1 Kings 2

Mien Bible (Thai Script) © Thailand Bible Society, 2007

1ดาวิด เกวย เสย เญย เฒี่ยง โห่ เถา ฟัด อ๊ะ. นิ่น ฯฒฯ พ้าย หว่า ปุน นิ่น เญย ตอน, ซาโลมอน.

2นิ่น ก๊อง, “อี้ หฒั่น เยีย อ๋อย หฒุ ยั่ง ป้าม เมี่ยน เหยียด ฒู้ง อ๋อย หฒุ ยั่ง เญย เจ๊า. เม่ย อ๋อย หฒุ เฮ้น, ปุน ธีง เม่ย โหฒว จุน-เฒ้ย เมี่ยน.

3อ๋อย หฒุ เอย เจี๊ยน เฒี้ยว, เม่ย เญย ทิน-ฮู่ง, พ้าย เญย หว่า. อ๋อย หฒุ ยั่ง นิ่น เญย เจ๊า หย่า เอย เฟี้ย เจี๊ยน โมเซ เญย เล์ย-หลัด โซว เญย เหยียด ฒู้ง เล์ย-หลัด เหธา หลี่ง เหธา เล์ย. ฮนั้ง หน่าย, ไม้ กุ๊น เม่ย โหฒว หาย หญู่ง ไฟ มี่ง เถา หาย นอม ต๋อง, เม่ย ฯฒฯ ตุ๊ หลง.

4เฒี้ยว หย่า อ๋อย เอย เจี๊ยน นิ่น แล์ง ปุน เยีย เญย หว่า โหฒว. เฒี้ยว ก๊อง, ‘สี ก๊อง เม่ย เญย เฒ้ย-ฟุน ไฝ ฟิม นิ่น บัว ยั่ง เญย เจ๊า, อ๋อย หฒุ หล่ง เหฑ่ง เฮญี้ยว, หล่ง เหฑ่ง หฒะเอ๋ย เหฒียบ ฒัวะ เญย เยียม เยีย เญย หฑะเฮมียน, เม่ย เญย เฒ้ย-ฟุน ฯฒฯ หฑิบ เจี๊ยน อิสะลาเอน เมี่ยน เญย ฮู่ง เหว่ย, ไม้ ตั๋ง.’

5“ไม้ ตาน บัวะ น้าย. เม่ย ฮิ้ว ตุ๊ เสลุยา เญย ตอน, โยอาบ, ฮนั้ง หาย นอ โหฒว ปุน เยีย. นิ่น ไต๋ อิสะลาเอน เมี่ยน เญย อี เต้า แปง-เปย๊ย, เน เญย ตอน, อับเน, เหธา เยเท เญย ตอน, อามาสา. เยียม ถาย-แป้ง เญย เฒี่ยง โห่ นิ่น ไต๋ นิ่น บัว ฮนั้ง เยียม เบ๊าะ จ๋า เญย เฒี่ยง โห่ ไต๋ นิ่น บัว นอ. น้าย เต๋ย ฑย้าม หย่า กั๊วะ หฒุ นิ่น ไซ เจี๊ยน เญย โหว-ฮลาง เหธา ตาบ เจี๊ยน เญย เฮ่.

6เหว่ย น้าย เม่ย อ๋อย หฒุ หฒิว เม่ย เญย ธง-เม่ง โหฒว. ไม้ ตู๋ง ปุน นิ่น เยียม เถา บะเปยย แปะ, ตุ๊ แป้ง ออน เญย มี่ง เยี่ยม เกน.

7“มป่า อ๋อย หฒุ โหฒว หลง ปุน กิเลอาด เมี่ยน, บาซินไล, เญย ตอน บัว, ปุน นิ่น บัว จวั่ง เม่ย เญย เตี้ย หญั่น หฮนาง, เหว่ย หฒุ เยีย เปย๋า เม่ย เญย ก๋อ, อับซาโลม, วั้ว หฒั่น, นิ่น บัว หย่า ฒิบ เยีย หลง เญย

8“เยียม เม่ย น้าย หย่า ม่าย เยียม บาฮูลิม ต้าย เญย เบนยามิน เมี่ยน, เกลา เญย ตอน, ซิเมอี, ต้ง เยีย มี่ง มาหะนาอิม วั้ว ฮนอย นิ่น เหฒียว เยีย โตะ ไห่. มป่า ฆะฮ้า นิ่น เหฌี่ย เถา จอแดน ด้าย ฒิบ เยีย, เยีย ฯฒฯ เฒี้ยง เจี๊ยน เฒี้ยว โฮ้ว หว่า ปุน นิ่น. เยีย ก๊อง, ‘เยีย ฒู้ง ไม้ หล่ง หฑุ ด๊าว ไต๋ เม่ย อ๊ะ.’

