2 Samuel 13

Mien Bible (Thai Script) © Thailand Bible Society, 2007

← Chapter 12 Jump to: Chapter 14 →

1ดาวิด เญย ตอน, อับซาโลม, ม่าย เต้า หมั่ว เฒี่ยง ตุ๊ เหฑว่ย ไห่. นิ่น เญย บั๋ว เห่ว ทามา. ดาวิด เญย กั้น เต้า ตอน, อัมโนน, ฮนั้ม ทามา.

2อัมโนน ปะหละ ฮนั้ม เกา, เฮญี้ยว เฑ่า ตุ๊ โค้ว, ฒู้ง เป๋น แป่ง หมี่ อ๊ะ. เหว่ย หฒุ ทามา เซ ไม้ เปว๋ย เจี๋ย ตอน เญย เซียะ, อัมโนน ไฮ์ ไม้ หน่อย ตุ๊ ทามา.

3อัมโนน ม่าย เต้า โล์-แกง ต่อย, บั๋ว เห่ว โยนาดับ, เซ ดาวิด เญย ก๋อ, ซีเมฮา, เญย ตอน. น้าย เต้า เมี่ยน ไกว ไห่.

4นิ่น ก๊อง บั๋ว อัมโนน, “ฮู่ง เญย ตอน อ้า! เม่ย เหว่ย หาย ติ่ว เหยียด ดอม เป๊ย เหยียด ดอม เฑ่า? เม่ย ไม้ บั๋ว เยีย ไฟ?” อัมโนน เตา, “เยีย ฮนั้ม เยีย เญย โย์ว, อับซาโลม, เญย หมั่ว, ทามา.”

5โยนาดับ ก๊อง บั๋ว นิ่น, “เม่ย อ๋อย หฒุ เปว๋ย เจี๊ยน โหธว หฒา หล่าย ปุ๊ด แป่ง. เม่ย เญย เตีย ต้าย หมั่ง เม่ย เญย เฒี่ยง โห่ อ๋อย หฒุ ก๊อง บั๋ว นิ่น, ‘โท้ บั๋ว เยีย เญย หมั่ว, ทามา, ต้อ หญั่น ฮบ ต้าย ปุน เยีย หญั่น. นิ่น อ๋อย หฒุ ต้าย เยียม เยีย เญย หฑะเฮมียน หลิ่ว เล์ย ปุน เยีย ตุ๊ ปวัด นิ่น. ฆะฮ้า นิ่น กั้น เญย ปั์ว อ๋อย หฒุ ต้อ ต้าย ปุน เยีย หญั่น.’”

6อัมโนน ฯฒฯ เปว๋ย เจี๊ยน โหธว หฒา หล่าย ปุ๊ด แป่ง. ฮู่ง เตี๋ย ต้าย หมั่ง นิ่น เญย เฒี่ยง โห่ นิ่น ก๊อง บั๋ว ฮู่ง เตี๋ย, “โท้ ปุน เยีย เญย หมั่ว, ทามา, ต้าย เยียม เยีย เญย หฑะเฮมียน โหฒว อี นอม ฌั้ว, ปุน นิ่น กั้น ต้อ ต้าย ปุน เยีย หญั่น.”

7ดาวิด ฯฒฯ พ้าย เมี่ยน มี่ง บั๋ว ทามา, “มี่ง เม่ย เญย ก๋อ, อัมโนน, เญย เปย๊า หลิ่ว เล์ย กะน้าย ปุน นิ่น หญั่น.”

8ทามา ฯฒฯ มี่ง นิ่น เญย ก๋อ, อัมโนน, เญย เปย๊า, เถา อัมโนน เปว๋ย เจี๊ยน เญย ต๋อง. นิ่น ฯฒฯ เยียม อัมโนน เญย หฑะเฮมียน เฒาะ โช้ว เหฒียง เญย บ๊วน ไหธ ต้าย ฒาง.

9นิ่น หย่า เยียม อัมโนน เญย หฑะเฮมียน เฒาะ ฌั้ว ธ้วด ต้าย มป่า อัมโนน ไม้ หญั่น. นิ่น ก๊อง บั๋ว หฒวัง เมี่ยน, “ธ้วด เหฑ่ง มี่ง!” นิ่น บัว ฯฒฯ ธ้วด เหฑ่ง หมี่ อ๊ะ.

