1 Kings 21

Mien Bible (Thai Script) © Thailand Bible Society, 2007

← Chapter 20 Jump to: Chapter 22 →

1น้าย เต๋ย สี่ เจี๋ย ลิ์ว, ฆะฮ้า แอ๋ง ม่าย เต๋ย สี่ ธ้วด. ม่าย เต้า ยิดเลเอน เมี่ยน, บั๋ว เห่ว นาโบด, ม่าย นอม อะหงุ่น หฮวีง เยียม ยิดเลเอน, นิด สะมาเลีย ฮู่ง, อาหับ, เญย ฮู่ง ติ่น.

2อาหับ ก๊อง บั๋ว นาโบด, “โท้ ปุน เม่ย เญย อะหงุ่น หฮวีง เยีย โหฒว ไล เญย หฮวีง เหว่ย หฒุ เยียม นิด เยีย เญย ฮู่ง ติ่น. เยีย ฯฒฯ เฒาะ กั้น นอม เก้า หลง เญย อะหงุ่น หฮวีง เถง เม่ย ทิ้ว ไฟ เม่ย อ๋อย หล่ง ญ่าน เยีย ฯฒฯ ปุน หฒี่ หฮวีง เญย จ๋า-ฒิ่น เม่ย.”

3มป่า นาโบด เตา, “น้าย เซ เยีย เยียม อง-ถาย บัว หฑิบ เญย ป่วน. เฒี้ยว ไม้ ปุน เยีย เฒาะ ปุน กั้น เต้า.”

4อาหับ ฯฒฯ หฑวน เปย๊า. เฮญี้ยว เฑ่า หย่า เฉีย เจี์ย เญย เหว่ย หฒุ วั้ว เต้า ยิดเลเอน เมี่ยน, นาโบด, ก๊อง, “เยีย ไม้ ไฮ่ เฒาะ อง-ถาย บัว หฑิบ เญย ป่วน ปุน เม่ย,” อาหับ ฯฒฯ เปว๋ย เจี๊ยน โหธว, เฮมียน เมี้ยนๆ วั้ว, ไม้ คั้ง หญั่น หาย หญู่ง.

5นิ่น เญย เอ๊า, เยเซเบน ฮู่ง หม่า, เปียะ ต้าย หน่าย นิ่น, “เม่ย เหว่ย หาย ติ่ว เฮญี้ยว ด่ง หน่าย เฑ่า, ไม้ หญั่น หฮนาง?”

6อาหับ เตา, “เหว่ย หฒุ เยีย ก๊อง บั๋ว ยิดเลเอน เมี่ยน, นาโบด, ‘หม่าย เม่ย เญย อะหงุ่น หฮวีง ปุน เยีย, ไฟ สี ก๊อง เม่ย หอบ เฮญี้ยว นอ, เยีย เฒาะ กั้น นอม อะหงุ่น หฮวีง ทิ้ว ปุน เม่ย.’ มป่า นิ่น เตา, ‘เยีย ไม้ เฒาะ เยีย เญย อะหงุ่น หฮวีง จิว ปุน เม่ย.’”

7นิ่น เญย เอ๊า, เยเซเบน, ก๊อง, “เม่ย โหฒว ฮู่ง กุ๊น อิสะลาเอน ไม้ เฒ์ย? เจี์ย ซิน ต้าย เฌียนๆ โย่วๆ เญย หญั่น หฮนาง อ๊ะ. เยีย อ๋อย เฒาะ ยิดเลเอน เมี่ยน, นาโบด, เญย หฮวีง จิว ปุน เม่ย.”

8เยเซเบน ฯฒฯ เต๊ง อาหับ เญย บั๋ว เฟี้ย เฝียน, หย่า เบ๊าะ เจี๊ยน ฮู่ง เญย เหยียน, ฝูง มี่ง ปุน เหธา นาโบด จวั่ง ฒี่ง เญย เมี่ยน โก๋ เหธา โหฒว โฮล เญย เมี่ยน.

9วั้ว เฒ้ย เฝียน ก๊อง, “อ๋อย หฒุ ตี่ง นอม ฮนอย เฒย ไม้ หญั่น หาย หญู่ง หย่า ปุน นาโบด เฒว์ย เจี๊ยน หฒวัง เมี่ยน บุด๋ง, ฮลัง เญย ต๋อง.

