1 Kings 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1เหว่ย ซาโลมอน ฮู่ง หล่ง อียิบ เต่ย-ปูง เญย ฮู่ง, ฟาโล, เญย เซียะ โหฒว เอ๊า, ซาโลมอน เหธา ฟาโล ฯฒฯ ม่าย จิว ทง. ซาโลมอน ต้อ น้าย เต้า เซียะ ต้าย เยียม เจี๊ยน ดาวิด เญย ฒี่ง ฒั้ว นิ่น โหฒว เหฒียง นิ่น กั้น เญย ฮู่ง ติ่น เหธา หฒั่ง เฒี้ยว เญย เปย๊า, หย่า โหฒว เหฒียง เยลูซาเลม เญย ฒี่ง หลาด.

2วั้ว หฒั่น แปะ ฝีง หธ่อ เยียม ฮลัง เญย ต๋อง ฝ่ง ห่อ เหฒี่ย เหว่ย หฒุ ไม้ แก้ง โหฒว เปย๊า เหว่ย เฒี้ยว เญย เม่ง.

3ซาโลมอน ฮนั้ม เฒี้ยว หย่า เอย เจี๊ยน นิ่น เญย เตีย, ดาวิด, เญย หลี่ง โหฒว, ธ้วด ลิ์ว นิ่น เยียม ฮลัง เญย ต๋อง ฝ่ง ห่อ เหฒี่ย หย่า ปั๊ว ฮูง.

4ฮู่ง เตี๋ย มี่ง กิเบโอน, อ๋อย เยียม วั้ว ฝ่ง ห่อ เหฒี่ย เหว่ย หฒุ วั้ว นอม ฮลัง เญย ต๋อง ม่าย เม่ง เต้า เก้า โฮล เจี๋ย. ซาโลมอน ฯฒฯ ฝ่ง ห่อ เหยียด ธิน เต้า แซง-คู้ อัน วั้ว นอม เหฒี่ย-ต้อง ปั๊ว เหฒี่ย.

5เยียม กิเบโอน ม่าย ม์วน ซาโลมอน เบ๋ย ปวัด เฒี้ยว ต้าย เหธา นิ่น ก๊อง หว่า. ทิน-ฮู่ง ก๊อง, “เม่ย อ๋อย เยีย เหธย หาย หญู่ง ปุน เม่ย, กุ๊น โท้ อ๊ะ.”

6ซาโลมอน ก๊อง, “เม่ย ปุน ธีง เม่ย หฒะเก้ง ฮนั้ม ไห่ เม่ย เญย โปว, เยีย เญย เตีย, ดาวิด, เหว่ย หฒุ นิ่น เยียม เม่ย เญย หฑะเฮมียน เหฒียบ ฒัวะ เญย, เฮญี้ยว หฒีง เญย, ม่าย เฮญี้ยว โหฒว หอบ ปุน เม่ย. เม่ย หธ่อ ฮนั้ม ไห่ นิ่น หย่า หฒั่นๆ ฮนั้ม หธีง ต้าย ปุน นิ่น ม่าย ตอน อี้ ฮนอย เฒว์ย เจี๊ยน นิ่น เญย เหว่ย.

7“โอ เฒี้ยว, เยีย เญย ทิน-ฮู่ง อ่า, อี้ หฒั่น เม่ย ปุน เม่ย เญย โปว โหฒว ฮู่ง ตี๊ เยีย เญย เตีย, ดาวิด, ไม้ กุ๊น เยีย โหฒว ฝุเจว๊ย หย่า ไม้ ฮิ้ว ตุ๊ ฮนั้ง หาย นอ เปียะ ธ้วด.

8เม่ย เญย โปว เยียม เม่ย กิ๊น ต้าย เญย แปะ ฝีง บุด๋ง, เซ เหยียด ฝีง โฮล เญย, ฒู้ง ไม้ ไฮ่ ฝุน, ไม้ ไฮ่ ซ้าว ไม้ เหฑ่ง.

9เหว่ย น้าย โท้ เหธย ปุน เม่ย เญย โปว ม่าย ธง-เม่ง ไฮ่ ฮิ้ว ตุ๊ หลง, ไฮ่ ฮิ้ว ตุ๊ เธี้ยว, เหว่ย ปุน เยีย ไฮ่ กุ๊น ตุ๊ เม่ย ด่ง น้าย ธั้ม เญย แปะ ฝีง.”

