2 Samuel 17

Mien Bible (Thai Script) © Thailand Bible Society, 2007

← Chapter 16 Jump to: Chapter 18 →

1อาหิโทเฟน แอ๋ง ก๊อง บั๋ว อับซาโลม, “โท้ ปุน เยีย กิ๊น เหยียด หว่าน อี ธิน เต้า แปง. อี้ ม์วน เยีย ฯฒฯ มี่ง หฒุ่น ดาวิด.

2นิ่น ขวน หย่า โค้ว เญย เฒี่ยง โห่ เยีย ฯฒฯ หฒุ่น หฒ่าย, แฮะ นิ่น กั้ม เหฑีย. กัน นิ่น วั้ว เต๋ย หฒวัง เมี่ยน ฯฒฯ เปย๋า เหฑ่ง. เยีย ฯฒฯ ไต๋ ฮู่ง เตี๋ย กั้น ฮนั้ง,

3แอ๋ง ต้อ แปะ ฝีง หฑวน ต้าย เกวย เม่ย ฮนั้ง เซียง-บวั์ง หฑวน ต้าย ล์อ เซียง-ล่าง นอ. สี ก๊อง เม่ย ล์อ วั้ว เต้า เมี่ยน หฒุ ไต่, เม่ย ฯฒฯ ตุ๊ เหยียด ฒู้ง แปะ ฝีง หฑวน. เหฒ่ง เหฌี่ย เญย เมี่ยน ฯฒฯ แป้ง ออน เญย เยียม.”

4น้าย หญู่ง หฒะเอ๋ย หอบ อับซาโลม เหธา อิสะลาเอน เญย หฒวัง เมี่ยน โก๋ เญย เฮญี้ยว.

5มป่า อับซาโลม ก๊อง, “มี่ง เห่ว อานคี เมี่ยน, หุไซ, ต้าย, ปุน บัว หมวัง ก๋า นิ่น ฮนั้ง หาย นอ ก๊อง.”

6หุไซ ต้าย ล์อ อับซาโลม วั้ว หฒั่น, อับซาโลม บั๋ว นิ่น, “อาหิโทเฟน ฮนั้ง น้าย นอ ก๊อง. เยีย บัว เอย นิ่น เญย หฒะเอ๋ย โหฒว หอบ ไฟ ไม้ หอบ? ไม้ หอบ นอ, เม่ย ก๊อง ม่าะ!”

7หุไซ ก๊อง บั๋ว อับซาโลม, “น้าย หฑุ่น อาหิโทเฟน ต๊า หฒะเอ๋ย ไม้ หย่าว.”

8หุไซ แอ๋ง ก๊อง, “เม่ย ฮิ้ว ตุ๊ เม่ย เญย เตีย เหธา นิ่น เญย เมี่ยน เซ เบ๊าะ จ๋า เฮ้น เญย เมี่ยน. อี้ หฒั่น นิ่น บัว เฉีย เจี์ย ฮนั้ง เยียม หล่ม-ฮวาง เญย เจี๊ยบ-เญ์ย, นิ่น เญย ตอน หฒุ ธ้าง มี่ง นอ. ไม้ ตาน บัวะ น้าย. เม่ย เญย เตีย เซ เหยียด เต้า เบ๊าะ จ๋า เฮ้น เญย เมี่ยน. ลู่ง ม์วน หฒั่น นิ่น ไม้ เหธา นิ่น เญย แปง-กวั้น เปว๋ย.

9ต๋าย อี้ หฒั่น นิ่น ฒู้ง ปี๋ง เจี๊ยน เหยียด นอม ค้วด ไฟ กั้น นอม ต๋อง. เหฑีย นิ่น เญย แปง ไฮ่ เบ๊าะ เม่ย เญย แปง ด่าง. หมวัง ไฮ์ เญย เมี่ยน ฯฒฯ ก๊อง, ‘กัน อับซาโลม วั้ว เต๋ย แปง หฒุ ไต๋ ไต่ หมี่ อ๊ะ.’

10ไม้ กุ๊น ม่าย เมี่ยน ต๊าม โฮล, เซ ม่าย เฮญี้ยว ฮนั้ง เซี่ยน เญย เฮญี้ยว นอ, นิ่น บัว ฒู้ง กั้ม เหฑีย เกา, บะฑิว หยุ เหฑ่ง, เหว่ย หฒุ อิสะลาเอน เญย หฒวัง เมี่ยน ฮิ้ว ตุ๊ เม่ย เญย เตีย เซ เบ๊าะ จ๋า เฮ้น เญย เมี่ยน. กัน นิ่น วั้ว เต๋ย หย่า โหฒว เบ๊าะ จ๋า เฮ้น เญย แปง.

