Joshua 10

Mien Bible (Thai Script) © Thailand Bible Society, 2007

1เยลูซาเลม ฒี่ง เญย ฮู่ง, อาโดนีเซเดก, ไฮ์ ก๊อง โยซูวา ธ้าง ตุ๊ ไอ ฒี่ง หย่า เหมียด เหฑ่ง หมี่ อ๊ะ. โยซูวา โหฒว ปุน ไอ ฒี่ง เหธา ไอ ฒี่ง เญย ฮู่ง ฮนั้ง นิ่น โหฒว ปุน เยลีโค ฒี่ง เหธา เยลีโค ฒี่ง เญย ฮู่ง นอ. อาโดนีเซเดก แอ๋ง ไฮ์ ก๊อง กิเบโอน ฒี่ง เญย เมี่ยน เหธา อิสะลาเอน เมี่ยน ก๊อง หอบ หย่า เยียม นิด นิ่น บัว ฟัด เญย.

2นิ่น เหธา นิ่น เญย แปะ ฝีง หฒะเก้ง กั้ม เหฑีย ไห่, เหว่ย หฒุ กิเบโอน ฒี่ง เป๋น ต้ม ฒี่ง ฮนั้ง นอม ม่าย ฮู่ง เยียม เญย ต้ม ฒี่ง โฮล, หย่า เก้า โฮล ไอ ฒี่ง. วั้ว นอม ฒี่ง เญย เหยียด ฒู้ง มจั่ง ตอน หย่า เบ๊าะ จ๋า เฮ้น ไห่.

3ฮนั้ง หน่าย เยลูซาเลม ฒี่ง เญย ฮู่ง, อาโดนีเซเดก, ฯฒฯ พ้าย เมี่ยน มี่ง ล์อ เฮโบโลน ฒี่ง เญย ฮู่ง, โฮฮัม, ยานมู้ด ฒี่ง เญย ฮู่ง, ปีลาม, ลาคี้ด ฒี่ง เญย ฮู่ง, ยาเฟีย, เหธา เอกโลน ฒี่ง เญย ฮู่ง, เดบี, ก๊อง บั๋ว นิ่น บัว,

4“โท้ เม่ย บัว ต้าย เยีย น้าย เถง เยีย เบ๊าะ กิเบโอน ฒี่ง, เหว่ย หฒุ วั้ว นอม ฒี่ง เญย เมี่ยน เหธา โยซูวา แอ๋ง เหธา อิสะลาเอน เมี่ยน ก๊อง หอบ เหลียบ แหง่ง หว่า หมี่ อ๊ะ.”

5วั้ว เต๋ย ปยา เต้า อาโมไล เมี่ยน เญย ฮู่ง ม่าย เยลูซาเลม ฒี่ง, เฮโบโลน ฒี่ง, ยานมู้ด ฒี่ง, ลาคี้ด ฒี่ง เหธา เอกโลน ฒี่ง เญย ฮู่ง เตี๋ย, เหธา เหยียด ฒู้ง เบ๊าะ จ๋า เญย แปง กั๊บ ชะ ฝาว มี่ง เหลียบ เธี้ยง เหธา กิเบโอน ฒี่ง เญย เมี่ยน เบ๊าะ จ๋า.

6กิเบโอน เมี่ยน ฯฒฯ พ้าย เมี่ยน มี่ง วั้ว กินกาน เญย ด๊บ-ลิ่ว เธี้ยง ล์อ โยซูวา. นิ่น บัว ก๊อง, “โท้ เม่ย ไม้ ตู๋ง กวั่ง เยีย บัว, เม่ย เญย โปว. ก๊าน ต้าย เถง เยีย บัว, หย่า เหฌียว เยีย บัว เญย แหม่ง, เหว่ย หฒุ เยียม บง-ไอ๊ ต๋อง วั้ว เต๋ย อาโมไล เมี่ยน เญย หฒวัง ฮู่ง เตี๋ย กั๊บ ชะ ต้าย เบ๊าะ เยีย บัว.”

7โยซูวา ฯฒฯ ต้อ เจี๊ยน เหยียด ฒู้ง แปง-ม่าน, เลี่ยม เบ๊าะ จ๋า เก้า เฮ้น เจี๋ย เญย แปง เยียม กินกาน ธ้วด เจ๊า มี่ง.

