Revelation 18

Ika 2018 Bible

← Chapter 17 Jump to: Chapter 19 →

1Ọhụn e mẹgụ, m nọ hụn mmọn-ozi ọzọ k'ọ gha elu-igwee hidanla. Hụnnị nwọn ikẹn ọda-ọda; ọ banhan, ọghọ rị a ẹhụ nọ nwungbarị ụwa ile.

2Ọ nọ weshi olu elu sị, “Ọ dangụọ! Babilọnụ uku a dangụọ! Ọ wụrụọlẹ ebe eje-mmọn bi, ebe mmọn ile rụnị bi, ebe nnụnụ ile rụnị bi; ebe anụ ile rụnị w'a sọ bi.

3Makẹni alị ile a raọlẹ eje-manya a wụ ughẹrẹ, ọ tụgbarị wẹ; ndị-nze rị ụwa e mẹgụọ mgba a; ndị-afịa ụwa e gigụọ ihiẹn o gi obibi mmẹ-nwọn-enwẹn-m nwọnhẹn họnrin ndị-ịdanfịn.”

4Ya m nọ nụ kẹ olu ọzọ gha elu-igwee sị, “Ndị nke m, gha nị imẹ ẹ pụha, amamgbe ụnụ e bu ẹka che njọ a, amamgbe ihiẹn mẹn'ẹ e ru ụnụ ẹhụ;

5makẹni, elumelu njọ a a sụntụgụọ elu-igwee; Osolobuẹ a nyanhangụọ njọ a.

6“Mẹ ẹ ihiẹn o mẹ ndị-ọzọ! Mẹgwarị a ya ụzọ ẹbụọ! Gbaye ẹ manya k'o dọn gbaye ndị ọzọ, y'a gbayedẹ ẹ ya ụzọ ẹbụọ!

7Ye ẹ afụnfụn lẹ ẹkwan han kẹ ọghọ o ye enwẹn ẹ lẹ obibi mmẹ-nwọn-enwẹn-m o bi. “Ebe o mẹni ọ sị enwẹn ẹ, ‘Mmẹ wụ eze; di anwụnnahịnnị m; ihiẹn-ẹkwan emẹkọ m!’

8Afụnfụn ile furun'ẹ k'e gi akpọhịn ohu bịachanrịn — kẹ ọnwụn, kẹ ihiẹn-ẹkwan, kẹ ụnwụn. Wẹ k'a kpọ a ọkụn. Ẹghẹẹ, makẹni Chuku-nwọnni-ẹnyi hụn rị e ye afụnfụn wụ dikẹn.”

9Ndị-nze rị ụwa hụn mẹ mgba a, sọn ẹ bi obibi mmẹ-nwọn-enwẹn-m, k'a kwann'a ẹkwan, goo n'ẹ — ogẹn w'e gi hụn ẹnwụnrụn ọkụn wẹ kpọ a.

10Egun afụnfụn ọ rị imẹ ẹ anịkọ wẹ nọkunmẹ ẹ. Wẹ k'e turu ebe teni, a sị, “Heuu! Heuu! Ledẹ obodo uku nwẹn! Obodo uku wụ Babilọnụ! Osolobuẹ e gigụọ ube ohu yechanrịn a afụnfụn a!”

11Ndị-afịa ụwa k'a kwann'a ẹkwan, sụkụrụ (gbusuru), makẹni onwọnzini onyẹ e ṅọnnarịn wẹ ibu-afịa:

12goru, siliva, ejije lẹ ọmụma pụ-ichẹn e gbukeni; ẹkwa linẹ, ẹkwa pọpụ a ṅanrannị, ẹkwa siki lẹ ẹkwa ufie a ṅanrannị; onwọnzini onyẹ e ṅọnnarịn wẹ ụdị osisi ile e kun fuẹin lẹ ihiẹn rị ichẹn-ichẹn wẹ gi eze-enyi mẹmẹ; onwọnzini onyẹ e ṅọnnarịn wẹ ụdị ihiẹn ile wẹ gi osisi a ṅanrannị mẹmẹ lẹ ihiẹn igwe-bronzu lẹ igwe mmaka lẹ ihiẹn mabụlụ;

