1 Kings 20

Mien Bible (Thai Script) © Thailand Bible Society, 2007

1ซีเลีย กั๊วะ เญย ฮู่ง, เบนฮาดัด, ติ่ว ฑ่อย นิ่น เญย แปง-กวั้น. ม่าย ฟ่า เหฒียบ เหญ่ย เต้า ฮู่ง เหธา นิ่น บัว เญย ม์า เหธา เบ๊าะ จ๋า เญย ม์า-เธีย. นิ่น ฯฒฯ ฝาว มี่ง เว่ย เจี๊ยน เบ๊าะ สะมาเลีย ฒี่ง.

2นิ่น พ้าย โต่ว เฝียน เมี่ยน เปียะ ฒี่ง มี่ง บั๋ว อิสะลาเอน เญย ฮู่ง, อาหับ, “เบนฮาดัด ฮนั้ง น้าย นอ ก๊อง,

3‘เม่ย เญย เจียม ญ่าน เป๋น เยีย เญย. เม่ย เญย เก้า หลง เจี๋ย เญย เอ๊า เหธา ฝุเจว๊ย หย่า เป๋น เยีย เญย.’”

4อิสะลาเอน เญย ฮู่ง เตา, “เยีย เญย เฒี้ยว, ฮู่ง เตี๋ย, อ้า! ฮนั้ง เม่ย ก๊อง นอ. เยีย เหธา เยีย ม่าย เญย เหยียด ฒู้ง เป๋น เม่ย เญย.”

5โต่ว เฝียน เมี่ยน แอ๋ง ต้าย หฑุ่น ก๊อง, “เบนฮาดัด ฮนั้ง น้าย นอ ก๊อง, ‘เยีย ปุน หว่า มี่ง เห่ว เม่ย เฒาะ เม่ย เญย เจียม ญ่าน เหธา เม่ย เญย เอ๊า, เม่ย เญย ฝุเจว๊ย จิว ปุน เยีย.

6มป่า ฌัง ฮนอย เล่ย ไม้ โก น้าย นอม เฒี่ยง โห่, เยีย ปุน เยีย เญย เจียน มี่ง เม่ย วั้ว โซว เม่ย เญย เปย๊า เหธา เม่ย เญย เจียน เญย เปย๊า. นิ่น บัว ปวัด หาย หญู่ง หอบ นิ่น บัว เญย เฮญี้ยว, นิ่น บัว ฯฒฯ เฒาะ ต้อ มี่ง อ๊ะ.’”

7อิสะลาเอน เมี่ยน เญย ฮู่ง เห่ว วั้ว นอม เต่ย-ปูง เญย หฒวัง เมี่ยน โก๋ ต้าย ฒุ้น, ก๊อง บั๋ว นิ่น บัว, “หมั่ง ม่าะ! น้าย เต้า เมี่ยน หฒะเก้ง อ๋อย ธัวะ สี่ อ๊ะ, เหว่ย หฒุ นิ่น ปุน หว่า ต้าย เห่ว เยีย เฒาะ เยีย เญย เอ๊า, เยีย เญย ฝุเจว๊ย เหธา เยีย เญย เจียม ญ่าน ฝูง มี่ง ปุน นิ่น. เยีย หย่า ไม้ แหง่ง นิ่น.”

8หฒวัง เมี่ยน โก๋ เหธา หฒวัง แปะ ฝีง ก๊อง, “ไม้ ตู๋ง หมวัง, ไม้ ตู๋ง แล์ง.”

9อาหับ ฮู่ง ฯฒฯ เตา เบนฮาดัด เญย โต่ว เฝียน เมี่ยน, “เยีย เญย เฒี้ยว, ฮู่ง เตี๋ย อ้า! ต้าว หฑุ่น เม่ย เห่ว เยีย โหฒว เญย เหยียด ฒู้ง เยีย อ๋อย เอย เจี๊ยน โหฒว. มป่า น้าย หฑุ่น โท้ เญย เยีย ไม้ ไฮ่ โหฒว.” โต่ว เฝียน เมี่ยน ฯฒฯ หฑวน มี่ง บั๋ว เบนฮาดัด.

10เบนฮาดัด แอ๋ง ปุน หว่า มี่ง บั๋ว อาหับ, “เยีย อ๋อย ต้อ เมี่ยน ธั้ม! เญย มี่ง เหมียด เม่ย บัว. สะมาเลีย เญย เนีย-บูง ฒู้ง ไม้ เก๋า นิ่น บัว เหยียด เต้า เหยียด เญา. สี ก๊อง เยีย ไม้ โหฒว, โท้ หฒวัง เฒี่ยน เฮนี้ยๆ เญย โหฒว ปุน เยีย.”

