2 Corinthians 12

Ika 2018 Bible

← Chapter 11 Jump to: Chapter 13 →

1Ọ rị mkpa nị m nyansọnmẹ isini — ọsụọn'a n'o nwọnni erere ọ ban. Nị m ku nwan oku ọhụn ndị m hụn lẹ ihiẹn Di-nwọnni-ẹnyi ghọsịsọnmẹ m.

2A marịnghọ m onyẹ nke Kraịstị ohu wẹ weri shikwọrị elu-igwee nke ẹtọ ahụa mmẹnọ ghanị: kẹ imẹ anụ-ẹhụ k'o mẹ kẹ ẹlẹ imẹ anụ-ẹhụ, amarịn m; Osolobuẹ ya marịn.

3Ihiẹn m marịn wụ nị wẹ weri onyẹni, ama m kẹ o mẹ imẹ anụ-ẹhụ ra ẹlẹ imẹ anụ-ẹhụ, Osolobuẹ sụọ marịn —

4e we w'ẹ shi alị Ezumikẹn wụ Paradaịsị, ọ nọ nụ ihiẹn ọnụ ịhịan ghalẹni e ku, ihiẹn wẹ ghalẹni a nị ịhịan e ku.

5Nị m gighọ nwan onyẹ nọ ẹnịna nyan isi, kanị egikọ m mmẹ lẹ enwẹn m nyan isi wezụka ihiẹn ndị hụn a ghọsị nị ndụn arị m.

6Kanị, o mẹdẹ ni m chọ nị m nyan isi, ọ ghọsịnị nị m wụ onyẹ-nzuzu, makẹni ihiẹn m k'e ku wụ ezioku. Kanị, emẹkọ m'a, makẹ ịhịan gha e ro ni m wụ ihiẹn ọwụlẹ karị ihiẹn wẹ hụn m mẹ lẹ hụn wẹ nụ m ku.

7Ihiẹn ndịnị m hụn a pụkakwọ ichẹn. Kanị, makẹ m gha e gi ihiẹn ndị hụ m hụn pachemẹ, Osolobuẹ nọ bu nsọngbu che m ẹhụ — rịkẹ ogun wẹ kpọye ịhịan ẹhụ. Nsọngbuni wụ onyẹ-ozi Ekwensụ. O bu ẹ che m ẹhụ n'ọ hụn ụzọ a lụ m, amamgbe m'a pachemẹ.

8Mgbe ẹtọ kẹ m kpọku Di-nwọnni-ẹnyi kẹni o mẹ ẹ hapụ m.

9Kanị Di-nwọnni-ẹnyi nọ sị m, “Eyemẹka m sụọ k'ị chọ, makẹni ebe ndụn nọlẹni rị kẹ ikẹn m nọ a pụhachanrịn ifọn.” M'a nyan nwan isi, a ghọghọ, nị ndụn arị m, kẹni ikẹn Kraịstị hụn ụzọ rịsọnmẹ imẹ m.

10Ọ sụọ m nwan a sụọ nị ndụn arị m, nị w'a kpari m, nị m'a ta afụnfụn, nị w'e kpokpo m lẹ ni ọdakin rị ichẹn-ichẹn a bịanị m, ebe o mẹni ufiri Kraịstị rọ. Makẹni, ogẹn ọwụlẹ ndụn gilẹni rị m ya kẹ m gi e kẹnrẹn.

11E zuzuọlẹ m! Ụnụ haịn m gi mẹ ẹ! Ụnụ te furu hụn e kuni m ọhụnma — makẹni onwọnni ihiẹn ndịnị ụnụ rị a kpọ okẹn ndị-ozi pụ-ichẹn gi ka m, ọsụọn'a nị onwọnni ihiẹn m wụ.

12E dọnringụọ m ẹnya rụn ihiẹn bu ọda imẹ igunrun ụnụ, ihiẹn bu ọda wẹ gi a marịn ezigbo onyẹ-ozi pụ-ichẹn: kẹ ihiẹn-nghọsị kẹ ọrụn atụmẹnya kẹ ihiẹn wẹ gi a ghọsị ikẹn Osolobuẹ.

13Kị wẹ mẹni ụka ndị-ọzọ wẹ mẹlẹnini ụnụ, wezụka nị ebuyeni m ụnụ ibu iye m ihiẹn m gi e bi? Dodo ni, gbagharị nị m njọ m gilẹni buye ụnụ ibuni!

14Lee n'ẹ, a kwademẹgụọ m nwan nị m lala d'a hụn ụnụ nke mgbe ẹtọ. Kanị m bịa, anakọ m ụnụ ihiẹn ọwụlẹ makẹ m gha e mẹ ụnụ ibu olu. Makẹni, ụnụ kẹ m chọkọ, ẹlẹ ihiẹn ụnụ. Ẹghẹẹ, ẹlẹ ụmụ a kpatọnị ndị mụnị wẹ, ndị mụnị wẹ nwọn a kpatọnị wẹ.

15Ni m gichanrịnghọ ihiẹn m ile lẹ ndụn m yeni ụnụ ẹka. O mẹ nwan nị mmẹ nwẹn rị e nwọnwaye ihiẹn-ọsụsụọ ụnụ, nị ihiẹn m sụọbehi ụnụ nwẹn k'ọ sụọ ụnụ mbụ?

16Ikẹnkwọ ụnụ a sị, “Ọsụọn'a nị y'e buyeni ẹnyi ibu, y'e mẹghọ ẹnyi ẹro tụnarịn ẹnyi ihiẹn.”

17Nanị? Ra ndị m zihẹni ụnụ kẹ m gi tụnarịn ụnụ ihiẹn ụnụ?

18Mmẹ rịọ Taịtọsụ d'a hụn ụnụ, m nọ zi nwẹnẹ ẹnyi hụn-ẹbọ hụ chen'ẹ. Ra Taịtọsụ tụnarịn ụnụ ihiẹn ụnụ? Ẹlẹ agụngụn ohu kẹ ẹnyi gụn? Ẹlẹ ẹka ohu kẹ ẹnyi gi rụn?

19Ụnụ rodẹ nwan nị ẹnyi gi hụnnị ile e kinrin ọnụ ẹnyi ihun ụnụ ra? Ẹlẹkwọ ya! Ẹnyi rị e ku ẹ ihun Osolobuẹ, e ku ẹ kẹ Kraịstị chọ. Ndị nke m, ẹnyi rị e mẹ ihiẹnni ile kẹni okukwe ụnụ sue.

20Egun rị a tụ m nị ikẹnkwọ, m bịa, ahụnkọ m ụnụ kẹ m dọn chọ, ụnụ nwẹn ahụnkọ m kẹ ụnụ dọn chọ; egun rị a tụ m nị, ikẹnkwọ, ikpe lẹ ẹnya-ụfụ lẹ eje-olulu jẹnkọ d'a rị; nị ụfọdụ imẹ ụnụ k'a gha e ro enwẹn wẹ sụọ; nị ikuja oku ịhịan, oku-azụụn, mpache lẹ isusu jẹnkọ d'a rị.

21Egun rị a tụ m, nị, ikẹnkwọ Osolobuẹ m e welụa m alị imẹ igunrun ụnụ, m bịazị; ikẹnkwọ a kwanma m ẹkwan makẹ ndị bu ọda mẹ njọ mbụ hụn kelẹni rogharị ihiẹn ru unyin lẹ ughẹrẹ lẹ ihiẹn-ifẹnrẹn ile wẹ mẹsọnmẹ.

← Chapter 11 Jump to: Chapter 13 →