1 Kings 15

Mien Bible (Thai Script) © Thailand Bible Society, 2007

← Chapter 14 Jump to: Chapter 16 →

1เนบัด เญย ตอน, เยโลโบอัม โหฒว ฮู่ง เหฒียบ เป๊ด หฮญัง วั้ว หฮญัง, อาบียัม ฝาว เหว่ย โหฒว ฮู่ง กุ๊น ยูดา.

2นิ่น เยียม เยลูซาเลม กุ๊น ปัว หฮญัง. นิ่น เญย มา เญย บั๋ว เห่ว มาอาคา, เซ อาบีชาโลม เญย เซียะ.

3อาบียัม ป์าม ฒุ์ย ฮนั้ง นิ่น เญย เตีย ป์าม เญย เหยียด ฒู้ง ฒุ์ย. นิ่น ไม้ เหฒียบ ฒัวะ เญย โหฒว ปุน เฒี้ยว, นิ่น เญย ทิน-ฮู่ง, ฮนั้ง นิ่น เญย อง-ถาย, ดาวิด, นอ.

4มป่า เหว่ย ดาวิด, เฒี้ยว, นิ่น เญย ทิน-ฮู่ง, ปุน นิ่น ม่าย เฒ้ย-ฟุน เยียม เยลูซาเลม ฒี่ง. เฒี้ยว อ๋อย ปุน นิ่น ม่าย เต้า ตอน หฑิบ เจี๊ยน นิ่น โหฒว ฮู่ง หย่า เหลียบ ว้วน เยลูซาเลม,

5เหว่ย หฒุ หฒิว เฒี้ยว หมั่ง, ดาวิด โหฒว ตุ๊ หอบ. เฒี่ยง เสย นิ่น หย่า ไม้ ปู๋ง ด๊อด เฒี้ยว เญย เหยียด ติ้ว เล์ย-หลัด, ธ้วด ลิ์ว ฮิดไท เมี่ยน, อุลียา, วั้ว เต๋ย สี่.

6เยโลโบอัม เหธา เลโหโบอัม เบ๊าะ จ๋า เญย สี่, เยียม อาบียัม เญย เสย เฒ้ย หย่า หฑิบ เจี๊ยน เบ๊าะ.

7อาบียัม โหฒว ลิ์ว เหฒ่ง เหฌี่ย เญย เหยียด ฒู้ง สี่ เหธา นิ่น โหฒว เญย เหยียด ฒู้ง, เฟี้ย เจี๊ยน ยูดา ฮู่ง เญย ฮู่ง โต้ว ตาน. อาบียัม เหธา เยโลโบอัม หฒั่นๆ เบ๊าะ จ๋า.

8อาบียัม เกวย เสย หมี่ อ๊ะ, หย่า หฒัง เจี๊ยน ดาวิด เญย ฒี่ง. นิ่น เญย ตอน, อาสา, หฑิบ เจี๊ยน นิ่น โหฒว ฮู่ง.

9เยโลโบอัม โหฒว อิสะลาเอน เญย ฮู่ง หญี่ เหฒียบ หฮญัง วั้ว หฮญัง, อาสา ฝาว เหว่ย โหฒว ยูดา เญย ฮู่ง.

10นิ่น เยียม เยลูซาเลม กุ๊น เฝย เหฒียบ เยี้ยด หฮญัง. นิ่น เญย กู๋ เญย บั๋ว เห่ว มาอาคา, เซ อาบีชาโลม เญย เซียะ.

11หฒิว เฒี้ยว ปวัด, อาสา โหฒว ตุ๊ หอบ ฮนั้ง นิ่น เญย อง-ถาย, ดาวิด, โหฒว นอ.

12เยียม เต่ย-ปูง หฒั่ง เฒี่ยน เญย ต๋อง หม่าย ป๊วน-ซิน เญย มจั่ง ตอน นิ่น หฒุ่น ธ้วด หมี่ อ๊ะ. นิ่น หย่า เฒาะ นิ่น เญย เตีย โหฒว ต้าย เญย หมิ่ว-ฝัง กวั่ง เหฑ่ง.

13นิ่น หย่า ถุย นิ่น เญย กู๋ เญย เม่ง โห่, ไม้ ตุ๊ โหฒว ฮู่ง กู๋, เหว่ย หฒุ นิ่น โหฒว นอม อะหมั่ง, กั้ม เฑี้ย ไห่ เญย อาเซลา เฒี่ยน เญ์ย เญย ฝัง. อาสา หย่า ก๋อย วั้ว เต้า หมิ่ว-ฝัง ต้อ มี่ง เถา ขิดโลน โด๊ะ ปั๊ว.