8เฒี้ยว ก๊อง บั๋ว โยซูวา, “ไม้ ตู๋ง กั้ม เหฑีย นิ่น บัว, เหว่ย หฒุ เยีย เฒาะ นิ่น บัว จิว ปุน เม่ย หมี่ อ๊ะ. เยียม นิ่น บัว บุด๋ง ไม้ ม่าย เหยียด เต้า ไฮ่ เบ๊าะ ตุ๊ ฮี่ง เม่ย.”

9โยซูวา เยียม กินกาน เฒี่ยง ม์วน ยั่ง เจ๊า มี่ง. เถา วั้ว ฯฒฯ เลี่ยม เฒ่ย เหธา นิ่น บัว เบ๊าะ จ๋า.

10เฒี้ยว โหฒว ปุน อาโมไล เมี่ยน เยียม อิสะลาเอน เมี่ยน เญย หฑะเฮมียน แหมง หลุ่น เหฑ่ง หมี่ อ๊ะ. อิสะลาเอน เมี่ยน เยียม กิเบโอน ฒี่ง ไต๋ นิ่น บัว ธั้ม ไห่, หย่า หฒุ่น เจี๊ยน ไต๋ เจี๊ยน มี่ง เบดโฮโลน เญย เจ๊า ฝาว เจี๋ย เญย ต๋อง, หฒุ่น ไต๋ เจี๊ยน นิ่น บัว มี่ง เถา อาเซคา ฒี่ง เหธา มักเคดา ฒี่ง.

11อาโมไล เมี่ยน เปย๋า เจี๊ยน อิสะลาเอน เมี่ยน เยียม เบดโฮโลน เหฌี่ย เจี๋ย เญย ต๋อง วั้ว หฒั่น, เฒี้ยว ปุน ต้ม เปาะ เยียม ลู่ง ด๊อด เหฌี่ย เบ๊าะ เจี๊ยน นิ่น บัว มี่ง เถา อาเซคา ฒี่ง. นิ่น บัว ฯฒฯ ไต่ หมี่ อ๊ะ. หฒุ เปาะ เบ๊าะ ไต่ เญย เมี่ยน เก้า ธั้ม อิสะลาเอน เมี่ยน หล่ง หฑุ ด๊าว ไต๋ ไต่ เญย เมี่ยน.

12ต้ง เฒี้ยว จิว อาโมไล เมี่ยน ปุน อิสะลาเอน เมี่ยน วั้ว ฮนอย, โยซูวา ตอง เจี๊ยน อิสะลาเอน เมี่ยน โท้ เฒี้ยว. นิ่น ก๊อง, “บะฮนอย อ้า! ตี้ง เจี๊ยน กิเบโอน ฒี่ง กู้ หงว่าย ม่าะ! หฮลา อ้า! เยียม เจี๊ยน ไอยาโลน ฮ์อง กู้ หงว่าย ม่าะ!”

13บะฮนอย ฯฒฯ ตี้ง เจี๊ยน, หฮลา หย่า ไม้ ต์ง อ๊ะ. ฒั้ว เถา อิสะลาเอน เมี่ยน เบ๊าะ ฮี่ง นิ่น บัว เญย วิน-วั้ง. น้าย เต๋ย สี่ เฟี้ย เจี๊ยน เยียม ยาซา โซว. บะฮนอย ตี้ง เจี๊ยน เหฒียง ลู่ง กู้ หงว่าย, ไม้ ด๊อด เหฌี่ย อ๊า ลั่ม ปวั๊ง เหยียด ฮนอย เญย เฒี่ยง โห่.

14ฒิ่น ด่าง เญย ฮนอย เหธา ฆะฮ้า ฮี้ง เญย ฮนอย ไม้ ม่าย เจี๋ย เหยียด นอม ฮนอย ฮนั้ง น้าย นอม ฮนอย, ต้ง เฒี้ยว หมวัง ป้าม เมี่ยน เญย หว่า. เซ เฒี้ยว เหว่ย อิสะลาเอน เมี่ยน เบ๊าะ จ๋า.

15โยซูวา เหธา อิสะลาเอน เญย หฒวัง เมี่ยน ต๋าว ฆาง หฑวน กินกาน เธี้ยง หมี่ อ๊ะ.

16วั้ว เต๋ย ปยา เต้า ฮู่ง เปย๋า มี่ง ปี๋ง มักเคดา แบ๋ง-ค้วด กะญั์ว.