11อิสะลาเอน เญย ฮู่ง เตา, “อ๋อย หฒุ บั๋ว นิ่น, ‘ไม้ แก้ง ฒุ เบ๊าะ จ๋า เญย ฒอง-ฒุ มี่ง เบ๊าะ จ๋า เญย เมี่ยน ไม้ หอบ หฒุ ปู๋ง หว่า-เหมา ฮนั้ง เบ๊าะ ลิ์ว จ๋า ไจ๊ ฆอย เบ๊าะ จ๋า เญย ฒอง-ฒุ นอ.’”

12เบนฮาดัด เหธา หฒวัง ฮู่ง เตี๋ย เยียม นิ่น บัว เญย ด๊บ-ลิ่ว ฮบ ติ๊ว วั้ว หฒั่น, เบนฮาดัด ไฮ์ น้าย เต๋ย เฝียน. นิ่น ฯฒฯ ก๊อง บั๋ว นิ่น เญย แปง, “เก๊าะ-เมี่ยน เยียม เก๊าะ-เมี่ยน เญย ต๋อง หลิ่ว เล์ย เหฒียง เบ๊าะ จ๋า อ๊ะ.” เก๊าะ-เมี่ยน ฯฒฯ มี่ง เยียม เก๊าะ-เมี่ยน เญย ต๋อง หลิ่ว เล์ย เหฒียง เบ๊าะ วั้ว นอม ฒี่ง.

13ม่าย เต้า โต่ว หว่า เมี่ยน ต้าย ล์อ อิสะลาเอน เมี่ยน เญย ฮู่ง, อาหับ. นิ่น ก๊อง, “ เฒี้ยว ฮนั้ง น้าย นอ ก๊อง, ‘เม่ย ปวัด น้าย เต๋ย ต้ม แปง-กวั้น ไฟ? อี้ ฮนอย เยีย อ๋อย เฒาะ นิ่น บัว จิว ปุน เม่ย. เม่ย ฯฒฯ ฮิ้ว ตุ๊ เยีย เซ เฒี้ยว ’”

14อาหับ หน่าย, “ปั่ง หาย เต้า โหฒว?” โต่ว หว่า เมี่ยน ก๊อง, “ เฒี้ยว ฮนั้ง น้าย ก๊อง, ‘ปั่ง หฒวัง แซ้ง-เฒี้ยว เญย แปง-เปย๊ย หลุน.’” อาหับ หน่าย, “หาย เต้า อ๋อย หฒุ เจี์ย กอน เบ๊าะ?” โต่ว หว่า เมี่ยน เตา, “เม่ย อ๋อย หฒุ เจี์ย กอน เบ๊าะ.”

15ฮู่ง เตี๋ย ฯฒฯ ติ่ว ฑ่อย เต้าๆ แซ้ง-เฒี้ยว เญย เมี่ยน หลุน เมี่ยน. เหยียด ฒู้ง ม่าย หญี่ แป๊ะ ฟ่า เหฒียบ เหญ่ย เต้า. ฆะฮ้า แอ๋ง ติ่ว ฑ่อย อิสะลาเอน เญย หฒวัง แปง, เหยียด ฒู้ง ม่าย เสี่ย ธิน เต้า.

16เหฒียง ลู่ง อ๋าน นิ่น บัว ธ้วด ฒี่ง มี่ง เบ๊าะ จ๋า ต๋อย เบนฮาดัด เหธา เถง นิ่น วั้ว เต๋ย ฟ่า เหฒียบ เหญ่ย เต้า ฮู่ง เตี๋ย เยียม นิ่น บัว เญย ด๊บ-ลิ่ว ฮบ เกา ติ๊ว อ๋อย ฆวิน อ๊ะ.

17แซ้ง-เฒี้ยว เญย เมี่ยน หลุน เมี่ยน ธ้วด ฒี่ง ด่าง. เบนฮาดัด พ้าย เมี่ยน ธ้วด มี่ง ฒ่า เต่ย-ปูง. นิ่น บัว หฑวน ต้าย ก๊อง, “ม่าย เมี่ยน เยียม สะมาเลีย หูง เจี๊ยน ต้าย อ๊ะ.”

18เบนฮาดัด ก๊อง, “สี ก๊อง นิ่น บัว ต้าย เหว่ย อ๋อย ก๊อง หอบ, เลี่ยม นั่ง เฒาะ นิ่น บัว. สี ก๊อง นิ่น บัว ต้าย เบ๊าะ จ๋า, เลี่ยม นั่ง เญย เฒาะ นิ่น บัว ม่าะ!”

