1 Kings 5

Mien Bible (Thai Script) © Thailand Bible Society, 2007

← Chapter 4 Jump to: Chapter 6 →

1ไทละ ฒี่ง เญย ฮู่ง, ฮีลาม, หมวัง ไฮ์ อิสะลาเอน เมี่ยน ออน ซาโลมอน หฑิบ เจี๊ยน นิ่น เญย เตีย, ดาวิด, โหฒว ฮู่ง, นิ่น ฯฒฯ พ้าย เต๋ย นิ่น เญย เจียน มี่ง ปวั้ง ซาโลมอน, เหว่ย หฒุ ฒิ่น ด่าง ฮีลาม หฒั่นๆ เหธา ดาวิด จิว หฒัวะ.

2ซาโลมอน แอ๋ง วุ่ย หว่า หฑวน ปุน ฮีลาม. นิ่น ก๊อง,

3“เม่ย ฮิ้ว ตุ๊ หลาย เหธา ปูงๆ เว่ย ก๋อม เญย วิน-วั้ง เบ๊าะ จ๋า, เยีย เญย เตีย, ดาวิด, ไม้ ตุ๊ เหธย เปย๊า เหว่ย เฒี้ยว, นิ่น เญย ทิน-ฮู่ง, เญย เม่ง. ฒั้ว เถา เฒี้ยว ปุน นิ่น เญย วิน-วั้ง เยียม นิ่น เญย เหฒา-เดี๊ย.

4มป่า อี้ หฒั่น เฒี้ยว, เยีย เญย ทิน-ฮู่ง, ปุน เยีย เยียม ปูงๆ ถาย-แป้ง, ไม้ ม่าย วิน-วั้ง หย่า ไม้ ม่าย สี่.

5เยีย ฯฒฯ เจี์ย เฮญี้ยว อ๋อย เหธย นอม เปย๊า เหว่ย เฒี้ยว, เยีย เญย ทิน-ฮู่ง, เญย เม่ง, ฮนั้ง เฒี้ยว บั๋ว เยีย เญย เตีย, ดาวิด, เญย หว่า. เฒี้ยว ก๊อง, ‘เม่ย เญย ตอน, ต้ง เยีย อ๋อย ปุน ตี๊ เม่ย หฑิบ เจี๊ยน เฒว์ย เม่ย เญย เหว่ย วั้ว เต้า, อ๋อย เหธย นอม เปย๊า เหว่ย เยีย เญย เม่ง.’

6“ฮนั้ง หน่าย, โท้ พ้าย เม่ย เญย เมี่ยน เหว่ย เยีย ก๋อย สีดา ฒ่ง เดี๋ยง. เยีย เญย เมี่ยน หย่า เหธา เม่ย เญย เมี่ยน ไฮ่ ล่ม ฑ่อย โหฒว. หฒิว เม่ย ตี่ง ต้าย เญย กง-ฒิ่น เยีย มต้าย ปุน เม่ย เหว่ย ธี้ง เม่ย เญย เมี่ยน, เหว่ย หฒุ เม่ย ฮิ้ว ตุ๊ เยียม เยีย บัว บุด๋ง ไม้ ม่าย หาย เต้า ไฮ่ ก๋อย เดี๋ยง ด่ง ไซดอน เมี่ยน.”

7ฮีลาม หมวัง ไฮ์ ซาโลมอน เญย หว่า, นิ่น เก้ง อะเฮน้ย ไห่. นิ่น ก๊อง, “อี้ ฮนอย อ๋อย หฒุ เธง เฒี้ยว เหว่ย หฒุ นิ่น ปุน ดาวิด ตุ๊ เต้า ธง-เม่ง เญย ตอน กุ๊น น้าย โฮล ไห่ เญย ฝีง.”

8ฮีลาม แอ๋ง วุ่ย หว่า ปุน ซาโลมอน. นิ่น ก๊อง, “เม่ย ฝูง ปุน เยีย เญย หว่า เยีย ตุ๊ ฒิบ หมี่ อ๊ะ. เยีย ฯฒฯ หฒิว เม่ย โท้ วั้ว เต๋ย สีดา ฒ่ง เดี๋ยง เหธา ฒ่ง เดี๋ยง ปุน เม่ย.

