Joshua 7

Mien Bible (Thai Script) © Thailand Bible Society, 2007

← Chapter 6 Jump to: Chapter 8 →

1อิสะลาเอน เมี่ยน ไม้ เหฒียบ ฒัวะ เญย โหฒว. นิ่น บัว เฑ้บ ธ้วด หอบ หฒุ เหมียด เหว่ย ฝูง ตั๋ง ปุน เฒี้ยว เญย กะน้าย, เหว่ย หฒุ อาคาน เฑ้บ ธ้วด หอบ หฒุ ฝูง ตั๋ง ปุน เฒี้ยว เญย กะน้าย. อาคาน โหฒว คานมี เญย ตอน. คานมี โหฒว สับดี เญย ตอน. สับดี โหฒว เฒลา เญย ตอน, ยูดา ฝีง. หลาย อาคาน โหฒว เญย สี่, เฒี้ยว เฉีย เจี์ย! ไห่ อิสะลาเอน เมี่ยน.

2โยซูวา พ้าย เมี่ยน เยียม เยลีโค ฒี่ง ฝาว เถา ไอ ฒี่ง. ไอ ฒี่ง เยียม นิด เบดอาเวน, เบดเอน ฒี่ง เญย ตง ปูง แหมง. โยซูวา บั๋ว นิ่น บัว, “ฝาว มี่ง ธ้าย จั๊วะ ฒ่า หมั่ง วั้ว นอม เต่ย-ปูง.” นิ่น บัว ฯฒฯ ฝาว มี่ง ฒ่า ไอ ฒี่ง.

3นิ่น บัว หฑวน ต้าย ก๊อง บั๋ว โยซูวา, “ไม้ หฒุ ปุน เหยียด ฒู้ง แปะ ฝีง ฝาว มี่ง เบ๊าะ ไอ ฒี่ง. ปุน อี ปัว ธิน เต้า เมี่ยน มี่ง เบ๊าะ เก๋า อ๊ะ. ไม้ หฒุ ปุน หฒวัง แปะ ฝีง มี่ง โค้ว เหว่ย หฒุ วั้ว นอม ฒี่ง เญย เมี่ยน ไม้ ธั้ม.”

4ฮนั้ง หน่าย ม่าย เล่ย ไม้ โก ปัว ธิน เต้า ฝาว มี่ง. นิ่น บัว หย่า เยียม ไอ ฒี่ง เมี่ยน เญย วั้ว ด่าง เปย๋า.

5ไอ ฒี่ง เญย เมี่ยน ไต๋ นิ่น บัว ฟ่า เหฒียบ หลัวะ เต้า เญย ต๋อง. ไอ ฒี่ง เญย เมี่ยน เยียม ฒี่ง แก้ง หฒุ่น นิ่น บัว เถา เชบาลิม, เยียม เหฌี่ย เจี๋ย เญย ต๋อง ไต๋ นิ่น บัว. อิสะลาเอน แปะ ฝีง กั้ม เหฑีย เกา, บะฑิว ฒู้ง หยุ เหฑ่ง ฮนั้ง ววม นอ.

6โยซูวา เหธา อิสะลาเอน เมี่ยน เญย หฒวัง เมี่ยน โก๋ เฑ่า ไห่, ฯฒฯ เป๊ด นิ่น บัว เญย ลุย, พัวะ เหฌี่ย เฒี้ยว เญย แล์ง แหง่ง หว่า ฟาง หฑะเฮมียน แหมง เยียม เถา ลู่ง ม์าน-หฮมวัง. นิ่น บัว แอ๋ง เฒาะ เนีย-บูง หฮยาม เจี๊ยน กั้น เญย มฆ้อง.

7โยซูวา หน่าย เฒี้ยว, “โอ เฒี้ยว ทิน-ฮู่ง อ้า! เหว่ย หาย ติ่ว ต้อ น้าย เต๋ย แปะ ฝีง เจี๋ย น้าย ปูง จอแดน ด้าย ต้าย? เหว่ย เฒาะ เยีย บัว จิว ปุน เยียม อาโมไล เมี่ยน เญย ปั์ว-เดี๊ย หฒุ เหมียด ไฟ? เฝย ตุ๊ เยีย บัว ปวั๊ง เอ๋ย เยียม วั้ว ปูง จอแดน ด้าย.

8เฒี้ยว อ้า! เยีย อ๋อย หฒุ ฮนั้ง หาย นอ ก๊อง เหว่ย หฒุ อิสะลาเอน เมี่ยน อี้ หฒั่น หฒุ นิ่น บัว เญย วิน-วั้ง หฒุ่น เปย๋า.

9คานาอัน เมี่ยน เหธา น้าย นอม เต่ย-ปูง เหยียด ฒู้ง เญย แปะ ฝีง ตุ๊ ไฮ์ น้าย เต๋ย เฝียน, นิ่น บัว อ๋อย ต้าย เว่ย เจี๊ยน ไต๋ เหฑ่ง เยีย บัว. วั้ว หฒั่น เม่ย อ๋อย ฮนั้ง หาย นอ โหฒว เหว่ย เปว เจี๊ยน เม่ย โฮล ไห่ เญย เม่ง?”

