2 Samuel 7

Mien Bible (Thai Script) © Thailand Bible Society, 2007

← Chapter 6 Jump to: Chapter 8 →

1ฮู่ง เตี๋ย ตุ๊ เยียม นิ่น กั้น เญย ติ่น, เฒี้ยว ปุน นิ่น ตุ๊ ฮิด ขวน, ไม้ หฒุ เว่ย ก๋อม เญย วิน-วั้ง ต้าย ห่อย.

2วั้ว หฒั่น ฮู่ง เตี๋ย ก๊อง บั๋ว โต่ว หว่า เมี่ยน, นาทัน, “หมั่ง ม่าะ! เยีย เยียม สีดา ฒ่ง เดี๋ยง โหฒว ต้าย เญย ติ่น มป่า ทิน-ฮู่ง เญย แล์ง แหง่ง หว่า ฟาง เยียม ด๊บ-ลิ่ว.”

3นาทัน ก๊อง บั๋ว ฮู่ง เตี๋ย, “เม่ย กุ๊น หฒิว เม่ย เญย เฮญี้ยว อ๋อย โหฒว เญย มี่ง โหฒว, เหว่ย หฒุ เฒี้ยว เหธา เม่ย เยียม.”

4มป่า ต้ง วั้ว ม์วน นาทัน ฒิบ เฒี้ยว เญย หว่า ก๊อง,

5“มี่ง บั๋ว เยีย เญย โปว, ดาวิด, ‘ เฒี้ยว ฮนั้ง น้าย นอ ก๊อง, “เม่ย หฒะเก้ง อ๋อย เหธย นอม เปย๊า ปุน เยีย เยียม ไฟ?

6เยียม เยีย ต้อ อิสะลาเอน เมี่ยน ธ้วด อียิบ เถา อี้ ฮนอย เยีย ไม้ เยียม เจี๋ย เหยียด นอม เปย๊า. เยีย เยียม เญย ต๋อง เซ ด๊บ-ลิ่ว, ซุ้ย เจี๋ย มี่ง เจี๋ย ต้าย.

7ตะฟ่าน เยีย เหธา อิสะลาเอน เญย หฒวัง เมี่ยน ซุ้ย เจี๋ย เญย ต๋อง, เยีย ไม้ ตุ๊ บั๋ว เจี๋ย อิสะลาเอน เญย ต้ม เจียน, ต้ง เยีย พ้าย เหฒียง โก๋ว เยีย เญย แปะ ฝีง, อิสะลาเอน, เญย หาย เต้า, ‘เม่ย เหว่ย หาย ติ่ว ไม้ หล่ง สีดา ฒ่ง เดี๋ยง เหธย นอม ติ่น ปุน เยีย?’”

8“‘อี้ หฒั่น บั๋ว เยีย เญย โปว, ดาวิด, “เน่น เจี๋ย เญย เฒี้ยว ฮนั้ง น้าย นอ ก๊อง, ‘เยีย เฒาะ เม่ย เยียม ยู่ง เธี้ยง ปู๋ง ปะกี ยู่ง เญย เฒี่ยง โห่ ธ้วด ต้าย เหลียบ เม่ย โหฒว เยีย เญย แปะ ฝีง, อิสะลาเอน เมี่ยน, เญย ฮู่ง.

9ไม้ กุ๊น เม่ย มี่ง หาย, เยีย เหธา เม่ย เยียม. เม่ย เญย เหยียด ฒู้ง วิน-วั้ง เยียม เม่ย เญย วั้ว ด่าง แหมง เยีย ไพ กวั่ง หมี่ อ๊ะ. เยีย อ๋อย ปุน เม่ย ตุ๊ เม่ง เต้า โฮล, ด่ง ลู่ง เดี๊ย ม่าย เม่ง เต้า โฮล เจี๋ย เญย เมี่ยน.

10เยีย อ๋อย ปุน นอม ต๋อง เยีย เญย แปะ ฝีง, อิสะลาเอน เมี่ยน, เยียม, หย่า เหลียบ นิ่น บัว เยียม วั้ว เหว่ย เป๋น นิ่น บัว กั้น เญย ต๋อง, ไม้ หฒุ แอ๋ง เญ้า เฮญี้ยว. เมี่ยน เอ๊าะ เมี่ยน หย่า ไม้ ตุ๊ แอ๋ง ต้าย ห่อย นิ่น บัว ฮนั้ง ฒิ่น ด่าง วั้ว นอ,

11หย่า ไม้ ฮนั้ง เยีย พ้าย ต้ม เจียน กุ๊น อิสะลาเอน เมี่ยน เญย เฒี่ยง โห่. เยีย หย่า อ๋อย ปุน เม่ย ตุ๊ ถาย-แป้ง, ไม้ หฒุ เม่ย เญย เหยียด ฒู้ง วิน-วั้ง ห่อย. “‘“ เฒี้ยว หย่า ก๊อง บั๋ว เม่ย, เฒี้ยว อ๋อย เหธย โฮ์ ต่อย เฒ้ย-ฟุน ปุน เม่ย.