9มป่า อี้ หฒั่น เม่ย ไม้ ตู๋ง ฝุน นิ่น ไม้ ม่าย ฒุ์ย. เม่ย เซ ธง-เม่ง เมี่ยน. เม่ย ฯฒฯ ไฮ่ ฮิ้ว ตุ๊ อ๋อย หฒุ ฮนั้ง หาย นอ โหฒว ปุน นิ่น. เม่ย อ๋อย หฒุ ไต๋ น้าย เต้า อง-มฆ้อง-แปะ, ปุน ฑย้าม เหลี่ยว ธ้วด, เหฌี่ย เถา เยี่ยม เกน.”

10ดาวิด ฯฒฯ เกวย เสย หมี่ อ๊ะ. นิ่น เญย เซย หฒัง เจี๊ยน ดาวิด ฒี่ง.

11ดาวิด โหฒว อิสะลาเอน เมี่ยน เญย ฮู่ง เฝย เหฒียบ หฮญัง, เยียม เฮโบโลน กุ๊น เสี่ย หฮญัง, แอ๋ง เยียม เยลูซาเลม กุ๊น ฟ่า เหฒียบ ฟาม หฮญัง.

12ซาโลมอน ฯฒฯ หฑิบ เจี๊ยน นิ่น เญย เตีย, ดาวิด, เฒว์ย ฮู่ง เหว่ย. นิ่น เญย กั๊วะ หย่า เหลียบ ตุ๊ ว้วน เญย.

13ฮักกีด เญย ตอน, อาโดนียา, ต้าย ล์อ ซาโลมอน เญย มา, บัดเชบา. บัดเชบา หน่าย ก๋า, “เม่ย ต้าย เหว่ย แป้ง ออน เญย เจ๊า ไฟ?” อาโดนียา เตา, “เฒ์ย เญย. เยีย ต้าย เหว่ย แป้ง ออน.”

14นิ่น หย่า หฑิบ เจี๊ยน ก๊อง, “เยีย ม่าย เต๋ย หว่า อ๋อย ก๊อง บั๋ว เม่ย.” บัดเชบา ก๊อง, “กุ๊น ก๊อง ม่าะ!”

15อาโดนียา ก๊อง, “เม่ย ฮิ้ว ตุ๊ น้าย นอม กั๊วะ มต้าย เป๋น เยีย เญย. อิสะลาเอน เญย หฒวัง เมี่ยน หย่า ฮนั้ม เจี๊ยน เยีย ตุ๊ โหฒว ฮู่ง. มป่า สี่ ก๊อย เหยี่ยน. กั๊วะ เป๋น เยีย เญย โย์ว เญย, เหว่ย หฒุ เฒี้ยว ปุน นิ่น หมี่ อ๊ะ.

16อี้ หฒั่น เยีย ม่าย เหยียด หญู่ง อ๋อย โท้ เม่ย. โท้ ไม้ ตู๋ง แหง่ง เยีย.” บัดเชบา ก๊อง, “กุ๊น ก๊อง ม่าะ!”

17อาโดนียา ฯฒฯ ก๊อง, “เถง เยีย โท้ ซาโลมอน ฮู่ง, เหว่ย หฒุ ฮนั้ม ต้าย นิ่น ไม้ ไฮ่ แหง่ง เม่ย. โท้ นิ่น ปุน ซูเนม เมี่ยน เญย เซียะ, อาบีช้าก, เยีย หล่ง โหฒว เอ๊า.”

18บัดเชบา ก๊อง, “หลง อ๊ะ. เยีย เถง เม่ย โท้ ฮู่ง เตี๋ย.”

19บัดเชบา ฯฒฯ มี่ง ล์อ ซาโลมอน ฮู่ง เหว่ย เถง อาโดนียา โท้. ฮู่ง เตี๋ย ฯฒฯ โซ้ว เจี์ย ซิน มี่ง ฒิบ นิ่น เญย มา หย่า โด๊ะ มฆ้อง ปุน นิ่น เญย มา, ฯฒฯ มี่ง เฒว์ย เจี๊ยน นิ่น เญย ฮู่ง เหว่ย. นิ่น หย่า พ้าย เมี่ยน ต้อ นอม เหว่ย ต้าย ปุน นิ่น เญย มา เฒว์ย. นิ่น เญย มา ฯฒฯ เฒว์ย เจี๊ยน นิ่น เญย บย่าว แหมง ปูง.

