1 Kings 8

Mien Bible (Thai Script) © Thailand Bible Society, 2007

1ซาโลมอน ฮู่ง เห่ว อิสะลาเอน เมี่ยน เญย เมี่ยน โก๋ เหธา ฝีงๆ เญย เปย๊ย เฒ้ย เหธา อิสะลาเอน เมี่ยน เญย ปู้ง ป่วน เปย๊ย เฒ้ย ต้าย เถา เยลูซาเลม ฒี่ง, กั๊บ ฒุ้น เยียม นิ่น เญย หฑะเฮมียน, เหว่ย ต้อ เฒี้ยว เญย แล์ง แหง่ง หว่า ฟาง เยียม ดาวิด เญย ฒี่ง, สิโอน, ฝาว ต้าย.

2เธี้ยด หฮลา, เซ เอทานิม หฮลา, ต๋อย บย๊อ ลิ่ว ฒิบ เญย เฒี่ยง โห่, อิสะลาเอน เญย หฒวัง เมี่ยน กั๊บ ฒุ้น เยียม ซาโลมอน ฮู่ง เญย หฑะเฮมียน.

3อิสะลาเอน เมี่ยน เญย หฒวัง เมี่ยน โก๋ ต้าย เถา, ไซ เมี่ยน ฯฒฯ โป้ว แล์ง แหง่ง หว่า ฟาง.

4นิ่น บัว ต้อ เฒี้ยว เญย แล์ง แหง่ง หว่า ฟาง เหธา หวุ่ย ปวั้ง เญย ด๊บ-ลิ่ว เหธา เหยียด ฒู้ง จา-ต๋อง. ไซ เมี่ยน เหธา เลวี เมี่ยน แกง ฝาว.

5ซาโลมอน ฮู่ง เหธา เยียม นิ่น เญย หฑะเฮมียน กั๊บ ฒุ้น เญย อิสะลาเอน เมี่ยน เหยียด ฒู้ง เยียม แล์ง แหง่ง หว่า ฟาง หฑะเฮมียน ฝ่ง ห่อ ปะกี ยู่ง เหธา ง่ง เหว่ย โหฒว เหฒี่ย เญย กะน้าย ธั้ม! ไห่, ฒู้ง ฝุน ไม้ ธีง, ซ้าว ไม้ ฮี่ง.

6ไซ เมี่ยน ฯฒฯ ต้อ เฒี้ยว เญย แล์ง แหง่ง หว่า ฟาง เปียะ หฒั่ง ทิน-ฮู่ง เญย เปย๊า อัน ฟาง เญย ต๋อง, สีง ติ่น กะญั์ว เจี๋ย วั้ว ฉง, เซ เก้า ธีง-เหฑ่ง เจี๋ย วั้ว ฉง, หย่า อัน เจี๊ยน เคลูบิม เญย ด๊าด กะเดี๊ย แหมง.

7เคลูบิม ยัง ด๊าด แล์ง แหง่ง หว่า ฟาง เญย ต๋อง กู้ หงว่าย หย่า เฑีย เจี๊ยน แล์ง แหง่ง หว่า ฟาง เหธา แกง ฟาง เญย เดี๋ยง.

8แกง ฟาง เญย เดี๋ยง ด๊าว เญย. เยียม สีง ติ่น กะญั์ว เจี๋ย วั้ว ฉง เญย หฑะเฮมียน แหมง, เซ เยียม ธีง-เหฑ่ง ต๋อง วั้ว ฉง, ฒู้ง หมั่ง ตุ๊ ปวัด น้าย เต๋ย เดี๋ยง. มป่า เยียม ธีง-เหฑ่ง ต๋อง กะเหญี่ย แหมง หมั่ง ไม้ ปวัด อ๊ะ. น้าย เต๋ย เดี๋ยง หธ่อ เยียม หน่าย เถา อี้ จ๋า ฮนอย.

