1 Kings 22

Mien Bible (Thai Script) © Thailand Bible Society, 2007

← Chapter 21 Jump to:

1ปัว หฮญัง กะญั์ว ซีเลีย เหธา อิสะลาเอน น้าย เต๋ย อี นอม กั๊วะ ไม้ ม่าย เบ๊าะ จ๋า เญย สี่.

2มป่า เถา ตะฟาม หฮญัง วั้ว หฮญัง, ยูดา กั๊วะ เญย ฮู่ง, เยโฮซาฟัด, ต้าย ล์อ อิสะลาเอน เญย ฮู่ง.

3อิสะลาเอน เญย ฮู่ง ก๊อง บั๋ว นิ่น เญย เจียน, “เม่ย บัว ฮิ้ว เญย ไฟ? ลาโม้ดกิเลอาด เป๋น บัว เญย. บัว หย่า ไม้ โหฒว หาย หญู่ง. วั้ว นอม ฒี่ง เยียม ซีเลีย ฮู่ง เญย ปั์ว-เดี๊ย, บัว หย่า ไม้ ธ้าง หฑวน.”

4นิ่น ฯฒฯ หน่าย เยโฮซาฟัด, “เม่ย เหธา เยีย มี่ง เบ๊าะ ลาโม้ดกิเลอาด ไฟ?” เยโฮซาฟัด เตา อิสะลาเอน เญย ฮู่ง, “เยีย หย่า ฮนั้ง เม่ย นอ. เยีย เญย แปะ ฝีง หย่า ฮนั้ง เม่ย เญย. เยีย เญย ม์า หย่า ฮนั้ง เม่ย เญย.”

5มป่า เยโฮซาฟัด หย่า ก๊อง บั๋ว อิสะลาเอน เญย ฮู่ง, “บัว อ๋อย หฒุ หน่าย เฒี้ยว ด่าง.”

6อิสะลาเอน เญย ฮู่ง ฯฒฯ เห่ว นิ่น เญย หฒวัง โต่ว หว่า เมี่ยน ต้าย ฒุ้น. เหยียด ฒู้ง ม่าย เฝย แป๊ะ เต้า. ฮู่ง เตี๋ย หน่าย ก๋า นิ่น บัว, “เยีย มี่ง เบ๊าะ ลาโม้ดกิเลอาด หอบ ไฟ ไม้ หอบ?” นิ่น บัว เตา, “กุ๊น มี่ง อ๊ะ. เฒี้ยว อ๋อย เฒาะ วั้ว นอม ฒี่ง จิว ปุน เยียม ฮู่ง เตี๋ย เญย ปั์ว-เดี๊ย.”

7เยโฮซาฟัด หน่าย ก๋า, “เยียม น้าย ไม้ ม่าย เฒี้ยว เญย กั้น เต้า โต่ว หว่า เมี่ยน บัว ไฮ่ หน่าย เญย ไฟ?”

8อิสะลาเอน เญย ฮู่ง เตา เยโฮซาฟัด, “หธ่อ ม่าย เต้า บัว ไฮ่ ปั่ง เหว่ย เถง บัว หน่าย เฒี้ยว มป่า เยีย ฑอง นิ่น เหว่ย หฒุ นิ่น ไม้ โต่ว เจี๋ย หลง เญย หว่า ปุน เยีย. ขูง โต่ว เธี้ยว เญย หว่า ฮนั้ง. น้าย เต้า เซ อิมลา เญย ตอน, มีคายา.” เยโฮซาฟัด ก๊อง, “ฮู่ง เตี๋ย ไม้ หอบ หฒุ ฮนั้ง หน่าย ก๊อง.”

9อิสะลาเอน เญย ฮู่ง ฯฒฯ เห่ว นิ่น เญย เหยียด เต้า เจียน ต้าย หย่า บั๋ว นิ่น, “มี่ง ต้อ อิมลา เญย ตอน, มีคายา, เซี้ยบๆ เญย ต้าย ม่าะ!”

10อิสะลาเอน เญย ฮู่ง เหธา ยูดา เญย ฮู่ง, เยโฮซาฟัด, เยียม สะมาเลีย เญย ฒี่ง แก้ง ด่าง, เบ๊าะ เบย้า เญย เธี้ยง. เก๊าะ-เมี่ยน เฒว์ย เจี๊ยน ฮู่ง เหว่ย หย่า ฒอง เจี๊ยน นิ่น บัว เญย ฮู่ง ลุย. หฒวัง โต่ว หว่า เมี่ยน เยียม เจี๊ยน วั้ว โต่ว เจี๊ยน หว่า เยียม.