11“หฒิว เยีย เญย หฒะเอ๋ย, เม่ย อ๋อย หฒุ เห่ว อิสะลาเอน เญย หฒวัง เมี่ยน, เยียม ดาน เถา เบเอเชบา ด่ง ค้อย-เฮลน เญย ซา-เฒียว ธั้ม, ต้าย ฒุ้น เม่ย น้าย. เม่ย กั้น อ๋อย หฒุ ต้อ นิ่น บัว มี่ง เบ๊าะ จ๋า.

12ฮนั้ง หน่าย, เยีย บัว เยียม หาย เดา ปวั้ง หฒุ นิ่น, เยีย บัว ฯฒฯ เหฌี่ย ฮนั้ง บยู่ง-ซุ้ย เหฌี่ย เดา. เลี่ยม นิ่น เหธา กัน นิ่น เญย เมี่ยน ฯฒฯ ไม้ เลี่ยว เหยียด เต้า อ๊ะ.

13สี ก๊อง นิ่น ถุย เปียะ นอม ฒี่ง กะญั์ว, อิสะลาเอน เญย หฒวัง เมี่ยน ฯฒฯ ต้อ ฮลาง มี่ง ทอ วั้ว นอม ฒี่ง เหฌี่ย ฮ์อง, เถา เลี่ยม เหยียด นอม หละเปย๊ย-ตอน ไม้ ปวัด เยียม วั้ว.”

14อับซาโลม เหธา อิสะลาเอน เญย หฒวัง เมี่ยน ก๊อง, “อานคี เมี่ยน, หุไซ, เญย หฒะเอ๋ย เซ เก้า หลง อาหิโทเฟน เญย.” เหว่ย หฒุ เฒี้ยว ตี่ง ปุน อาหิโทเฟน หลง เญย หฒะเอ๋ย ด๊อด เหว่ย ปุน อับซาโลม หฒุ เธี้ยว เญย เหฒะ หน่าน.

15หุไซ ก๊อง บั๋ว สาโดก ไซ เมี่ยน เหธา อาบียาทา ไซ เมี่ยน, “อาหิโทเฟน ธ่าง ล่าง บั๋ว อับซาโลม เหธา อิสะลาเอน เญย เมี่ยน โก๋ เญย หว่า เซ ฮนั้ง น้าย ฮนั้ง วั้ว. เยีย กั้น ก๊อง เญย หฒะเอ๋ย เซ ฮนั้ง น้าย ฮนั้ง วั้ว.

16อี้ หฒั่น ก๊าน พ้าย เมี่ยน มี่ง บั๋ว ดาวิด ‘อี้ ม์วน ไม้ ตู๋ง ฮิด เปียะ เต่ย-ปูง-ฮวาง เญย เจ๊า-โป่ว. ด่ง หาย ฒู้ง อ๋อย หฒุ เจี๋ย จอแดน ด้าย. เหฑีย ฮู่ง เตี๋ย เหธา กัน นิ่น เญย เหยียด ฒู้ง เมี่ยน หฒุ นะ เหฑ่ง.’”

17วั้ว หฒั่น โยนาทาน เหธา อาหิมาอัด เยียม เอนโลเกน ฒั้ว. ม่าย เต้า มเซียะ โปว อ้าโหล่ ต้อ หว่า มี่ง บั๋ว นิ่น บัว, นิ่น บัว ฯฒฯ มี่ง บั๋ว ดาวิด ฮู่ง, เหว่ย หฒุ นิ่น บัว กั้ม เหฑีย ไม้ ปุน เมี่ยน ปวัด นิ่น บัว เปียะ ฒี่ง.

18มป่า ม่าย เต้า เมี่ยน หลุน เมี่ยน ปวัด นิ่น บัว ฯฒฯ มี่ง บั๋ว อับซาโลม. นิ่น บัว อี เต้า ฯฒฯ ก๊าน เจี๊ยน เปย๋า เถา บาฮูลิม, เหยียด เต้า เมี่ยน เญย เปย๊า. วั้ว เต้า เมี่ยน เญย หลาด กะญั์ว ม่าย นอม ววม-ค้วด. นิ่น บัว ฯฒฯ เปียะ กะญั์ว มี่ง.

19วั้ว เต้า เมี่ยน เญย เอ๊า ล์อ คว้าย กะน้าย ก๊ม เจี๊ยน ค้วด-ฑุ่ย แอ๋ง เฒาะ ธุ พุย เจี๊ยน กู้ หงว่าย, หย่า ไม้ ม่าย หาย เต้า ฮิ้ว.

