Joshua 13

Mien Bible (Thai Script) © Thailand Bible Society, 2007

← Chapter 12 Jump to: Chapter 14 →

1โยซูวา เญย หฮญัง-เจ๊ย ฮลัง, โก๋ ไห่ อ๊ะ. เฒี้ยว ก๊อง บั๋ว นิ่น, “เม่ย เญย หฮญัง-เจ๊ย ฮลัง, โก๋ ไห่ อ๊ะ. อ๋อย หฒุ แฑง เญย เต่ย-ปูง หธ่อ แอ๋ง ม่าย จั๊ง เญย.

2“หธ่อ อ๋อย หฒุ แฑง เญย เต่ย-ปูง ม่าย ฟีลิสะเตีย เมี่ยน เหธา เกซู เมี่ยน เญย เหยียด ฒู้ง เต่ย-ปูง,

3เยียม อียิบ เต่ย-ปูง เญย ตง ปูง แหมง, ซิโห ด้าย มี่ง ป๊ะ ปูง แหมง เถา เอโคโลน ฒี่ง เญย กั๊บ-จ๋าย. เหยียด ฒู้ง ฝุน เป๋น คานาอัน เมี่ยน เญย เต่ย-ปูง. กุ๊น ฟีลิสะเตีย เมี่ยน วั้ว เต๋ย ปยา เต้า ต้ม เจียน เยียม กาซา ฒี่ง, อัดโดด ฒี่ง, อัดเคโลน ฒี่ง, กัด ฒี่ง, เอโคโลน ฒี่ง, หย่า ม่าย อับวิม เมี่ยน เญย เต่ย-ปูง,

4เซ น่าม ปูง แหมง คานาอัน เมี่ยน เญย เหยียด ฒู้ง เต่ย-ปูง, เหธา ไซดอน เมี่ยน เญย เต่ย-ปูง เยียม เมอาลา มี่ง เถา อาเฟ้ก ฒี่ง, แอ๋ง มี่ง เถา อาโมไล เมี่ยน เญย กั๊บ-จ๋าย.

5หย่า ม่าย เกบาน เมี่ยน เญย เต่ย-ปูง, เหธา มี่ง ตง ปูง แหมง เหยียด ฒู้ง เลบานอน เต่ย เยียม เฮโมน บง- จั๊วะ, บาอันกาด มู้ง, มี่ง เถา เปียะ ฮามัด ฒี่ง เญย ต๋อง.

6“บง-ไอ๊ ต๋อง เญย เหยียด ฒู้ง เมี่ยน เยียม เลบานอน เก้ มี่ง เถา มิดเลโฟ้ดมาอิม, เซ ไซดอน เญย เหยียด ฒู้ง เมี่ยน, เยีย กั้น อ๋อย เยียม อิสะลาเอน เมี่ยน เญย วั้ว ด่าง แหมง หฒุ่น นิ่น บัว ธ้วด มี่ง. กุ๊น หฒิว เยีย พ้าย เหฒียง เม่ย เฒาะ น้าย เต๋ย เดา ปุน ฆอย เป๋น อิสะลาเอน เมี่ยน หฑิบ เญย ป่วน.

7อี้ หฒั่น เม่ย อ๋อย หฒุ พ้าย น้าย เต๋ย เดา ปุน ฆอย น้าย เต๋ย ดั้ว ฝีง เหธา มะนัดเส ด๊าม-ฝีง เป๋น นิ่น บัว หฑิบ เญย ป่วน.”

8เหฒ่ง วั้ว เต๋ย มะนัดเส ด๊าม-ฝีง เหธา ลูเบน ฝีง เหธา กาด ฝีง หฑิบ เญย เดา เยียม จอแดน ด้าย ตง ปูง แหมง หฒิว เฒี้ยว เญย โปว, โมเซ, พ้าย ปุน นิ่น บัว เญย ป่วน.