20บัดเชบา ก๊อง, “เยีย ม่าย ติ๊ เตียน ไฝ-ฟิ้ว หว่า อ๋อย โท้ เม่ย. โท้ ไม้ ตู๋ง แหง่ง เยีย.” ฮู่ง เตี๋ย เตา, “เยีย เญย มา อ่า, กุ๊น ก๊อง อ๊ะ. เยีย หย่า ไม้ แหง่ง มา.”

21บัดเชบา ก๊อง, “โท้ เฒาะ ซูเนม เมี่ยน เญย เซียะ, อาบีช้าก, ปุน เม่ย เญย ก๋อ, อาโดนียา, หล่ง โหฒว เอ๊า.”

22ซาโลมอน ฮู่ง เตา นิ่น เญย มา, “มา เหว่ย หาย ติ่ว โท้ เฒาะ ซูเนม เมี่ยน เญย เซียะ, อาบีช้าก, ปุน อาโดนียา หล่ง โหฒว เอ๊า? เลี่ยม กั๊วะ โท้ ปุน นิ่น ม่าะ! นิ่น โหฒว เยีย เญย ก๋อ. เม่ย เถง นิ่น โท้ หย่า เถง อาบียาทา ไซ เมี่ยน เหธา เสลุยา เญย ตอน, โยอาบ, โท้ กั๊วะ.”

23ซาโลมอน ฮู่ง ฯฒฯ เฒี้ยง เจี๊ยน เฒี้ยว โฮ้ว หว่า ก๊อง, “หลาย อาโดนียา ก๊อง น้าย เต๋ย หว่า นิ่น อ๋อย หฒุ กวั่ง แหม่ง อ๊ะ. สี ก๊อง ไม้ ฮนั้ง น้าย นอ, โท้ ทิน-ฮู่ง ตี่ง เยีย เญย ฒุ์ย, ฒู้ง เฮนี้ยๆ เญย ตี่ง.

24เยีย เฒี้ยง เจี๊ยน เฒี่ยง เจี๊ยน เญย เฒี้ยว, ต้ง เหลียบ เยีย, ปุน เยีย เฒว์ย เยีย เญย เตีย, ดาวิด, เญย ฮู่ง เหว่ย หย่า หฒิว นิ่น แล์ง เญย หว่า หล่ง เยีย เหลียบ ฮู่ง โต้ว วั้ว เต้า เฒี้ยว, แล์ง อี้ ฮนอย อาโดนียา ฒู้ง อ๋อย หฒุ ไต๋ ไต่.”

25ซาโลมอน ฯฒฯ พ้าย เยโฮยาดา เญย ตอน, เบไนยา, มี่ง เฒาะ อาโดนียา ไต๋ ไต่.

26ฮู่ง เตี๋ย ก๊อง บั๋ว อาบียาทา ไซ เมี่ยน, “หฑวน อานาโท้ด, เม่ย กั้น เญย ลี่ง เต่ย วั้ว. เม่ย หฒี่ ตุ๊ ไต่, มป่า อี้ หฒั่น เยีย ไม้ ไต๋ เม่ย เหว่ย หฒุ เม่ย เยียม เยีย เญย เตีย เญย วั้ว ด่าง แหมง แกง เจี๋ย เฒี้ยว ทิน-ฮู่ง เญย แล์ง แหง่ง หว่า ฟาง. เม่ย หย่า หฒุ เหธา นิ่น จวั่ง เสี่ยว เหฒีย หญู่ง โค้ว หน่าน.”

27ซาโลมอน ฯฒฯ หฒุ่น อาบียาทา ธ้วด, ไม้ ตุ๊ โหฒว เฒี้ยว เญย ไซ เมี่ยน. ฮนั้ง หน่าย ฯฒฯ ปุน เฒี้ยว เยียม ซีโล ก๊อง เอลี เญย เปย๊า ฒง เมี่ยน วั้ว เต๋ย หว่า ธ้วด ต้าย เฒียน.

28โยอาบ หมวัง ไฮ์ น้าย เต๋ย สี่ ธ้วด, นิ่น ฯฒฯ เปย๋า มี่ง เถา เฒี้ยว เญย ด๊บ-ลิ่ว นั้น เจี๊ยน เหฒี่ย-ต้อง เญย จอง. (โยอาบ ไม้ เถง อับซาโลม มป่า นิ่น เถง อาโดนียา.)