10เฒี้ยว ก๊อง บั๋ว โยซูวา, “โซ้ว เจี์ย ซิน ต้าย ม่าะ! เม่ย เหว่ย หาย ติ่ว พัวะ เหฌี่ย เถา เดา มี่ง?

11อิสะลาเอน เมี่ยน ป์าม ฒุ์ย หมี่ อ๊ะ. นิ่น บัว แหง่ง เยีย เหธา นิ่น บัว แล์ง เจี๋ย เญย แหง่ง หว่า, ต้ง เยีย หัด นิ่น บัว เอย เจี๊ยน โหฒว. นิ่น บัว เฑ้บ ธ้วด อ๋อย หฒุ ฝูง ตั๋ง ปุน เยีย เญย กะน้าย. นิ่น บัว หนิ่ม, นิ่น บัว ก๊อง-แปะ หย่า เฒาะ วั้ว เต๋ย กะน้าย ต้อ มี่ง เหธา นิ่น บัว กั้น เญย กะน้าย เซียว.

12เหว่ย น้าย อิสะลาเอน เมี่ยน หธีง ต้าย ไม้ ไฮ่ เบ๊าะ ไม้ ฮี่ง นิ่น บัว เญย วิน-วั้ง. นิ่น บัว อ๋อย หฒุ ต๋าว ฆาง เปย๋า เหว่ย นิ่น บัว เป๋น หฒุ เหมียด เญย กะน้าย หมี่ อ๊ะ. เยียม น้าย มี่ง เยีย ไม้ เหธา เม่ย บัว เยียม อ๊ะ, ธ้วด ลิ์ว เม่ย บัว เหมียด เหฑ่ง ต้ง ฝูง ตั๋ง ปุน เยีย วั้ว เต๋ย กะน้าย.

13“มี่ง อ๊ะ! มี่ง เถง แปะ ฝีง สา เหฑ่ง หวุย. อ๋อย หฒุ บั๋ว นิ่น บัว, ‘อ๋อย หฒุ สา กั้น เญย หวุย, หลิ่ว เล์ย เหฒียง เหว่ย ฌัง ฮนอย. เหว่ย หฒุ เฒี้ยว, อิสะลาเอน เมี่ยน เญย ทิน-ฮู่ง ก๊อง, “โอ อิสะลาเอน เมี่ยน อ้า! เยียม เม่ย บัว เญย บุด๋ง ม่าย ฝูง ตั๋ง ปุน เฒี้ยว เญย กะน้าย. สี ก๊อง เม่ย บัว ไม้ เฒาะ น้าย เต๋ย กะน้าย ธ้วด มี่ง, เม่ย บัว ไม้ ไฮ่ เบ๊าะ ไม้ ฮี่ง เม่ย บัว เญย วิน-วั้ง อ๊ะ.”

14“‘ฌัง ดอม เม่ย บัว อ๋อย หฒุ เหยียด ฝีง เหยียด ฝีง เญย ธ้วด ต้าย. เฒี้ยว กิ๊น หาย ฝีง เมี่ยน, วั้ว ฝีง อ๋อย หฒุ เหยียด ปู้ง เหยียด ปู้ง ธ้วด ต้าย. เฒี้ยว กิ๊น หาย ปู้ง เมี่ยน, วั้ว ปู้ง อ๋อย หฒุ เหยียด ป่วน เหยียด ป่วน ธ้วด ต้าย. เฒี้ยว กิ๊น หาย ป่วน เมี่ยน, วั้ว ป่วน อ๋อย หฒุ เหยียด เต้า เหยียด เต้า ธ้วด ต้าย.

15เฒาะ หฒุ หาย เต้า ม่าย น้าย เต๋ย อ๋อย หฒุ เฒาะ เป๋น ฝูง ตั๋ง ปุน เฒี้ยว เญย กะน้าย, อ๋อย หฒุ หล่ง โต์ว ปั๊ว กวั่ง, เลี่ยม นิ่น กั้น เหธา นิ่น ม่าย เญย หญู่งๆ กะน้าย เหว่ย หฒุ นิ่น แหง่ง เฒี้ยว เหธา เม่ย บัว แล์ง เจี๋ย เญย แหง่ง หว่า. นิ่น หย่า เยียม อิสะลาเอน เมี่ยน บุด๋ง โหฒว ไญ้ ไห่ เญย สี่.’”

16ตะเหญ่ย ดอม เฑี้ยว เญย โยซูวา ต้อ อิสะลาเอน เมี่ยน เหยียด ฝีง เหยียด ฝีง เญย ธ้วด ต้าย, ฯฒฯ ด๊อด หฒุ ยูดา ฝีง.

17ยูดา ฝีง เญย ปู้งๆ เมี่ยน ธ้วด ต้าย ฯฒฯ ด๊อด หฒุ เฒลา เมี่ยน. เฒลา เมี่ยน เหยียด ป่วน เหยียด ป่วน ธ้วด ต้าย ฯฒฯ ด๊อด หฒุ สับดี.