12เม่ย เญย ฮนอย-เหญียะ ปวั๊ง, เม่ย ฯฒฯ เกวย เสย หมี่ อ๊ะ. เยีย อ๋อย ปุน เม่ย เญย ตอน, เซ เม่ย กั้น เญย เธียน ตอน, ตุ๊ หฑิบ เจี๊ยน เม่ย โหฒว ฮู่ง. เยีย หย่า อ๋อย เหลียบ นิ่น เญย กั๊วะ ว้วน.

13นิ่น ฒู้ง อ๋อย เหว่ย เยีย เญย เม่ง เหธย นอม เปย๊า. เยีย หย่า อ๋อย เหลียบ นิ่น เญย กั๊วะ เญย ฮู่ง เหว่ย เถา เหยียด ลิ์ว.

14เยีย อ๋อย โหฒว นิ่น เญย เตีย. นิ่น หย่า อ๋อย โหฒว เยีย เญย ตอน. สี ก๊อง นิ่น ป์าม ฒุ์ย, เยีย ฒู้ง หล่ง ป้าม เมี่ยน เญย ปย๊า เบ๊าะ หฌาว นิ่น, เซ หล่ง ป้าม เมี่ยน เญย ปย๊า-ปิน เบ๊าะ.

15มป่า เยีย อ๋อย เหยียด ลิ์ว เหฒียบ ฒัวะ เญย ฮนั้ม นิ่น, ไม้ ฮนั้ง เยีย เฒาะ หฑวน ไม้ ฮนั้ม ต้ง เยีย ถุย ฆอย เยียม ด่าง เม่ย วั้ว เต้า เซาโล.

16เยีย ปุน เม่ย เญย โต้ว ฒง เหธา เม่ย เญย กั๊วะ ตุ๊ เยียม เยีย เญย หฑะเฮมียน เหยียด ลิ์ว ว้วน. เม่ย เญย ฮู่ง เหว่ย หย่า อ๋อย เหลียบ ว้วน เถา เหยียด ลิ์ว.”’”

17นาทัน หฒิว น้าย เต๋ย เหยียด ฒู้ง หว่า เหธา เหยียด ฒู้ง หล่าว ย่าง เญย สี่ ก๊อง บั๋ว ดาวิด.

18ดาวิด ฮู่ง ฯฒฯ เปียะ มี่ง เฒว์ย เจี๊ยน เฒี้ยว เญย หฑะเฮมียน ก๊อง, “โอ เฒี้ยว ทิน-ฮู่ง อ่า, เยีย เซ ต้ง หาย เต้า, เยีย เญย ฮมวั้ง ต่อย หย่า ฝุน เป๋น หาย หญู่ง, เม่ย หธีง ต้าย โหฒว ด่ง น้าย หลง ปุน เยีย?

19โอ เฒี้ยว ทิน-ฮู่ง อ่า, หฒิว เม่ย หมั่ง น้าย เซ ไฝ-ฟิ้ว สี่. เม่ย หย่า ก๊อง เถา เม่ย เญย โปว เญย โฮ์ ต่อย เฒ้ย-ฟุน. โอ เฒี้ยว ทิน-ฮู่ง อ่า, เม่ย เหยียด เกา ฮนั้ง น้าย นอ เถง เมี่ยน ไฟ?

20“โอ เฒี้ยว ทิน-ฮู่ง อ่า, เม่ย ด่ง น้าย ท่าย เม่ย เญย โปว, เยีย, ดาวิด, ไฮ่ จา ก๊อง หาย หญู่ง? เหว่ย หฒุ เม่ย ฮิ้ว ตุ๊ เยีย, เม่ย เญย โปว.

21เม่ย โหฒว น้าย เต๋ย เหยียด ฒู้ง โฮล เญย สี่, หย่า ปุน เม่ย เญย โปว ฮิ้ว เซ เหว่ย เม่ย แล์ง เญย หว่า, หย่า หฒิว เม่ย กั้น เญย เอ๋ย.

