2 Samuel 14

Mien Bible (Thai Script) © Thailand Bible Society, 2007

← Chapter 13 Jump to: Chapter 15 →

1เสลุยา เญย ตอน, โยอาบ, ฮิ้ว ตุ๊ ฮู่ง เตี๋ย เญย เฮญี้ยว จั๋ง ไห่ อับซาโลม.

2โยอาบ ฯฒฯ พ้าย เมี่ยน มี่ง เทโคอา ล์อ เต้า ธง-เม่ง เญย มเซียะ ตอน, ก๊อง บั๋ว นิ่น, “โท้ เม่ย โหฒว เอ๋ย เล์ย ฮนั้ง เฑ่า เญี้ยม เญย เมี่ยน. ฒุ เจี๊ยน เมี่ยน เฑ่า เญี้ยม เญย เฒี่ยง โห่ ฒุ เญย ลุย-โหว หย่า ไม้ ตู๋ง ฑ้าด โย่ว. อ๋อย หฒุ โหฒว เอ๋ย เล์ย ฮนั้ง เหว่ย ไต่ มี่ง เญย เมี่ยน เฑ่า เญี้ยม เล่า เญย มเซียะ ตอน.

3อ๋อย หฒุ เปียะ มี่ง ล์อ ฮู่ง เตี๋ย ฮนั้ง น้าย นอ ก๊อง บั๋ว นิ่น.” โยอาบ ฯฒฯ หฌาว เหฒียง น้าย เต้า มเซียะ ตอน อ๋อย หฒุ ฮนั้ง หาย นอ ก๊อง.

4น้าย เต้า เทโคอา เมี่ยน เญย มเซียะ ตอน มี่ง ล์อ ฮู่ง เตี๋ย วั้ว หฒั่น, นิ่น พัวะ เหฌี่ย เดา ป๋าย หย่า ก๊อง, “โอ ฮู่ง เตี๋ย อ้า! โท้ เถง เยีย.”

5ฮู่ง เตี๋ย หน่าย นิ่น, “เม่ย ม่าย หาย หญู่ง สี่?” วั้ว เต้า มเซียะ ตอน ก๊อง, “เยีย เซ เอ๊า-กว๊า. โหฆ ไต่ หมี่ อ๊ะ.

6เยีย, เม่ย เญย มเซียะ โปว, ม่าย อี เต้า ตอน. ม่าย ฮนอย นิ่น บัว เยียม เด่ย แฑง จ๋า หย่า ไม้ ม่าย เมี่ยน ป๊า นิ่น บัว. เหยียด เต้า ฯฒฯ ไต๋ วั้ว เต้า ไต่.

7อี้ หฒั่น เยีย เญย หฒวัง เธียน-เธะ ต้าย ล์อ เยีย, เม่ย เญย มเซียะ โปว, หย่า ก๊อง, ‘เฒาะ ต้ง ไต๋ นิ่น เญย ก๋อ วั้ว เต้า จิว ปุน เยีย บัว ไต๋ เหว่ย จ๊าว ก๋อ หฒุ ไต๋ ไต่ เญย เมี่ยน แหม่ง วิน. นิ่น บัว เลี่ยม อ๋อย เฒาะ ตุ๊ หฑิบ จา-ตี้ง วั้ว เต้า ไต๋.’ ฮนั้ง หน่าย นิ่น บัว อ๋อย เฒาะ เยีย เหฒ่ง เหฌี่ย เญย ตอน เหมียด. เยีย เญย โหฆ ฯฒฯ ไม้ ม่าย บั๋ว หย่า ไม้ ม่าย โฮ์ ต่อย เยียม น้าย ลู่ง เดี๊ย.”

8ฮู่ง เตี๋ย ก๊อง บั๋ว วั้ว เต้า มเซียะ ตอน, “กุ๊น หฑวน เม่ย เญย เปย๊า ม่าะ! เยีย ฯฒฯ พ้าย หว่า หลิ่ว เล์ย เม่ย เญย สี่.”

