1 Kings 19

Mien Bible (Thai Script) © Thailand Bible Society, 2007

← Chapter 18 Jump to: Chapter 20 →

1อาหับ เฒาะ เอลียา โหฒว เญย เหยียด ฒู้ง สี่, เหธา นิ่น ฮนั้ง หาย นอ หล่ง หฑุ ด๊าว ไต๋ บาอัน เฒี่ยน เญย หฒวัง ไซ เมี่ยน, ก๊อง บั๋ว เยเซเบน.

2เยเซเบน ฯฒฯ พ้าย โต่ว เฝียน เมี่ยน มี่ง บั๋ว เอลียา, “สี ก๊อง ฌัง ฮนอย เถา น้าย นอม เฒี่ยง โห่ เยีย ไม้ ตุ๊ โหฒว ปุน เม่ย เญย แหม่ง ฮนั้ง เม่ย โหฒว ปุน วั้ว เต๋ย เมี่ยน เญย แหม่ง, โท้ ปุน หฒวัง เฒี่ยน โหฒว ปุน เยีย ฒู้ง เก้า เฮนี้ย.”

3เอลียา กั้ม เหฑีย ไห่ ฯฒฯ ธ้วด เจ๊า เปย๋า แหม่ง. นิ่น มี่ง เถา ยูดา เต่ย-ปูง เญย เบเอเชบา, หย่า กวั่ง เจี๊ยน นิ่น เญย โปว เยียม หน่าย.

4มป่า นิ่น กั้น เปียะ เต่ย-ปูง-ฮวาง ยั่ง เหยียด ฮนอย เญย เจ๊า ฯฒฯ เฒว์ย เหฌี่ย เหยียด ติ้ว เดี๋ยง-กอน โท้ ทิน-ฮู่ง ปุน นิ่น ไต่. นิ่น เต๋า เก๋า ก๊อง, “โอ เฒี้ยว อ้า! บัวะ น้าย เก๋า อ๊ะ. โท้ เฒาะ เยีย เญย แหม่ง, เหว่ย หฒุ เยีย ไม้ เก้า หลง เยีย เญย อง-ถาย.”

5นิ่น ฯฒฯ เปว๋ย เหฌี่ย เดี๋ยง กะเดี๊ย มฌ่อม อ๊ะ. เลี่ยม เฒ่ย ม่าย เต้า ฟิน-เมี่ยน ต้าย มาน เจี๊ยน นิ่น ก๊อง, “เจี์ย ซิน ต้าย หญั่น ม่าะ!”

6นิ่น หมั่ง ฯฒฯ ปวัด เยียม นิ่น เญย มฆ้อง กะเฮลน ม่าย นอม ฌั้ว ฒิ เจี๊ยน หละเปย๊ย-จอม กู้ หงว่าย, หย่า ม่าย แป้ง ววม. นิ่น หญั่น ลิ์ว ฮบ ลิ์ว แอ๋ง เปว๋ย เหฌี่ย หมี่ อ๊ะ.

7เฒี้ยว เญย ฟิน-เมี่ยน แอ๋ง ต้าย ตะเหญ่ย หฑุ่น ฯฒฯ มาน เจี๊ยน นิ่น หย่า ก๊อง, “เจี์ย ซิน ต้าย หญั่น ม่าะ! เหว่ย หฒุ เม่ย อ๋อย หฒุ ยั่ง เญย เจ๊า เจี๋ย ด่าง เม่ย เญย ชะ.”

8เอลียา ฯฒฯ เจี์ย ซิน หญั่น หย่า ฮบ. น้าย เต๋ย หญั่น ฮบ ปุน นิ่น ม่าย ชะ ยั่ง เฝย เหฒียบ ฮนอย เฝย เหฒียบ ม์วน เถา โฮเล้บ, ทิน-ฮู่ง เญย บง วั้ว.

9เยียม โฮเล้บ นิ่น เปียะ นอม แบ๋ง-ค้วด เจี๋ย ม์วน. เฒี้ยว ก๊อง บั๋ว นิ่น, “เอลียา อ่า, เม่ย โหฒว หาย หญู่ง เยียม น้าย?”

10เอลียา เตา, “เยีย เหว่ย เฒี้ยว, เน่น เจี๋ย เญย ทิน-ฮู่ง, จอม เฮญี้ยว เญย โหฒว เหว่ย หฒุ อิสะลาเอน เมี่ยน กวั่ง เม่ย เญย แหง่ง หว่า, แธะ หว่าย เม่ย เญย เหฒี่ย-ต้อง, หล่ง หฑุ ด๊าว ไต๋ เม่ย เญย โต่ว หว่า เมี่ยน. อี้ หฒั่น ขูง เหฒ่ง เยีย ดุ เต้า เมี่ยน ฮนั้ง, นิ่น บัว หย่า อ๋อย เฒาะ เยีย เญย แหม่ง.”

11เฒี้ยว ก๊อง, “ธ้วด มี่ง เยียม บง กู้ หงว่าย โซ้ว เจี๊ยน เยีย เญย หฑะเฮมียน.” เฒี้ยว ฯฒฯ เจี๋ย นิ่น เญย หฑะเฮมียน. ม่าย เฮ้น ไห่ เญย ต้ม หฑยาว ป่วน ต้าย ปุน บง เยียม เฒี้ยว เญย หฑะเฮมียน บาง, หละเปย๊ย หย่า บ๋าย. มป่า เฒี้ยว ไม้ เยียม หฑยาว. หฑยาว ป่า, เดา ฯฒฯ ต์ง, มป่า เฒี้ยว ไม้ เยียม เดา-ต์ง กะญั์ว.