10อัมโนน ก๊อง บั๋ว ทามา, “ต้อ ฌั้ว เปียะ เยีย เญย เกน เหว่ย ปุน เยีย ตุ๊ หญั่น เม่ย เญย ปั์ว ต้อ ต้าย เญย กะน้าย.” ทามา ฯฒฯ ต้อ นิ่น โหฒว ต้าย เญย ฌั้ว เปียะ เกน มี่ง ปุน นิ่น เญย ก๋อ, อัมโนน, หญั่น.

11มป่า ต้อ ฌั้ว มี่ง ปุน นิ่น เญย ก๋อ หญั่น วั้ว หฒั่น, นิ่น เญย ก๋อ เฒาะ เจี๊ยน นิ่น แอ๋ง ก๊อง บั๋ว นิ่น, “เยีย เญย หมั่ว อ้า! ต้าย เหธา เยีย เปว๋ย ม่าะ!”

12ทามา ก๊อง, “เยีย เญย ก๋อ อ้า! ไม้ ตุ๊ เหลาะ. ไม้ ตู๋ง อ๊าบ เยีย. เยียม อิสะลาเอน เมี่ยน บุด๋ง ไม้ โหฒว น้าย เต๋ย สี่. ไม้ ตู๋ง โหฒว น้าย เต๋ย เอ๊าะ สี่ ม่าะ!

13เยีย กั้น แอ๊ะ, ฮนั้ง หน่าย หฒุ ไญ้, เยีย เญย เฮมียน ไม้ ลั่ม อัน ต๋อง อ๊ะ. เม่ย กั้น หย่า หฒุ เยียม อิสะลาเอน เมี่ยน บุด๋ง เป๋น กะน้าย-หฮงง. เหว่ย น้าย เม่ย หอบ หฒุ โท้ ฮู่ง เตี๋ย, ฮนั้ม ต้าย นิ่น ไม้ แหง่ง ปู๋ง เยีย ปุน เม่ย.”

14มป่า อัมโนน ไม้ หมวัง. นิ่น เญย ชะ เก้า เฮ้น, นิ่น ฯฒฯ ธา นิ่น เญย หมั่ว, ทามา.

15ฆะฮ้า อัมโนน เก้ง! ฑอง ไห่ ทามา, ฒู้ง ฑอง เก้า ธั้ม นิ่น ฒิ่น ด่าง ฮนั้ม วั้ว หฒั่น. อัมโนน ก๊อง, “เจี์ย ซิน ต้าย, มี่ง อ๊ะ.”

16ทามา ก๊อง บั๋ว นิ่น, “เยีย เญย ก๋อ อ้า! ไม้ ตู๋ง ฮนั้ง น้าย โหฒว. หฒุ่น เยีย ธ้วด เซ ต่อง เก้า เฮนี้ย เม่ย โหฒว ปุน เยีย เญย.” มป่า อัมโนน ไม้ หมวัง.

17นิ่น ฯฒฯ เห่ว นิ่น กั้น เญย โปว ต้าย บั๋ว นิ่น, “หฒุ่น น้าย เต้า มเซียะ ตอน ธ้วด น้าย มี่ง, กวน เจี๊ยน แก้ง, ซอน เจี๊ยน.”

18อัมโนน เญย โปว ฯฒฯ หฒุ่น ทามา ธ้วด มี่ง แอ๋ง ซอน เจี๊ยน แก้ง. วั้ว หฒั่น ทามา ฒุ เจี๊ยน ลุย-ด๊าว. ลุย-เมว์ย หย่า ด๊าว เญย ฮนั้ง ไม้ แก้ง ตอง จา เญย ฮู่ง เซียะ ฒุ นอ.

19ทามา เฒาะ ซ้าย หฮยาม เจี๊ยน มฆ้อง หย่า เป๊ด นิ่น ฒุ เจี๊ยน ม่าย ลุย-เมว์ย ด๊าว เญย ลุย, หล่ง ปั์ว ปวัง เจี๊ยน มฆ้อง เหยียด ปิ่น มี่ง เหยียด ปิ่น เญี้ยม บุย เญย.