14มป่า เยียม ฮลัง หฒั่ง เฒี่ยน เญย ต๋อง นิ่น ไม้ เฒาะ ฆอย. ไม้ กุ๊น ฮนั้ง น้าย, อาสา เหยียด เสย หล่ง เหฑ่ง เฮญี้ยว เหฒียบ ฒัวะ เญย กัน เฒี้ยว.

15นิ่น เฒาะ นิ่น เญย เตีย เหว่ย จ๊าว ซูง แล์ง แหง่ง หว่า เญย กะน้าย เหธา นิ่น กั้น จ๊าว ซูง แล์ง แหง่ง หว่า เญย กะน้าย เหธา เจียม ญ่าน เหธา จา-ต๋อง, ต้อ มี่ง เฒี้ยว เญย เปย๊า.

16เยียม อาสา เหธา อิสะลาเอน เญย ฮู่ง, บาอาชา โหฒว ฮู่ง เญย เฒี่ยง โห่ นิ่น บัว หฒั่นๆ เบ๊าะ จ๋า.

17อิสะลาเอน เญย ฮู่ง, บาอาชา, ธ้วด มี่ง เหธา ยูดา เบ๊าะ จ๋า. นิ่น เหธย ลามา ฒี่ง ต้าย ว้วน เญย เหว่ย ตั๊ง เจี๊ยน ไม้ ปุน หาย เต้า เปียะ ธ้วด ยูดา เญย ฮู่ง, อาสา, เญย เต่ย.

18อาสา ฯฒฯ เฒาะ เยียม หฒั่ง เฒี้ยว เญย เปย๊า เหธา ฮู่ง ติ่น เหฒ่ง เหฌี่ย เญย เจียม ญ่าน หย่า พ้าย นิ่น เญย เจียน มี่ง เถา ดามัดกัด ฒี่ง, ทับลิมโมน เญย ตอน, เฮซีโอน เญย ฟุน, ซีเลีย เต่ย-ปูง เญย ฮู่ง, เบนฮาดัด.

19นิ่น ก๊อง, “โท้ เม่ย เหธา เยีย เหลียบ แหง่ง หว่า ฮนั้ง เม่ย เญย เตีย เหธา เยีย เญย เตีย เหลียบ แหง่ง หว่า นอ. เยีย ฝูง น้าย เต๋ย เจียม ญ่าน มี่ง ปุน เม่ย. โท้ มี่ง ถุย เม่ย เหธา อิสะลาเอน เญย ฮู่ง, บาอาชา เหลียบ เญย แหง่ง หว่า เหว่ย ปุน นิ่น เล่ย ฆอย เยีย.”

20เบนฮาดัด หมวัง อาสา ฮู่ง เญย หว่า, ฯฒฯ พ้าย นิ่น เญย แปง-เปย๊ย มี่ง เบ๊าะ อิสะลาเอน เญย ฒี่ง. นิ่น เบ๊าะ ฮี่ง อิโยน, ดาน, อาเบนเบดมาอะคา เหธา คินเนเล้ด เต่ย เหยียด ฒู้ง เหธา นับทาลี เต่ย เหยียด ฒู้ง.

21บาอาชา ไฮ์ น้าย เต๋ย สี่ ธ้วด, นิ่น ตี้ง, ไม้ เหธย ลามา, แอ๋ง ถุย มี่ง เยียม ทีละซา ฒี่ง.

22อาสา ฯฒฯ เหฌี่ย หลี่ง หัด ยูดา เต่ย-ปูง เญย หฒวัง เมี่ยน มี่ง เปี้ยน บาอาชา หล่ง เหธย ลามา วั้ว เต๋ย หละเปย๊ย เหธา เดี๋ยง มี่ง. ไม้ ม่าย หาย เต้า ไม้ หฒุ เถง โหฒว. อาสา ฮู่ง หล่ง น้าย เต๋ย หละเปย๊ย เหธา เดี๋ยง เหธย เยียม เบนยามิน เญย เกบา เหธา มิดปา ฒี่ง.

23อาสา กุ๊น เญย เฒี่ยง โห่ โหฒว ลิ์ว เหฒ่ง เหฌี่ย เญย สี่, นิ่น เญย ชะ โหฒว ธ้วด เญย เหยียด ฒู้ง สี่ เหธา นิ่น เหธย เญย ฒี่ง, เฟี้ย เจี๊ยน ยูดา ฮู่ง เญย ฮู่ง โต้ว ตาน. มป่า โก๋ ต้าย เญย เฒี่ยง โห่ อาสา เญย เหฒา ม่าย แป่ง.

