2 Corinthians 13

Ika 2018 Bible

← Chapter 12 Jump to:

1Ọnwan k'e mẹ mgbe ẹtọ m lala d'a hụn ụnụ: “Madụ ẹbụọ mọbụ ẹtọ sikọ d'a shịarịrị ẹri wẹ kebe gi oku ọwụlẹ dọn.”

2A gbagụọ m wẹ ile mẹ njọ mbụ lẹ ndị họdụnị mkpịnsịn-ẹka kẹ m bịa nke mgbe ẹbụọ; m rịzị nwan a gba wẹ ya hụnnị m rịlẹni ebẹhụ, nị, m bịa, egikọ m ẹka alụlụa sọn onyẹ ọwụlẹ —

3ebe o mẹni ụnụ chọkọ nị m ghọsị ụnụ nị Kraịstị rị imẹ m e ku nke-esi. Kraịstị arịnị alụlụa imẹ igunrun ụnụ — kaka! O gizi ẹka-ikẹn e sọn ụnụ.

4Ọsụọn'a nị wẹ kpọgbu ẹ elu-obe nọkẹ onyẹ nwọnlẹni ikẹn, ọ hụzị nwan ndụn ghahanị ikẹn Osolobuẹ. Imẹ ẹ, ẹnyi nwẹn rịzịkwọ kẹ ndị nwọnlẹni ikẹn; kanị, o mẹ nke ẹka ẹnyi k'e gi sọn ụnụ, ẹnyi k'e sọn ẹ gi ikẹn Osolobuẹ bi, gi ikẹn Osolobuẹ hụ sọn ụnụ.

5Lekpọ nị enwẹn ụnụ, nị ụnụ marịn kẹ ụnụ hụ imẹ okukwe. Lele ni enwẹn ụnụ. Ụnụ amarịn nị Jizọs Kraịstị rị imẹ ụnụ? Ụnụ a marịnghọ nụ — mmanị ụnụ a dangụọ nlele hụ.

6M gi ẹ dọn nị ụnụ k'a marịn nị ẹnyi nwẹn adannị nlele hụ.

7Kanị, ẹnyi hụ e mẹ ekpere a rịọ Osolobuẹ, amamgbe ụnụ e mẹ ihiẹn ọwụlẹ rịlẹni mma, ẹlẹ ni wẹ gi ẹ sị nị ẹnyi a zụnka ụnụ, kama, kẹni ụnụ mẹhụ ihiẹn rị mma, ọsụọn'a nị ẹnyi nwẹn k'a nọ kẹ ndị dan nlele.

8Makẹni, ẹnyi a saẹka mẹ ihiẹn ọwụlẹ e gbọndọn ezioku, kama, ihiẹn a kwadọn ezioku sụọ kẹ ẹnyi e mẹ.

9Ẹnyi a ghọghọ aghọghọ omẹni ẹnyi ezeni bụ ụnụ e zeghọ. Ekpere ẹnyi wụ nị ụnụ zuchanrịn oke.

10Ya haịn m gi deni ụnụ ihiẹn ndịnị ogẹnni m kelẹni bịa ebahụn ụnụ rị, amamgbe m'a bịa, e gi m ikẹn hụ Di-nwọnni-ẹnyi ye m mẹghafe ihiẹn okẹn, ikẹn o ye m gi zụn ụnụ ẹlẹ itikpọ ụnụ.

11Nke ikpanzụụn, umunẹ m, ghọghọma nị; bihutọ nị ẹka; a gba nị ibe ụnụ umẹ; e nwọn ni obi ohu; e gi ni udọn e bi. Ụnụ mẹ ẹnịna, Osolobuẹ udọn lẹ ihiẹn-ọsụsụọ gha ẹka a a bịa k'a nọyeni ụnụ.

12Dide ni ibe ụnụ odide rị nsọ.

13Ndị nke Osolobuẹ ile e zi ekele ụnụ.

14Ẹfọma Di-nwọnni-ẹnyi Jesu Kristi lẹ ihiẹn-ọsụsụọ Osolobuẹ lẹ mmẹkọ Mmọn-nsọ ya nọyeni ụnụ ile.

← Chapter 12 Jump to: