2 Samuel 11

Mien Bible (Thai Script) © Thailand Bible Society, 2007

← Chapter 10 Jump to: Chapter 12 →

1เถา ธุน-เกน ฮนอย, ต๋อย หฒุ หฒวัง ฮู่ง เตี๋ย เหยียด เกา ธ้วด มี่ง เบ๊าะ จ๋า เญย เฒี่ยง โห่, ดาวิด พ้าย โยอาบ เหธา เจี๊ยน นิ่น เญย หฒวัง เจียน เหธา อิสะลาเอน เญย เหยียด ฒู้ง แปง ธ้วด มี่ง เบ๊าะ จ๋า. นิ่น บัว เบ๊าะ ป่าย อัมโมน เมี่ยน หย่า เว่ย เจี๊ยน อ๋อย เบ๊าะ ลับบา ฒี่ง. มป่า ดาวิด เยียม เจี๊ยน เยลูซาเลม.

2ม่าย ฮนอย ลู่ง ม์าน-หฮมวัง, ดาวิด เยียม โหธว เจี์ย ซิน ต้าย ฝาว ฮู่ง ติ่น เญย เปย๊า-ง่อ กู้ หงว่าย ซาว อะหฑย่าว. เยียม เปย๊า-ง่อ หมั่ง เหฌี่ย, นิ่น ปวัด เต้า มเซียะ ตอน หฑาว เจี๊ยน ซิน. วั้ว เต้า มเซียะ ตอน เฒี่ยง ตุ๊ เหฑว่ย ไห่.

3ดาวิด ฯฒฯ พ้าย เมี่ยน มี่ง หมวัง ก๋า น้าย เต้า มเซียะ ตอน ฮนั้ง หาย นอ. ม่าย เต้า เมี่ยน ก๊อง, “วั้ว เต้า มเซียะ ตอน เซ เอลีอัม เญย เซียะ, บัดเชบา, ฮิดไท เมี่ยน, อุลีอา เญย เอ๊า.”

4ดาวิด พ้าย เมี่ยน มี่ง ต้อ วั้ว เต้า มเซียะ ตอน ต้าย. นิ่น ฯฒฯ ต้าย ล์อ ดาวิด. ดาวิด หย่า เหธา นิ่น เปว๋ย. (วั้ว หฒั่น บัดเชบา เญย ซิน-เหยี่ยน จังๆ เหฑ่ง, นิ่น แอ๋ง สา ลิ์ว หวุย.) เปว๋ย ลิ์ว, บัดเชบา หฑวน นิ่น กั้น เญย เปย๊า หมี่ อ๊ะ.

5วั้ว เต้า มเซียะ ตอน ฯฒฯ ม่าย เจี๊ยน ซิน อ๊ะ. นิ่น พ้าย เมี่ยน มี่ง บั๋ว ดาวิด, “เยีย ม่าย ซิน อ๊ะ.”

6ดาวิด ฯฒฯ พ้าย เมี่ยน มี่ง โยอาบ วั้ว บั๋ว นิ่น, “ฝูง ฮิดไท เมี่ยน, อุลีอา, ต้าย เยีย น้าย โอ่.” โยอาบ ฯฒฯ ฝูง อุลีอา มี่ง ดาวิด วั้ว.

7อุลีอา ต้าย ล์อ นิ่น วั้ว หฒั่น, ดาวิด หน่าย ก๋า, โยอาบ ฮนั้ง หาย นอ, แปง ฮนั้ง หาย นอ, เบ๊าะ จ๋า เญย สี่ ฮนั้ง หาย นอ.

8ฆะฮ้า ดาวิด ก๊อง บั๋ว อุลีอา, “กุ๊น หฑวน เม่ย เญย เปย๊า ฮิด ตั้ง ขวน ม่าะ!” อุลีอา ฯฒฯ ธ้วด ฮู่ง ติ่น. ฮู่ง เตี๋ย หย่า ปุน เมี่ยน ต้อ ฒี่ง เหญ่ย มี่ง ฝูง ปุน นิ่น.

9มป่า อุลีอา เหธา นิ่น เญย เฒี้ยว เญย หฒวัง เจียน เปว๋ย ฮู่ง ติ่น เญย แก้ง ด่าง. นิ่น ไม้ หฑวน นิ่น กั้น เญย เปย๊า.

10ม่าย เมี่ยน บั๋ว ดาวิด, “อุลีอา ไม้ หฑวน เปย๊า.” ดาวิด ฯฒฯ หน่าย อุลีอา, “เม่ย เยียม โก เญย ต้าย ไม้ เฒ์ย? เม่ย เหว่ย หาย ติ่ว ไม้ หฑวน เปย๊า?”

11อุลีอา ก๊อง บั๋ว ดาวิด, “แล์ง แหง่ง หว่า ฟาง เหธา ยูดา เมี่ยน เหธา อิสะลาเอน เมี่ยน เยียม ด๊บ-ลิ่ว. เยีย เญย เฒี้ยว, โยอาบ, เหธา เยีย เญย เฒี้ยว เญย เมี่ยน หย่า เหลียบ เธี้ยง เยียม หล่ม-ฮวาง. เยีย ฝู่ง ไฮ่ หฑวน เปย๊า หญั่น, ฮบ แอ๋ง เหธา เยีย เญย เอ๊า เปว๋ย? เยีย เฒี้ยง เจี๊ยน ฮู่ง เตี๋ย เญย แหม่ง แล์ง เยีย ด่ง หาย ฒู้ง ไม้ ฮนั้ง หน่าย โหฒว.”

12ดาวิด ฯฒฯ ก๊อง บั๋ว อุลีอา, “อี้ ฮนอย แอ๋ง เยียม ฮนอย น้าย, ฌัง ฮนอย เยีย ปุน เม่ย หฑวน.” วั้ว ฮนอย เหธา ตะเหญ่ย ฮนอย, อุลีอา เยียม เยลูซาเลม ฒี่ง.

13ดาวิด เห่ว อุลีอา ต้าย เหธา นิ่น หญั่น หย่า ฮบ, ปุน นิ่น ฮบ ติ๊ว ฆวิน. มป่า วั้ว ม์วน อุลีอา ธ้วด มี่ง เยียม นิ่น เญย เฒี้ยว เญย เจียน บุด๋ง เปว๋ย นิ่น กั้น เญย หฒิ, มป่า นิ่น ไม้ หฑวน เปย๊า.

14ตะเหญ่ย ดอม ดาวิด เฟี้ย เฝียน ปุน โยอาบ แอ๋ง ปุน อุลีอา ต้อ มี่ง.

15เฝียน เฟี้ย เจี๊ยน ก๊อง, “ปุน อุลีอา เยียม เบ๊าะ จ๋า เก้า เฮนี้ย เจี๋ย เญย ต๋อง วั้ว ด่าง แหมง ลิ์ว, เม่ย บัว กุ๊น ถุย ธ้วด อ๊ะ, ปุน นิ่น หฒุ ไต๋ ไต่ อ๊ะ.”

16ฮนั้ง หน่าย โยอาบ เว่ย เจี๊ยน ฒี่ง เญย เฒี่ยง โห่ นิ่น ปุน อุลีอา เยียม ม่าย วิน-วั้ง เก้า เฮ้น เญย แปง เยียม เญย ต๋อง.

17ฒี่ง กะญั์ว เญย เมี่ยน ธ้วด ต้าย เหธา โยอาบ เบ๊าะ จ๋า. ม่าย เต๋ย ดาวิด เญย เจียน หฒุ ไต่. ฮิดไท เมี่ยน, อุลีอา, หย่า หฒุ ไต๋ ไต่.

18โยอาบ พ้าย เมี่ยน มี่ง เฒาะ เบ๊าะ จ๋า เญย เหยียด ฒู้ง สี่ มี่ง บั๋ว ดาวิด.

19นิ่น จา หว่า โต่ว เฝียน เมี่ยน, “เม่ย เฒาะ น้าย เต๋ย เบ๊าะ จ๋า เญย เหยียด ฒู้ง สี่ บั๋ว ลิ์ว ฮู่ง เตี๋ย.