11เคนาอะนา เญย ตอน, เสเดคียา, หล่ง เฮลียะ โหฒว จอง. นิ่น ก๊อง, “ เฒี้ยว ฮนั้ง น้าย ก๊อง, ‘เม่ย อ๋อย หล่ง น้าย เต๋ย จอง เบ๊าะ ซีเลีย เมี่ยน เถา เหมียด เหฑ่ง นิ่น บัว.’”

12หฒวัง โต่ว หว่า เมี่ยน หย่า ฟี่ ฮนั้ง เญย โต่ว หว่า. นิ่น บัว ก๊อง, “กุ๊น มี่ง เบ๊าะ ลาโม้ดกิเลอาด ฯฒฯ เบ๊าะ ฮี่ง, เหว่ย หฒุ เฒี้ยว อ๋อย เฒาะ วั้ว นอม ฒี่ง จิว ปุน เยียม ฮู่ง เตี๋ย เญย ปั์ว-เดี๊ย.”

13มี่ง เห่ว มีคายา ต้าย วั้ว เต้า โต่ว เฝียน เมี่ยน ก๊อง บั๋ว นิ่น, “หฒวัง โต่ว หว่า เมี่ยน ต้ง โจ๋ว หว่า ก๊อง ฮู่ง เตี๋ย อ๋อย ตุ๊ หลง. โท้ เม่ย เหธา วั้ว เต๋ย ต้ง โจ๋ว หว่า ก๊อง หย่า ขูง ก๊อง ฮู่ง เตี๋ย อ๋อย ตุ๊ หลง ฮนั้ง.”

14มป่า มีคายา ก๊อง, “เยีย เฒี้ยง เจี๊ยน เฒี่ยง เจี๊ยน เญย เฒี้ยว แล์ง หว่า, เฒี้ยว ก๊อง หาย หญู่ง เยีย ขูง ไฮ่ ก๊อง วั้ว หญู่ง ฮนั้ง.”

15มี่ง เถา ฮู่ง เตี๋ย วั้ว หฒั่น, ฮู่ง เตี๋ย หน่าย นิ่น, “มีคายา อ่า, เยีย บัว มี่ง เบ๊าะ ลาโม้ดกิเลอาด หอบ ไฟ ไม้ หอบ?” มีคายา เตา, “กุ๊น มี่ง เบ๊าะ หย่า เบ๊าะ ตุ๊ ฮี่ง. เฒี้ยว อ๋อย เฒาะ วั้ว นอม ฒี่ง จิว ปุน เยียม ฮู่ง เตี๋ย เญย ปั์ว-เดี๊ย.”

16มป่า ฮู่ง เตี๋ย ก๊อง บั๋ว นิ่น, “เยีย ปุน เม่ย โฮ้ว บัวะ เหฒีย หฑุ่น หว่า เม่ย เต๊ง เฒี้ยว เญย บั๋ว ขูง ก๊อง เฒียน หว่า ฮนั้ง.”

17มีคายา ฯฒฯ ก๊อง, “เยีย ปวัด อิสะลาเอน เญย หฒวัง เมี่ยน หฑาน มี่ง เยียม บง ฮนั้ง ปะกี ยู่ง กวั้น ไม้ ม่าย หมั่ง ยู่ง เญย เมี่ยน โก๋ว นอ. เฒี้ยว หย่า ก๊อง, ‘น้าย เต๋ย แปะ ฝีง ไม้ ม่าย เฒี้ยว. อ๋อย หฒุ ปุน นิ่น บัว เก๊าะ-เมี่ยน แป้ง ออน เญย หฑวน เก๊าะ-เมี่ยน เญย เปย๊า.’”

18อิสะลาเอน เญย ฮู่ง ก๊อง บั๋ว เยโฮซาฟัด, “เยีย ไม้ เฒ์ย ก๊อง เจี๋ย บั๋ว เม่ย, น้าย เต้า เหยียด ลิ์ว ไม้ โต่ว หลง เญย หว่า ปุน เยีย. นิ่น ขูง โต่ว เธี้ยว เญย หว่า ฮนั้ง.”

19มีคายา แอ๋ง ก๊อง, “เม่ย อ๋อย หฒุ หมวัง เฒี้ยว เญย หว่า. เยีย ปวัด เฒี้ยว เฒว์ย นิ่น เญย ฮู่ง เหว่ย, หย่า ปวัด กู้ หงว่าย ลู่ง เญย หฒวัง ฟิน-เมี่ยน เว่ย ก๋อม นิ่น หฒาย แหมง บย่าว แหมง.