10ซาโลมอน ฮนั้ง น้าย นอ โท้ เซ หอบ เฒี้ยว เญย เฮญี้ยว.

11ทิน-ฮู่ง ฯฒฯ ก๊อง บั๋ว นิ่น, “เหว่ย หฒุ เม่ย ฮนั้ง น้าย นอ โท้, ไม้ เฒ์ย เหว่ย กั้น โท้ แหม่ง ด๊าว ไฟ ปุ๊ด ฒ่อย ไฟ อ๋อย เหมียด วิน-วั้ง เญย แหม่ง, มป่า เม่ย โท้ ธง-เม่ง เหว่ย ปุน เม่ย ไฮ่ สัม ตุ๊ ธ้วด หาย หญู่ง หอบ เญย, แป้ง ฟิม เญย,

12เยีย ฯฒฯ เอย เม่ย โท้ เญย โหฒว. เยีย เหธย ธง-เม่ง ปุน เม่ย ม่าย ปั้น เหฒ่ย ฮิ้ว ตุ๊ หอบ. เจี๋ย ต้าย เญย เฒี่ยง โห่ ไม้ ม่าย หาย เต้า ฮนั้ง เม่ย. ฆะฮ้า ฮี้ง หย่า ไม้ ม่าย หาย เต้า ฮนั้ง เม่ย.

13เลี่ยม เม่ย ไม้ โท้ เญย, เยีย หย่า อ๋อย เหธย ปุน เม่ย. เยีย ปุน เม่ย ปุ๊ด ฒ่อย, ปุน เมี่ยน ท่าย เหว่ย เยียม เม่ย เญย เสย เฒ้ย ไม้ ม่าย กั้น เต้า ฮู่ง เตี๋ย ด่ง เม่ย.

14สี ก๊อง เม่ย กัน หลง เยีย, หมวัง เยีย เญย เล์ย-หลัด เหธา หลี่ง ฮนั้ง เม่ย เญย เตีย, ดาวิด นอ, เยีย ฯฒฯ ปุน เม่ย เฒี่ยง ตุ๊ เสี่ยว ญ่วน ด๊าว.”

15ซาโลมอน เญีย ต้าย ฯฒฯ ฮิ้ว ตุ๊ นิ่น เบ๋ย ปวัด. นิ่น หฑวน เยลูซาเลม มี่ง โซ้ว เจี๊ยน เฒี้ยว เญย แล์ง แหง่ง หว่า ฟาง หฑะเฮมียน แหมง ฝ่ง ห่อ ปั๊ว เหฒี่ย เหธา เหฒี่ย เหว่ย จิว ทง เญย กะน้าย, แอ๋ง เหว่ย นิ่น เญย หฒวัง เจียน เบ่น หฮนาง โฮล เญย.

16ม่าย ฮนอย ม่าย อี เต้า หม่าย ป๊วน-ซิน เญย มเซียะ ตอน ต้าย ล์อ ฮู่ง เตี๋ย หย่า โซ้ว เจี๊ยน นิ่น เญย หฑะเฮมียน.

17ม่าย เต้า ก๊อง, “เยีย เญย เฒี้ยว อ่า, น้าย เต้า มเซียะ ตอน เหธา เยีย จวั่ง นอม เปย๊า เยียม. นิ่น เหธา เยีย เยียม เปย๊า วั้ว หฒั่น เยีย ยู์ง ตุ๊ เต้า กู้งว์า.

18เยีย ยู์ง ลิ์ว, ฆะฮ้า ปัว ฮนอย นิ่น หย่า ยู์ง ตุ๊ เต้า. เยีย บัว กั้น เยียม ฮนั้ง. ธ้วด ลิ์ว เยีย บัว อี เต้า, ไม้ ม่าย หาย เต้า เหธา เยีย บัว เยียม เปย๊า.

19ลู่ง ม์วน หฒั่น น้าย เต้า มเซียะ ตอน เญย กู้งว์า ไต่, เหว่ย หฒุ นิ่น งัด หฒุ ไต่ หมี่ อ๊ะ.