29ม่าย เมี่ยน บั๋ว ซาโลมอน ฮู่ง, “โยอาบ เปย๋า มี่ง เฒี้ยว เญย ด๊บ-ลิ่ว, เยียม เหฒี่ย-ต้อง กะเฮลน.” ซาโลมอน ฯฒฯ พ้าย เยโฮยาดา เญย ตอน, เบไนยา, มี่ง. นิ่น ก๊อง, “มี่ง อ๊ะ! มี่ง ไต๋ นิ่น อ๊ะ.”

30เบไนยา ฯฒฯ เปียะ เฒี้ยว เญย ด๊บ-ลิ่ว ก๊อง, “ฮู่ง เตี๋ย ก๊อง, ‘ธ้วด ต้าย ม่าะ!’” โยอาบ เตา, “เยีย ไม้ ธ้วด อ๊ะ. เยีย เยียม น้าย ไต่.” เบไนยา มี่ง บั๋ว ฮู่ง เตี๋ย, “โยอาบ ฮนั้ง น้าย นอ ก๊อง, ฮนั้ง น้าย นอ เตา เยีย.”

31ฮู่ง เตี๋ย บั๋ว เบไนยา, “เอย เจี๊ยน นิ่น เญย หว่า โหฒว อ๊ะ. เฒาะ ไต๋ ไต่, ปย๊บ เจี๊ยน. โยอาบ ไต๋ ไม้ โหฒว ต่อง วั้ว เต๋ย เมี่ยน, ปุน นิ่น บัว เญย ฑย้าม เหลี่ยว ธ้วด. ฮนั้ง น้าย นอ ไต๋ โยอาบ ฯฒฯ ปุน น้าย เต๋ย สี่ ซูง. เยีย เหธา เยีย เญย เปย๊า ฒง เมี่ยน ฯฒฯ ไม้ หฒุ ดาม-ตอง.

32เฒี้ยว อ๋อย ปุน โยอาบ กั้น ดาม นิ่น ไต๋ เมี่ยน ปุน ฑย้าม เหลี่ยว ธ้วด เญย ฒุ์ย, เหว่ย หฒุ เยีย เญย เตีย, ดาวิด, ไม้ ฮิ้ว เญย เฒี่ยง โห่ โยอาบ หล่ง หฑุ ด๊าว ไต๋ อี เต้า เมี่ยน เก้า หลง เจี๋ย นิ่น กั้น, เซ อิสะลาเอน เญย ต้ม แปง-เปย๊ย, เน เญย ตอน, อับเน, เหธา ยูดา เญย ต้ม แปง-เปย๊ย, เยเท เญย ตอน, อามาสา.

33โยอาบ ไต๋ วั้ว เต๋ย อี เต้า เมี่ยน เญย ฒุ์ย, โยอาบ เหธา นิ่น เญย เฒ้ย-ฟุน อ๋อย หฒุ เหยียด ลิ์ว ดาม-ตอง, มป่า ดาวิด เหธา นิ่น เญย เฒ้ย-ฟุน เหธา นิ่น เญย เปย๊า ฒง เมี่ยน เหธา หฑิบ เจี๊ยน เฒว์ย นิ่น เญย เหว่ย วั้ว เต๋ย ตุ๊ เฒี้ยว เญย แป้ง ออน เถา หม่าน โก๊ว หม่าน ต่อย.”

34เยโฮยาดา เญย ตอน, เบไนยา ฯฒฯ มี่ง เฒาะ โยอาบ ไต๋ ไต่, หฒัง เจี๊ยน โยอาบ กั้น เญย เดา เยียม วั้ว เต่ย-ปูง-ฮวาง.

35ฮู่ง เตี๋ย ฯฒฯ ออน เยโฮยาดา เญย ตอน, เบไนยา, โหฒว ต้ม แปง-เปย๊ย ตี๊ โยอาบ. นิ่น หย่า ออน สาโดก ไซ เมี่ยน ตี๊ อาบียาทา.

36เจี๋ย ต้าย, ฮู่ง เตี๋ย พ้าย เมี่ยน มี่ง เห่ว ซิเมอี ต้าย ฯฒฯ ก๊อง บั๋ว นิ่น, “เม่ย อ๋อย หฒุ ก๊ม เปย๊า เยียม น้าย เยลูซาเลม ฒี่ง. หย่า อ๋อย หฒุ เยียม หน่าย, ไม้ ตู๋ง ธ้วด มี่ง กั้น นอม ต๋อง.

