2 Samuel 18

Mien Bible (Thai Script) © Thailand Bible Society, 2007

← Chapter 17 Jump to: Chapter 19 →

1ดาวิด ติ๊ม หมั่ง กัน นิ่น เญย เมี่ยน แอ๋ง พ้าย กุ๊น เหยียด ธิน เต้า แปง เญย แปง-เปย๊ย เหธา กุ๊น เหยียด แป๊ะ เต้า แปง เญย แปง-เปย๊ย.

2ดาวิด หย่า พ้าย จุน-แปง ธ้วด มี่ง, ปุน โหฒว ปัว กวั้น. โยอาบ กุ๊น เหยียด กวั้น, เสลุยา เญย ตอน, โยอาบ เญย โย์ว, อาบีไช, กุ๊น เหยียด กวั้น, กัด เมี่ยน, อิดไท, หย่า กุ๊น เหยียด กวั้น. ดาวิด บั๋ว นิ่น เญย แปง, “เยีย กั้น ฒู้ง เหธา เม่ย บัว มี่ง.”

3มป่า นิ่น เญย แปง ก๊อง, “เม่ย ไม้ ตู๋ง มี่ง. สี ก๊อง เยีย บัว อ๋อย หฒุ เปย๋า, นิ่น บัว ฝุน เยีย บัว ไม้ หล่ง เจี๊ยน. ไม้ กุ๊น เยีย บัว หฒุ ไต่ เหยียด ป่วน, นิ่น บัว หย่า ไม้ ฝุน เยีย บัว ด่ง หาย หล่ง เจี๊ยน. มป่า ฮู่ง เตี๋ย เก้า จ๋าย เยีย บัว เหยียด หว่าน เต้า. เม่ย เยียม เจี๊ยน ฒี่ง กะญั์ว หลิ่ว เล์ย เถง เยีย บัว เซ เก้า หลง.”

4ฮู่ง เตี๋ย ก๊อง, “เม่ย บัว ปวัด หาย หญู่ง หอบ, เยีย ฯฒฯ ฮนั้ง วั้ว นอ โหฒว.” ฮู่ง เตี๋ย ฯฒฯ โซ้ว เจี๊ยน ฒี่ง แก้ง ด่าง. หฒวัง จุน-แปง ธ้วด มี่ง เป๋น เหยียด กวั้น, เหยียด กวั้น. เหยียด กวั้น ม่าย เหยียด แป๊ะ เต้า ไฟ เหยียด ธิน เต้า.

5ฮู่ง เตี๋ย พ้าย โยอาบ, อาบีไช เหธา อิดไท, “เหว่ย เยีย นอ, โท้ เฮงๆ โหฒว ปุน วั้ว เต้า เมี่ยน หลุน เมี่ยน, เซ อับซาโลม.” ฮู่ง เตี๋ย จา หว่า ก๊อง อับซาโลม เญย เจ๊า บั๋ว นิ่น เญย แปง-เปย๊ย วั้ว หฒั่น, หฒวัง เมี่ยน หย่า ไฮ์ หมี่ อ๊ะ.

6ดาวิด เญย จุน-แปง ธ้วด มี่ง เหธา อิสะลาเอน เญย แปง เบ๊าะ จ๋า. นิ่น บัว เยียม เอฟาอิม เญย หล่ม เบ๊าะ.

7เยียม หน่าย อิสะลาเอน เมี่ยน เซวย ดาวิด เญย เจียน. วั้ว ฮนอย หฒุ ไต๋ ไต่ เญย เมี่ยน ธั้ม! ไห่, ฒู้ง ม่าย อี หว่าน เต้า.

8วั้ว ฮนอย เบ๊าะ จ๋า เญย สี่ หฑาน มี่ง ปวั๊ง วั้ว เต๋ย ต๋อง เญย เดา. ไต่ วั้ว หล่ม เญย เมี่ยน เก้า ธั้ม หฒุ หฑุ ด๊าว ไต๋ วั้ว เต๋ย.