20ทามา เญย ก๋อ, อับซาโลม, หน่าย นิ่น, “เม่ย เญย ก๋อ, อัมโนน, เหธา ลิ์ว เม่ย ไฟ? เยีย เญย หมั่ว อ่า, ไม้ ตู๋ง ก๊อง อ๊ะ. นิ่น โหฒว เม่ย เญย ก๋อ. ไม้ ตู๋ง ฮนั้ม ธั้ม.” ทามา ฯฒฯ เฑ่าๆ โดะๆ เญย เยียม นิ่น เญย ก๋อ, อับซาโลม, เญย เปย๊า.

21ดาวิด ฮู่ง ไฮ์ น้าย เต๋ย เหยียด ฒู้ง สี่ นิ่น เฉีย เจี์ย! ไห่.

22มป่า อับซาโลม ไม้ เหธา อัมโนน ก๊อง หาย หญู่ง หว่า, ไม้ กุ๊น หลง ไฟ เธี้ยว, เหว่ย หฒุ อับซาโลม ฑอง อัมโนน หลาย อัมโนน ธา นิ่น เญย หมั่ว.

23เจี๋ย ลิ์ว อี หฮญัง, อับซาโลม เยียม บาอันฮาโซ, นิด เอฟาอิม, จั๊บ ปะกี ยู่ง เญย เปยย. อับซาโลม ธี้ง ฮู่ง เตี๋ย เญย เหยียด ฒู้ง ตอน เหธา เจี๊ยน นิ่น มี่ง.

24นิ่น มี่ง ล์อ ฮู่ง เตี๋ย หย่า ก๊อง, “เยีย, เม่ย เญย โปว, ม่าย เมี่ยน จั๊บ ปะกี ยู่ง เญย เปยย. โท้ ฮู่ง เตี๋ย เหธา ฮู่ง เญย หฒวัง เจียน เหธา เยีย, เม่ย เญย โปว, มี่ง.”

25มป่า ฮู่ง เตี๋ย ก๊อง บั๋ว อับซาโลม, “เยีย เญย ตอน อ้า! บัว ไม้ หฒุ มี่ง เหฑ่ง. เหฑีย ขูง หละเญ้า เม่ย ฮนั้ง.” อับซาโลม ชะ โท้, ฮู่ง เตี๋ย หธ่อ ไม้ แล์ง มี่ง, มป่า นิ่น ปวัง หว่า ปุน อับซาโลม.

26อับซาโลม ฯฒฯ ก๊อง, “ไม้ มี่ง นอ, โท้ ฆอย ฑุ่ย ปุน เยีย เญย ก๋อ, อัมโนน, เหธา เจี๊ยน เยีย บัว มี่ง.” ฮู่ง เตี๋ย หน่าย, “นิ่น เหว่ย หาย ติ่ว อ๋อย หฒุ เหธา เม่ย มี่ง?”

27มป่า อับซาโลม ชะ โท้, ฮู่ง เตี๋ย ฯฒฯ ฆอย ฑุ่ย ปุน อัมโนน เหธา ฮู่ง เญย เหยียด ฒู้ง ตอน มี่ง.

28อับซาโลม พ้าย นิ่น เญย โปว, “ฒั้ว เจี๊ยน หมั่ง อัมโนน ฮบ ติ๊ว ธั้ม เฌียน-โย่ว อ๊ะ, เยีย หาย หฒั่น ก๊อง, ‘ไต๋ อัมโนน อ๊ะ,’ กุ๊น ไต๋ นิ่น ไต่. ไม้ ตู๋ง กั้ม เหฑีย. เซ เยีย พ้าย เม่ย บัว โหฒว ไม้ เฒ์ย? อ๋อย หฒุ ต๊าม โฮล หย่า เฮ้น.”