9แล์ง แหง่ง หว่า ฟาง ขูง ม่าย ต้ง โมเซ เยียม โฮเล้บ บง อัน วั้ว เต๋ย อี คว้าย หละเปย๊ย-เป๊น. ธ้วด ลิ์ว หน่าย ไม้ ม่าย หาย หญู่ง. น้าย เต๋ย อี คว้าย หละเปย๊ย-เป๊น เซ อิสะลาเอน เมี่ยน ธ้วด อียิบ เต่ย-ปูง, ฆะฮ้า เฒี้ยว เหธา นิ่น บัว เหลียบ เญย แหง่ง หว่า

10ไซ เมี่ยน เยียม ธีง-เหฑ่ง เญย ต๋อง ธ้วด ต้าย ฯฒฯ ม่าย บ๋วน เยียม ปวั๊ง หฒั่ง เฒี้ยว เญย เปย๊า.

11หลาย บ๋วน, ไซ เมี่ยน ไม้ ไฮ่ โหฒว กง ฟู-สู, เหว่ย หฒุ เฒี้ยว เญย ฌัง-หล่าง เยียม ปวั๊ง เฒี้ยว เญย เปย๊า.

12วั้ว หฒั่น ซาโลมอน เต๋า เก๋า ก๊อง, “โอ เฒี้ยว อ่า, เม่ย ปุน บะฮนอย เยียม วั้ว ลู่ง, มป่า เฒี้ยว ก๊อง เฒี้ยว อ๋อย เยียม หฮมวัง ไห่ เญย บ๋วน กะญั์ว.

13เยีย เหว่ย เม่ย เหธย เหฒียง เหยียด นอม เหฑว่ย ไห่ เญย เปย๊า, เซ โหฒว นอม ต๋อง เหว่ย ปุน เม่ย เหยียด ลิ์ว เยียม.”

14อิสะลาเอน เญย หฒวัง เมี่ยน หธ่อ กั๊บ ฒุ้น โซ้ว เจี๊ยน วั้ว, ซาโลมอน ฮู่ง ฮวิน หฑวน ต้าย ปวัง หว่า ปุน นิ่น บัว.

15นิ่น ก๊อง, “เธง เฒี้ยว, อิสะลาเอน เมี่ยน เญย ทิน-ฮู่ง. นิ่น หฒิว นิ่น กั้น เญย ฑุ่ย เหธา เยีย เญย เตีย, ดาวิด, แล์ง เญย หว่า หล่ง นิ่น กั้น เญย ปั์ว โหฒว เหฒียง. เหว่ย หฒุ นิ่น ก๊อง,

16‘เยียม เยีย ต้อ เยีย เญย แปะ ฝีง, อิสะลาเอน เมี่ยน, ธ้วด อียิบ ต้าย, เยีย ไม้ กิ๊น หาย ฝีง อิสะลาเอน เมี่ยน เญย หาย นอม ฒี่ง เหว่ย เยีย เญย เม่ง เหลียบ นอม เปย๊า. มป่า เยีย กิ๊น ดาวิด ต้าย กุ๊น เยีย เญย แปะ ฝีง, อิสะลาเอน เมี่ยน.’

17“เยีย เญย เตีย, ดาวิด, เจี์ย เฮญี้ยว อ๋อย เหว่ย เฒี้ยว, อิสะลาเอน เมี่ยน เญย ทิน-ฮู่ง เญย เม่ง, เหลียบ นอม เปย๊า.

18มป่า เฒี้ยว ก๊อง บั๋ว เยีย เญย เตีย, ดาวิด, ‘เม่ย เจี์ย เฮญี้ยว เหว่ย เยีย เญย เม่ง เหลียบ นอม เปย๊า เซ หลง ไห่ อ๊ะ, เหว่ย หฒุ เม่ย ม่าย น้าย หญู่ง หฒะเอ๋ย เยียม เม่ย เญย เฮญี้ยว.

19มป่า เม่ย กั้น ไม้ ตุ๊ เหธย. เซ เม่ย เญย เธียน ตอน อ๋อย เหว่ย เยีย เญย เม่ง เหธย นอม เปย๊า.’