9ม่าย เยียม อานโนน ฮ์อง- เฮลน เญย อาโลเอ ฒี่ง, เหธา ฮ์อง กะญั์ว เญย ฒี่ง, เลี่ยม เมเดบา เหยียด ฒู้ง เดา-แป้ง มี่ง เถา ดีโบน ฒี่ง.

10หย่า ม่าย เยียม เฮ้ดโบน ฒี่ง กุ๊น อาโมไล เมี่ยน วั้ว เต้า สิโหน ฮู่ง เญย นอมๆ ฒี่ง มี่ง เถา อัมโมน เมี่ยน เญย กั๊บ-จ๋าย.

11หย่า ม่าย กิเลอาด เต่ย เหธา เกซู เมี่ยน เหธา มาอาคา เมี่ยน เญย เต่ย, เลี่ยม เฮโมน บง เหยียด ฒู้ง เหธา บาซาน เต่ย เหยียด ฒู้ง มี่ง เถา สาเลคา มู้ง.

12แอ๋ง ม่าย บาซาน เต่ย เญย โอก ฮู่ง กุ๊น เญย เฒี่ยง นอม กั๊วะ. นิ่น เยียม อัดทาโล้ด ฒี่ง เหธา เอเดนอี ฒี่ง กุ๊น. เลฟาอิม เมี่ยน ขูง เหฒ่ง นิ่น กั้น ดุ เต้า ฮนั้ง. น้าย เต๋ย เมี่ยน เหยียด ฒู้ง โมเซ เบ๊าะ ฮี่ง แอ๋ง หฒุ่น นิ่น บัว ธ้วด เหฑ่ง.

13มป่า อิสะลาเอน เมี่ยน ไม้ หฒุ่น เกซู เมี่ยน เหธา มาอาคา เมี่ยน ธ้วด. เกซู เมี่ยน, มาอาคา เมี่ยน ฯฒฯ เยียม อิสะลาเอน เมี่ยน บุด๋ง เถา อี้ จ๋า ฮนอย.

14มป่า โมเซ ไม้ พ้าย เดา ปุน เลวี ฝีง โหฒว นิ่น บัว หฑิบ เญย ป่วน. นิ่น บัว หฑิบ เญย ป่วน เซ หล่ง โต์ว ปั๊ว เหฒี่ย ฝ่ง ห่อ ปุน เฒี้ยว, อิสะลาเอน เมี่ยน เญย ทิน-ฮู่ง, เญย กะน้าย, ฮนั้ง เฒี้ยว เหธา นิ่น บัว แล์ง เจี๋ย เญย หว่า นอ.

15โมเซ หฒิว ลูเบน ฝีง เญย ปู้ง ป่วน พ้าย เดา เป๋น นิ่น บัว หฑิบ เญย ป่วน.

16นิ่น บัว เญย กั๊บ-จ๋าย เซ เยียม อานโนน ฮ์อง- เฮลน เญย อาโลเอ ฒี่ง เหธา เยียม ฮ์อง กะญั์ว เญย ฒี่ง เหธา เว่ย ก๋อม เมเดบา ฒี่ง เญย เดา-แป้ง,

17เลี่ยม เฮ้ดโบน ฒี่ง เหธา เยียม เฮ้ดโบน เดา-แป้ง เญย นอมๆ ฒี่ง, ดีโบน ฒี่ง, บาโม้ดบาอัน ฒี่ง เหธา เบดบาอันเมโอน ฒี่ง,

18หย่า ม่าย ยาฮ้าด ฒี่ง, เคเดโม้ด ฒี่ง เหธา เมฟาอาด ฒี่ง,

19ม่าย คีลิยาทาอิม, สิบมา, เหธา เยียม วั้ว นอม ฮ์อง เญย บง-ไอ๊, เฒเอเล้ดซาหา ฒี่ง.