9เทโคอา เมี่ยน มเซียะ ตอน ก๊อง, “เยีย เญย เฒี้ยว, ฮู่ง เตี๋ย อ้า! เยีย เหธา เยีย เญย เตีย เญย โต้ว ฒง อ๋อย หฒุ เหว่ย น้าย เต๋ย สี่ ดาม-ตอง มป่า ฮู่ง เตี๋ย เหธา ฮู่ง เหว่ย ไม้ หฒุ ดาม-ตอง.”

10ฮู่ง เตี๋ย ก๊อง, “สี ก๊อง ม่าย หาย เต้า ก๊อง หาย หญู่ง ปุน เม่ย, เม่ย กุ๊น ต้อ นิ่น ต้าย เยีย น้าย, นิ่น ฯฒฯ ไม้ มี่ง แอ๋ง หละเญ้า เม่ย อ๊ะ.”

11วั้ว เต้า มเซียะ ตอน แอ๋ง ก๊อง, “โท้ เฒี้ยง เจี๊ยน เฒี้ยว, เม่ย เญย ทิน-ฮู่ง, แล์ง ไม้ ปุน จ๊าว เมี่ยน แหม่ง วิน วั้ว เต้า แอ๋ง ไต๋ เมี่ยน, เยีย เญย ตอน ฯฒฯ ไม้ หฒุ ไต่ อ๊ะ.” ฮู่ง เตี๋ย ก๊อง, “เยีย เฒี้ยง เจี๊ยน เฒี่ยง เจี๊ยน เญย เฒี้ยว แล์ง หว่า ก๊อง, เม่ย เญย ตอน เญย เหยียด ติ้ว บะเปยย ไม้ หฒุ ด๊อด เหฌี่ย เดา.”

12วั้ว เต้า มเซียะ ตอน ก๊อง, “โท้ ปุน เยีย, เม่ย เญย มเซียะ โปว, แอ๋ง ก๊อง โจ๋ว หว่า บั๋ว เยีย เญย เฒี้ยว, ฮู่ง เตี๋ย.” ฮู่ง เตี๋ย เตา, “กุ๊น ก๊อง ม่าะ!”

13น้าย เต้า มเซียะ ตอน ก๊อง, “วั้ว หญู่ง ฮู่ง เตี๋ย เหว่ย หาย ติ่ว ฮนั้ง น้าย นอ ต๊า หฒะเอ๋ย ห่อย ทิน-ฮู่ง เญย แปะ ฝีง? ฮู่ง เตี๋ย ฮนั้ง น้าย นอ ก๊อง, ฮู่ง เตี๋ย ฒู้ง ตี่ง กั้น โหฒว ต่อง เหว่ย หฒุ ฮู่ง เตี๋ย ไม้ ปุน กั้น เญย ตอน, ต้ง เปย๋า มี่ง วั้ว เต้า, หฑวน.

14เยีย บัว เต้าๆ ฒู้ง หฒุ ไต่, ฮนั้ง ววม คูง เหฌี่ย เดา, ไม้ ไฮ่ เซียว ไม้ หฑวน อ๊ะ. ทิน-ฮู่ง ไม้ เฒาะ เมี่ยน เญย แหม่ง. ต๋าว หฑวน นิ่น ต๊า หฒะเอ๋ย ปุน หฒุ เล่ย ฆอย นิ่น เญย เมี่ยน หฑวน ต้าย.

15“เยีย ต้าย ก๊อง น้าย เต๋ย หว่า บั๋ว เยีย เญย เฒี้ยว, ฮู่ง เตี๋ย, เหว่ย หฒุ แปะ ฝีง แฮะ เยีย กั้ม เหฑีย. เยีย, เม่ย เญย มเซียะ โปว, ฮนั้ม ต้าย, ‘เยีย อ๋อย โท้ ฮู่ง เตี๋ย. เหฑีย ฮู่ง เตี๋ย อ๋อย เอย เจี๊ยน เยีย โท้ เญย หว่า โหฒว.

16เยีย ฮนั้ม ต้าย ฮู่ง เตี๋ย อ๋อย หมวัง เยีย, เหฌียว เยีย, เม่ย เญย โปว, เหธา เยีย เญย ตอน, เปย๋า ดุ๊ด เจี์ย เฮญี้ยว อ๋อย เหมียด เยีย บัว เหธา เยีย บัว เยียม ทิน-ฮู่ง หฑิบ ต้าย เญย ป่วน.’

