Joshua 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1ตะเหญ่ย ดอม เฑี้ยว เญย, โยซูวา เหธา อิสะลาเอน เญย เหยียด ฒู้ง เมี่ยน เยียม ซิดทิม ธ้วด เจ๊า มี่ง จอแดน ด้าย เฮลน. เถา วั้ว, นิ่น บัว ธอง ด๊บ-ลิ่ว ฒั้ว เจี๊ยน เจี๋ย ด้าย.

2เจี๋ย ลิ์ว ปัว ฮนอย, โหฒว เปย๊ย เญย เมี่ยน มี่ง ก๋อม ด๊บ-ลิ่ว เธี้ยง,

3ก๊อง บั๋ว แปะ ฝีง, “เม่ย บัว หาย หฒั่น ปวัด เลวี ไซ เมี่ยน แกง เจี๊ยน เฒี้ยว, เม่ย บัว เญย ทิน-ฮู่ง, เญย แล์ง แหง่ง หว่า ฟาง มี่ง นอ, อ๋อย หฒุ ธ้วด เม่ย บัว เยียม เญย ต๋อง กัน เจี๊ยน ฟาง มี่ง อ๊ะ.

4เม่ย บัว ฯฒฯ ฮิ้ว ตุ๊ อ๋อย หฒุ ยั่ง หาย ติ้ว เจ๊า มี่ง, เหว่ย หฒุ เม่ย บัว ไม้ แก้ง ยั่ง เจี๋ย น้าย ติ้ว เจ๊า. เม่ย บัว อ๋อย หฒุ เล่ย แล์ง แหง่ง หว่า ฟาง อี ธิน เดาะ เญย ต๋อง. ไม้ ตู๋ง มี่ง ฟัด.”

5โยซูวา ก๊อง บั๋ว หฒวัง แปะ ฝีง, “เม่ย บัว อ๋อย หฒุ สา กั้น ธีง-เหฑ่ง ต้าย, เหว่ย หฒุ ฌัง ฮนอย เฒี้ยว อ๋อย เยียม เม่ย บัว บุด๋ง โหฒว บัวะ ฮ่อง เญย สี่.”

6โยซูวา ก๊อง บั๋ว ไซ เมี่ยน, “อ๋อย หฒุ แกง เจี๊ยน แล์ง แหง่ง หว่า ฟาง เจี๋ย แปะ ฝีง วั้ว ด่าง แหมง.” นิ่น บัว ฯฒฯ แกง เจี๊ยน แล์ง แหง่ง หว่า ฟาง มี่ง ด่าง แปะ ฝีง.

7เฒี้ยว ก๊อง บั๋ว โยซูวา, “อี้ ฮนอย เยีย อ๋อย ตอง เจี๊ยน อิสะลาเอน เมี่ยน ท่าย เม่ย โหฒว โฮล, เหว่ย ปุน นิ่น บัว ฮิ้ว ตุ๊ เยีย ฮนั้ง หาย นอ เหธา โมเซ เยียม, เยีย หย่า ฮนั้ง วั้ว นอ เหธา เม่ย เยียม.

8เม่ย อ๋อย หฒุ บั๋ว แกง แล์ง แหง่ง หว่า ฟาง วั้ว เต๋ย ไซ เมี่ยน, ‘เม่ย บัว มี่ง เถา จอแดน ด้าย เฮลน อ๋อย หฒุ เปียะ มี่ง โซ้ว เจี๊ยน ด้าย กะญั์ว.’”

9โยซูวา ก๊อง บั๋ว อิสะลาเอน เมี่ยน, “ต้าย ฟัด เต๋ย ม่าะ! ต้าย หมวัง เฒี้ยว, เม่ย บัว เญย ทิน-ฮู่ง, เญย หว่า.”