20สี ก๊อง ฮู่ง เตี๋ย เฉีย! เจี์ย ไห่, หน่าย เม่ย, ‘เม่ย บัว เบ๊าะ จ๋า ฝู่ง มี่ง นิด ฒี่ง หลาด ด่ง หน่าย ฟัด? เม่ย บัว ไม้ ฮิ้ว ตุ๊ นิ่น บัว อ๋อย เยียม ฒี่ง หลาด ป๊วน ฟอง ไฟ?

21หาย เต้า ไต๋ เยลุบเบเซ้ด เญย ตอน, อาบีเมเล้ก? ไม้ เฒ์ย ม่าย เต้า มเซียะ ตอน เยียม ฒี่ง หลาด กู้ หงว่าย ฒอย กู้ หงว่าย วั้ว แหมง หม่อ เหฌี่ย เบ๊าะ นิ่น, นิ่น หธีง เยียม เทเบด ไต่ ไฟ? เม่ย บัว ฝู่ง มี่ง นิด ฒี่ง หลาด ด่ง หน่าย ฟัด?’ สี ก๊อง ฮู่ง เตี๋ย ฮนั้ง น้าย นอ หน่าย, เม่ย อ๋อย หฒุ บั๋ว นิ่น, ‘เม่ย เญย โปว, ฮิดไท เมี่ยน, อุลีอา, หย่า ไต่ หมี่ อ๊ะ.’”

22โต่ว เฝียน เมี่ยน ฯฒฯ มี่ง อ๊ะ. มี่ง เถา ดาวิด วั้ว นิ่น หฒิว โยอาบ บั๋ว นิ่น เญย หว่า เฒว่ย เยี้ยด เฒว่ย เหญ่ย เญย ก๊อง บั๋ว ฮู่ง เตี๋ย.

23โต่ว เฝียน เมี่ยน ก๊อง บั๋ว ดาวิด, “วิน-วั้ง เก้า เฮ้น เจี๋ย เยีย บัว หย่า ธ้วด ต้าย เยียม วั้ว เดา-ฌัง เหธา เยีย บัว เบ๊าะ จ๋า, มป่า เยีย บัว หฒุ่น นิ่น บัว เถา ฒี่ง แก้ง ด่าง.

24ป๊วน ฟอง เญย เมี่ยน เยียม ฒี่ง หลาด กู้ หงว่าย ป๊วน ฮู่ง เญย เจียน. ม่าย เต๋ย ฮู่ง เตี๋ย เญย เจียน ไต่ หมี่ อ๊ะ. ไม้ ตาน บัวะ น้าย. เม่ย เญย โปว, ฮิดไท เมี่ยน, อุลีอา, หย่า ไต่ หมี่ อ๊ะ.”

25ดาวิด บั๋ว โต่ว เฝียน เมี่ยน, “เม่ย อ๋อย หฒุ ฮนั้ง น้าย นอ บั๋ว โยอาบ, ‘ไม้ ตู๋ง ปุน น้าย เต๋ย สี่ ขวน เม่ย เญย เฮญี้ยว, เหว่ย หฒุ หฑุ ด๊าว ไม้ กิ๊น น้าย เต้า เหธา วั้ว เต้า. เม่ย บัว อ๋อย หฒุ ชะ เบ๊าะ วั้ว นอม ฒี่ง เถา เบ๊าะ ป่าย.’ อ๋อย หฒุ ฮนั้ง น้าย นอ ก๊อง เหว่ย ออน โยอาบ เญย เฮญี้ยว.”

26อุลีอา เญย เอ๊า ไฮ์ ก๊อง นิ่น เญย โหฆ ไต่ หมี่ อ๊ะ, นิ่น เหว่ย นิ่น เญย โหฆ เฑ่า เญี้ยม.

27เฑ่า เญี้ยม เญย เฒี่ยง โห่ เจี๋ย ลิ์ว, ดาวิด พ้าย เมี่ยน มี่ง ต้อ นิ่น ต้าย เยียม ฮู่ง ติ่น. นิ่น ฯฒฯ โหฒว ดาวิด เญย เอ๊า หย่า ยู์ง เต้า ตอน ปุน ดาวิด. มป่า ดาวิด โหฒว น้าย เต๋ย สี่ เฒี้ยว ไม้ หอบ เฮญี้ยว.

← Chapter 10 Jump to: Chapter 12 →