17“เยีย, เม่ย เญย มเซียะ โปว, แอ๋ง ฮนั้ม ต้าย, ‘โท้ เยีย เญย เฒี้ยว, ฮู่ง เตี๋ย, เญย หว่า ปุน เยีย แป้ง ออน, เหว่ย หฒุ เยีย เญย เฒี้ยว, ฮู่ง เตี๋ย, เซ ฮนั้ง ทิน-ฮู่ง เญย ฟิน-เมี่ยน, ฮิ้ว ตุ๊ หลง, ฮิ้ว ตุ๊ เธี้ยว. โท้ เฒี้ยว, เม่ย เญย ทิน-ฮู่ง, เหธา เม่ย เยียม.’”

18ฮู่ง เตี๋ย ก๊อง บั๋ว วั้ว เต้า มเซียะ ตอน, “เยีย อ๋อย หน่าย โจ๋ว หว่า เม่ย. ต้ง เยีย อ๋อย หน่าย เญย เม่ย ไม้ ตู๋ง ปี๋ง.” วั้ว เต้า มเซียะ ตอน ก๊อง, “โท้ เยีย เญย เฒี้ยว, ฮู่ง เตี๋ย, กุ๊น ก๊อง อ๊ะ.”

19ดาวิด หน่าย, “เม่ย โหฒว เญย น้าย เต๋ย เหยียด ฒู้ง สี่ เซ โยอาบ ม่าย ป่วน เหธา เจี๊ยน โหฒว ไฟ?” วั้ว เต้า มเซียะ ตอน ก๊อง, “เยีย เฒี้ยง เจี๊ยน เยีย เญย เฒี้ยว, ฮู่ง เตี๋ย, เญย แหม่ง แล์ง หว่า, เยีย เญย เฒี้ยว, ฮู่ง เตี๋ย, ก๊อง เญย หว่า ไม้ เพียน มี่ง หฒาย, มี่ง บย่าว. เซ ฮู่ง เตี๋ย เญย โปว, โยอาบ, เห่ว เยีย โหฒว. เซ นิ่น หฌาว เยีย, เม่ย เญย มเซียะ โปว, ก๊อง น้าย เต๋ย เหยียด ฒู้ง หว่า.

20เม่ย เญย โปว, โยอาบ, อ๋อย ฮนั้ง น้าย โหฒว เหว่ย เบี๊ยน น้าย เต๋ย สี่. มป่า เยีย เญย เฒี้ยว ม่าย ธง-เม่ง ฮนั้ง ทิน-ฮู่ง เญย ฟิน-เมี่ยน, ไฮ่ ฮิ้ว ตุ๊ ลู่ง เดี๊ย เญย เหยียด ฒู้ง สี่.”

21ฮู่ง เตี๋ย ก๊อง บั๋ว โยอาบ, “วั้ว หญู่ง, เยีย ฆอย ฑุ่ย ปุน เม่ย โหฒว อ๊ะ. กุ๊น มี่ง ต้อ วั้ว เต้า เมี่ยน หลุน เมี่ยน, อับซาโลม, หฑวน ต้าย.”

22โยอาบ ฯฒฯ พัวะ เหฌี่ย เดา ป๋าย หย่า ปวัง หว่า ปุน ฮู่ง เตี๋ย. โยอาบ ก๊อง, “อี้ ฮนอย เม่ย เญย โปว, ฮิ้ว ตุ๊ หฒิว เยีย เญย เฒี้ยว, ฮู่ง เตี๋ย, หมั่ง เยีย โหฒว ตุ๊ หอบ ฮู่ง เตี๋ย เญย เฮญี้ยว, เหว่ย หฒุ ฮู่ง เตี๋ย ฆอย ฑุ่ย โหฒว เอย เม่ย เญย โปว โท้ เญย หว่า.”

23โยอาบ ฯฒฯ เจี์ย ซิน ต้าย มี่ง เกซู, ต้อ อับซาโลม หฑวน เยลูซาเลม.

