2 Samuel 15

Mien Bible (Thai Script) © Thailand Bible Society, 2007

← Chapter 14 Jump to: Chapter 16 →

1ฆะฮ้า อับซาโลม เหว่ย กั้น หลิ่ว เล์ย ม์า-เธีย เหธา ม์า, แอ๋ง ม่าย ฮม์ เหฒียบ เต้า เมี่ยน ถิว มี่ง ด่าง.

2อับซาโลม ดอมๆ เจี์ย ซิน เฑี้ยว เญย มี่ง โซ้ว เจี๊ยน ฒี่ง แก้ง ด่าง เญย เจ๊า-เฮลน. ตะฟ่าน หาย เต้า เมี่ยน ม่าย สี่ อ๋อย โท้ ฮู่ง เตี๋ย ตุ๋น, อับซาโลม ฯฒฯ เห่ว วั้ว เต้า หย่า หน่าย นิ่น, “เม่ย เยียม หาย นอม มู้ง ต้าย?” วั้ว เต้า ฯฒฯ เตา, “เยีย เซ เยียม อิสะลาเอน เต่ย-ปูง เญย เหยียด ฝีง เมี่ยน.”

3อับซาโลม แอ๋ง ก๊อง บั๋ว นิ่น, “เม่ย ก๊อง เญย เซ หอบ เญย, หลง เญย, มป่า ฮู่ง เตี๋ย ไม้ ตุ๊ พ้าย หาย เต้า หมวัง เม่ย เญย สี่.”

4อับซาโลม แอ๋ง จา โจ๋ว หว่า ก๊อง, “เฝย ตุ๊ เยีย เยียม อิสะลาเอน ตุ๊ โหฒว ตุ๋น สี่ เจียน. หาย เต้า ม่าย สี่ ไฟ โก๋ เญย เจ๊า เยีย ฯฒฯ แป้ง ฟิม เญย เถง นิ่น ตุ๋น.”

5สี ก๊อง ม่าย หาย เต้า เมี่ยน ต้าย ฟัด, ป๋าย อับซาโลม, อับซาโลม ฯฒฯ ซูง ปั์ว แปง เจี๊ยน นิ่น, ฒม นิ่น เญย เฮมียน.

6อับซาโลม ฮนั้ง น้าย นอ โหฒว ปุน ต้าย ล์อ ฮู่ง เตี๋ย ตุ๋น สี่ เญย เต้าๆ อิสะลาเอน เมี่ยน. อับซาโลม ฯฒฯ ดั๊ว ตุ๊ อิสะลาเอน เมี่ยน เญย เฮญี้ยว กัน นิ่น.

7เจี๋ย ลิ์ว เปยย หฮญัง, อับซาโลม ก๊อง บั๋ว ฮู่ง เตี๋ย, “โท้ ปุน เยีย มี่ง เฮโบโลน จ๊าว ซูง เยีย แล์ง ปุน เฒี้ยว เญย แหง่ง หว่า.

8เหว่ย หฒุ เยีย, เม่ย เญย โปว, เยียม ซีเลีย เต่ย-ปูง, เกซู มู้ง, วั้ว หฒั่น เยีย แล์ง แหง่ง หว่า ก๊อง, ‘สี ก๊อง เฒี้ยว ต้อ เยีย เยียม เยลูซาเลม หฑวน, เยีย ฒู้ง อ๋อย เยียม เฮโบโลน ป๋าย นิ่น.’”

9ฮู่ง เตี๋ย ก๊อง, “เม่ย กุ๊น แป้ง ออน เญย มี่ง อ๊ะ.” นิ่น ฯฒฯ มี่ง เฮโบโลน หมี่ อ๊ะ.

10มป่า อับซาโลม พ้าย โต่ว เฝียน เมี่ยน ปี๋ง เจี๊ยน มี่ง ก๋อม อิสะลาเอน เต่ย-ปูง เญย ฝีงๆ เมี่ยน. นิ่น บัว ก๊อง, “เม่ย บัว เยี้ยด ไฮ์ จอง เญย เฉีย บุย, อ๋อย หฒุ ก๊อง, ‘อับซาโลม เยียม เฮโบโลน โหฒว ฮู่ง อ๊า โล่ะ!’”