9โหฒว เกา, อับซาโลม เลี่ยม เฒ่ย ปวั้ง หฒุ ดาวิด เญย เจียน. วั้ว หฒั่น อับซาโลม เก้ เจี๊ยน ล่อ. ล่อ ยั่ง ต้ม บะอง เฒวย เดี๋ยง กะเดี๊ย เจี๋ย, อับซาโลม เญย มฆ้อง ฟับ หฒุ เดี๋ยง-ฆว่า. ล่อ มี่ง หมี่ อ๊ะ. นิ่น กั้น ดิ๋ว เจี๊ยน ไม้ เถา ลู่ง, ไม้ เถา เดา เญย.

10ม่าย เต้า เมี่ยน ปวัด ฯฒฯ บั๋ว โยอาบ, “เยีย ปวัด อับซาโลม ดิ๋ว เจี๊ยน ต้ม บะอง เฒวย เดี๋ยง.”

11โยอาบ บั๋ว ต้ง ต้อ เฝียน ต้าย บั๋ว นิ่น วั้ว เต้า, “เม่ย ปวัด นิ่น? วั้ว หญู่ง เม่ย เหว่ย หาย ติ่ว ไม้ ฮงะ นิ่น ด๊อด เหฌี่ย เดา ต้าย? เยีย อะเฮน้ย เฒาะ เหฒียบ นอม ฒิ่น เหธา ติ้ว โหว-ฮลาง โหฒว ฒี่ง เหญ่ย ปุน เม่ย.”

12มป่า วั้ว เต้า เมี่ยน เตา โยอาบ, “ไม้ กุ๊น เยีย เญย ปั์ว นั้น เหยียด ธิน นอม ฒิ่น, เยีย หย่า ไม้ ซูง ปั์ว ห่อย ฮู่ง เตี๋ย เญย ตอน, เหว่ย หฒุ เยีย บัว ตุ๊ ไฮ์ ฮู่ง เตี๋ย หัด เม่ย เหธา อาบีไช เหธา อิดไท. นิ่น ก๊อง, ‘เหว่ย เยีย โท้ โก๋ว วั้ว เต้า เมี่ยน หลุน เมี่ยน, อับซาโลม.’

13มป่า สี ก๊อง เยีย ห่อย นิ่น เญย แหม่ง, (หย่า ไม้ ม่าย หาย หญู่ง ปี๋ง ตุ๊ ฮู่ง เตี๋ย เจี๊ยน) เม่ย กั้น หย่า ไม้ ไฮ่ เปว ไม้ ตุ๊ เยีย.”

14โยอาบ ก๊อง, “เยีย ไม้ อ๋อย เหธา เม่ย กวั่ง เฒี่ยง โห่.” โยอาบ ฯฒฯ นั้น เจี๊ยน ปัว ติ้ว ธัง-นั้ง ฑบ เปียะ อับซาโลม เญย บะฑิว, ต้ง อับซาโลม เยียม บะอง เฒวย เดี๋ยง หธ่อ ม่าย แหม่ง เญย เฒี่ยง โห่.

15ม่าย เหฒียบ เต้า เมี่ยน หลุน เมี่ยน, ต้ง ต้อ โยอาบ เบ๊าะ จ๋า เญย หวัวะ กิ่น, เว่ย เจี๊ยน อับซาโลม ไต๋ นิ่น ไต่ อ๊ะ.

16โยอาบ ฯฒฯ ปย๊ม จอง โหฒว จั๋ง-โห่ ปุน แปง หฑวน ต้าย, ไม้ หฒุ่น อิสะลาเอน เมี่ยน อ๊ะ.

17นิ่น บัว เฒาะ อับซาโลม เญย เซย ตั๊บ นอม เยียม วั้ว หล่ม เญย ต้ม! ค้วด หย่า เฒาะ หละเปย๊ย ดุย เจี๊ยน เป๋น เหยียด ต้ม! ดุย หละเปย๊ย. อิสะลาเอน เญย หฒวัง เมี่ยน, เก๊าะ-เมี่ยน เปย๋า หฑวน เก๊าะ-เมี่ยน เญย เปย๊า.