12เดา ต์ง ป่า, แอ๋ง ม่าย โต์ว, มป่า เฒี้ยว ไม้ เยียม โต์ว. โต์ว เจี๋ย ลิ์ว, ม่าย เฉีย ไฝ เญย, ส่วน เญย.

13เอลียา หมวัง ไฮ์ น้าย เต๋ย เฉีย ฯฒฯ เฒาะ นิ่น เญย ลุย-ด๊าว ปวัง เจี๊ยน เฮมียน, ธ้วด ต้าย โซ้ว เจี๊ยน ค้วด-ด่าง. ม่าย เฉีย เหธา นิ่น ก๊อง, “เอลียา อ่า, เม่ย โหฒว หาย หญู่ง เยียม น้าย?”

14นิ่น ก๊อง, “เยีย เหว่ย เฒี้ยว, เน่น เจี๋ย เญย ทิน-ฮู่ง, จอม เฮญี้ยว เญย โหฒว, เหว่ย หฒุ อิสะลาเอน เมี่ยน กวั่ง เม่ย เญย แหง่ง หว่า, แธะ หว่าย เม่ย เญย เหฒี่ย-ต้อง, หล่ง หฑุ ด๊าว ไต๋ เม่ย เญย โต่ว หว่า เมี่ยน. อี้ หฒั่น ขูง เหฒ่ง เยีย ดุ เต้า เมี่ยน ฮนั้ง. นิ่น บัว หย่า อ๋อย เฒาะ เยีย เญย แหม่ง.”

15เฒี้ยว ก๊อง บั๋ว นิ่น, “เม่ย มี่ง อ๊ะ. กัน เม่ย เญย เจ๊า หฑวน เถา ดามัดกัด เญย เต่ย-ปูง-ฮวาง. เถา วั้ว เม่ย อ๋อย หฒุ หล่ง โย่ว ออน ฮาซาเอน โหฒว ซีเลีย เญย ฮู่ง.

16หย่า อ๋อย หฒุ หล่ง โย่ว ออน นิมซี เญย ตอน, เยฮู, โหฒว อิสะลาเอน เมี่ยน เญย ฮู่ง. หย่า ออน เยียม อาเบนเมโฮลา วั้ว เต้า ซาฟัด เญย ตอน, เอลีซา, โหฒว โต่ว หว่า เมี่ยน ตี๊ เม่ย.

17หาย เต้า เปย๋า ดุ๊ด ฮาซาเอน เญย หฑุ ด๊าว, เยฮู ฯฒฯ ไต๋. หาย เต้า เปย๋า ดุ๊ด เยฮู เญย หฑุ ด๊าว, เอลีซา ฯฒฯ ไต๋.

18มป่า เยียม อิสะลาเอน เต่ย-ปูง เยีย อ๋อย เลี่ยว เหฌี่ย เสี่ย ธิน เต้า เมี่ยน, เซ นิ่น บัว เญย ธี่ง เบาะ ไม้ เกว่ย เหฌี่ย ป๋าย ไฟ ฑุ่ย หย่า ไม้ ฒม เจี๋ย บาอัน เฒี่ยน เญย หมิ่ว-ฝัง.”

19เอลียา ฯฒฯ ธ้วด วั้ว นอม ต๋อง, ล์อ ปวัด ซาฟัด เญย ตอน, เอลีซา. วั้ว หฒั่น เอลีซา หล่ง เหฒียบ เหญ่ย ต๋อย ง่ง ไล่ เดา. นิ่น หล่ง เหฒียบ เหญ่ย วั้ว ต๋อย. เอลียา เจี๋ย เถา วั้ว ฯฒฯ เฒาะ นิ่น กั้น เญย ต้ม ลุย, กว๋า เจี๊ยน เอลีซา.

20เอลีซา ฯฒฯ กวั่ง เจี๊ยน ง่ง ถิว หฒุ่น เจี๊ยน เอลียา มี่ง. นิ่น ก๊อง, “โท้ ปุน เยีย ฒม เยีย เญย เตี๋ย หม่า ด่าง, ฆะฮ้า เยีย ฯฒฯ กัน เม่ย มี่ง.” เอลียา ก๊อง บั๋ว นิ่น, “กุ๊น หฑวน มี่ง ม่าะ! เยีย ไม้ โหฒว หาย หญู่ง ล่าน เม่ย.”

21เอลีซา ฯฒฯ เล่ย เอลียา หฑวน มี่ง เฒาะ นิ่น วั้ว ต๋อย ง่ง ไต๋ ต้าย, หล่ง ไล่ เปย๊ย โหฒว ฒ่าง โฒ้ว อ๊อ ปุน หฒวัง เมี่ยน. นิ่น บัว ฯฒฯ หญั่น อ๊ะ. ฆะฮ้า นิ่น กัน เจี๊ยน เอลียา มี่ง ฟู-สู นิ่น.

← Chapter 18 Jump to: Chapter 20 →