20เฒี้ยว ก๊อง, ‘หาย เต้า อ๋อย ดั๊ว อาหับ มี่ง ลาโม้ดกิเลอาด, เยียม วั้ว หฒุ ไต่?’ “ม่าย เต้า ฮนั้ง น้าย นอ ก๊อง, ม่าย เต้า ฮนั้ง วั้ว นอ ก๊อง.

21ฆะฮ้า ม่าย เต้า ธ้วด ต้าย โซ้ว เจี๊ยน เฒี้ยว เญย หฑะเฮมียน ก๊อง, ‘เยีย อ๋อย ดั๊ว นิ่น.’

22“ เฒี้ยว หน่าย นิ่น, ‘เม่ย อ๋อย หล่ง หาย หญู่ง หฒะเอ๋ย?’ “นิ่น ก๊อง, ‘เยีย อ๋อย มี่ง ปุน น้าย เต๋ย หฒวัง โต่ว หว่า เมี่ยน ก๊อง-แปะ.’ “ เฒี้ยว แอ๋ง ก๊อง, ‘ฮนั้ง หน่าย เม่ย หฒะเก้ง ไฮ่ ดั๊ว ตุ๊ หฒุ นิ่น. กุ๊น มี่ง โหฒว ม่าะ!’

23“อี้ หฒั่น เฒี้ยว ปุน เม่ย เญย น้าย เต๋ย โต่ว หว่า เมี่ยน เหยียด ฒู้ง ก๊อง-แปะ. เฒี้ยว ฒู้ง ตี่ง เหฒียง ปุน เม่ย หฒุ ต้ม เหฒะ หน่าน.”

24เคนาอะนา เญย ตอน, เสเดคียา, มี่ง เถา, ไบ๋ มีคายา เญย เฮมียน หย่า หน่าย นิ่น, “ เฒี้ยว เญย สีง ลี่ง ฮนั้ง หาย นอ ธ้วด เยีย มี่ง เหธา เม่ย ก๊อง หว่า แล่?”

25มีคายา เตา, “เม่ย เปียะ กะญั์ว เจี๋ย เญย เหยียด ฉง ปี๋ง เจี๊ยน วั้ว เม่ย ฯฒฯ ฮิ้ว อ๊ะ.”

26อิสะลาเอน เญย ฮู่ง ก๊อง, “เฒาะ มีคายา ฝูง หฑวน จิว ปุน อาโมน แซ้ง-เฒี้ยว เหธา ฮู่ง เญย ตอน, โยอาด.

27อ๋อย หฒุ ก๊อง บั๋ว นิ่น บัว, ‘ฮู่ง เตี๋ย ฮนั้ง น้าย นอ ก๊อง, “เฒาะ น้าย เต้า โล้ หววน เจี๊ยน โล่, ปุน ววม เหธา ฌั้ว เก๋า ยู์ง เจี๊ยน แหม่ง ฮนั้ง, เถา เยีย แป้ง ออน เญย หฑวน ต้าย.”’”

28มีคายา ก๊อง, “สี ก๊อง เม่ย ไฮ่ ตุ๊ แป้ง ออน เญย หฑวน ต้าย, เซ ไม้ เฒ์ย เฒี้ยว หล่ง เยีย ก๊อง หว่า.” นิ่น แอ๋ง ก๊อง, “หฒวัง แปะ ฝีง อ่า, โท้ หมวัง หลง โอ่.”

29อิสะลาเอน เญย ฮู่ง เหธา ยูดา เญย ฮู่ง, เยโฮซาฟัด, ฯฒฯ มี่ง ลาโม้ดกิเลอาด.

30อิสะลาเอน เญย ฮู่ง ก๊อง บั๋ว เยโฮซาฟัด, “เปียะ มี่ง เบ๊าะ จ๋า เญย เฒี่ยง โห่ เยีย ฒอง เป๋น กั้น เต้า มป่า เม่ย ฒุ เจี๊ยน เม่ย เญย ฮู่ง ลุย.” อิสะลาเอน เญย ฮู่ง ฯฒฯ ฒอง เป๋น กั้น เต้า, เปียะ มี่ง เบ๊าะ จ๋า.

31ซีเลีย เญย ฮู่ง พ้าย นิ่น เญย ฟ่า เหฒียบ เหญ่ย เต้า เบ๊าะ จ๋า เธีย เญย แปง-เปย๊ย, “ไม้ ตู๋ง เหธา หาย เต้า เบ๊าะ จ๋า, ไม้ กุ๊น โฮล ไฝ. ขูง เหธา อิสะลาเอน เญย ฮู่ง เบ๊าะ ฮนั้ง.”