37เม่ย อ๋อย หฒุ ฮิ้ว ตุ๊, ตะฟ่าน หาย นอม ฮนอย เม่ย ธ้วด ฒี่ง เจี๋ย วั้ว หง่าน ขิดโลน ฮ์อง, เม่ย ด่ง หาย ฒู้ง อ๋อย หฒุ ไต่. เม่ย กั้น หย่า อ๋อย หฒุ ดาม-ตอง.”

38ซิเมอี เตา ฮู่ง เตี๋ย, “เม่ย ฮนั้ง น้าย นอ ก๊อง เซ หลง เญย. เม่ย เญย โปว อ๋อย เอย เจี๊ยน เยีย เญย เฒี้ยว, ฮู่ง เตี๋ย, ก๊อง เญย หว่า.” ซิเมอี ฯฒฯ เยียม เจี๊ยน เยลูซาเลม เล่า เญย.

39เจี๋ย ลิ์ว ปัว หฮญัง, ม่าย อี เต้า ซิเมอี เญย โน่ว เปย๋า มี่ง เถา กัด ฒี่ง เญย ฮู่ง, มาอาคา เญย ตอน, อาคิด. ม่าย เมี่ยน บั๋ว ซิเมอี, “เม่ย เญย โน่ว เยียม กัด ฒี่ง.”

40ซิเมอี เยี้ยด ไฮ์, นิ่น เฒาะ เก้ ออน ปุ่ย เจี๊ยน ล่อ, เก้ เจี๊ยน มี่ง เถา กัด ฒี่ง, อาคิด ฮู่ง วั้ว, ต้อ นิ่น เญย โน่ว หฑวน ต้าย.

41ม่าย เมี่ยน บั๋ว ซาโลมอน, ซิเมอี ธ้วด เยลูซาเลม มี่ง เถา กัด ฒี่ง แอ๋ง หฑวน ต้าย อ๊ะ.

42ฮู่ง เตี๋ย ฯฒฯ พ้าย เมี่ยน มี่ง เห่ว ซิเมอี ต้าย, ก๊อง บั๋ว นิ่น, “เยีย เห่ว เม่ย เฒี้ยง เจี๊ยน เฒี้ยว แล์ง หว่า หย่า ขวิน เม่ย ไม้ เฒ์ย? เยีย ก๊อง, ‘ตะฟ่าน เม่ย ธ้วด มี่ง กั้น นอม ต๋อง วั้ว ฮนอย, เม่ย ด่ง หาย ฒู้ง อ๋อย หฒุ ไต่.’ วั้ว หฒั่น เม่ย เตา เยีย, ‘เม่ย ฮนั้ง หน่าย ก๊อง เซ หลง เญย. เยีย หย่า อ๋อย เอย เจี๊ยน เม่ย เญย หว่า โหฒว.’

43วั้ว หญู่ง, เม่ย เหว่ย หาย ติ่ว ไม้ เอย เจี๊ยน เม่ย เฒี้ยง เจี๊ยน เฒี้ยว แล์ง เญย หว่า หย่า ไม้ เอย เยีย หัด เญย หว่า?”

44ฮู่ง เตี๋ย หย่า ก๊อง บั๋ว ซิเมอี, “เยียม เม่ย เญย เฮญี้ยว เม่ย หย่า ฮิ้ว ตุ๊ เม่ย โหฒว ปุน เยีย เญย เตีย, ดาวิด, เญย เหยียด ฒู้ง หว่าย สี่. อี้ หฒั่น เฒี้ยว อ๋อย หฒิว เม่ย โหฒว เญย หว่าย สี่ วิ่น ปุน เม่ย.

45มป่า เฒี้ยว อ๋อย เหธย ฟุ ปุน ซาโลมอน ฮู่ง. ดาวิด เญย ฮู่ง เหว่ย ฯฒฯ เยียม เฒี้ยว เญย หฑะเฮมียน เหลียบ ว้วน เถา หม่าน โก๊ว หม่าน ต่อย.”

46ฮู่ง เตี๋ย ฯฒฯ พ้าย เยโฮยาดา เญย ตอน, เบไนยา. เบไนยา ฯฒฯ ธ้วด มี่ง เฒาะ ซิเมอี ไต๋ ไต่. ฮนั้ง หน่าย, ซาโลมอน กุ๊น เญย กั๊วะ เหลียบ ว้วน เยียม ซาโลมอน เญย ปั์ว-เดี๊ย.

← Chapter 1 Jump to: Chapter 3 →