20“อี้ หฒั่น เฒี้ยว เอย นิ่น แล์ง เญย หว่า โหฒว. เยีย หฑิบ เจี๊ยน เยีย เญย เตีย, ดาวิด, เฒว์ย เจี๊ยน อิสะลาเอน เมี่ยน เญย ฮู่ง เหว่ย, ฮนั้ง เฒี้ยว แล์ง นอ. เยีย หย่า ตุ๊ เหว่ย เฒี้ยว, อิสะลาเอน เมี่ยน เญย เม่ง, เหธย เหฒียง เปย๊า.

21เยีย หลิ่ว เล์ย เหฒียง ต๋อง อัน แล์ง แหง่ง หว่า ฟาง. ฟาง กะญั์ว ม่าย ต้ง เฒี้ยว ต้อ บัว เญย อง-ถาย ธ้วด อียิบ เต่ย-ปูง วั้ว หฒั่น นิ่น เหธา นิ่น บัว แล์ง เจี์ย เญย แหง่ง หว่า.”

22ซาโลมอน ฯฒฯ โซ้ว เจี๊ยน เฒี้ยว เญย เหฒี่ย-ต้อง หฑะเฮมียน แหมง, ตอง เจี๊ยน เหยียด หฒวัง กั๊บ ฒุ้น เญย อิสะลาเอน เมี่ยน ซูง ปั์ว หูง เจี๊ยน ลู่ง.

23นิ่น ก๊อง, “โอ เฒี้ยว, อิสะลาเอน เมี่ยน เญย ทิน-ฮู่ง อ่า, เยียม กู้ หงว่าย ลู่ง ไฟ กะเดี๊ย เดา ไม้ ม่าย ทิน-ฮู่ง ฮนั้ง เม่ย นอ. เม่ย เอย เจี๊ยน เม่ย แล์ง เญย แหง่ง หว่า หย่า ปุน ธีง เม่ย เหฒียบ ฒัวะ เญย ฮนั้ม เม่ย เญย โปว, ต้ง หล่ง เหฑ่ง เฮญี้ยว กัน หลง เม่ย วั้ว เต๋ย.

24เม่ย เอย เจี๊ยน เม่ย เหธา เม่ย เญย โปว, เยีย เญย เตีย, ดาวิด, แล์ง เญย หว่า โหฒว. เม่ย กั้น เญย ฑุ่ย แล์ง, เม่ย กั้น เญย ปั์ว อี้ ฮนอย หย่า โหฒว เหฒียง อ๊ะ.

25“ เฒี้ยว, อิสะลาเอน เมี่ยน เญย ทิน-ฮู่ง อ่า, โท้ อี้ หฒั่น เอย เจี๊ยน เม่ย เหธา เม่ย เญย โปว, เยีย เญย เตีย, ดาวิด, แล์ง เญย หว่า โหฒว. วั้ว หฒั่น เม่ย ก๊อง, ‘สี ก๊อง เม่ย เญย เฒ้ย-ฟุน ไฝ ฟิม, กัน หลง เยีย ฮนั้ง เม่ย กัน นอ, เม่ย ฯฒฯ เหยียด ลิ์ว ม่าย เฒ้ย-ฟุน เฒว์ย อิสะลาเอน เมี่ยน เญย ฮู่ง เหว่ย.’

26โอ อิสะลาเอน เมี่ยน เญย ทิน-ฮู่ง อ่า, โท้ เม่ย อี้ หฒั่น โหฒว เหฒียง หฒิว เม่ย เหธา เม่ย เญย โปว, เยีย เญย เตีย, ดาวิด, แล์ง เญย หว่า.

27“ทิน-ฮู่ง หฒะเก้ง อ๋อย เยียม ป้าม เกน ไฟ? ลู่ง เหธา เก้า ฮลัง เจี๋ย เญย ลู่ง, เม่ย เยียม ไม้ เหฌี่ย. วั้ว หญู่ง, เยีย เหธย น้าย นอม เปย๊า เม่ย เก้า เยียม ไม้ เหฌี่ย อ๊ะ.