11ม่าย หญี่ แป๊ะ เต้า เยียม เยลูซาเลม เญย เมี่ยน กัน เจี๊ยน นิ่น มี่ง. เมี่ยน ธี้ง นิ่น บัว มี่ง มป่า นิ่น บัว ไม้ ฮิ้ว ตุ๊ น้าย เต๋ย เจ๊า.

12อับซาโลม ฝ่ง ห่อ เหฒี่ย เญย เฒี่ยง โห่, นิ่น พ้าย เมี่ยน มี่ง บั๋ว เถง ดาวิด ธ่าง ล่าง วั้ว เต้า กิโลน เมี่ยน, อาหิโทเฟน, เยียม นิ่น เญย ป๊วน-ฒี่ง, กิโลน, ต้าย. ฟ้าน เญย เจ๊า กุ๊น โหฒว กุ๊น โฮล. กัน อับซาโลม เญย เมี่ยน กุ๊น โหฒว กุ๊น ธั้ม.

13ม่าย เต้า โต่ว เฝียน เมี่ยน ต้าย บั๋ว ดาวิด, “อิสะลาเอน เมี่ยน เญย เฮญี้ยว เปียะ อับซาโลม หมี่ อ๊ะ.”

14ดาวิด ก๊อง บั๋ว เหธา นิ่น เยียม เยลูซาเลม เญย เหยียด ฒู้ง เจียน, “บัว อ๋อย หฒุ เปย๋า. ไม้ เฒย แอ๊ะ, บัว ไม้ ไฮ่ เปย๋า ไม้ ดุ๊ด อับซาโลม. อ๋อย หฒุ ก๊าน เจี๊ยน มี่ง, เหฑีย นิ่น ไฮ่ เซี้ยบๆ เญย หฒุ่น หฒ่าย ห่อย บัว, หย่า หล่ง หฑุ ด๊าว ไต๋ เยียม ฒี่ง เญย เมี่ยน.”

15ฮู่ง เตี๋ย เญย เจียน ก๊อง บั๋ว ฮู่ง เตี๋ย, “เยีย บัว เญย เฒี้ยว, ฮู่ง เตี๋ย, ตี่ง โหฒว หาย หญู่ง เยีย บัว ฯฒฯ เอย เจี๊ยน โหฒว.”

16ฮู่ง เตี๋ย เหธา นิ่น เญย เหยียด เปย๊า เมี่ยน ฯฒฯ ธ้วด เจ๊า อ๊ะ. ขูง เลี่ยว เหฒียบ เต้า จ๊า-เฒ่ย เอ๊า โก๋ว ฮู่ง ติ่น ฮนั้ง.

17ฮู่ง เตี๋ย ฯฒฯ ธ้วด เจ๊า, หฒวัง เมี่ยน หย่า กัน เจี๊ยน มี่ง. เถา ฆะฮ้า ลาย วั้ว นอม เปย๊า นิ่น บัว ตี้ง เหฌี่ย.

18ฮู่ง เญย หฒวัง เจียน มี่ง ด่าง ฮู่ง เตี๋ย. เคเลที เมี่ยน เหธา เพเล้ด เมี่ยน เหยียด ฒู้ง แอ๋ง เหธา กัน นิ่น วั้ว เต๋ย หลัวะ แป๊ะ เต้า กัด เมี่ยน เจี๋ย ด่าง ฮู่ง เตี๋ย.

19ฮู่ง เตี๋ย ก๊อง บั๋ว กัด เมี่ยน, อิดไท, “เม่ย เหว่ย หาย ติ่ว กัน เยีย บัว ต้าย? กุ๊น หฑวน มี่ง เหธา เซียง-ฮู่ง เยียม. เม่ย เซ กั้น ฝีง เมี่ยน, เล่ย ฆอย เม่ย กั้น เญย เต่ย-ปูง.