10โยซูวา ก๊อง, “เม่ย บัว ฮนั้ง น้าย นอ ไฮ่ ฮิ้ว ตุ๊ เฒี่ยง เจี๊ยน เญย ทิน-ฮู่ง เยียม เม่ย บัว บุด๋ง. เม่ย บัว หย่า ไฮ่ ฮิ้ว ตุ๊ นิ่น ด่ง หาย ฒู้ง อ๋อย เยียม เม่ย บัว เญย วั้ว ด่าง แหมง หฒุ่น ธ้วด คานาอัน เมี่ยน, ฮิดไท เมี่ยน, ฮีไว เมี่ยน, เปลิดซี เมี่ยน, เกกาซี เมี่ยน, อาโมไล เมี่ยน เหธา เยบุด เมี่ยน.

11หมั่ง ม่าะ! ลู่ง เดี๊ย เญย เฒี้ยว เญย แล์ง แหง่ง หว่า ฟาง อ๋อย เปียะ จอแดน ด้าย ด่าง เม่ย บัว.

12เหว่ย น้าย, อี้ หฒั่น อ๋อย หฒุ เยียม อิสะลาเอน เมี่ยน เญย ฝีง บุด๋ง กิ๊น เหฒียบ เหญ่ย ล่าน เมี่ยน, เหยียด ฝีง เหยียด ล่าน.

13ไซ เมี่ยน แกง เจี๊ยน เฒี้ยว เญย แล์ง แหง่ง หว่า ฟาง, เซ ลู่ง เดี๊ย เญย เฒี้ยว เญย ฟาง, มี่ง วั้ว หฒั่น, นิ่น บัว เญย เหฒา เยี้ยด ธ้าย เหฌี่ย จอแดน ด้าย, จอแดน ด้าย เญย ววม ฯฒฯ ตี้ง, ไม้ เหลี่ยว เหฌี่ย อ๊ะ. วั้ว เจี๋ย เญย ววม ฯฒฯ ดุย เจี๊ยน วั้ว.”

14ฮนั้ง หน่าย หฒวัง แปะ ฝีง แธะ นิ่น บัว เญย ด๊บ-ลิ่ว อ๋อย เจี๋ย จอแดน ด้าย วั้ว หฒั่น, แกง แล์ง แหง่ง หว่า ฟาง เญย ไซ เมี่ยน ฯฒฯ มี่ง ด่าง แปะ ฝีง.

15ต๋อย เซียว ธุน-แกง เญย เฒี่ยง โห่, จอแดน ด้าย เญย ววม หฒั่นๆ เหยียม ปวั๊ง ขัม เมี์ยน ธ้วด. มป่า แกง แล์ง แหง่ง หว่า ฟาง เญย ไซ เมี่ยน เถา จอแดน ด้าย นิ่น บัว เญย เหฒา เยี้ยด ธ้าย เหฌี่ย ววม ฮนั้ง,

16วั้ว เจี๋ย เหลี่ยว เหฌี่ย เญย ววม ฯฒฯ ตี้ง มี่ง ดุย เจี๊ยน เป๋น เหยียด ดุย เยียม โก เญย ต๋อง, นิด สาเลทาน, อาดัม ฒี่ง วั้ว. เหลี่ยว เหฌี่ย อาลาบา ค้อย เญย ววม หย่า ตั๋ง เหฑ่ง, ไม้ เหลี่ยว เหฌี่ย. อาลาบา ค้อย, เซ ค้อย-เฑ้า. อิสะลาเอน แปะ ฝีง ฯฒฯ เจี๋ย เยลีโค ฒี่ง เญย ต๋อย-หง่าน.

17อิสะลาเอน เญย หฒวัง เมี่ยน เจี๋ย เดา-ฆาย วั้ว หฒั่น, แกง เฒี้ยว เญย แล์ง แหง่ง หว่า ฟาง เญย ไซ เมี่ยน โซ้ว เจี๊ยน วั้ว จอแดน ด้าย บุด๋ง เญย เดา-ฆาย ฒั้ว เถา หฒวัง แปะ ฝีง เจี๋ย เหฑ่ง จอแดน ด้าย.

← Chapter 2 Jump to: Chapter 4 →