2 Samuel 5

Mien Bible (Thai Script) © Thailand Bible Society, 2007

← Chapter 4 Jump to: Chapter 6 →

1ฝีงๆ อิสะลาเอน เมี่ยน มี่ง เฮโบโลน, ดาวิด วั้ว. นิ่น บัว ก๊อง, “เยีย บัว มต้าย จวั่ง เม่ย เญย ฑย้าม-เฟย.

2ฒิ่น ด่าง, เซาโล โหฒว ฮู่ง กุ๊น เยีย บัว เญย เฒี่ยง โห่, เซ เม่ย ต้อ อิสะลาเอน เมี่ยน เปียะ ธ้วด เบ๊าะ จ๋า. เฒี้ยว ก๊อง บั๋ว เม่ย, ‘เม่ย อ๋อย โก๋ว เยีย เญย แปะ ฝีง, อิสะลาเอน เมี่ยน, ฮนั้ง โก๋ว ปะกี ยู่ง เญย เมี่ยน นอ. เม่ย หย่า อ๋อย ตุ๊ โหฒว โฮล, กุ๊น นิ่น บัว.’”

3อิสะลาเอน เมี่ยน เญย หฒวัง เมี่ยน โก๋ ต้าย เถา เฮโบโลน, ดาวิด ฮู่ง วั้ว. ดาวิด ฯฒฯ เหธา นิ่น บัว เหลียบ เจี์ย แหง่ง หว่า. นิ่น บัว ฯฒฯ เยียม เฮโบโลน หล่ง โย่ว ออน ดาวิด โหฒว ฮู่ง กุ๊น อิสะลาเอน.

4ดาวิด โหฒว ฮู่ง วั้ว หฒั่น นิ่น เญย หฮญัง-เจ๊ย ตุ๊ ฟ่า เหฒียบ หฮญัง. นิ่น เฒว์ย เหว่ย กุ๊น เฝย เหฒียบ หฮญัง.

5นิ่น เยียม เฮโบโลน กุ๊น ยูดา เสี่ย หฮญัง-เปี๋ยน. นิ่น หย่า เยียม เยลูซาเลม กุ๊น ก๋อม อิสะลาเอน เหธา ยูดา ฟ่า เหฒียบ ฟาม หฮญัง.

6ฮู่ง เตี๋ย เหธา นิ่น เญย เมี่ยน ธ้วด มี่ง เถา เยลูซาเลม เบ๊าะ เยบุด เมี่ยน. เยียม วั้ว เญย เยบุด เมี่ยน ก๊อง บั๋ว ดาวิด, “เม่ย บัว ฒู้ง ไม้ ตุ๊ เปียะ น้าย. เลี่ยม มฒีง แม่ง เญย เมี่ยน เหธา เหฒา ไบ เญย เมี่ยน ไฮ่ ปุน เม่ย บัว หฒุ ถุย.” นิ่น บัว ฮนั้ม ต้าย, “ดาวิด เปียะ ไม้ ตุ๊ น้าย นอม ต๋อง.”

7มป่า ดาวิด เบ๊าะ ฮี่ง สิโอน เว่ย ว้วน เญย ต๋อง, เซ ดาวิด เญย ฒี่ง.

8วั้ว ฮนอย ดาวิด ก๊อง, “หาย เต้า อ๋อย เบ๊าะ เยบุด เมี่ยน, อ๋อย หฒุ ยั่ง ววม-หฒวน มี่ง เบ๊าะ วั้ว เต๋ย เหฒา ไบ เหธา มฒีง แม่ง เญย เมี่ยน, ต้ง ดาวิด ฑอง วั้ว เต๋ย เมี่ยน.” เหว่ย น้าย ม่าย โก๊ว หว่า ก๊อง, “มฒีง แม่ง เหธา เหฒา ไบ เญย เมี่ยน ไม้ ตุ๊ เปียะ ฮู่ง ติ่น.”

9ดาวิด ฯฒฯ มี่ง เยียม เจี๊ยน วั้ว นอม เว่ย ว้วน เญย ต๋อง, แอ๋ง ธ้วด บั๋ว เห่ว ดาวิด เญย ฒี่ง. นิ่น เหธย ฒี่ง เว่ย ก๋อม เญย ต๋อง เยียม มินโล เจี์ย กอน โหฒว.

10ดาวิด เหยียด ฮนอย เป๊ย เหยียด ฮนอย เฮ้น เจี๊ยน ฝาว, เหว่ย หฒุ เน่น เจี๋ย เญย เฒี้ยว ทิน-ฮู่ง เหธา นิ่น เยียม.

11ไทละ เญย ฮู่ง, ฮีลาม, พ้าย เต๋ย โต่ว เฝียน เมี่ยน มี่ง ดาวิด วั้ว, หย่า ฝูง สีดา ฒ่ง เดี๋ยง เหธา หละเปย๊ย-หฒั่ง เหธา เดี๋ยง-หฒั่ง. นิ่น บัว หย่า เหธย นอม ฮู่ง ติ่น ปุน นิ่น.