18โยซูวา ฯฒฯ ปุน สับดี วั้ว ป่วน เมี่ยน เหยียด เต้า เหยียด เต้า ธ้วด ต้าย ฯฒฯ ด๊อด หฒุ อาคาน. อาคาน โหฒว คานมี เญย ตอน. คานมี โหฒว สับดี เญย ตอน. สับดี โหฒว เฒลา เญย ตอน, ยูดา ฝีง.

19โยซูวา ก๊อง บั๋ว อาคาน, “เยีย เญย ตอน อ้า! อ๋อย หฒุ ท่าย เฒี้ยว, อิสะลาเอน เมี่ยน เญย ทิน-ฮู่ง, หย่า อ๋อย หฒุ เธง นิ่น. เม่ย ฮนั้ง หาย นอ โหฒว อ๋อย หฒุ ก๊อง หฒะ บั๋ว เยีย, ไม้ ตู๋ง ปี๋ง เยีย.”

20อาคาน เตา โยซูวา, “เฒ์ย เญย. เยีย หฒะเก้ง ป์าม ฒุ์ย, โหฒว ต่อง เฒี้ยว, อิสะลาเอน เมี่ยน เญย ทิน-ฮู่ง. เยีย ฮนั้ง น้าย นอ โหฒว.

21เยียม ธ้าง ตุ๊ ต้าย เญย กะน้าย เยีย ปวัด เหยียด เต๋ย บาบีโลน เต่ย-ปูง เญย ต้ม ลุย เหฑว่ย ไห่ เหธา เหยียด จ้อย เหฒียบ เป๊ด ลู์ง ญ่าน, แอ๋ง เหธา เหยียด ติ้ว เจียม, เฮนี้ย-ต้าว เหฒียบ ฮม์ ลู์ง. เยีย ฯฒฯ เหมว่ย เจี๊ยะ น้าย เต๋ย กะน้าย แอ๋ง เฒาะ ต้าย. น้าย เต๋ย กะน้าย ปย๊บ เจี๊ยน เยีย เญย ด๊บ-ลิ่ว กะญั์ว เญย เดา-เดี๊ย. ญ่าน เยียม ค้วด-โด๊ะ.”

22โยซูวา ฯฒฯ พ้าย เต๋ย เมี่ยน มี่ง. นิ่น บัว ฯฒฯ ถิว เจี๊ยน มี่ง อาคาน เญย ด๊บ-ลิ่ว, ล์อ ปวัด วั้ว เต๋ย กะน้าย ปย๊บ เจี๊ยน ด๊บ-ลิ่ว กะญั์ว. ญ่าน เยียม ค้วด-โด๊ะ.

23นิ่น บัว ฯฒฯ เยียม ด๊บ-ลิ่ว กะญั์ว เฒาะ ธ้วด ต้าย ต้อ มี่ง เถา โยซูวา เหธา อิสะลาเอน เมี่ยน วั้ว, อัน เจี๊ยน เฒี้ยว เญย หฑะเฮมียน.

24โยซูวา เหธา อิสะลาเอน เญย หฒวัง เมี่ยน ฯฒฯ ต้อ เฒลา เญย ฟุน, อาคาน, เหธา ต้ม ลุย, ญ่าน, เจียม-ติ้ว, เลี่ยม อาคาน เญย ตอน, เซียะ, ง่ง, ล่อ, ยู่ง, ปะกี ยู่ง, เลี่ยม ด๊บ-ลิ่ว เหธา นิ่น ม่าย เญย หญู่งๆ กะน้าย, ฝาว วั้ว เจี๋ย อาโค ฮ์อง มี่ง.

25โยซูวา ก๊อง, “เม่ย เหว่ย หาย ติ่ว ต้อ เหฒะ หน่าน ต้าย ปุน เยีย บัว? อี้ ฮนอย เฒี้ยว อ๋อย ปุน เม่ย หฒุ เหฒะ หน่าน อ๊ะ.” อิสะลาเอน เญย หฒวัง เมี่ยน ฯฒฯ หล่ง หละเปย๊ย ฒง นิ่น ไต่. เลี่ยม นิ่น เญย เปย๊า ฒง เมี่ยน เหธา นิ่น เญย จา-ตี้ง กะน้าย เหยียด ฒู้ง นิ่น บัว หล่ง หละเปย๊ย ฒง หย่า หล่ง โต์ว ปั๊ว เหฑ่ง.

26หฒวัง เมี่ยน แอ๋ง เฒาะ หละเปย๊ย ดุย เจี๊ยน อาคาน เญย เซย, เป๋น เหยียด ต้ม ดุย หละเปย๊ย เถา อี้ จ๋า ฮนอย. ฆะฮ้า เฒี้ยว เญย กะเฉีย ฟิว. เหว่ย น้าย เต๋ย สี่, เถา อี้ จ๋า ฮนอย เมี่ยน เห่ว วั้ว นอม ต๋อง โหฒว อาโค ฮ์อง.

← Chapter 6 Jump to: Chapter 8 →