28โอ เฒี้ยว, เยีย เญย ทิน-ฮู่ง อ่า, โท้ หมวัง เม่ย เญย โปว เต๋า เก๋า โจ้ว เญย หว่า. โท้ หมวัง อี้ ฮนอย เม่ย เญย โปว เยียม เม่ย เญย หฑะเฮมียน เต๋า เก๋า โท้ น้าย เต๋ย หว่า.

29โท้ เม่ย ฮนอยๆ ม์วนๆ หมั่ง เจี๊ยน น้าย นอม เปย๊า, เซ ต้ง เม่ย ก๊อง น้าย นอม ต๋อง, ‘เยีย อ๋อย เหลียบ เยีย เญย เม่ง เยียม น้าย นอม ต๋อง. ’ เม่ย ฯฒฯ หมวัง ไฮ์ เม่ย เญย โปว ฮวิน น้าย นอม ต๋อง เต๋า เก๋า เญย หว่า.

30เม่ย เญย โปว เหธา เม่ย เญย แปะ ฝีง, อิสะลาเอน เมี่ยน, ฮวิน น้าย นอม ต๋อง เต๋า เก๋า เญย เฒี่ยง โห่, โท้ เฒี้ยว เยียม วั้ว ลู่ง, เม่ย เยียม เญย ต๋อง, หมวัง เยีย บัว โจ้ว เญย หว่า. หมวัง ไฮ์ ลิ์ว หย่า โท้ กวั่ง เยีย บัว เญย ฒุ์ย.

31“สี ก๊อง ม่าย เต้า จวั่ง ล์าง เมี่ยน โหฒว ต่อง กั้น เต้า เมี่ยน, ฯฒฯ หฒุ เมี่ยน เห่ว โด๊ว เหฒียว, อ๋อย หฒุ ต้อ นิ่น เถา น้าย หฒั่ง ทิน-ฮู่ง เญย เปย๊า, ปุน นิ่น เยียม เม่ย เญย เหฒี่ย-ต้อง หฑะเฮมียน แหมง โด๊ว เหฒียว.

32โท้ เม่ย เยียม กู้ หงว่าย ลู่ง หมวัง หย่า เอย เจี๊ยน โหฒว. โท้ เซี้ยม เม่ย เญย โปว บัว หย่า ตี่ง โหฒว ต่อง วั้ว เต้า เญย ฒุ์ย, ปุน นิ่น หฒิว นิ่น โหฒว เญย หฒุ ดาม-ตอง, แอ๋ง ตี่ง ไม้ โหฒว ต่อง วั้ว เต้า ไม้ ม่าย ฒุ์ย, ปุน นิ่น หฒิว นิ่น โหฒว เญย ตุ๊ หลง.

33“เม่ย เญย แปะ ฝีง, อิสะลาเอน เมี่ยน, หาย หฒั่น ป์าม ฒุ์ย ฯฒฯ หฒุ วิน-วั้ง ฮี่ง นิ่น บัว, ฆะฮ้า นิ่น บัว หฑวน ต้าย ล์อ เม่ย เยียม น้าย เม่ย เญย เปย๊า เหญี่ยม เม่ย เญย บั๋ว, เต๋า เก๋า โจ้ว เม่ย,

34โท้ เม่ย เยียม กู้ หงว่าย ลู่ง หมวัง หย่า กวั่ง เม่ย เญย แปะ ฝีง เญย ฒุ์ย, ต้อ นิ่น บัว หฑวน ต้าย เยียม เม่ย เหธย ปุน นิ่น บัว เญย อง-ถาย เญย เต่ย-ปูง.