32เบ๊าะ จ๋า เธีย เญย แปง-เปย๊ย ปวัด เยโฮซาฟัด นิ่น บัว ก๊อง, “น้าย เต้า หฒะเก้ง อิสะลาเอน เญย ฮู่ง.” นิ่น บัว ฯฒฯ ต๋าว ซิน มี่ง เบ๊าะ นิ่น. เยโฮซาฟัด ฯฒฯ เห่ว.

33เบ๊าะ จ๋า เธีย เญย แปง-เปย๊ย ปวัด ไม้ เฒ์ย อิสะลาเอน เญย ฮู่ง, นิ่น บัว ฯฒฯ ต๋าว เธีย, ไม้ หฒุ่น เยโฮซาฟัด อ๊ะ.

34มป่า ม่าย เต้า เมี่ยน โก๊ว-เหมว่ย ป๊วน เหยียด ฑิด ฟอง หย่า หฒุ อิสะลาเอน เญย ฮู่ง เยียม นิ่น ฒุ เบ๊าะ จ๋า เญย ลุย เหยียด คว้าย เหยียด คว้าย เญย บุด๋ง-ฉัง. ฮู่ง ฯฒฯ บั๋ว ฒ้าง นิ่น เญย เธีย วั้ว เต้า, “ต๋าว เธีย ทอ เยีย ธ้วด เบ๊าะ จ๋า เธี้ยง. เยีย หฒุ มุน หมี่ อ๊ะ.”

35วั้ว ฮนอย เฒี่ยง ฮนอย เบ๊าะ จ๋า เฮนี้ย เญย. นิ่น บัว หย่า เซ่ง เจี๊ยน ฮู่ง เตี๋ย เยียม นิ่น เญย เธีย กะญั์ว ฮวิน หมั่ง เจี๊ยน ซีเลีย เมี่ยน เถา ลู่ง หฮมวัง. ลู่ง ม์าน-หฮมวัง นิ่น ไต่ หมี่ อ๊ะ. ฑย้าม เยียม หฒุ มุน เญย ต๋อง ธ้วด ต้าย เหลี่ยว เหฌี่ย เธีย กะญั์ว.

36บะฮนอย ด๊อด เญย เฒี่ยง โห่, ม่าย เฉีย เห่ว ก๋อม แปง-กวั้น เญย ต๋อง ก๊อง, “เก๊าะ-เมี่ยน หฑวน เก๊าะ-เมี่ยน เญย ป๊วน-มู้ง เหธา ป๊วน-เต่ย-ปูง อ๊ะ.”

37ฮู่ง เตี๋ย ฯฒฯ ไต่ หมี่ อ๊ะ. เมี่ยน ฯฒฯ ต้อ นิ่น เญย เซย มี่ง หฒัง เจี๊ยน สะมาเลีย.

38นิ่น บัว เยียม สะมาเลีย เญย ววม-ต้ม หฑาว เธีย. จู๊ ต้าย เบี่ย นิ่น เญย ฑย้าม, (หม่าย ป๊วน-ซิน เญย มเซียะ ตอน หย่า เยียม วั้ว หฑาว ซิน) ฮนั้ง เฒี้ยว ก๊อง เจี๋ย เญย หว่า นอ.

39อาหับ กุ๊น เญย เฒี่ยง โห่ โหฒว เหฒ่ง เหฌี่ย เญย สี่ เหธา นิ่น โหฒว เญย เหยียด ฒู้ง, เหธา นิ่น หล่ง ฒ์าง-ญ่า โหฒว ฮู่ง ติ่น, เหธา นิ่น เหลียบ เญย เหยียด ฒู้ง ฒี่ง, เฟี้ย เจี๊ยน อิสะลาเอน ฮู่ง เญย ฮู่ง โต้ว ตาน.

40อาหับ ฯฒฯ เกวย เสย หมี่ อ๊ะ. นิ่น เญย ตอน, อาหัดยา, หฑิบ เจี๊ยน นิ่น โหฒว ฮู่ง.

41อาหับ โหฒว อิสะลาเอน เญย ฮู่ง ตะเฝย หฮญัง วั้ว หฮญัง, อาสา เญย ตอน, เยโฮซาฟัด, ฝาว เหว่ย โหฒว ยูดา เญย ฮู่ง.