18อับซาโลม หธ่อ เยียม เสย หฒั่ง วั้ว หฒั่น, นิ่น เยียม ฮู่ง ฮ์อง เหว่ย นิ่น กั้น เหลียบ นอม หละเปย๊ย-ต่ง โหฒว จั๋ง-โห่, เหว่ย หฒุ นิ่น ก๊อง, “เยีย ไม้ ม่าย ตอน หฑิบ เยีย เญย บั๋ว.” นิ่น ธ้วด หละเปย๊ย-ต่ง เญย บั๋ว เห่ว อับซาโลม เอย นิ่น กั้น เญย บั๋ว. เมี่ยน หย่า เห่ว อับซาโลม เญย จั๋ง-โห่ เถา อี้ จ๋า ฮนอย.

19สาโดก เญย ตอน, อาหิมาอัด ก๊อง, “โท้ ปุน เยีย ถิว มี่ง ต้อ เฝียน มี่ง บั๋ว ฮู่ง เตี๋ย, เฒี้ยว เหฌียว ฮู่ง เตี๋ย เปย๋า ดุ๊ด นิ่น เญย วิน-วั้ง หมี่ อ๊ะ.”

20โยอาบ ก๊อง บั๋ว นิ่น, “อี้ ฮนอย เม่ย ไม้ ตู๋ง ต้อ หาย หญู่ง เฝียน มี่ง บั๋ว. กั้น นอม ฮนอย เม่ย ต้อ มี่ง ตุ๊ เญย, มป่า อี้ ฮนอย ไม้ ตู๋ง ต้อ เหว่ย หฒุ ฮู่ง เตี๋ย เญย ตอน ไต่ หมี่ อ๊ะ.”

21โยอาบ ฯฒฯ ก๊อง บั๋ว เต้า คู้ด เมี่ยน, “มี่ง อ๊ะ. หฒิว เม่ย ปวัด เญย มี่ง บั๋ว ฮู่ง เตี๋ย.” คู้ด เมี่ยน เยียม โยอาบ เญย หฑะเฮมียน โด๊ะ เหฌี่ย ลิ์ว, ฯฒฯ ถิว มี่ง หมี่ อ๊ะ.

22สาโดก เญย ตอน, อาหิมาอัด, แอ๋ง ก๊อง บั๋ว โยอาบ, “ฮนั้ง หาย หย่า ป่า, โท้ ปุน เยีย กัน คู้ด เมี่ยน มี่ง.” โยอาบ ก๊อง, “เยีย เญย ตอน อ่า, เม่ย อ๋อย ถิว มี่ง โหฒว หาย หญู่ง? เหว่ย หฒุ เม่ย บั๋ว น้าย เต๋ย เฝียน ไม้ ม่าย ฒี่ง เหญ่ย ปุน เม่ย.”

23อาหิมาอัด ก๊อง, “ฮนั้ง หาย หย่า ป่า, เยีย อ๋อย ถิว มี่ง!” โยอาบ ก๊อง, “วั้ว หญู่ง เม่ย ถิว มี่ง อ๊ะ ม่าะ!” อาหิมาอัด ฯฒฯ กัน เดา-แป้ง เญย เจ๊า ถิว เจี๋ย ด่าง คู้ด เมี่ยน.

24วั้ว หฒั่น ดาวิด เฒว์ย เจี๊ยน กะญั์ว เหธา กะเหญี่ย เญย ฒี่ง แก้ง บุด๋ง. เซี้ยว แกง เมี่ยน ฝาว ฒั้ว แก้ง เญย ล่าว กู้ หงว่าย. เธา เฮมียน หมั่ง นิ่น ปวัด ม่าย เหยียด เต้า เมี่ยน กั้น ถิว เจี๊ยน ต้าย ฮนั้ง.

25เซี้ยว แกง เมี่ยน ฯฒฯ เห่ว เจี๊ยน บั๋ว ฮู่ง เตี๋ย. ฮู่ง เตี๋ย ก๊อง, “สี ก๊อง ดุ เต้า เมี่ยน ต้าย ฮนั้ง, ต๋าย นิ่น ต้อ เฝียน ต้าย บั๋ว.” วั้ว เต้า เมี่ยน กุ๊น โหฒว กุ๊น ต้าย ฟัด.

