Revelation 8

Ika 2018 Bible

← Chapter 7 Jump to: Chapter 9 →

1Ogẹn Nwa-ebulu hụ gi tọpụ eriri nke ẹsa, elu-igwee ile nọ mẹ jụụ ihiẹn nọkẹ nkirishi mgbahunmẹ ọkụrọkụ ohu.

2Ya kẹ m nọ hụn ndị mmọn-ozi ẹsa hụn e turu ihun Osolobuẹ. Wẹ nọ ye wẹ opi ẹsa.

3Mmọn-ozi ọzọ hụn gi mkpu-sẹnsa goru wẹ gi a mụyeni Osolobuẹ nsẹnsi nọ bịa d'e turu ihun ukpo nchụn-ẹjan hụ. Wẹ nọ kpọnye ẹ nsẹnsi bu ọda, n'o gi nsẹnsi ahụn wụ ekpere ndị-nsọ ile chụn ẹjan elu ukpo nchụn-ẹjan ahụn wẹ gi goru mẹmẹ hụn rị ihun ukpo-eze ahụn;

4ẹnwụnrụn nsẹnsi hụ rị a dụnnị hụn wụ ekpere ndị-nsọ nọ gha ẹka mmọn-ozi hụ a lọshi elu ihun Osolobuẹ.

5Ya kẹ mmọn-ozi hụ nọ weri sẹnsa hụ o gi rị a dụn nsẹnsi ọkụn, weri ọkụn ukpo nchụn-ẹjan hujun ẹ, tụ a ye elu-ụwa. Ya kẹ akpara nọ han, igwere e dẹn, amụma e be, alị e zinzin.

6Ya kẹ ndị mmọn-ozi ẹsa hụ gi opi ẹsa nọ kwademẹ nị wẹ gbu opi wẹ.

7Mmọn-ozi nke ibuzọ e gbu opi ẹ, wẹ nọ ma ẹkwan-igwere lẹ ọkụn wẹ gwọgbama ya lẹ ẹdeke ye imẹ ụwa, ọ nọ dụnpụ ụzọ ohu, latọ ụzọ ẹbụọ; imẹ osisi ile, ọ dụnpụzị ụzọ ohu, ọ họdụ ụzọ ẹbụọ; ọ dụnpụchanrịn irurue ile rị e sue alị.

8Mmọn-ozi nke ẹbụọ nọ gbu opi ẹ, wẹ nọ tụ ihiẹn nọ kẹ ẹregede ugu rị e nwun ọkụn ye imẹ ohimin — ohimin nọ họnrin ẹdeke azụụn ohu, ọ họdụ azụụn ẹbụọ.

9Ụzọ ohu imẹ ihiẹn ndị rị ndụn imẹ ohimin nọ nwụnhụn, ọ họdụ ụzọ ẹbụọ. Imẹ ụgbọ-mirin ile, ụzọ ohu nọ tikpọpụ, ọ họdụ ụzọ ẹbụọ.

10Mmọn-ozi nke ẹtọ nọ gbu opi ẹ: kokisẹ ohu hi-ogbe rị e nwun kẹ ọkụn ọwa nọ gha igwere dan. Imẹ iyi ile rị ụwa, ọ danye azụụn ohu latọ azụụn ẹbụọ, kẹ iyi kẹ isi-mirin.

11Ẹfan kokisẹ hụ wụ “Elumilu.” Imẹ mirin ile rịnị, ụzọ ohu nọ lumẹ ilu, ọ họdụ ụzọ ẹbụọ. Ndị bu ọda nọ nwụnhụn makẹ mirin hụ rị e lu ilu.

12Mmọn-ozi nke ẹnọ e gbu opi ẹ, ẹnyanwụn nọ wiwi azụụn ohu, ifọn lẹ kokisẹ nọ wiwizịkwọ azụụn ohu-ohu, a latọsọnmẹ wẹ azụụn ẹbụọ-ẹbụọ. Ukpẹ wẹ nọ tibelụa, timẹhụ ụzọ ẹbụọ imẹ ụzọ ẹtọ. Anwụn amụchanrịnzịnị kẹ ụhụọhịn han k'o dọn a mụ mbụ; ifọn etibiehanzịnị k'o dọn e ti mbụ. Wẹ kebe ụhụọhịn ụzọ ẹtọ, anwụn amụkarịzịnị ụzọ ẹbụọ — ẹrịra kẹ ifọn mẹzikwọ imẹ uhinhin.

13M nọ lee ẹnya elu, hụn ugọn ohu k'o fekọ imẹ elu, yikọ, “Nsọngbu! Nsọngbu! Okẹn nsọngbu jẹnkọ d'a rịnị ndị ile bi elu-ụwa ogẹn ndị mmọn-ozi ẹtọ họdụnị e gi gbu opi ndị họdụnị!”

← Chapter 7 Jump to: Chapter 9 →