19น้าย เต๋ย เมี่ยน ฯฒฯ ธ้วด ฒี่ง มี่ง, เซ หฒวัง แซ้ง-เฒี้ยว เญย เมี่ยน หลุน เมี่ยน. แปง-กวั้น หย่า กัน เจี๊ยน นิ่น บัว มี่ง.

20เก๊าะ-เมี่ยน ไต๋ เหธา เก๊าะ-เมี่ยน เบ๊าะ จ๋า วั้ว เต๋ย วิน-วั้ง. ซีเลีย เมี่ยน เปย๋า, อิสะลาเอน เมี่ยน หฒุ่น เจี๊ยน กัน นิ่น บัว เญย ฆะฮ้า ฆาง, มป่า ซีเลีย เญย ฮู่ง, เบนฮาดัด, เก้ เจี๊ยน ม์า เหธา เก้ ม์า เญย แปง ถิว เปย๋า.

21อิสะลาเอน เญย ฮู่ง ธ้วด ฒี่ง มี่ง ธ้าง ม์า เหธา เบ๊าะ จ๋า เญย เธีย หย่า ไต๋ ซีเลีย เมี่ยน ธั้ม ไห่.

22ฆะฮ้า วั้ว เต้า โต่ว หว่า เมี่ยน ต้าย ล์อ อิสะลาเอน เมี่ยน เญย ฮู่ง ก๊อง, “เม่ย อ๋อย หฒุ เฮ้น เจี์ย ต้าย เหว่ย หฒุ เถา ธุน-เกน ฮนอย ซีเลีย เญย ฮู่ง ฒู้ง อ๋อย ต้าย เบ๊าะ เม่ย อ๊ะ.”

23ซีเลีย เญย ฮู่ง, เบนฮาดัด, เญย เจียน ก๊อง บั๋ว นิ่น, “อิสะลาเอน เมี่ยน เญย เฒี่ยน เซ เยียม บง เญย เฒี่ยน นิ่น บัว หธีง ต้าย เก้า เฮ้น บัว. มป่า ปุน บัว เยียม เดา-แป้ง เบ๊าะ นอ, บัว ด่ง หาย ฒู้ง เก้า เฮ้น นิ่น บัว.

24อ๋อย หฒุ ฮนั้ง น้าย นอ โหฒว. โท้ เฒาะ เหยียด ฒู้ง ฮู่ง เตี๋ย ธ้วด, ไม้ ตู๋ง ปุน กุ๊น เบ๊าะ จ๋า เญย เจ๊า. แอ๋ง เหลียบ แปง-เปย๊ย ตี๊ นิ่น บัว.

25เม่ย อ๋อย หฒุ เหลียบ แปง-กวั้น ด่ง ฒิ่น ด่าง ไต่ วั้ว เต๋ย ธั้ม, หย่า ล์อ ม์า ตี๊ ม์า, ล์อ เบ๊าะ จ๋า เญย ม์า-เธีย ตี๊ เบ๊าะ จ๋า เญย ม์า-เธีย, บัว ฯฒฯ เยียม เดา-แป้ง เหธา อิสะลาเอน เมี่ยน เบ๊าะ จ๋า. ฮนั้ง หน่าย บัว ด่ง หาย ฒู้ง ฮี่ง อ๊ะ.” เบนฮาดัด ไฮ์ หอบ เฮญี้ยว เญย ฯฒฯ เอย เจี๊ยน โหฒว.

26เถา ตะเหญ่ย หฮญัง เญย ธุน-เกน ฮนอย, เบนฮาดัด ติ่ว ฑ่อย ซีเลีย เญย แปง หย่า ธ้วด มี่ง เถา อาเฟ้ก ฒี่ง, อ๋อย เหธา อิสะลาเอน เมี่ยน เบ๊าะ จ๋า.

27อิสะลาเอน เมี่ยน หย่า ติ่ว ฑ่อย แปง, ปุน เจี๊ยน เปี้ยน ฝุย, ฯฒฯ ธ้วด มี่ง เหธา นิ่น บัว เบ๊าะ จ๋า. นิ่น บัว ฮนั้ง อี กวั้น โหฒะ เญย ยู่ง เหลียบ เธี้ยง เยียม ซีเลีย แปง เญย เธี้ยง ต๋อย-หง่าน. ซีเลีย เญย แปง ปวั๊ง เหฑ่ง เดา-เป้ย.