26เซี้ยว แกง เมี่ยน แอ๋ง ปวัด เหยียด เต้า เมี่ยน ถิว เจี๊ยน ต้าย. เซี้ยว แกง เมี่ยน ฯฒฯ เห่ว ฒั้ว แก้ง เมี่ยน บั๋ว นิ่น, “หมั่ง ม่าะ! แอ๋ง กั้น ม่าย เต้า เมี่ยน ถิว เจี๊ยน ต้าย.” ฮู่ง เตี๋ย ก๊อง, “ต๋าย นิ่น หย่า ต้อ เฝียน ต้าย.”

27เซี้ยว แกง เมี่ยน ก๊อง, “เยีย ปวัด ถิว ต้าย ด่าง วั้ว เต้า ถิว ฮนั้ง สาโดก เญย ตอน, อาหิมาอัด.” ฮู่ง เตี๋ย ก๊อง, “นิ่น เซ คู้ เมี่ยน หย่า ต้อ คู้ เฝียน ต้าย.”

28อาหิมาอัด เห่ว เจี๊ยน บั๋ว ฮู่ง เตี๋ย, “แป้ง ออน อ๊ะ โอ่.” นิ่น ฯฒฯ เยียม ฮู่ง เตี๋ย เญย หฑะเฮมียน พัวะ เหฌี่ย เฮมียน เถา เดา ก๊อง, “เธง เฒี้ยว, เม่ย เญย ทิน-ฮู่ง, เหว่ย หฒุ นิ่น เฒาะ ต้ง ซูง ปั์ว ห่อย เยีย เญย เฒี้ยว, ฮู่ง เตี๋ย, วั้ว เต๋ย เมี่ยน จิว ปุน ฮู่ง เตี๋ย หมี่ อ๊ะ.”

29ฮู่ง เตี๋ย หน่าย, “วั้ว เต้า เมี่ยน หลุน เมี่ยน, อับซาโลม, เยียม หลง เญย ไฟ?” อาหิมาอัด เตา, “เม่ย เญย โปว, โยอาบ, พ้าย เยีย ต้าย วั้ว หฒั่น, เยีย ปวัด เมี่ยน ธั้ม ดุด ต๋า ดุด เญย, มป่า ไม้ ฮิ้ว ตุ๊ ม่าย หาย หญู่ง สี่ ธ้วด.”

30ฮู่ง เตี๋ย ก๊อง, “มี่ง โซ้ว เจี๊ยน วั้ว กะเฮลน.” นิ่น ฯฒฯ ถุย มี่ง กะเฮลน โซ้ว ตี่ง เญย.

31วั้ว หฒั่น คู้ด เมี่ยน ต้าย เถา อ๊ะ. คู้ด เมี่ยน ก๊อง, “ม่าย คู้ เฝียน บั๋ว เยีย เญย เฒี้ยว, ฮู่ง เตี๋ย, เหว่ย หฒุ อี้ ฮนอย เฒี้ยว เหฌียว ฮู่ง เตี๋ย เปย๋า ดุ๊ด เหยียด ฒู้ง อ๋อย ห่อย ฮู่ง เตี๋ย วั้ว เต๋ย.”

32ฮู่ง เตี๋ย หน่าย คู้ด เมี่ยน “วั้ว เต้า เมี่ยน หลุน เมี่ยน, อับซาโลม, หลง เญย ไฟ?” คู้ด เมี่ยน เตา, “โท้ ปุน เยีย เญย เฒี้ยว, ฮู่ง เตี๋ย, เญย วิน-วั้ง เหธา เหยียด ฒู้ง เจี์ย ต้าย อ๋อย ห่อย ฮู่ง เตี๋ย วั้ว เต๋ย, ฮนั้ง วั้ว เต้า เมี่ยน หลุน เมี่ยน.”

33ฮู่ง เตี๋ย เฮญี้ยว มุน ตุ๊ โด ไห่. นิ่น ฝาว ฒี่ง แก้ง กู้ หงว่าย เญย เหยียด ฉง เญี้ยม. นิ่น เหยียด ปิ่น มี่ง เหยียด ปิ่น ก๊อง, “โอ เยีย เญย ตอน, อับซาโลม อ่า, เยีย เญย ตอน, เยีย เญย ตอน, อับซาโลม. เฝย ตุ๊ เยีย ตุ๊ ไต่ ตี๊ เม่ย. เยีย เญย ตอน, เยีย เญย ตอน, อับซาโลม อ้า!”

← Chapter 17 Jump to: Chapter 19 →