12ดาวิด ฯฒฯ ฮิ้ว ตุ๊ เฒี้ยว เหลียบ นิ่น โหฒว อิสะลาเอน เญย ฮู่ง. ทิน-ฮู่ง แอ๋ง เหว่ย นิ่น เญย แปะ ฝีง, อิสะลาเอน เมี่ยน, ปุน เมี่ยน ท่าย ดาวิด เญย กั๊วะ.

13ดาวิด ธ้วด เฮโบโลน มี่ง, ฆะฮ้า นิ่น เยียม เยลูซาเลม แอ๋ง ล์อ เอ๊า เหธา จ๊า-เฒ่ย เอ๊า หย่า ตุ๊ น่าม โญ์ว.

14เยียม น้าย มี่ง ก๊อง นิ่น เยียม เยลูซาเลม ตุ๊ ต้าย เญย ฝุเจว๊ย. ม่าย ซัมมุวา, โซบับ, นาทัน, ซาโลมอน,

15อิบฮา, เอลีซูวา, เนเฟ้ก, ยาเฟีย,

16เอลีซามา, เอลียาดา เหธา เอลีเฟเล้ด.

17ฟีลิสะเตีย เมี่ยน ไฮ์ ก๊อง เมี่ยน หล่ง โย่ว ออน ดาวิด โหฒว ฮู่ง กุ๊น อิสะลาเอน เต่ย-ปูง. ฟีลิสะเตีย เญย หฒวัง เมี่ยน ฯฒฯ ธ้วด ต้าย ล์อ ดาวิด, มป่า ดาวิด หมวัง ไฮ์ ฯฒฯ เหฌี่ย เถา เว่ย ว้วน เญย ต๋อง.

18ฟีลิสะเตีย เมี่ยน ต้าย ปุน หฑาน เยียม ปวั๊ง เลฟาอิม ฮ์อง.

19ดาวิด ฯฒฯ หน่าย เฒี้ยว, “เยีย อ๋อย หฒุ มี่ง เบ๊าะ ฟีลิสะเตีย เมี่ยน ไฟ? เม่ย อ๋อย เฒาะ นิ่น บัว จิว ปุน เยีย ไฟ?” เฒี้ยว เตา นิ่น, “กุ๊น มี่ง อ๊ะ. เหว่ย หฒุ เยีย ด่ง หาย ฒู้ง อ๋อย เฒาะ ฟีลิสะเตีย เมี่ยน จิว ปุน เยียม เม่ย เญย ปั์ว-เดี๊ย.”

20ดาวิด ฯฒฯ มี่ง บาอันเปลาซิม. เยียม หน่าย นิ่น เบ๊าะ ฮี่ง นิ่น บัว. นิ่น ก๊อง, “ เฒี้ยว เบ๊าะ ป่าย เยีย เญย วิน-วั้ง ฮนั้ง ววม หธง ทง นอ.” เหว่ย น้าย วั้ว นอม ต๋อง ธ้วด บั๋ว เห่ว บาอันเปลาซิม.

21ฟีลิสะเตีย เมี่ยน กวั่ง เจี๊ยน นิ่น บัว เญย หมิ่ว-ฝัง วั้ว. ดาวิด เหธา นิ่น เญย เมี่ยน ฯฒฯ เปี้ยน มี่ง เหฑ่ง หมี่ อ๊ะ.

22ฟีลิสะเตีย เมี่ยน แอ๋ง ต้าย ปุน หฑาน เยียม ปวั๊ง เลฟาอิม ฮ์อง.

23ดาวิด ฯฒฯ หน่าย เฒี้ยว, เฒี้ยว หย่า เตา ก๊อง, “ไม้ ตู๋ง แปง หฒะ ฝาว. อ๋อย หฒุ ฮวีง มี่ง เถา นิ่น บัว เญย ฆะฮ้า ฆาง เยียม เยี่ยน โหฒ่ว หล่ม ต๋อย-หง่าน เบ๊าะ นิ่น บัว.

24เม่ย บัว เยี้ยด ไฮ์ แปง-กวั้น ยั่ง เจ๊า เญย เฉีย บุย เยียม เยี่ยน โหฒ่ว หล่ม กู้ หงว่าย, อ๋อย หฒุ ก๊าน มี่ง, เหว่ย หฒุ น้าย ปุน ธีง เฒี้ยว เยียม เม่ย บัว เญย วั้ว ด่าง แหมง เบ๊าะ ฟีลิสะเตีย เมี่ยน เญย แปง-กวั้น.”

25ดาวิด ฯฒฯ เอย เจี๊ยน เฒี้ยว พ้าย เญย หว่า โหฒว. นิ่น บัว ฯฒฯ เยียม เกบา เบ๊าะ เจี๊ยน ฟีลิสะเตีย เมี่ยน มี่ง เถา เกเซ.

← Chapter 4 Jump to: Chapter 6 →