28ทิน-ฮู่ง เญย เมี่ยน ต้าย บั๋ว อิสะลาเอน เญย ฮู่ง, “ เฒี้ยว ฮนั้ง น้าย ก๊อง, ‘หลาย ซีเลีย เมี่ยน ก๊อง เฒี้ยว เซ เยียม บง เญย เฒี่ยน, ไม้ เฒ์ย ฮ์อง เญย เฒี่ยน, เยีย อ๋อย เฒาะ น้าย ต้ม กวั้น แปง จิว ปุน เยียม เม่ย เญย ปั์ว-เดี๊ย. เม่ย ฯฒฯ ฮิ้ว ตุ๊ เยีย เซ เฒี้ยว ’”

29อิสะลาเอน เมี่ยน เหธา ซีเลีย เมี่ยน เญย เธี้ยง ต๋อย-หง่าน. นิ่น บัว เยียม เธี้ยง เสี่ย ฮนอย. เถา เสี่ย ฮนอย วั้ว ฮนอย นิ่น บัว ฯฒฯ ธ้วด มี่ง เบ๊าะ จ๋า อ๊ะ. ดุ ฮนอย ฮนั้ง อิสะลาเอน เมี่ยน ไต๋ เหยียด สิน เต้า ซีเลีย เมี่ยน เญย ยั่ง เจ๊า แปง.

30ซีเลีย เมี่ยน เหฒ่ง เหฌี่ย เญย แปง เปย๋า เปียะ อาเฟ้ก ฒี่ง. ฒี่ง หลาด บาง เหฌี่ย, ดั๊บ ไต่ อี หว่าน เสี่ย ธิน เต้า. เบนฮาดัด เปย๋า เปียะ ฒี่ง กะญั์ว ปี๋ง เจี๊ยน ฒี่ง กะญั์ว เจี๋ย เญย เหยียด ฉง.

31นิ่น เญย เจียน ก๊อง บั๋ว นิ่น, “เยีย บัว ไฮ์ ก๊อง อิสะลาเอน เมี่ยน เญย ฮู่ง ค้อ-เลี่ยน เมี่ยน. ปุน เยีย บัว ไซ เจี๊ยน ล่าม่า เดีย-โธว หย่า เฒาะ ฮลาง โคว เจี๊ยน มฆ้อง มี่ง ล์อ อิสะลาเอน เญย ฮู่ง. เหฑีย นิ่น อ๋อย เลี่ยว เม่ย เญย แหม่ง.”

32นิ่น บัว ฯฒฯ ไซ เจี๊ยน ล่าม่า เดีย-โธว, มฆ้อง หย่า โคว เจี๊ยน ฮลาง, มี่ง ล์อ อิสะลาเอน เญย ฮู่ง. นิ่น บัว ก๊อง, “เม่ย เญย โปว, เบนฮาดัด, ก๊อง, ‘โท้ เม่ย เลี่ยว นิ่น เญย แหม่ง โอ่.’” ฮู่ง เตี๋ย เตา, “นิ่น หธ่อ ม่าย แหม่ง เญย? นิ่น โหฒว ฮนั้ง เยีย เญย โย์ว.”

33น้าย เต๋ย เมี่ยน ไฮ์ นิ่น ฮนั้ง น้าย นอ ก๊อง ฯฒฯ เซี้ยบๆ เญย เฒาะ นิ่น เญย หว่า ก๊อง, “เฒ์ย เญย. เบนฮาดัด ฮนั้ง เม่ย เญย โย์ว.” ฮู่ง เตี๋ย ก๊อง, “มี่ง ต้อ นิ่น ต้าย ม่าะ!” เบนฮาดัด ธ้วด ต้าย วั้ว หฒั่น, อาหับ เห่ว นิ่น ฝาว อาหับ เญย เบ๊าะ จ๋า เธีย.

34เบนฮาดัด ก๊อง, “เยีย เญย เตีย ธ้าง เม่ย เญย เตีย เญย วั้ว เต๋ย ฒี่ง เยีย อ๋อย ฝูง หฑวน ปุน เม่ย. เม่ย กุ๊น เหลียบ เม่ย กั้น เญย เฮย-ห่อง เยียม ดามัดกัด ฒี่ง ฮนั้ง เยีย เญย เตีย เยียม สะมาเลีย เหลียบ นอ.” อาหับ ก๊อง, “หฒิว เม่ย ก๊อง เญย เหลียบ แหง่ง หว่า เยีย ฯฒฯ ปู๋ง เม่ย มี่ง.” นิ่น ฯฒฯ เหธา เบนฮาดัด เหลียบ แหง่ง หว่า แอ๋ง ปู๋ง นิ่น มี่ง อ๊ะ.