20อับซาโลม เญย เจียน ต้าย เถา วั้ว เต้า มเซียะ ตอน เญย เปย๊า หน่าย, “อาหิมาอัด เหธา โยนาทาน เยียม หาย?” วั้ว เต้า มเซียะ ตอน เตา, “นิ่น บัว เจี๋ย วั้ว หง่าน หฒิ ด้าย.” วั้ว เต๋ย เมี่ยน ล์อ มป่า ล์อ ไม้ ปวัด หาย เต้า. นิ่น บัว ฯฒฯ หฑวน เยลูซาเลม ฒี่ง หมี่ อ๊ะ.

21อับซาโลม เญย เจียน หฑวน มี่ง, อาหิมาอัด เหธา โยนาทาน เยียม ววม-ค้วด ธ้วด ต้าย มี่ง บั๋ว ดาวิด. นิ่น บัว ก๊อง, “เซี้ยบๆ เญย เจี์ย ซิน ต้าย ก๊าน เจี๊ยน เจี๋ย วั้ว หง่าน หฒิ ด้าย เหว่ย หฒุ อาหิโทเฟน ฮนั้ง น้าย ฮนั้ง วั้ว ธ่าง ล่าง ห่อย เม่ย.”

22ดาวิด เหธา กัน นิ่น เญย หฒวัง เมี่ยน ฯฒฯ เจี๋ย วั้ว หง่าน หฒิ จอแดน ด้าย. เถา ลู่ง ฌัง เหยียด ฒู้ง เจี๋ย เหฑ่ง, ไม้ เหฒ่ง เหยียด เต้า.

23อาหิโทเฟน ปวัด เมี่ยน ไม้ เอย นิ่น เญย หฒะเอ๋ย, นิ่น ฯฒฯ เฒาะ เก้ ออน ปุ่ย เจี๊ยน ล่อ, เก้ เจี๊ยน หฑวน นิ่น เญย เปย๊า เยียม กั้น เญย ป๊วน-มู้ง. นิ่น หลิ่ว เล์ย หญู่งๆ ซูง ฯฒฯ ดิ๋ว จาง ไต่ หมี่ อ๊ะ. เมี่ยน ต้อ นิ่น มี่ง หฒัง นิ่น เญย เตีย เญย โฒ้ว.

24ดาวิด มี่ง เถา มาหะนาอิม. อับซาโลม เหธา กัน นิ่น เญย หฒวัง เมี่ยน หย่า เจี๋ย วั้ว หง่าน หฒิ จอแดน ด้าย.

25อับซาโลม เหลียบ อามาสา โหฒว ต้ม แปง-เปย๊ย ตี๊ โยอาบ. อามาสา เซ อิสะมาเอน เมี่ยน, บั๋ว เห่ว อิดทาลา, เญย ตอน. อิดทาลา, หล่ง โยอาบ เญย มา, เสลุยา, เญย เฑี์ย, เซ นาหาด เญย เซียะ, อาบีกายิน.

26อับซาโลม เหธา อิสะลาเอน เมี่ยน เหลียบ เธี้ยง เยียม กิเลอาด เต่ย.

27ดาวิด เถา มาหะนาอิม เญย เฒี่ยง โห่, ม่าย อัมโมน ฝีง, ลับบา เมี่ยน, นาหาด เญย ตอน, โซบี, เหธา โลเดบา เมี่ยน, อัมมีเอน, เญย ตอน, มาคีเล, เหธา กิเลอาด เต่ย เญย โลเกลิม มู้ง เญย เมี่ยน, บาซินไล,

28ต้อ เจี๊ยน สวัง-ติ่ม, ปุ้น, หล่ง เนีย โหฒว ต้าย เญย จา-ต๋อง, เบย้า วิด เหธา เบย้า บาลี, เหธา บ๊วน, ธ้าว ต้าย เญย เบย้า, ตบ, ตบ ซิ,

29เมว์ย-ต้อง, หญอ-เฮมย, ปะกี ยู่ง เหธา เยียม นิ่น บัว เญย แซง-คู้ กวั้น โหฒว ต้าย เญย หญอ-เฮมย-แหง่ง ปุน ดาวิด เหธา กัน นิ่น ต้าย เญย เมี่ยน หญั่น. เหว่ย หฒุ นิ่น บัว ก๊อง, “น้าย เต๋ย เมี่ยน เยียม เต่ย-ปูง-ฮวาง เฮญี้ยว หย่า เซีย, จาง หย่า ฆ้าด, นิ่น บัว โค้ว ไห่ อ๊ะ.”

← Chapter 16 Jump to: Chapter 18 →