20เม่ย ต้าย เถา ไม้ แก้ง เล่า. เยีย อี้ ฮนอย อ๋อย หฒุ ปุน เม่ย กัน เยีย เจี๋ย น้าย เจี๋ย วั้ว. เยีย กั้น ฒู้ง ไม้ ฮิ้ว ตุ๊ อ๋อย มี่ง หาย. กุ๊น หฑวน อ๊ะ, หย่า ต้อ เจี๊ยน เม่ย เญย จวั่ง ฝีง เมี่ยน. โท้ เฒี้ยว ปุน ธีง นิ่น เหฒียบ ฒัวะ เญย ฮนั้ม เม่ย หย่า เหฒียบ ฒัวะ เญย โหฒว ปุน เม่ย.”

21มป่า อิดไท เตา ฮู่ง เตี๋ย, “เยีย เฒี้ยง เจี๊ยน เหยียด ลิ์ว เฒี่ยง เจี๊ยน เญย เฒี้ยว หย่า เยียม เยีย เญย เฒี้ยว, ฮู่ง เตี๋ย, เญย หฑะเฮมียน แล์ง หว่า ก๊อง, เยีย เญย เฒี้ยว, ฮู่ง เตี๋ย, เยียม หาย, ไม้ กุ๊น นั่ง ไฟ ไต่, เยีย, เม่ย เญย โปว, ฒู้ง เยียม วั้ว อ๊ะ.”

22ดาวิด ก๊อง บั๋ว อิดไท, “วั้ว หญู่ง, เม่ย กุ๊น มี่ง ด่าง อ๊ะ.” กัด เมี่ยน, อิดไท, ฯฒฯ ต้อ เจี๊ยน กัน นิ่น วั้ว เต๋ย เมี่ยน, เลี่ยม ต้ม เมี่ยน เหธา ฝุเจว๊ย, มี่ง อ๊ะ.

23หฒวัง เมี่ยน เจี๋ย เญย เฒี่ยง โห่, ป๊วน-เต่ย เมี่ยน เหยียด ฒู้ง ปู๋ง-ซีง ปู๋ง-เฉีย เญย เญี้ยม บุย. ฮู่ง เตี๋ย เจี๋ย ขิดโลน โด๊ะ. หฒวัง เมี่ยน เจี๋ย มี่ง หย่า หูง เจี๊ยน เต่ย-ปูง-ฮวาง เญย เจ๊า มี่ง.

24สาโดก หย่า เยียม วั้ว, เหธา แกง ทิน-ฮู่ง เญย แล์ง แหง่ง หว่า ฟาง เญย เลวี เมี่ยน เหยียด ฒู้ง. นิ่น บัว เฒาะ ทิน-ฮู่ง เญย แล์ง แหง่ง หว่า ฟาง อัน เหฌี่ย. อาบียาทา ฝาว ต้าย ฒั้ว หฒวัง แปะ ฝีง เยียม ฒี่ง ธ้วด ต้าย เจี๋ย เหฑ่ง.

25ฮู่ง เตี๋ย หย่า ก๊อง บั๋ว สาโดก, “อ๋อย หฒุ แกง ทิน-ฮู่ง เญย แล์ง แหง่ง หว่า ฟาง หฑวน ฒี่ง มี่ง. สี ก๊อง หฒิว เฒี้ยว หมั่ง เยีย โหฒว ตุ๊ หอบ นอ, นิ่น อ๋อย ต้อ เยีย หฑวน ต้าย ตุ๊ ปวัด แล์ง แหง่ง หว่า ฟาง เหธา เฒี้ยว เยียม เญย ต๋อง.

26มป่า สี ก๊อง เฒี้ยว ก๊อง, ‘เยีย ไม้ หอบ เฮญี้ยว เม่ย,’ เยีย เยียม น้าย, เซว่ย นิ่น โหฒว หฒิว นิ่น ปวัด หอบ เญย.”

27ฮู่ง เตี๋ย แอ๋ง ก๊อง บั๋ว สาโดก ไซ เมี่ยน, “เม่ย เซ โต่ว หว่า เมี่ยน ไม้ เฒ์ย? กุ๊น แป้ง ออน เญย หฑวน ฒี่ง, เม่ย เหธา อาบียาทา ต้อ เม่ย เญย ตอน, อาหิมาอัด, เหธา อาบียาทา เญย ตอน, โยนาทาน.