35ม่าย กวั้น โต่ว หว่า เมี่ยน เญย เหยียด เต้า หฒิว เฒี้ยว ก๊อง เญย หว่า บั๋ว เหธา นิ่น โหฒว กวั้น เญย เหยียด เต้า ต่อย, “โท้ เม่ย เบ๊าะ เยีย.” มป่า วั้ว เต้า เมี่ยน ไม้ คั้ง เบ๊าะ นิ่น.

36นิ่น ฯฒฯ ก๊อง, “หลาย เม่ย ไม้ หมวัง เฒี้ยว เญย หว่า, เม่ย เยี้ยด เล่ย เยีย, ม่าย เต้า เซี่ยน อ๋อย หงาด ไต่ เม่ย.” วั้ว เต้า เมี่ยน เยี้ยด เล่ย ฆอย ฮนั้ง ฯฒฯ ม่าย เต้า เซี่ยน ต้าย หงาด ไต่ นิ่น หมี่ อ๊ะ.

37วั้ว เต้า โต่ว หว่า เมี่ยน แอ๋ง ปวั้ง หฒุ กั้น เต้า เมี่ยน ฯฒฯ ก๊อง บั๋ว นิ่น, “โท้ เบ๊าะ เยีย ม่าะ!” วั้ว เต้า เมี่ยน ฯฒฯ เบ๊าะ นิ่น มุน หมี่ อ๊ะ.

38น้าย เต้า โต่ว หว่า เมี่ยน ฯฒฯ มี่ง โซ้ว เจี๊ยน เจ๊า-เฮลน ฒั้ว ฮู่ง เตี๋ย เจี๋ย. นิ่น หล่ง เดีย ปวัง เจี๊ยน มฒีง เหว่ย ปุน เมี่ยน เฒียะ ไม้ ตุ๊ นิ่น.

39ฮู่ง เตี๋ย เจี๋ย เจ๊า วั้ว หฒั่น, วั้ว เต้า โต่ว หว่า เมี่ยน เห่ว เจี๊ยน ก๊อง บั๋ว ฮู่ง เตี๋ย, “เม่ย เญย โปว เยียม เบ๊าะ จ๋า เธี้ยง วั้ว หฒั่น, ม่าย เต้า เมี่ยน ต้อ เต้า เฒาะ ต้าย เญย วิน-วั้ง ต้าย ก๊อง, ‘โก๋ว หลง น้าย เต้า เมี่ยน. สี ก๊อง นิ่น เปย๋า ดุ๊ด, เม่ย เญย แหม่ง อ๋อย หฒุ ตี๊ นิ่น เญย แหม่ง. ไม้ เฒย แอ๊ะ, อ๋อย หฒุ ธ้วด หญี่ เหฒียบ เยี้ยด จ้อย ญ่าน.’

40มป่า เยีย, เม่ย เญย โปว, เญ้า เจี๊ยน น้าย เญ้า เจี๊ยน วั้ว เญย เฒี่ยง โห่, ไม้ ปวัด น้าย เต้า เมี่ยน หมี่ อ๊ะ.” อิสะลาเอน เญย ฮู่ง ก๊อง, “เม่ย เญย ฒุ์ย มต้าย อ๋อย หฒุ ฮนั้ง หน่าย ตี่ง เหว่ย หฒุ เม่ย กั้น ตี่ง ลิ์ว อ๊ะ.”

41วั้ว เต้า โต่ว หว่า เมี่ยน ฯฒฯ เซี้ยบๆ เญย เฒาะ ฆอย ปวัง มฒีง เญย เดีย. อิสะลาเอน เญย ฮู่ง เตี๋ย ฯฒฯ เฒียะ ตุ๊ นิ่น เป๋น เหยียด เต้า วั้ว เต๋ย โต่ว หว่า เมี่ยน.

42นิ่น ก๊อง บั๋ว ฮู่ง เตี๋ย, “ เฒี้ยว ฮนั้ง น้าย นอ ก๊อง, ‘เหว่ย หฒุ เม่ย ปู๋ง เหยียด เต้า ต้ง เยีย ตี่ง อ๋อย หฒุ ไต่ เญย เมี่ยน เปย๋า, เม่ย เญย แหม่ง อ๋อย หฒุ ตี๊ นิ่น เญย แหม่ง, เม่ย เญย แปะ ฝีง หย่า ตี๊ นิ่น เญย แปะ ฝีง.’”

43อิสะลาเอน เญย ฮู่ง, อาหับ, ฯฒฯ หฑวน เถา สะมาเลีย, นิ่น เญย ฮู่ง ติ่น วั้ว, โหย่ว เฉีย เจี์ย โหย่ว เฑ่า.

← Chapter 19 Jump to: Chapter 21 →