17ม่าย เมี่ยน บั๋ว โยซูวา, “วั้ว เต๋ย ปยา เต้า ฮู่ง ม่าย เมี่ยน ล์อ ปวัด ปี๋ง เจี๊ยน มักเคดา แบ๋ง-ค้วด กะญั์ว.”

18โยซูวา ก๊อง, “เม่ย บัว ฟ้ง เหฒีย นอม ต้ม หละเปย๊ย ดั๊บ เจี๊ยน แบ๋ง-ค้วด-ฑุ่ย, หย่า พ้าย เมี่ยน ฒั้ว เจี๊ยน ม่าะ!

19มป่า เม่ย บัว กั้น ไม้ ตู๋ง เยียม หน่าย ฒั้ว. อ๋อย หฒุ หฒุ่น เจี๊ยน เม่ย บัว เญย วิน-วั้ง มี่ง, เยียม นิ่น บัว เญย ฆะฮ้า ฆาง เบ๊าะ เจี๊ยน มี่ง. ไม้ ตู๋ง ปุน นิ่น บัว เปย๋า เปียะ นิ่น บัว เญย ฒี่ง, เหว่ย หฒุ เฒี้ยว, เม่ย บัว เญย ทิน-ฮู่ง, เฒาะ นิ่น บัว จิว ปุน เม่ย บัว หมี่ อ๊ะ.”

20โยซูวา เหธา อิสะลาเอน เมี่ยน ไต๋ วั้ว เต๋ย เมี่ยน ไต่ เหฑ่ง. ขูง เหฒ่ง เต้า ป๊า ฮนั้ง. เหฒ่ง วั้ว เต๋ย เปย๋า เปียะ เว่ย ว้วน เญย ฒี่ง หมี่ อ๊ะ.

21หฒวัง แปง แป้ง ออน เญย หฑวน เถา มักเคดา เญย เธี้ยง, โยซูวา วั้ว. เยียม หน่าย ต้าย เลี่ยม ไม้ ม่าย หาย เต้า ก๊าม ก๊อง อิสะลาเอน เมี่ยน อ๊ะ.

22โยซูวา แอ๋ง ก๊อง, “คอย ฆอย แบ๋ง-ค้วด ต้อ วั้ว เต๋ย ปยา เต้า ฮู่ง ธ้วด ต้าย เถา เยีย น้าย.”

23นิ่น บัว ฯฒฯ คอย ฆอย แบ๋ง-ค้วด ต้อ วั้ว เต๋ย ปยา เต้า ฮู่ง ธ้วด. ม่าย เยลูซาเลม ฒี่ง เญย ฮู่ง, เฮโบโลน ฒี่ง เญย ฮู่ง, ยานมู้ด ฒี่ง เญย ฮู่ง, ลาคี้ด ฒี่ง เหธา เอกโลน ฒี่ง เญย ฮู่ง.

24นิ่น บัว ต้อ วั้ว เต๋ย ฮู่ง เตี๋ย มี่ง เถา โยซูวา วั้ว. โยซูวา ฯฒฯ เห่ว อิสะลาเอน เมี่ยน เญย หฒวัง มจั่ง ตอน ต้าย, หย่า บั๋ว ต้ง เหธา นิ่น ธ้วด มี่ง เบ๊าะ จ๋า วั้ว เต๋ย แปง-เปย๊ย, “ต้าย ฟัด เต๋ย หล่ง เหฒา ธ้าย เจี๊ยน น้าย เต๋ย ฮู่ง เญย จาง.” นิ่น บัว ฯฒฯ มี่ง ฟัด เต๋ย หล่ง นิ่น บัว เญย เหฒา ธ้าย เจี๊ยน วั้ว เต๋ย ฮู่ง เญย จาง.

25โยซูวา ก๊อง บั๋ว นิ่น บัว, “ไม้ ตู๋ง กั้ม เหฑีย หย่า ไม้ ตู๋ง ต๊าม ไฝ. อ๋อย หฒุ เฮ้น หย่า หฒูง เจี๊ยน ต๊าม, เหว่ย หฒุ เฒี้ยว อ๋อย ฮนั้ง น้าย นอ โหฒว ปุน เหธา เม่ย บัว เบ๊าะ จ๋า วั้ว เต๋ย เหยียด ฒู้ง วิน-วั้ง.”

26ฆะฮ้า โยซูวา เฒาะ น้าย เต๋ย ปยา เต้า ฮู่ง ไต๋ ไต่, ต้อ มี่ง ดิ๋ว เจี๊ยน ปยา ติ้ว เดี๋ยง. นิ่น บัว เญย เซย ดิ๋ว เจี๊ยน วั้ว เดี๋ยง เถา หฮมวัง.