24อาสา ฯฒฯ เกวย เสย หมี่ อ๊ะ, หย่า เหธา นิ่น เญย อง-ถาย บัว หฒัง เจี๊ยน เยียม นิ่น เญย อง-ถาย, ดาวิด, เญย ฒี่ง. นิ่น เญย ตอน, เยโฮซาฟัด, หฑิบ เจี๊ยน นิ่น โหฒว ฮู่ง.

25อาสา โหฒว ยูดา เญย ฮู่ง ตะเหญ่ย หฮญัง วั้ว หฮญัง, เยโลโบอัม เญย ตอน, นาดับ, ฝาว เหว่ย โหฒว อิสะลาเอน เญย ฮู่ง. นิ่น โหฒว ฮู่ง กุ๊น อิสะลาเอน อี หฮญัง.

26หฒิว เฒี้ยว หมั่ง, นิ่น โหฒว หว่าย สี่. นิ่น เอย เจี๊ยน นิ่น เญย เตีย เญย หฒะเอ๋ย หย่า ป์าม ฒุ์ย ฮนั้ง นิ่น เญย เตีย นอ, ฯฒฯ ปุน อิสะลาเอน เมี่ยน เหธา เจี๊ยน ป์าม ฒุ์ย.

27อิดสาคา เมี่ยน, อาหิยา เญย ตอน, บาอาชา, ต๊า หฒะเอ๋ย ห่อย นาดับ ฯฒฯ เยียม นอม ฟีลิสะเตีย เมี่ยน เญย ฒี่ง, กิบเบโทน, ไต๋ นิ่น. วั้ว หฒั่น นาดับ เหธา อิสะลาเอน เญย หฒวัง เมี่ยน เว่ย เจี๊ยน กิบเบโทน, อ๋อย เบ๊าะ วั้ว นอม ฒี่ง.

28อาสา โหฒว ยูดา เญย ฮู่ง ตะฟาม หฮญัง วั้ว หฮญัง, บาอาชา ไต๋ นาดับ หย่า ตี๊ นิ่น โหฒว ฮู่ง.

29บาอาชา เยี้ยด ฝาว เหว่ย โหฒว ฮู่ง, นิ่น ไต๋ เหฑ่ง เยโลโบอัม เญย โต้ว ฒง เญย เหยียด ฒู้ง เมี่ยน. ตะฟ่าน ไฮ่ เท้า เฉีย เญย, ไม้ เลี่ยว เหยียด เต้า ธ้วด สีง แหม่ง, หฒิว เฒี้ยว หล่ง นิ่น เญย โปว, ซีโล เมี่ยน, อาหิยา, ก๊อง เญย หว่า,

30เหว่ย หฒุ เยโลโบอัม ป์าม ฒุ์ย แอ๋ง ปุน อิสะลาเอน เมี่ยน เหธา เจี๊ยน ป์าม ฒุ์ย ฯฒฯ ธัวะ เฒี้ยว, อิสะลาเอน เมี่ยน เญย ทิน-ฮู่ง, เฉีย เจี์ย.

31นาดับ กุ๊น เญย เฒี่ยง โห่ โหฒว ลิ์ว เหฒ่ง เหฌี่ย เญย สี่, เหธา นิ่น โหฒว เญย เหยียด ฒู้ง, เฟี้ย เจี๊ยน อิสะลาเอน ฮู่ง เญย ฮู่ง โต้ว ตาน.

32เยียม อาสา เหธา อิสะลาเอน เญย ฮู่ง, บาอาชา, โหฒว ฮู่ง เญย เฒี่ยง โห่ นิ่น บัว หฒั่นๆ เบ๊าะ จ๋า.

33เยียม อาสา โหฒว ยูดา เญย ฮู่ง ตะฟาม หฮญัง วั้ว หฮญัง, อาหิยา เญย ตอน, บาอาชา, เยียม ทีละซา ฒี่ง ฝาว เหว่ย โหฒว อิสะลาเอน เมี่ยน เญย ฮู่ง, หย่า กุ๊น หญี่ เหฒียบ เฝย หฮญัง.

34หฒิว เฒี้ยว หมั่ง, นิ่น โหฒว หว่าย สี่. นิ่น เอย เจี๊ยน เยโลโบอัม เญย หฒะเอ๋ย โหฒว หย่า ป์าม ฒุ์ย ฮนั้ง นิ่น นอ, ปุน อิสะลาเอน เมี่ยน เหธา เจี๊ยน ป์าม ฒุ์ย.

← Chapter 14 Jump to: Chapter 16 →