22“โอ เฒี้ยว ทิน-ฮู่ง อ่า, หฒิว เยีย บัว กั้น เญย มน่อม ไฮ์, เม่ย เซ โฮล ไห่. ไม้ ม่าย หาย เต้า ฮนั้ง เม่ย. ธ้วด ลิ์ว เม่ย, ไม้ ม่าย กั้น เต้า ทิน-ฮู่ง.

23แอ๋ง ม่าย หาย ฝีง ฮนั้ง เม่ย เญย แปะ ฝีง, อิสะลาเอน เมี่ยน? เยียม ลู่ง เดี๊ย เซ ต้ง น้าย ดุ ฝีง ฮนั้ง, ต้ง ทิน-ฮู่ง ธ้วด มี่ง เหว่ย นิ่น กั้น หฒัวะ หฑวน โหฒว กั้น เญย แปะ ฝีง, หย่า เหว่ย กั้น ตุ๊ เม่ง เต้า โฮล. เม่ย หฒัวะ นิ่น บัว เยียม อียิบ เต่ย-ปูง ธ้วด หย่า โหฒว ต้ม บัวะ ฮ่อง เญย สี่, เยียม เม่ย เญย แปะ ฝีง เญย วั้ว ด่าง แหมง หฒุ่น ธ้วด กั้น ฝีง เมี่ยน เหธา นิ่น บัว เญย เฒี่ยน.

24เม่ย เหว่ย กั้น เหลียบ อิสะลาเอน เมี่ยน เหยียด ลิ์ว โหฒว เม่ย เญย แปะ ฝีง. โอ เฒี้ยว อ่า, เม่ย ตุ๊ โหฒว นิ่น บัว เญย ทิน-ฮู่ง.

25“โอ เฒี้ยว ทิน-ฮู่ง อ่า, โท้ เฒาะ เม่ย เหว่ย เยีย, เม่ย เญย โปว, เหธา เยีย เญย เฒ้ย-ฟุน แล์ง เญย หว่า เหลียบ ว้วน เถา เหยียด ลิ์ว. โท้ เม่ย เอย เจี๊ยน เม่ย ก๊อง เญย หว่า โหฒว.

26โท้ ปุน เมี่ยน เหยียด ลิ์ว เธง เม่ย เญย เม่ง เว่ย โฮล. นิ่น บัว ฯฒฯ ก๊อง, ‘เน่น เจี๋ย เญย เฒี้ยว เซ กุ๊น อิสะลาเอน เญย ทิน-ฮู่ง.’ เม่ย เญย โปว, ดาวิด, เญย โต้ว ฒง หย่า ตุ๊ เยียม เม่ย เญย หฑะเฮมียน เหลียบ ว้วน.

27“โอ เน่น เจี๋ย เญย เฒี้ยว, อิสะลาเอน เญย ทิน-ฮู่ง อ่า, เม่ย หล่าว ย่าง ปุน เยีย, เม่ย เญย โปว. เม่ย ก๊อง, ‘เยีย อ๋อย เหลียบ เม่ย เญย โฮ์ ต่อย เฒ้ย-ฟุน.’ เหว่ย น้าย เยีย, เม่ย เญย โปว, ปู๋ง หล่าง เญย เยียม เม่ย เญย หฑะเฮมียน ฮนั้ง น้าย นอ เต๋า เก๋า.

28โอ เฒี้ยว ทิน-ฮู่ง อ่า, เม่ย เซ ทิน-ฮู่ง. เม่ย เญย หว่า เซ เฒียน เญย. เม่ย หย่า แล์ง น้าย เต๋ย หลง เญย สี่ ปุน เยีย, เม่ย เญย โปว.

29เหว่ย น้าย โท้ เม่ย อะเฮน้ย เหธย ฟุ ปุน เยีย, เม่ย เญย โปว เญย เฒ้ย-ฟุน, เหว่ย ปุน นิ่น บัว เหยียด ลิ์ว ตุ๊ เยียม เม่ย เญย หฑะเฮมียน. โอ เฒี้ยว ทิน-ฮู่ง อ่า, เม่ย ฒู้ง ก๊อง ธ้วด หว่า เหธย ฟุ ปุน เยีย, เม่ย เญย โปว, เญย เฒ้ย-ฟุน หย่า อ๋อย เหธย ฟุ ปุน นิ่น บัว เถา เหยียด ลิ์ว.”

← Chapter 6 Jump to: Chapter 8 →