29อับซาโลม เญย โปว ฯฒฯ เอย เจี๊ยน นิ่น พ้าย เญย หว่า โหฒว ปุน อัมโนน. ฮู่ง เตี๋ย เหฒ่ง เหฌี่ย เญย เหยียด ฒู้ง ตอน เจี์ย ซิน ต้าย, เก๊าะ-เมี่ยน ฝาว เก๊าะ-เมี่ยน เญย ล่อ เก้ เจี๊ยน เปย๋า.

30นิ่น บัว หธ่อ เยียม ด๊าม-เจ๊า วั้ว หฒั่น ม่าย หว่า เถา ดาวิด วั้ว ก๊อง, “อับซาโลม ไต๋ เหฑ่ง ฮู่ง เญย ตอน, ไม้ เหฒ่ง เหยียด เต้า.”

31ฮู่ง เตี๋ย โซ้ว เจี์ย ต้าย เป๊ด นิ่น เญย ลุย-โหว หย่า เปว๋ย กะเดี๊ย เดา. โซ้ว เจี๊ยน ฮู่ง เญย กะเฮลน วั้ว เต๋ย เจียน หย่า เป๊ด นิ่น บัว เญย ลุย-โหว.

32มป่า ดาวิด เญย ก๋อ, ซีเมฮา เญย ตอน, โยนาดับ, ก๊อง, “โท้ เยีย เญย เฒี้ยว ไม้ ตู๋ง หล่าย นิ่น บัว ไต๋ เหฑ่ง วั้ว เต๋ย เมี่ยน หลุน เมี่ยน, เซ ฮู่ง เตี๋ย เญย เหยียด ฒู้ง ตอน, เหว่ย หฒุ ขูง อัมโนน กั้น ไต่ ฮนั้ง. เยียม อัมโนน ธา อับซาโลม เญย หมั่ว, ทามา, วั้ว ฮนอย, อับซาโลม เจี์ย เฮญี้ยว ไต๋ อัมโนน.

33ฮนั้ง น้าย, โท้ เยีย เญย เฒี้ยว, ฮู่ง เตี๋ย, ไม้ ตู๋ง เฮญี้ยว ฮวาง หล่าย ฮู่ง เตี๋ย เญย เหยียด ฒู้ง ตอน หฒุ ไต่ เหฑ่ง. ขูง อัมโนน กั้น ดุ เต้า หฒุ ไต๋ ไต่ ฮนั้ง.”

34มป่า อับซาโลม เปย๋า. เซี้ยว แกง วั้ว เต้า เมี่ยน หลุน เมี่ยน เธา เฮมียน หมั่ง ปวัด เมี่ยน ธั้ม กัน เจี๊ยน โฮโลนาอิม, บง กะเฮลน วั้ว ติ้ว เจ๊า ต้าย.

35โยนาดับ ก๊อง บั๋ว ฮู่ง เตี๋ย, “หมั่ง ม่าะ! ฮู่ง เตี๋ย เญย ตอน บัว ต้าย อ๊ะ. ฮนั้ง เยีย, เม่ย เญย โปว, ก๊อง นอ, หฒะเก้ง ฮนั้ง วั้ว นอ.”

36นิ่น เยี้ยด ก๊อง เซ้ด หว่า ฮนั้ง, ฮู่ง เตี๋ย เญย ตอน เปียะ ต้าย หย่า ชะ เญี้ยม. ฮู่ง เตี๋ย เหธา นิ่น เญย หฒวัง โปว หย่า ปู๋ง-ซีง ปู๋ง-เฉีย เญย เญี้ยม.

37อับซาโลม เปย๋า มี่ง เถา เกซู เญย ฮู่ง, อัมมีฮู้ด, เญย ตอน, ทันไม, วั้ว. มป่า ดาวิด ฮู่ง ฮนอยๆ เหว่ย นิ่น เญย ตอน เฑ่า.

38อับซาโลม เปย๋า มี่ง เกซู, เยียม วั้ว ปัว หฮญัง.

39ฮู่ง เตี๋ย จั๋ง ไห่, อ๋อย ปวัด อับซาโลม, เหว่ย หฒุ นิ่น เฑ่า อัมโนน หฒุ ไต่ เญย เจ๊า โหฒะ เจี๊ยน เหฌี่ย.

← Chapter 12 Jump to: Chapter 14 →