27บะฮนอย ม้วด เก้ เญย เฒี่ยง โห่ โยซูวา พ้าย เมี่ยน มี่ง ปู๋ง นิ่น บัว เญย เซย เยียม เดี๋ยง เหฌี่ย ต้าย, ต้อ มี่ง กวั่ง ฒิ่น ด่าง นิ่น บัว ปี๋ง วั้ว นอม แบ๋ง-ค้วด. นิ่น บัว หย่า เฒาะ เหฒีย นอม ต้ม หละเปย๊ย ต้าย ดั๊บ เจี๊ยน ค้วด-ฑุ่ย. วั้ว เต๋ย หละเปย๊ย หธ่อ เยียม เถา อี้ จ๋า ฮนอย.

28ต้ง วั้ว ฮนอย โยซูวา ธ้าง ตุ๊ มักเคดา ฒี่ง. นิ่น หล่ง หฑุ ด๊าว ไต๋ ไต่ วั้ว นอม ฒี่ง เญย เมี่ยน เหธา ฮู่ง เตี๋ย, หย่า เหมียด เหฑ่ง นิ่น บัว, ไม้ เลี่ยว เหยียด เต้า ตุ๊ ธ้วด สีง แหม่ง. นิ่น โหฒว ปุน มักเคดา ฒี่ง เญย ฮู่ง ฮนั้ง ฒิ่น ด่าง โหฒว ปุน เยลีโค ฒี่ง เญย ฮู่ง นอ.

29โยซูวา เหธา อิสะลาเอน เญย หฒวัง เมี่ยน เยียม มักเคดา ฒี่ง มี่ง เถา ลิบนา ฒี่ง, ฯฒฯ เบ๊าะ ลิบนา ฒี่ง.

30เฒี้ยว หย่า เฒาะ น้าย นอม ฒี่ง เหธา น้าย นอม ฒี่ง เญย ฮู่ง จิว ปุน อิสะลาเอน เมี่ยน หมี่ อ๊ะ. โยซูวา หล่ง หฑุ ด๊าว ไต๋ เหฑ่ง วั้ว นอม ฒี่ง เญย เหยียด ฒู้ง เมี่ยน, ไม้ เลี่ยว เหยียด เต้า เยียม หน่าย. นิ่น โหฒว ปุน ลิบนา ฒี่ง เญย ฮู่ง ฮนั้ง ฒิ่น ด่าง โหฒว ปุน เยลีโค ฒี่ง เญย ฮู่ง นอ.

31โยซูวา เหธา อิสะลาเอน เญย หฒวัง เมี่ยน ธ้วด ลิบนา ฒี่ง มี่ง ลาคี้ด ฒี่ง ฯฒฯ เว่ย เจี๊ยน เบ๊าะ วั้ว นอม ฒี่ง.

32เฒี้ยว เฒาะ ลาคี้ด ฒี่ง จิว ปุน อิสะลาเอน เมี่ยน. ตะเหญ่ย ฮนอย โยซูวา ธ้าง ตุ๊ วั้ว นอม ฒี่ง, หย่า หล่ง หฑุ ด๊าว ไต๋ เหฑ่ง วั้ว นอม ฒี่ง เญย เมี่ยน, ฮนั้ง นิ่น บัว โหฒว ปุน ลิบนา ฒี่ง วั้ว นอ.

33วั้ว หฒั่น เกเซ มู้ง เญย ฮู่ง, โฮลาม, ฝาว ต้าย เถง ลาคี้ด ฒี่ง. โยซูวา ฯฒฯ เฒาะ นิ่น เหธา นิ่น เญย เมี่ยน ไต๋ เหฑ่ง, ไม้ เหฒ่ง เหยียด เต้า ตุ๊ ธ้วด สีง แหม่ง.

34โยซูวา เหธา อิสะลาเอน เญย หฒวัง เมี่ยน ธ้วด ลาคี้ด ฒี่ง มี่ง เอกโลน ฒี่ง, ฯฒฯ เว่ย เจี๊ยน เบ๊าะ วั้ว นอม ฒี่ง.