35“เม่ย เญย แปะ ฝีง, อิสะลาเอน เมี่ยน, หาย หฒั่น ป์าม ฒุ์ย, เม่ย ตี่ง ฒุ์ย ปุน ลู่ง ฮ์าน, ไม้ ตุ้ย บยู่ง เหฌี่ย, นิ่น บัว ฯฒฯ ฮวิน น้าย นอม ต๋อง เต๋า เก๋า, เหญี่ยม เม่ย เญย บั๋ว หย่า กวั่ง นิ่น บัว เญย ฒุ์ย,

36โท้ เม่ย เยียม กู้ หงว่าย ลู่ง หมวัง ไฮ์ หย่า กวั่ง เม่ย เญย โปว บัว, เม่ย เญย แปะ ฝีง, อิสะลาเอน เมี่ยน, เญย ฒุ์ย. โท้ หฌาว นิ่น บัว ฮนั้ง หาย นอ เยียม หธีง หอบ, หย่า ปุน บยู่ง เหฌี่ย เม่ย ปุน เม่ย เญย แปะ ฝีง หฑิบ เญย เดา.

37“สี ก๊อง เยียม น้าย นอม เต่ย-ปูง ปวั้ง ต้ม หง่อ, ไฟ ปุ๊ด ต้ม ววน-แป่ง, ไฟ เบย้า เจี๋ย บั๊ว, ปุ๊ด หลัด โต์ว, ไฟ จ๊บ-เหญ่ย ฟ้าน, ไฟ แกง-เมา ฟ้าน, ไฟ ม่าย วิน-วั้ง เว่ย ก๋อม อ๋อย เบ๊าะ เม่ย บัว เญย หาย นอม ฒี่ง, ไฟ ไม้ กุ๊น ปวั้ง หฒุ หาย หญู่ง เหฒะ หน่าน, หาย หญู่ง แป่ง,

38โท้ หมวัง นิ่น บัว เต๋า เก๋า เญย หว่า. สี ก๊อง หาย เต้า เมี่ยน ไฟ เม่ย เญย แปะ ฝีง, อิสะลาเอน เญย หฒวัง เมี่ยน, โจ้ว เม่ย, เก๊าะ-เมี่ยน หย่า เฮญี้ยว มุน เถา เก๊าะ-เมี่ยน เญย ฒุ์ย หย่า ซูง ปั์ว หูง เจี๊ยน น้าย นอม หฒั่ง เฒี้ยว เญย เปย๊า,

39โท้ เยียม กู้ หงว่าย ลู่ง, เม่ย เยียม เญย ต๋อง, หมวัง ไฮ์. โท้ กวั่ง นิ่น บัว เญย ฒุ์ย หย่า เถง นิ่น บัว. หฒิว เก๊าะ-เมี่ยน โหฒว เญย เจ๊า เถง นิ่น บัว, (เหว่ย หฒุ ขูง ม่าย เม่ย กั้น ฮนั้ง ฮิ้ว ตุ๊ หฒวัง ป้าม เมี่ยน เญย เฮญี้ยว).

40ฮนั้ง หน่าย เหว่ย ปุน นิ่น บัว เยียม เม่ย เหธย ปุน เยีย บัว เญย อง-ถาย เญย เต่ย-ปูง เหยียด ลิ์ว กั้ม เหฑีย เม่ย, ท่าย เม่ย.

41“ก๊อง เถา กั้น ฝีง เมี่ยน, เซ ไม้ เฒ์ย เม่ย เญย อิสะลาเอน แปะ ฝีง, มป่า เหว่ย เม่ย เญย เม่ง เยียม โก เญย เต่ย-ปูง ต้าย,

42(เหว่ย หฒุ ม่าย เมี่ยน ตุ๊ ไฮ์ เถา เม่ย โฮล ไห่ เญย เม่ง เหธา เม่ย เญย ปั์ว เญย ต้ม ชะ เหธา เม่ย ซูง ปั์ว ธ้วด โหฒว บัวะ ฮ่อง เญย สี่), นิ่น หย่า ต้าย หูง น้าย นอม เปย๊า เต๋า เก๋า.