10มป่า ล์อ อี เต้า เฮญี้ยว เพียน เญย เมี่ยน เฒว์ย เจี๊ยน เหธา นาโบด ต๋อย เฮมียน หย่า โหฒว จ๊า ฒอง-เหฒง ก๊อง นิ่น เหฒียว ทิน-ฮู่ง หย่า เหฒียว ฮู่ง เตี๋ย. ฆะฮ้า ต้อ นิ่น ธ้วด มี่ง หล่ง หละเปย๊ย ฒง ไต่.”

11เหธา นาโบด จวั่ง ฒี่ง เยียม วั้ว เต๋ย เมี่ยน โก๋ เหธา เจียน เอย เจี๊ยน เยเซเบน เฟี้ย เญย หว่า โหฒว. หฒิว นิ่น ฝูง ปุน นิ่น บัว เญย เฝียน,

12นิ่น บัว ตี่ง นอม ฮนอย ฒุ่น บั๋ว เมี่ยน เฒย ไม้ หญั่น หาย หญู่ง, หย่า ปุน นาโบด เฒว์ย แปะ ฝีง บุด๋ง, ฮลัง เญย ต๋อง.

13วั้ว เต๋ย อี เต้า เฮญี้ยว เพียน เญย เมี่ยน ต้าย เฒว์ย เจี๊ยน เหธา นาโบด ต๋อย เฮมียน. นิ่น บัว ตอง เจี๊ยน หฒวัง แปะ ฝีง โก๋ นาโบด. นิ่น บัว ก๊อง, “นาโบด เหฒียว ทิน-ฮู่ง หย่า เหฒียว ฮู่ง เตี๋ย.” หฒวัง เมี่ยน ฯฒฯ เฒาะ นาโบด ต้อ ธ้วด กะเหญี่ย หฒิ ฒี่ง, เฒาะ หละเปย๊ย ฒง ไต่ นิ่น.

14ฆะฮ้า นิ่น บัว ปุน หว่า มี่ง บั๋ว เยเซเบน, “นาโบด หฒุ หละเปย๊ย ฒง ไต่ หมี่ อ๊ะ.”

15เยเซเบน เยี้ยด ไฮ์ นาโบด หฒุ หละเปย๊ย ฒง ไต่, นิ่น มี่ง บั๋ว อาหับ, “กุ๊น มี่ง เฒาะ ยิดเลเอน เมี่ยน, นาโบด, ไม้ คั้ง ปุน เม่ย วั้ว นอม อะหงุ่น หฮวีง เหว่ย หฒุ นาโบด ไม้ เยียม อ๊ะ. นิ่น ไต่ หมี่ อ๊ะ.”

16อาหับ ไฮ์ ก๊อง นาโบด ไต่ หมี่ อ๊ะ, นิ่น ธ้วด มี่ง เถา ยิดเลเอน เมี่ยน, นาโบด, เญย อะหงุ่น หฮวีง เหว่ย เฒาะ เป๋น นิ่น เญย ป่วน.

17เฒี้ยว ก๊อง บั๋ว ทิดบี เมี่ยน, เอลียา,

18“มี่ง สะมาเลีย ปวั้ง อิสะลาเอน เมี่ยน เญย ฮู่ง, อาหับ. นิ่น อี้ หฒั่น เยียม นาโบด เญย อะหงุ่น หฮวีง, อ๋อย เฒาะ วั้ว นอม หฮวีง อ๊ะ.

19อ๋อย หฒุ ก๊อง บั๋ว นิ่น, ‘ เฒี้ยว ฮนั้ง น้าย นอ ก๊อง, “เม่ย ไต๋ เต้า เมี่ยน แอ๋ง เฒาะ นิ่น หฑิบ เญย จา-ตี้ง ไม้ เฒ์ย?” ฆะฮ้า ก๊อง บั๋ว นิ่น, “ เฒี้ยว ฮนั้ง น้าย นอ ก๊อง, จู๊ เบี่ย นาโบด เญย ฑย้าม วั้ว นอม ต๋อง, จู๊ หย่า อ๋อย เยียม วั้ว นอม ต๋อง เบี่ย เม่ย เญย ฑย้าม.”’”