42เยโฮซาฟัด ฝาว เหว่ย โหฒว ฮู่ง วั้ว หฒั่น นิ่น ตุ๊ ฟ่า เหฒียบ ฮม์ หฮญัง. นิ่น เยียม เยลูซาเลม กุ๊น หญี่ เหฒียบ ฮม์ หฮญัง. นิ่น เญย มา เซ ซินหิ เญย เซียะ, บั๋ว เห่ว อาซุบา.

43เยโฮซาฟัด เอย เจี๊ยน นิ่น เญย เตีย โหฒว เญย เจ๊า, ไม้ เพียน เหยียด เต๋ย. หฒิว เฒี้ยว หมั่ง, นิ่น โหฒว ตุ๊ หอบ. มป่า เยียม ฮลัง หฒั่ง เฒี่ยน เญย ต๋อง นิ่น ไม้ แธะ กวั่ง. แปะ ฝีง หธ่อ เยียม วั้ว ฝ่ง ห่อ เหฒี่ย หย่า ปั๊ว ฮูง.

44เยโฮซาฟัด หย่า เหธา อิสะลาเอน เญย ฮู่ง โหฒว หลง จิว ทง.

45เยโฮซาฟัด กุ๊น เญย เฒี่ยง โห่ โหฒว เหฒ่ง เหฌี่ย เญย สี่, เหธา นิ่น โหฒว ธ้วด เญย เหยียด ฒู้ง สี่, เหธา นิ่น ธ้วด มี่ง เบ๊าะ จ๋า เญย สี่, เฟี้ย เจี๊ยน ยูดา ฮู่ง เญย ฮู่ง โต้ว ตาน.

46นิ่น หย่า หฒุ่น ธ้วด เหฑ่ง เยียม หฒั่ง เฒี่ยน เญย ต๋อง หม่าย ป๊วน-ซิน เญย มจั่ง ตอน, ต้ง เยียม นิ่น เญย เตีย โหฒว ฮู่ง เญย เฒี่ยง โห่ เหฒ่ง เหฌี่ย วั้ว เต๋ย.

47วั้ว หฒั่น เอโดม เต่ย-ปูง ไม้ ม่าย ฮู่ง, ม่าย เต้า เจียน ตี๊ เจี๊ยน กุ๊น.

48เยโฮซาฟัด กั๊บ แซง-เอ๋ย ฑั้ง เหว่ย มี่ง โอฟี ทอ เจียม, มป่า ฑั้ง ไม้ แก้ง ตุ๊ มี่ง ฯฒฯ เยียม เอซีโอนเกเบ หว่าย หมี่ อ๊ะ.

49วั้ว หฒั่น อาหับ เญย ตอน, อาหัดยา, ก๊อง บั๋ว เยโฮซาฟัด, “ปุน เยีย เญย เมี่ยน เหธา เม่ย เญย เมี่ยน จวั่ง ฑั้ง มี่ง ม่าะ!” มป่า เยโฮซาฟัด ไม้ คั้ง.

50เยโฮซาฟัด ฯฒฯ เกวย เสย หมี่ อ๊ะ, หย่า เหธา นิ่น เญย อง-ถาย หฒัง เจี๊ยน นิ่น เญย อง-ถาย, ดาวิด, เญย ฒี่ง. นิ่น เญย ตอน, เยโฮลัม, หฑิบ เจี๊ยน นิ่น เญย เตีย โหฒว ฮู่ง.

51เยโฮซาฟัด โหฒว ยูดา เญย ฮู่ง เหฒียบ เธี้ยด หฮญัง วั้ว หฮญัง, อาหับ เญย ตอน, อาหัดยา ฝาว เหว่ย โหฒว อิสะลาเอน เญย ฮู่ง หย่า กุ๊น อิสะลาเอน อี หฮญัง.

52หฒิว เฒี้ยว หมั่ง, นิ่น โหฒว หว่าย สี่ เหว่ย หฒุ นิ่น เอย เจี๊ยน นิ่น เญย เตีย เหธา นิ่น เญย มา โหฒว เญย เจ๊า หย่า เอย เจี๊ยน เนบัด เญย ตอน, เยโลโบอัม, โหฒว เญย สี่, ต้ง ต้อ อิสะลาเอน เมี่ยน ป์าม ฒุ์ย วั้ว เต๋ย.

53อาหัดยา ฮนั้ง นิ่น เญย เตีย นอ, ฟู-สู หฒั่ง บาอัน เฒี่ยน หย่า ธัวะ เฒี้ยว, อิสะลาเอน เญย ทิน-ฮู่ง, เฉีย เจี์ย ไห่.

← Chapter 21 Jump to: