Revelation 2

Ika 2018 Bible

← Chapter 1 Jump to: Chapter 3 →

1“Dejẹnni onyẹ-isi ụka Ẹfẹsọsụ, sị a: Lee ihiẹn onyẹ hụ kokisẹ ẹsa hụ rịchanrịn ẹka-nni ẹ ku, onyẹ ahụn a ghahunmẹ imẹ obu-ukpẹ goru ẹsa hụ:

2A marịnghọ m ihiẹn ile ị rị e mẹ: kẹ ị dọn rị a lụgbu enwẹn i lẹ kẹ ị dọn rị e dingbu ihiẹn ile, lẹni y'a ra ye ndị rị e mẹ eje-ihiẹn efe; a marịnghọ m nị y'e lelegụọ ndị ahụn kpọ enwẹn wẹ ndị-ozi pụ-ichẹn bụ ẹlẹ wẹ ndị ozi pụ-ichẹn. Y'a hụngụọ a nị wẹ wụ ndị-ntụ.

3A marịnghọ m nị ị gi ufiri ẹfan m dingbu ihiẹn ile bụ ndụn eke gụkwọ ị nwan.

4“Kanị, ọnwan wụ ihiẹn ị rị e mẹ rị e ze m ize: ụnụ a latọgụọ ihiẹn-ọsụsụọ ahụn ụnụ nwọn mbụ.

5Nyanhan nị nwan ebe ụnụ gha dan, ụnụ e bihutọ ẹka, mẹmẹzi kẹ ụnụ e mẹ mbụ. Ụnụ jụ, a bịa m d'e wepụ obu-ukpẹ ụnụ ọnọdị a, mmanị ụnụ bihutọ ẹka.

6“Kanị, o nwọnghọ ihiẹn rị mma ụnụ rị e mẹ: ihiẹn ndị itu Nịkọlaịtịa e mẹ, hụn e ze mmẹ lẹ enwẹn m ize, e zezikwọ ụnụ nwẹn ize.

7Onyẹ nwọn ntịn ya nụ ihiẹn Mmọn-nsọ rị a gwa ụka rị ichẹn-ichẹn! Onyẹ hụn mẹrini kẹ m k'a nị ri mkpụrụ-osisi ahụn e ye ndụn hụn rị Paradaịsị, Alị Ezumikẹn Osolobuẹ.

8“Dejẹnni onyẹ-isi ụka Sụmẹna, sị a: ‘Lee ihiẹn onyẹ hụ wụ Ibuzọ lẹ Ikpanzụụn ku, onyẹ ahụn nwụnhụnnị hụn rịzị nwan ndụn: ọ sị,

9A marịngụọ m afụnfụn ụnụ rị a ta, marịnzịkwọ kẹ ụnụ mẹhan ogbẹnnyẹ (kanị m sị ụnụ nị ọdanfịn kẹ ụnụ wụ nke-esi). A marịnghọ m kẹ ndị ahụn kpọ enwẹn wẹ ndị Ju dọn rị e kuja oku ụnụ. Ẹlẹ ndị Ju kẹ wẹ wụ kanị ndị itu Ekwensụ!

10Atụlẹ ni egun afụnfụn ụnụ jẹnkọ nwan d'a ta. Lee ẹ, Ekwensụ e d'a tụ ụfọdụ imẹ ụnụ ngan kẹni wẹ gi ẹ lele ụnụ. Ụnụ k'a ta afụnfụn akpọhịn iri. Kwọnkẹnmẹ ni okukwe ụnụ d'e ru ọnwụn, e gi m ndụn wụ ndụn tu ụnụ ugọn.

11Onyẹ nwọn ntịn ya nụ ihiẹn Mmọn-nsọ rị a gwa ụka rị ichẹn-ichẹn! Onyẹ mẹri, ọnwụn nke ẹbụọ erukọ a ẹhụ.’

12“Dejẹnni onyẹ-isi ụka Pẹgamọm, sị a: “Lee ihiẹn onyẹ hụ ọpịa-agha ọnụnaị tụ nkọ rị ọnụ a ku:

13A marịnghọ m ebe i bi, ebẹhụ ukpo Ekwensụ lẹ enwẹn ẹ rị, kanị i kwọndọnhụkwọ ẹfan m; y'a jụnị ihiẹn m sị ụnụ kweri, kẹ hụn ahụn wẹ gbudẹ ezigbo ọshẹri m wụ Antipasị, hụn wẹ gbu imẹ igunrun ụnụ imẹ obodo hụ Ekwensụ bi.