43โท้ เยียม กู้ หงว่าย ลู่ง, เม่ย เยียม เญย ต๋อง, หมวัง ไฮ์ หย่า เอย เจี๊ยน น้าย เต้า กั้น ฝีง เมี่ยน โท้ เญย หว่า โหฒว, เหว่ย ปุน หม่าน ฝีง เมี่ยน ฮิ้ว ตุ๊ เม่ย เญย เม่ง หย่า กั้ม เหฑีย เม่ย, ท่าย เม่ย, ฮนั้ง เม่ย เญย แปะ ฝีง, อิสะลาเอน เมี่ยน, กั้ม เหฑีย เม่ย, ท่าย เม่ย นอ. นิ่น บัว หย่า ไฮ่ ฮิ้ว ตุ๊ เยีย เหธย น้าย นอม เปย๊า, เมี่ยน กัน เม่ย เญย บั๋ว เห่ว.

44“เม่ย เญย แปะ ฝีง ธ้วด มี่ง เหธา นิ่น บัว เญย วิน-วั้ง เบ๊าะ จ๋า, ไม้ กุ๊น เม่ย พ้าย นิ่น บัว มี่ง หาย นอม ต๋อง, นิ่น บัว หย่า หูง เจี๊ยน เฒี้ยว กิ๊น ต้าย เญย ฒี่ง เหธา เยีย เหว่ย เม่ย เญย เม่ง เหลียบ ต้าย เญย เปย๊า,

45โท้ เม่ย เยียม กู้ หงว่าย ลู่ง หมวัง นิ่น บัว เต๋า เก๋า โจ้ว เญย หว่า, ปุน นิ่น บัว ตุ๊ ฮี่ง.

46“เม่ย เญย แปะ ฝีง หาย หฒั่น ป์าม ฒุ์ย ต่อง เม่ย, (เหว่ย หฒุ ไม้ ม่าย หาย เต้า ป้าม เมี่ยน ไม้ ป์าม ฒุ์ย), เม่ย ฯฒฯ เฉีย เจี์ย นิ่น บัว, เฒาะ นิ่น บัว จิว ปุน วิน-วั้ง ธ้าง นิ่น บัว มี่ง เถา วิน-วั้ง เญย เต่ย-ปูง, ไม้ กุ๊น โก ไฟ ฟัด,

47สี ก๊อง เยียม นิ่น บัว หฒุ ธ้าง มี่ง วั้ว นอม เต่ย-ปูง นิ่น บัว ก๊อย เฮญี้ยว กวั่ง ฒุ์ย, หย่า เยียม หฒุ ธ้าง มี่ง วั้ว เต๋ย เมี่ยน เญย ต๋อง โจ้ว เม่ย, หย่า ก๊อง, ‘เยีย บัว ป์าม ฒุ์ย, โหฒว ต่อง, โหฒว หว่าย สี่,’

48สี ก๊อง นิ่น บัว เยียม ธ้าง นิ่น บัว วั้ว เต๋ย วิน-วั้ง เญย เต่ย-ปูง ปวั๊ง เฮญี้ยว ปวั๊ง เอ๋ย หฑวน ต้าย ล์อ เม่ย, แอ๋ง หูง เจี๊ยน เม่ย จิว ปุน นิ่น บัว เญย อง-ถาย เญย เต่ย-ปูง เหธา เม่ย กิ๊น ต้าย เญย ฒี่ง เหธา เยีย เหว่ย เม่ย เญย เม่ง เหธย ต้าย เญย เปย๊า,

49โท้ เม่ย เยียม กู้ หงว่าย ลู่ง, เม่ย เยียม เญย ต๋อง, หมวัง นิ่น บัว เต๋า เก๋า โจ้ว เญย หว่า, หย่า ค้อ-เลี่ยน นิ่น บัว.