28เยีย เยียม เต่ย-ปูง-ฮวาง เจี๋ย ด้าย เญย เจ๊า-โป่ว ฒั้ว เม่ย ฝูง เฝียน ต้าย ปุน เยีย ฮิ้ว.”

29สาโดก เหธา อาบียาทา ฯฒฯ แกง ทิน-ฮู่ง เญย แล์ง แหง่ง หว่า ฟาง หฑวน เยลูซาเลม. นิ่น บัว หย่า เยียม เจี๊ยน วั้ว.

30มป่า ดาวิด ฝาว กะลั้น บง, เหยียด ปิ่น ฝาว, เหยียด ปิ่น เญี้ยม. นิ่น ไม้ ตาบ เฮ่, หย่า ปวัง เจี๊ยน มฆ้อง. กัน นิ่น วั้ว เต๋ย หฒวัง เมี่ยน หย่า ปวัง เจี๊ยน มฆ้อง, เหยียด ปิ่น ฝาว, เหยียด ปิ่น เญี้ยม เจี๊ยน มี่ง.

31ม่าย เมี่ยน ต้าย บั๋ว ดาวิด, “อาหิโทเฟน เยียม เจี๊ยน เถง อับซาโลม เบี๊ยน สี่ วั้ว กวั้น เมี่ยน.” ดาวิด ฯฒฯ เต๋า เก๋า ก๊อง, “โอ เฒี้ยว อ่า, โท้ ปุน อาหิโทเฟน เถง ธ่าง ล่าง เญย หว่า ทิ้ว เป๋น หฮงง เญย สี่.”

32ดาวิด เถา บง-นี้ง, หฒั่ง ทิน-ฮู่ง เญย ต๋อง, ม่าย เต้า อานคี เมี่ยน, หุไซ, ต้าย เยียม นิ่น เญย หฑะเฮมียน. หุไซ เญย ลุย-โหว เป๊ด ฮู้ หย่า ม่าย เนีย-บูง เยียม นิ่น เญย มฆ้อง.

33ดาวิด ก๊อง บั๋ว นิ่น, “สี ก๊อง เม่ย กัน เยีย มี่ง, เม่ย เถง ไม้ ตุ๊ เยีย.

34มป่า สี ก๊อง เม่ย หฑวน ฒี่ง มี่ง บั๋ว อับซาโลม, ‘โอ ฮู่ง เตี๋ย อ่า, เยีย อ๋อย โหฒว เม่ย เญย โปว. ฒิ่น ด่าง เยีย โหฒว เม่ย เญย เตีย เญย โปว. อี้ หฒั่น เยีย อ๋อย ฮนั้ง วั้ว นอ โหฒว เม่ย เญย โปว.’ ฮนั้ง หน่าย เม่ย ไฮ่ ปุน อาหิโทเฟน ธ่าง ล่าง เญย หว่า ด๊อด.

35สาโดก ไซ เมี่ยน เหธา อาบียาทา ไซ เมี่ยน เหธา เม่ย เยียม หน่าย ไม้ เฒ์ย? เม่ย เยียม ฮู่ง ติ่น กะญั์ว หมวัง ไฮ์ หาย หญู่ง อ๋อย หฒุ บั๋ว สาโดก เหธา อาบียาทา.

36นิ่น บัว เญย อี เต้า ตอน เยียม หน่าย. ม่าย สาโดก เญย ตอน, อาหิมาอัด, เหธา อาบียาทา เญย ตอน, โยนาทาน. ฮนั้ง หน่าย, ตะฟ่าน เม่ย บัว หมวัง ไฮ์ หาย หญู่ง, อ๋อย หฒุ พ้าย น้าย เต๋ย อี เต้า ต้าย บั๋ว เยีย.”

37ดาวิด เญย โล์-แกง ต่อย, หุไซ, ฯฒฯ เปียะ ฒี่ง มี่ง. วั้ว หฒั่น อับซาโลม จังๆ เปียะ เยลูซาเลม.

← Chapter 14 Jump to: Chapter 16 →