13onwọnzini onyẹ e ṅọnnarịn wẹ sinamọnụ lẹ ihiẹn-akụnkụn ndị ọzọ ihiẹn-oriri gi a sụọ lẹ ndị e kun fuẹin; nsẹnsi lẹ maa lẹ frankisẹnsị; onwọnzini onyẹ e ṅọnnarịn wẹ manya, ofigbọn-olivu, ọka wẹ gwe a ṅanrannị lẹ ọka-witi; efin, atụnrụn, ẹshin lẹ ụgbọ-anyịnyan; igbọn lẹ ndụn ịhịan.

14Ndị-afịa hụ k'a sị a, “Ihiẹn ile rị mma rị a lagbu i ẹnya a nahịngụọ ị! Ihiẹn ile ẹhụ gi e fu i lẹ ọghọ ị ile e hunahịngụọ ị! Y'a hụnkọzị wẹ jẹnrin ejẹn!”

15Ndị gi afịa ihiẹn ndịnị ya lẹ wẹ a zụ hi ọdanfịn k'e gi egun afụnfụn ọ rị imẹ ẹ turu ebe teni; wẹ k'a rị a kwan ẹkwan, e goo, a sị,

16“Heuu! Heuu! Lee obodo uku nwẹn, hụn yi ẹkwa linẹ ṅanrannị lẹ ẹkwa pọpụ ṅanrannị lẹ ẹkwa ufie ṅanrannị; hụn yi goru lẹ ihiẹn mma pụ-ichẹn e gbukeni lẹ ejije!

17Ẹfe ahụn ile o fe e gigụọ ube ohu lachanrịn iwi!” Ndị-isi ụgbọ-mirin ile lẹ ndị ile e gi ụgbọ-mirin e jẹn lẹ ndị a rụn imẹ ụgbọ-mirin lẹ ndị ile e gi ụgbọ-mirin a zụ afịa nọ turu ebe teni,

18e yi oro ogẹn wẹ gi hụn ẹnwụnrụn wẹ gi kpọ a ọkụn, a sị, “Elee obodo han kẹ obodo ukuni?”

19A bụọ wẹ uzunzun ye isi, a kwan, e goo, a sị, “Heuu! Heuu! Ledẹ Obodo uku nwẹn ndị ile nwọn ụgbọ-mirin a gba imẹ ohimin gi ẹfe ẹ hi ọdanfịn! O gigụọ ube ohu, mgbahunmẹ ọkụrọkụ ohu, gba okpokoro!

20Elu-igwee, ghọghọma nwan! Ndị-nsọ lẹ ndị-ozi pụ-ichẹn lẹ ndị-amụma, ghọghọma nị nwan, makẹni Osolobuẹ e gigụọ ufiri ụnụ ma a ikpe!”

21Ya mmọn-ozi ohu kin akwanran ọda-ọda nọ buru ọmụma han kẹ ọlọ, tụ a ye imẹ ohimin, sị, “Ẹnịna kẹ wẹ k'a dọn gi ikẹn fịan obodo uku hụ wụ Babilọnụ alị; ahụnkọzị w'a!

22Anụkọzị wẹ olu ndị-ụbọ lẹ olu ndị ọkụ-ẹbụ lẹ ogbu-ẹkpịrị lẹ ogbu-opi imẹ i; ahụnkọzị wẹ onyẹ ọrụn-nka imẹ i; anụkọzị wẹ ukwere ọlọ imẹ i;

23ukpẹ ẹka enwunkọzị imẹ i; anụkọzị wẹ ịghọghọ ndị rị a gba ẹkụkwọ imẹ i. O k'e mẹ makẹni ndị-afịa ị te wụ ndị uku ụwa, alị ile kẹ i mẹ ihiẹn hụn i mẹ, dufiechanrịn wẹ.

24A hụnzịghọ wẹ ẹdeke ndị-amụma lẹ ndị-nsọ lẹ ndị ile wẹ gbu imẹ ụwa imẹ ẹ.”

← Chapter 17 Jump to: Chapter 19 →