50โท้ กวั่ง เม่ย เญย เมี่ยน เญย ฒุ์ย, ต้ง ป์าม ฒุ์ย ต่อง เม่ย วั้ว เต๋ย แปะ ฝีง. โท้ กวั่ง ฆอย นิ่น บัว โหฒว ต่อง เม่ย เญย เหยียด ฒู้ง สี่ หย่า ปุน เบ๊าะ ฮี่ง นิ่น บัว วั้ว เต๋ย วิน-วั้ง ค้อ-เลี่ยน นิ่น บัว,

51เหว่ย หฒุ นิ่น บัว โหฒว เม่ย เญย แปะ ฝีง, เม่ย หฑิบ เญย ป่วน, ต้ง เม่ย ต้อ ธ้วด อียิบ เต่ย-ปูง, ฮนั้ง เยียม สิน เฮลียะ เญย โต์ว-โล่ว ต้อ ธ้วด ต้าย.

52“โท้ เฒี้ยว หนูง มฒีง หมั่ง เจี๊ยน เม่ย เญย โปว, เม่ย เญย แปะ ฝีง, อิสะลาเอน เมี่ยน. นิ่น บัว หาย หฒั่น เห่ว เม่ย เถง, โท้ หมวัง นิ่น บัว โจ้ว เม่ย เญย หว่า.

53โอ เฒี้ยว ทิน-ฮู่ง อ่า, เม่ย เยียม ลู่ง เดี๊ย เญย หม่าน ฝีง กิ๊น นิ่น บัว ต้าย โหฒว เม่ย กั้น หฑิบ เญย ป่วน, ฮนั้ง เม่ย หล่ง โมเซ ก๊อง ต๋อย เม่ย ต้อ เยีย บัว เญย อง-ถาย ธ้วด อียิบ เต่ย-ปูง.”

54ซาโลมอน เกว่ย เหฌี่ย เฒี้ยว เญย เหฒี่ย-ต้อง หฑะเฮมียน ซูง ปั์ว หูง เจี๊ยน ลู่ง เต๋า เก๋า, โจ้ว เฒี้ยว น้าย เต๋ย เหยียด ฒู้ง หว่า ลิ์ว, นิ่น เจี์ย ซิน ต้าย

55โซ้ว เจี๊ยน หล่ง เฉีย โฮล เญย ปวัง หว่า ปุน กั๊บ ฒุ้น เญย เหยียด หฒวัง อิสะลาเอน เมี่ยน. นิ่น ก๊อง,

56“เธง เฒี้ยว, ต้ง ปุน อิสะลาเอน เมี่ยน ฮิด ขวน ฮนั้ง นิ่น แล์ง เญย หว่า นอ. นิ่น เอย เจี๊ยน นิ่น หล่ง นิ่น เญย โปว, โมเซ, แล์ง เญย เหยียด ฒู้ง หลง เญย หว่า, ไม้ ปู๋ง ด๊อด เหยียด โจ๋ว.

57โท้ เฒี้ยว, เยีย บัว เญย ทิน-ฮู่ง เหธา เยีย บัว เยียม ฮนั้ง นิ่น เหธา เยีย บัว เญย อง-ถาย บัว เยียม วั้ว นอ. โท้ นิ่น ไม้ ตู๋ง เล่ย ฆอย เยีย บัว ไฟ กวั่ง เยีย บัว.

58โท้ ปุน เยีย บัว เญย เฮญี้ยว เกวย นิ่น, กัน นิ่น เญย เหยียด ฒู้ง โต์-เล์ย, หย่า เอย เจี๊ยน นิ่น จิว ปุน บัว เญย อง-ถาย เญย เล์ย-หลัด เหธา หลี่ง เหธา เล์ย.

59โท้ ปุน เยีย เต๋า เก๋า โจ้ว เฒี้ยว น้าย เต๋ย หว่า ฮนอยๆ ม์วนๆ เยียม นิด เฒี้ยว ฟัด. หย่า โท้ นิ่น ค้อ-เลี่ยน นิ่น เญย แปะ ฝีง, อิสะลาเอน เมี่ยน, หฒิว นิ่น บัว โม์ว ฮนอย เฉียม หล่ง เญย,

60เหว่ย ปุน ลู่ง เดี๊ย หม่าน ฝีง ไฮ่ ฮิ้ว ตุ๊ เฒี้ยว เซ ทิน-ฮู่ง. ไม้ ม่าย กั้น เต้า อ๊ะ.