24ฮู่ง เตี๋ย ก๊อง, “ปุน นิ่น มี่ง เยียม นิ่น กั้น เญย ติ่น, ไม้ ตู๋ง ปุน นิ่น ต้าย เยียม เยีย เญย หฑะเฮมียน.” อับซาโลม ฯฒฯ เยียม นิ่น กั้น เญย เปย๊า, ไม้ ตุ๊ แอ๋ง ต้าย เยียม ฮู่ง เตี๋ย เญย หฑะเฮมียน.

25เยียม ก๋อม อิสะลาเอน เต่ย-ปูง ไม้ ม่าย เหยียด เต้า เมี่ยน ด่ง อับซาโลม เหฑว่ย, ตุ๊ เมี่ยน เธง. เยียม นิ่น เญย มฆ้อง-แป้ง เถา เหฒา-โด๊ะ-เญ์ย เปย๊ย ไม้ ม่าย ต๋อง เฆ่ม.

26นิ่น เญย บะเปยย เฮนี้ย ไห่, อ๋อย หฒุ เหยียด หฮญัง จั๊บ หฑุ่น. จั๊บ ต้าย วั้ว หฒั่น นิ่น หฒิว ฮู่ง เตี๋ย เฑียง กะน้าย เญย เฮนี้ย-ต้าว เฑียง ตุ๊ เหยียด จ้อย เหฒียบ เป๊ด ลู์ง.

27อับซาโลม ตุ๊ ปัว เต้า ตอน เหธา เหยียด เต้า เซียะ, บั๋ว เห่ว ทามา. นิ่น เซ เหยียด เต้า เหฑว่ย ไห่ เญย เซียะ.

28อับซาโลม เยียม เยลูซาเลม ปวั๊ง อี หฮญัง หย่า ไม้ ตุ๊ มี่ง เยียม ฮู่ง เตี๋ย เญย หฑะเฮมียน.

29อับซาโลม พ้าย เมี่ยน มี่ง เห่ว โยอาบ ต้าย, อ๋อย ปุน นิ่น มี่ง ล์อ ฮู่ง เตี๋ย. มป่า โยอาบ แหง่ง เจี๊ยน ไม้ ต้าย. อับซาโลม แอ๋ง ปุน เมี่ยน มี่ง เห่ว โยอาบ ตะเหญ่ย หฑุ่น มป่า นิ่น หธ่อ ไม้ ต้าย.

30อับซาโลม ฯฒฯ บั๋ว นิ่น เญย โปว, “หมั่ง ม่าะ! โยอาบ เญย เด่ย เหธา เยีย เญย เด่ย เยียม นิด เจี๊ยน เญย. เด่ย กะญั์ว ม่าย เบย้า บาลี. เม่ย บัว มี่ง ปู๋ง โต์ว ปั๊ว ม่าะ!” อับซาโลม เญย โปว ฯฒฯ มี่ง ปั๊ว อ๊ะ.

31โยอาบ ฯฒฯ มี่ง อับซาโลม เญย เปย๊า หน่าย นิ่น, “เม่ย เญย โปว ฝู่ง มี่ง ปั๊ว เยีย เญย เด่ย?”

32อับซาโลม เตา โยอาบ, “เยีย พ้าย เมี่ยน มี่ง ล์อ เม่ย ต้าย, อ๋อย เม่ย มี่ง ล์อ ฮู่ง เตี๋ย เถง เยีย ก๊อง, ‘เยีย เหว่ย หาย ติ่ว เยียม เกซู หฑวน? เยีย หธ่อ เยียม หน่าย เก้า หลง. อี้ หฒั่น โท้ ปุน เยีย มี่ง เยียม ฮู่ง เตี๋ย เญย หฑะเฮมียน. สี ก๊อง ปวัด เยีย ม่าย ต่อง เญย ต๋อง, กุ๊น ปุน ฮู่ง เตี๋ย ไต๋ เยีย ไต่.’”

33โยอาบ ฯฒฯ มี่ง บั๋ว ฮู่ง เตี๋ย. ฮู่ง เตี๋ย เห่ว อับซาโลม ต้าย. นิ่น ฯฒฯ ต้าย เถา ฮู่ง เตี๋ย เญย หฑะเฮมียน พัวะ เหฌี่ย เดา. ฮู่ง เตี๋ย หย่า ฒม อับซาโลม.

← Chapter 13 Jump to: Chapter 15 →