20ด๊าม ม์วน เยีย, เม่ย เญย โปว, เปว๋ย มฌ่อม วั้ว หฒั่น, นิ่น เจี์ย ซิน ต้าย. นิ่น เยียม เยีย เญย ซิน-เฮลน ฮล้อบ เจี๊ยน เยีย เญย ตอน มี่ง อัน เจี๊ยน นิ่น เญย กะเฮลน, แอ๋ง เฒาะ นิ่น เญย กู้งว์า-ไต่ อัน เจี๊ยน เยีย เญย กะเฮลน.

21ตะเหญ่ย ดอม เยีย เญีย ต้าย อ๋อย ปุน กู้งว์า ฮบ หญอ, ปวัด กู้งว์า ไต่ หมี่ อ๊ะ. ลู่ง หฒะเก้ง ฌัง, เยีย หลงๆ เญย หมั่ง, ปวัด ไม้ เฒ์ย เยีย ยู์ง เญย ตอน.”

22วั้ว เต้า มเซียะ ตอน ก๊อง, “ไม้ เฒ์ย เหลาะ. นั่ง วั้ว เต้า เซ เยีย เญย ตอน. ไต่ วั้ว เต้า เซ เม่ย เญย.” มป่า ตะเยี้ยด เต้า ก๊อง, “ไม้ เฒ์ย! ไต่ วั้ว เต้า เซ เม่ย เญย. นั่ง วั้ว เต้า เซ เยีย เญย.” นิ่น บัว ฯฒฯ เยียม ฮู่ง เตี๋ย เญย หฑะเฮมียน ฮนั้ง น้าย นอ แฑง.

23ฮู่ง เตี๋ย ก๊อง, “เหยียด เต้า ก๊อง, ‘นั่ง น้าย เต้า ตอน เซ เยีย เญย. ไต่ วั้ว เต้า เซ เม่ย เญย.’ วั้ว เต้า ก๊อง, ‘ไม้ เฒ์ย! ไต่ วั้ว เต้า เซ เม่ย เญย. นั่ง วั้ว เต้า เซ เยีย เญย.’”

24ฮู่ง เตี๋ย ฯฒฯ ก๊อง, “เฒาะ ฒูง หฑุ ด๊าว ต้าย ปุน เยีย.” เมี่ยน ฯฒฯ ต้อ หฑุ ด๊าว ต้าย ปุน ฮู่ง เตี๋ย.

25ฮู่ง เตี๋ย ฯฒฯ พ้าย เมี่ยน, “เฒาะ นั่ง น้าย เต้า กู้งว์า พิ โหฒว อี แหมง. เฒาะ แหมง ปุน น้าย เต้า มเซียะ ตอน, แอ๋ง เฒาะ แหมง ปุน วั้ว เต้า.”

26นั่ง วั้ว เต้า กู้งว์า เญย มา เหว่ย นิ่น เญย กู้งว์า เฮญี้ยว มุน ไห่ ฯฒฯ ก๊อง, “เยีย เญย เฒี้ยว อ้า! โท้ เฒาะ กู้งว์า-นั่ง ปุน วั้ว เต้า มเซียะ ตอน ม่าะ! ไม้ ตู๋ง ไต๋ นิ่น อ๊ะ!” มป่า วั้ว เต้า มเซียะ ตอน ก๊อง, “ไม้ ตู๋ง ปุน เยีย หย่า ไม้ ตู๋ง ปุน นิ่น. เฒาะ ต้าย พิ โหฒว อี แหมง.”

27ฮู่ง เตี๋ย ก๊อง, “เฒาะ กู้งว์า-นั่ง ปุน ตะเยี้ยด เต้า มเซียะ ตอน. ไม้ ตู๋ง ไต๋. ต้ง น้าย เต้า โหฒว เธียน มา.”

28อิสะลาเอน เญย หฒวัง เมี่ยน ไฮ์ ฮู่ง เตี๋ย ฮนั้ง น้าย นอ ตุ๋น สี่, นิ่น บัว ฯฒฯ บัวะ ฮ่อง ไห่, เหว่ย หฒุ นิ่น บัว ปวัด นิ่น ม่าย ทิน-ฮู่ง เหธย ปุน เญย ธง-เม่ง แป้ง ฟิม เญย ตุ๋น สี่.

← Chapter 2 Jump to: Chapter 4 →