61ฮนั้ง หน่าย เม่ย บัว หอบ หฒุ เหฒียบ ฒัวะ เฮญี้ยว กัน เฒี้ยว, บัว เญย ทิน-ฮู่ง. อ๋อย หฒุ เอย เจี๊ยน นิ่น เญย หลี่ง, กัน หลง นิ่น เญย เล์ย-หลัด ฮนั้ง อี้ ฮนอย นอ.”

62ฮู่ง เตี๋ย เหธา อิสะลาเอน เมี่ยน เญย หฒวัง แปะ ฝีง เยียม เฒี้ยว เญย หฑะเฮมียน ฝ่ง ห่อ เหฒี่ย.

63ซาโลมอน ฝ่ง ห่อ เหฒี่ย ปุน เฒี้ยว เหว่ย จิว ทง เญย กะน้าย ม่าย อี หว่าน อี ธิน เต้า ง่ง เหธา เหฒียบ เหญ่ย หว่าน เต้า ยู่ง เหธา ปะกี ยู่ง. ฮู่ง เตี๋ย เหธา อิสะลาเอน เญย หฒวัง เมี่ยน ฯฒฯ เฒาะ หฒั่ง เฒี้ยว เญย เปย๊า ฝูง ปุน เฒี้ยว.

64ต้ง วั้ว ฮนอย ฮู่ง เตี๋ย เฒาะ หลาด กะญั์ว, บุด๋ง เญย ต๋อง, หฒั่ง เฒี้ยว เญย เปย๊า หฑะเฮมียน แหมง, สา ธีง-เหฑ่ง. นิ่น เยียม วั้ว ฝ่ง ห่อ ปั๊ว เหฒี่ย เญย กะน้าย, เหฒี่ย เญย ล่าง หฒิ เหธา เหฒี่ย เหว่ย จิว ทง เญย แซง-คู้ เญย เฮมย, เหว่ย หฒุ เยียม หฒั่ง เฒี้ยว เญย เปย๊า หฑะเฮมียน แหมง เญย ต้ง ซิ เหฒี่ย-ต้อง ไฝ ไห่, อัน ไม้ เหฌี่ย ปั๊ว เหฒี่ย เญย กะน้าย เหธา เหฒี่ย เญย ล่าง หฒิ เหธา เหฒี่ย เหว่ย จิว ทง เญย แซง-คู้ เฮมย.

65วั้ว หฒั่น ซาโลมอน เหธา อิสะลาเอน เญย หฒวัง เมี่ยน เยียม วั้ว เจี๋ย ฒิบ. กั๊บ ฒุ้น เญย เมี่ยน ธั้ม! ไห่ อ๊ะ. ม่าย เยียม เลโบฮามัด เถา อียิบ โด๊ะ ต้าย เญย เมี่ยน. นิ่น บัว เยียม เฒี้ยว, บัว เญย ทิน-ฮู่ง, เญย หฑะเฮมียน โหฒว จอม โห่ว เสี่ย ฮนอย, แอ๋ง เหธา เสี่ย ฮนอย. เหยียด ฒู้ง ม่าย เหฒียบ เฝย ฮนอย.

66ฆะฮ้า วั้ว ฮนอย ฮู่ง เตี๋ย บั๋ว แปะ ฝีง หฑวน. นิ่น บัว ปวัง หว่า ปุน ฮู่ง เตี๋ย ฯฒฯ หฑวน เปย๊า, หฒะเก้ง เฌียน-โย่ว อะเฮน้ย ไห่ เหว่ย เฒี้ยว ปุน นิ่น เญย โปว, ดาวิด, เหธา นิ่น เญย แปะ ฝีง, อิสะลาเอน เมี่ยน, ตุ๊ หลง เญย เหยียด ฒู้ง สี่.

← Chapter 7 Jump to: Chapter 9 →