14“Kanị, o nwọnghọ ihiẹn ndị ị rị e mẹ rị e ze m ize: o nwọnghọ ndị rị imẹ ụnụ ebẹhụ rị e sọn nkuzi Balaam hụn kuzi Balakị ihiẹn Balakị gi bu uke cheni ụmụ Izrẹlụ, mẹ wẹ ri ihiẹn-oriri wẹ gi rụa mmọn, mẹzikwọ wẹ ghẹrẹ.

15O nwọnzighọ ndị rị imẹ ụnụ e sọn nkuzi ndị itu Nịkọlaịtịa.

16“Bihutọ nị nwan ẹka. Ụnụ jụ, m k'a bịa ozigbo, gi ọpịa-agha rị m ọnụ lụsọn ndị ahụn agha.

17Onyẹ nwọn ntịn ya nụ ihiẹn Mmọn-nsọ rị a gwa ụka rị ichẹn-ichẹn! Onyẹ hụ mẹrini kẹ m jẹnkọ d'e ye mana hụ zuerini. M k'e yezikwọ a ọmụma ọchan hụ wẹ deye ẹfan ọhụn hụn o mẹ ni onyẹ wẹ ye ẹ sụọ k'a saẹka marịn a.

18“Dejẹnni onyẹ-isi ụka Tịatira, sị a: “Lee ihiẹn Nwa Osolobuẹ ku, onyẹ ahụn ẹnya a e nwun kẹ ọkụn; onyẹ ahụn ụkụ-alị a nọ kẹ igwe bronzu wẹ finchan ọhụnma-ọhụnma rị e gbukeni: ọ sị,

19a marịnghọ m ihiẹn ị rị e mẹ: kẹ ihiẹn-ọsụsụọ ị kẹ okukwe i kẹ ozi ụnụ rị e jẹn kẹ ihiẹn ile ụnụ rị e dingbu; a marịnghọ m nị hụn ị rị a rụn kikẹnni ka hụn ị rụn mbụ.

20Kanị, ọnwan wụ ihiẹn ị rị e mẹ rị e ze m ize: y'e ye okpoho hụ wụ Jezibẹlụ efe, Jezibẹlụ ahụn kpọ enwẹn ẹ onyẹ-amụma, hụn gi ihiẹn ọ rị a kuzi e dufie idibo m, e mẹ wẹ a ghẹrẹ, e ri ihiẹn-oriri wẹ gi rụa mmọn.

21“E yeọlẹ m'a oghere bihutọ ẹka, kanị o kweni ghẹrẹbehi.

22Lee ẹ, m k'a tụ a emu k'e bu ẹ tọ elu-ukpo; m k'e ye ndị ya lẹ wẹ gba a ghẹrẹ eje-afụnfụn, mmanị wẹ bihutọ ẹka latọ ihiẹn ahụn ọ rị e mẹ.

23M k'e gbu ụmụ a. Ụka ile k'e gi ẹ marịn nị mmẹ wụ onyẹ hụ e nyọnchan uche lẹ obi lẹ ni m k'a kụ onyẹ-onyẹ imẹ ụnụ ụgwọ ihiẹn o mẹ.

24“Nke ụnụ ndị họdụnị, ndị rị ụka Tịatira ghalẹni e sọn nkuzini, ndị kelẹni mụnrụn ihiẹn ahụn wẹ rị a kpọ ‘Okẹn ihiẹn-nzuzue Ekwensụ,’ ebuyekọ m ụnụ ibu ọzọ;

25ka kwọnkẹnmẹ ni hụn ụnụ gi d'e ru nị a bịa m.

26Onyẹ hụn k'e mẹrini, onyẹ hụn mẹsọnmẹ ihiẹn m ku d'e ru isi-njẹndemẹ, kẹ m k'e bu ndị alị ichẹn-ichẹn che okpuru ẹ kịma;

27o k'e gi ọkpọ-igwe kị wẹ; o k'e tikpọchanrịn wẹ lekẹ ite ụrụa,

28nọkẹ kẹ Nẹdi m dọn ye m ikẹn m gi a kị. M k'e yezikwọ hụnyẹ kokisẹ ụtụntụn hụ.

29Onyẹ nwọn ntịn ya nụ ihiẹn Mmọn-nsọ rị a gwa ụka rị ichẹn-ichẹn!

← Chapter 1 Jump to: Chapter 3 →