35วั้ว ฮนอย นิ่น บัว ธ้าง ตุ๊ วั้ว นอม ฒี่ง, หย่า หล่ง หฑุ ด๊าว ไต๋ เหฑ่ง นิ่น บัว. วั้ว ฮนอย นิ่น เหมียด วั้ว นอม ฒี่ง เญย เหยียด ฒู้ง เมี่ยน, ฮนั้ง เยียม ลาคี้ด ฒี่ง โหฒว นอ.

36โยซูวา เหธา อิสะลาเอน เญย หฒวัง เมี่ยน ธ้วด เอกโลน ฒี่ง แอ๋ง ฝาว เถา เฮโบโลน ฒี่ง, เบ๊าะ วั้ว นอม ฒี่ง.

37นิ่น บัว ธ้าง ตุ๊ วั้ว นอม ฒี่ง, หย่า หล่ง หฑุ ด๊าว ไต๋ วั้ว นอม ฒี่ง เญย ฮู่ง เหธา แปะ ฝีง, เลี่ยม เยียม เว่ย ก๋อม วั้ว นอม ฒี่ง เญย ฟิ้ว-มู้ง เญย เมี่ยน, ไม้ เลี่ยว เหยียด เต้า. ฮนั้ง โหฒว ปุน เอกโลน ฒี่ง นอ, นิ่น บัว เหมียด เหฑ่ง วั้ว นอม ฒี่ง เหธา เยียม วั้ว นอม ฒี่ง เญย เหยียด ฒู้ง เมี่ยน.

38โยซูวา เหธา อิสะลาเอน เญย หฒวัง เมี่ยน แอ๋ง ต๋าว ฆาง ต้าย เบ๊าะ เดบี ฒี่ง.

39นิ่น บัว ธ้าง ตุ๊ วั้ว นอม ฒี่ง เหธา วั้ว นอม ฒี่ง เญย ฮู่ง, เลี่ยม เว่ย ก๋อม วั้ว นอม ฒี่ง เญย ฟิ้ว-มู้ง. นิ่น บัว หย่า หล่ง หฑุ ด๊าว ไต๋ เหฑ่ง นิ่น บัว, เหมียด วั้ว นอม ฒี่ง เญย เหยียด ฒู้ง เมี่ยน, ไม้ เลี่ยว เหยียด เต้า. นิ่น บัว โหฒว ปุน เดบี ฒี่ง ฮนั้ง นิ่น บัว โหฒว ปุน เฮโบโลน ฒี่ง, ลิบนา ฒี่ง เหธา วั้ว เต๋ย ฒี่ง เญย ฮู่ง เตี๋ย นอ.

40โยซูวา ฯฒฯ เบ๊าะ ฮี่ง เหฑ่ง วั้ว นอม เต่ย-ปูง, เลี่ยม บง-ไอ๊ ต๋อง, เนเกบ, เหธา ไฟ ปูง เญย บง-จั๊วะ เหธา เก้ ฒอง, เลี่ยม วั้ว เต๋ย ต๋อง เญย เหยียด ฒู้ง ฮู่ง เตี๋ย. ไม้ เลี่ยว เหยียด เต้า, ตะฟ่าน ไฮ่ เท้า เฉีย เญย กะน้าย เหยียด ฒู้ง เหมียด เหฑ่ง ฮนั้ง เฒี้ยว, อิสะลาเอน เมี่ยน เญย ทิน-ฮู่ง, หัด เหฒียง เญย หว่า นอ.

41โยซูวา เยียม คาเดดบาเนีย เบ๊าะ ฮี่ง เหฑ่ง นิ่น บัว มี่ง เถา กาซา เต่ย เหธา ก๋อม โกเซน เต่ย-ปูง, แอ๋ง มี่ง เถา กิเบโอน ฒี่ง.

42วั้ว หฑุ่น โยซูวา ธ้วด มี่ง เบ๊าะ ฮี่ง เหยียด ฒู้ง ฮู่ง เตี๋ย, หย่า ธ้าง ตุ๊ นิ่น บัว เญย เดา-เป้ย, เหว่ย หฒุ เฒี้ยว, อิสะลาเอน เมี่ยน เญย ทิน-ฮู่ง, เถง อิสะลาเอน เมี่ยน เบ๊าะ จ๋า.

43โยซูวา เหธา อิสะลาเอน เญย หฒวัง เมี่ยน ฯฒฯ หฑวน เถา กินกาน เญย ด๊บ-ลิ่ว เธี้ยง หมี่ อ๊ะ.

← Chapter 9 Jump to: Chapter 11 →