọma rị.

19Ẹlẹdẹ ọhụn sụọ, ụka ile gba tumẹ ẹ nị ẹnyi lẹ ya wịrị e jẹnhunmẹ imẹ ọrụn-eyemẹkanị ẹnyi gi e ye Di-nwọnni-ẹnyi lẹ enwẹn ẹ ọghọ, a ghọsịzị nị ẹnyi hụ e ro umunẹ ẹnyi.

20Ẹnyi rị a kpachanpụ ẹnya makẹ ịhịan gha e gi oku oyiyeni hi-ogbe wẹ buche ẹnyi ẹka kọrịanị ẹnyi;

21ẹnyi rị e mẹ ẹ n'ọ rị mma, ẹlẹ ẹnya Di-nwọnni-ẹnyi sụọ, kanị, ẹnya ịhịan zị.

22Ẹnyi zilazị nwẹnẹ ẹnyi ọzọ cheni wẹ. Ẹnyi e lelegụọ nwẹnẹ ẹnyini; ẹnyi a hụngụọ ezigbo adụdụ o gi a rụn ihiẹn bu ọda. Adụdụ a a wayegụọdẹ nwan makẹni obi ru ẹ alị ọda-ọda banyeni ụnụ.

23O mẹ nke Taịtọsụ, mmẹ lẹ ịya gba a wị, mmẹ lẹ ya gbazị a rụnnị ụnụ; nke umunẹ ẹnyi ya lẹ wẹ wị, wẹ rị a nọkin ẹnya ụka ichẹn-ichẹn, wẹ rị e ye Kraịstị ọghọ.

24Gi ni nwan oghereni ghọsị ndịnị ihiẹn-ọsụsụọ lẹ ihiẹn ẹnyi rị e gini ụnụ a nyan isi, kẹni ndị ụka ile gi ẹ dọn.

← Chapter 7 Jump to: Chapter 9 →