20อาหับ ก๊อง บั๋ว เอลียา, “เยีย เญย วิน-วั้ง อ้า! เม่ย ล์อ ปวัด เยีย หมี่ อ๊ะ.” เอลียา เตา, “เยีย ล์อ ปวัด เม่ย หมี่ อ๊ะ, เหว่ย หฒุ เอย เฒี้ยว หมั่ง เม่ย หม่าย กั้น โหฒว เอ๊าะ สี่.

21เฒี้ยว ก๊อง, ‘เยีย ฒู้ง อ๋อย ปุน เหฒะ หน่าน ห่อย เม่ย. เยีย อ๋อย กว๊าด เหฑ่ง เม่ย เญย เฒ้ย-ฟุน, ตะฟ่าน เยียม อิสะลาเอน เมี่ยน บุด๋ง เม่ย เญย มจั่ง ตอน, ไม้ กุ๊น โหฒว โน่ว ไฟ ไม้ โหฒว โน่ว, ไพ กวั่ง เหฑ่ง.

22เยีย อ๋อย ปุน เม่ย เญย โต้ว ฒง ฮนั้ง เนบัด เญย ตอน, เยโลโบอัม, เหธา อาหิยา เญย ตอน, บาอาชา, เญย โต้ว ฒง เหว่ย หฒุ เม่ย ธัวะ เยีย เฉีย เจี์ย แอ๋ง ปุน อิสะลาเอน เมี่ยน ป์าม ฒุ์ย.’

23“เยเซเบน แอ๊ะ, เฒี้ยว หย่า ก๊อง, ‘จู๊ อ๋อย เยียม ยิดเลเอน ฒี่ง กะญั์ว หญั่น นิ่น เญย เซย.’

24“ตะฟ่าน อาหับ เญย เมี่ยน, เยียม ฒี่ง ไต่ วั้ว เต๋ย, อ๋อย หฒุ จู๊ หญั่น. เยียม วั้ว น่า ไต่ วั้ว เต๋ย, อ๋อย หฒุ ด๊าม-ลู่ง เญย เหนาะ หญั่น.”

25(ไม้ ม่าย เจี๋ย เหยียด เต้า ฮนั้ง อาหับ, เอย เฒี้ยว หมั่ง หม่าย กั้น โหฒว เอ๊าะ สี่. เซ นิ่น เญย เอ๊า, เยเซเบน, โธะ นิ่น โหฒว.

26อาหับ โหฒว กั้ม เฑี้ย ไห่, โหยว เจี๋ย เญย สี่, มี่ง หฒั่ง หมิ่ว-ฝัง, ฮนั้ง เฒี้ยว เยียม อิสะลาเอน เมี่ยน เญย วั้ว ด่าง แหมง หฒุ่น ธ้วด วั้ว เต๋ย อาโมไล เมี่ยน.)

27อาหับ ไฮ์ น้าย เต๋ย หว่า นิ่น ฯฒฯ เป๊ด นิ่น เญย ลุย-โหว, ฒุ เจี๊ยน ล่าม่า เดีย-โธว หย่า เฒย ไม้ หญั่น หาย หญู่ง. นิ่น เปว๋ย เจี๊ยน หย่า ฒุ ล่าม่า เดีย-โธว. เจี๋ย มี่ง เจี๋ย ต้าย ปวัด เฮญี้ยว เฑ่าๆ วั้ว.

28เฒี้ยว แอ๋ง ก๊อง บั๋ว ทิดบี เมี่ยน, เอลียา,

29“เม่ย ปวัด อาหับ ฮนั้ง หาย นอ เยียม เยีย เญย หฑะเฮมียน ฒัด กั้น โหฒว ไฝ? เหว่ย หฒุ นิ่น ฒัด นิ่น กั้น โหฒว ไฝ, เยียม นิ่น เญย เสย เฒ้ย เยีย ไม้ ปุน นิ่น หฒุ น้าย เต๋ย เหฒะ หน่าน. มป่า เยียม นิ่น เญย ตอน เญย ลู่ง เดี๊ย, นิ่น เญย โต้ว ฒง อ๋อย หฒุ น้าย เต๋ย เหฒะ หน่าน.”

← Chapter 20 Jump to: Chapter 22 →