9เยีย เญย กง-เมี่ยน อ๋อย เยียม เลบานอน เก้ หว่วน เดี๋ยง เหฌี่ย เถา ค้อย. เถา ค้อย ฯฒฯ กิ๊ด เป๋น ไบ้, แฑง มี่ง เถา เม่ย ตี่ง เหฒียง เญย ต๋อง. เยียม หน่าย ไจ๊ ฆอย เดี๋ยง, เม่ย ฯฒฯ ไฮ่ ต้อ เจี๊ยน มี่ง อ๊ะ. เม่ย หย่า อ๋อย หฒุ หฒิว เยีย โท้ เญย หว่า หลิ่ว เล์ย หญั่น ฮบ ปุน เยีย เญย เปย๊า ฒง เมี่ยน.”

10ฮีลาม ฯฒฯ หลิ่ว เล์ย สีดา ฒ่ง เดี๋ยง เหธา ฒ่ง เดี๋ยง ปุน ซาโลมอน หฒิว ซาโลมอน อ๋อย หล่ง เญย.

11ซาโลมอน หย่า ฝูง อี สิน อี หว่าน ท้ง เบย้า วิด เหธา อี หว่าน อี ธิน ท้ง เฒียน กะลั้น โย่ว มี่ง ปุน ฮีลาม เหว่ย นิ่น เญย เปย๊า ฒง เมี่ยน เญย หญั่น ฮบ. ซาโลมอน หฮญังๆ ฮนั้ง น้าย นอ ฝูง ปุน ฮีลาม.

12เฒี้ยว เหธย ธง-เม่ง ปุน ซาโลมอน หฒิว นิ่น แล์ง เญย หว่า. ฮีลาม เหธา ซาโลมอน จิว ทง ม่าย แป้ง ออน, ล่าน เหธา ล่าน เหลียบ เจี์ย แหง่ง หว่า.

13ซาโลมอน ฮู่ง เยียม อิสะลาเอน เญย หฒวัง เมี่ยน กิ๊น ธ้วด ปัว หว่าน เต้า กง-เมี่ยน อ๊าบ เถง โหฒว กง.

14นิ่น พ้าย น้าย เต๋ย เมี่ยน โหฒว ปัว กวั้น ทิ้ว เจี๊ยน มี่ง เลบานอน, เหยียด หฮลา เหยียด หว่าน เต้า. ฮนั้ง หน่าย นิ่น บัว ฯฒฯ เยียม เลบานอน เหยียด หฮลา เหญียะ, แอ๋ง เยียม เปย๊า อี หฮลา เหญียะ. อาโดนีลัม กุ๊น น้าย เต๋ย หฒุ อ๊าบ ต้าย โหฒว กง เญย เมี่ยน.

15ซาโลมอน หย่า ม่าย เสี่ย หว่าน เต้า เปี้ยน กะน้าย เญย เมี่ยน หย่า ม่าย เหฮยียด หว่าน เยียม บง-ไอ๊ ต๋อง หฒุ หละเปย๊ย.

16กั้น หธะเหล่ง แอ๋ง ม่าย ปัว ธิน ฟาม-แป๊ะ เต้า โหฒว โฮล เญย เมี่ยน กุ๊น กง, หย่า กุ๊น โหฒว กง เญย เมี่ยน.

17หฒิว ฮู่ง เตี๋ย พ้าย เญย หว่า, เมี่ยน หฒุ เหฒียง จ๋าย ไห่, โฮล ไห่ เญย ต้ม หละเปย๊ย เหว่ย หล่ง หฒุ เหฒียง เญย หละเปย๊ย เหลียบ หฒั่ง เฒี้ยว เญย เปย๊า เญย กอน-โด๊ะ.

18ซาโลมอน โหฒว เปย๊า เญย หฒั่ง เมี่ยน เหธา ฮีลาม โหฒว เปย๊า เญย หฒั่ง เมี่ยน เหธา เกบาน เมี่ยน, หฒุ หละเปย๊ย หย่า หลิ่ว เล์ย เหฒียง เดี๋ยง เหว่ย โหฒว หฒั่ง ทิน-ฮู่ง เญย เปย๊า.

← Chapter 4 Jump to: Chapter 6 →