Revelation 13

Ika 2018 Bible

← Chapter 12 Jump to: Chapter 14 →

1M nọ hụn eje-anụ ohu k'ọ gha imẹ ohimin pụla. Mpịn iri lẹ isi ẹsa k'o nwọn. Okpu-eze ohu-ohu rịsọnmẹ elu mpịn ndị hụ. Ẹfan rị ichẹn-ichẹn e kuja oku Osolobuẹ rịsọnmẹ elu isi ẹsa hụ.

2Eje-anụnị tụsọnmẹ ẹkịrịka kẹ liopadị. Ụkụ alị a shịa ọda-ọda pu okẹn-mbụọ kẹ nke eje-anụ wụ Biẹ. Ọnụ a nọ kẹ nke Ẹwọrọ. Ya Dragọnụ nọ we ikẹn ẹ lẹ ukpo-eze ẹ ye eje-anụ hụ, bu ọkịkị che ẹ ẹka ọda-ọda.

3Isi ẹ ohu nọ kẹ isi anụ wẹ gbugụ, kanị ebẹhụ wẹ gi gbu ẹ a lagụọ. Eje-anụnị a tụkẹnmẹkẹ ụwa ile ẹnya, nke wụ nị wẹ ile hụ e sọn ẹ.

4Wẹ ile nọ femẹ Dragọnụ hụ makẹni ịya ye eje-anụ hụ ikẹn. Wẹ hụzị e fe eje-anụ hụ, a sị, “Onyẹ nọ kẹ eje-anụ hụ?! Onyẹ k'a saẹka lụsọn ẹ ọgụn?!”

5Wẹ ye eje-anụ hụ ọnụ o gi e ku okẹn ihiẹn, e ku arụ, ye ẹ ikẹn ọrọgbọ ifọn ẹbụọ kwasị ọgụnnaị.

6Ọ shịapụ ọnụ kujasọnmẹ oku Osolobuẹ lẹ ẹfan a lẹ elu-igwee ebe o bi lẹ ndị rị elu-igwee.

7Wẹ nọzị nị a lụsọn ndị-nsọ agha, mẹri wẹ; e wezikwọ wẹ ebọn ile lẹ ndị ile lẹ asụsụ ile lẹ alị ile che ẹ ẹka.

8Ndị ile bi elu-ụwa k'e fe ẹ, ndị ile wẹ delẹni ẹfan wẹ imẹ ẹkụkwọ ndụn-itẹbitẹ, ẹkụkwọ Nwa-ebulu hụ wẹ gbu nị wẹ d'e gbe iyetọ ụwa.

9Onyẹ nwọn ntịn, ya nụ.

10Onyẹ wẹ k'a nwụnrụn kẹ wẹ k'a nwụnrụn; onyẹ wẹ k'e gi ọpịa-agha gbu kẹ wẹ k'e gi ọpịa-agha gbu. Ọnwan chọ ndidin lẹ okukwe ẹka ndị nke Osolobuẹ.

11Ya m nọ hụn eje-anụ ọzọ k'ọ gha imẹ alị pụla. Mpịn ẹbụọ k'o nwọn rịkẹ nwa-ebulu kanị o ku kẹ eje-anụ uku wụ Dragọnụ.

12Eje-anụnị rị a kpanị nke ibuzọ ikẹn o ye ẹ. Ọ mẹ ụwa ile e ferịrị eje-anụ hụn ibuzọ ahụn ebe wẹ gi gbu ẹ lagụ.

13Ọ rụn okẹn ọrụn-atụmẹnya, e mẹdẹ ọkụn gha elu-igwee hidan idẹnya ịhịan ile.

14O gi ọrụn-atụmẹnya ndịnị wẹ ye ẹ ikẹn rụndọnni eje-anụ ibuzọ hụ dufie ndị bi elu-ụwa, sị wẹ kpụ eje-anụ ibuzọ ahụn wẹ gi ọpịa-agha begbu, hụn rịzị nwan ndụn.

15A nịzịghọ w'a saẹka mẹ ihiẹn o mẹ eje-anụ ibuzọ ahụn wẹ kpụ nọ rị ndụn, kwọnmẹ, kumẹdẹ oku, mẹdẹ wẹ gbu ndị ile jụ nị efekọ w'a.

16Eje-anụnị nọzị mẹ wẹ ye ịhịan ile ahịma ẹka-nni mọbụ ezimezi ihun — kẹ onyẹ uku kẹ onyẹ-nta, kẹ ọdanfịn kẹ ogbẹnnyẹ, kẹ igbọn kẹ onyẹ nwọn enwẹn ẹ —

17nke wụnị onwọnni onyẹ a s'ẹka ṅọn mọbụ re ihiẹn, mmanị o bu ahịma hụ. Ahịma hụ wụ ẹfan eje-anụ ibuzọ hụ mọbụ ole ẹfan a gba.

18Ihiẹnni chọ amamihiẹn: onyẹ nwọn nghọta ya gi ẹ gbakọ ahịma eje-anụ hụ, makẹni ọnụ-ọgụn ịhịan rọ. Ahịma hụ wụ isin kwasị ọgụn-mmẹtọ kwasị nnụ (666).

← Chapter 12 Jump to: Chapter 14 →