20แอ๋ง ม่าย เบดเปโอ, ปิดกา บง ฝาว เจี๋ย เญย ต๋อง เหธา เบดเยซิโม้ด ฒี่ง,

21เซ เยียม วั้ว นอม ต๋อง เญย เดา-แป้ง เญย เหยียด ฒู้ง ฒี่ง, เหธา อาโมไล เมี่ยน เญย สิโหน ฮู่ง เยียม เฮ้ดโบน ฒี่ง กุ๊น เญย เหยียด ฒู้ง กั๊วะ. โมเซ เบ๊าะ ฮี่ง นิ่น, เลี่ยม มีเดียน ฝีง เญย เปย๊ย เฒ้ย, เอวี, เลเคม, สูอา, ฮูอา เหธา เลบา. น้าย เต๋ย เปย๊ย เฒ้ย ฒิ่น ด่าง เยียม วั้ว นอม เต่ย-ปูง เกวย สิโหน ฮู่ง กุ๊น.

22อิสะลาเอน เมี่ยน หล่ง หฑุ ด๊าว ไต๋ เมี่ยน วั้ว หฒั่น, เลี่ยม เบโอ เญย ตอน, วั้ว เต้า หมั่ง แหม่ง เมี่ยน, บาลาอัม, หย่า หฒุ เหธา เจี๊ยน ไต๋ ไต่.

23ลูเบน ฝีง เญย เต่ย-ปูง ไฟ ปูง แหมง เญย กั๊บ-จ๋าย เซ จอแดน ด้าย. น้าย เต๋ย ฒี่ง เหธา ล์าง เป๋น ลูเบน เมี่ยน หฒิว นิ่น บัว เญย ปู้ง ป่วน ตุ๊ หฑิบ เญย ป่วน.

24โมเซ หฒิว กาด ฝีง เญย ปู้ง ป่วน พ้าย เดา เป๋น นิ่น บัว หฑิบ เญย ป่วน.

25นิ่น บัว เญย เต่ย-ปูง เยียม ยาเซ มู้ง เหธา กิเลอาด เต่ย เญย นอมๆ ฒี่ง, เลี่ยม อัมโมน เมี่ยน เญย เหยียด ป่วน เต่ย-ปูง, มี่ง เถา ลับบา ฒี่ง ตง ปูง แหมง, อาโลเอ ฒี่ง.

26นิ่น บัว เญย กั๊บ-จ๋าย หย่า เยียม เฮ้ดโบน ฒี่ง มี่ง เถา ลาม้าดมิดเป มู้ง เหธา เบโทนิม มู้ง, หย่า เยียม มาหะนาอิม ฒี่ง มี่ง เถา เดบี ฒี่ง เญย กั๊บ-จ๋าย.

27หย่า ม่าย ฮ์อง กะญั์ว เญย เบดฮาลัม มู้ง, เบดนิมลา มู้ง, สุกโค้ด มู้ง, สาโฟน เหธา เฮ้ดโบน ฒี่ง เญย สิโหน ฮู่ง เญย กั๊วะ เหฒ่ง เหฌี่ย เญย เต่ย-ปูง. ไฟ ปูง เญย กั๊บ-จ๋าย เซ จอแดน ด้าย หย่า กัน เจี๊ยน ด้าย มี่ง ป๊ะ ปูง เถา คินเนเล้ด ค้อย-ตอน วั้ว เดี๊ย หว่วน.

28น้าย เต๋ย ฒี่ง เหธา ล์าง เป๋น กาด เมี่ยน หฒิว นิ่น บัว เญย ปู้ง ป่วน ตุ๊ หฑิบ เญย ป่วน.

29โมเซ หย่า เฒาะ หฑิบ เญย ป่วน เดา ปุน มะนัดเส ด๊าม-ฝีง หฒิว มะนัดเส ด๊าม-ฝีง เญย ปู้ง ป่วน พ้าย ปุน ฆอย.

30นิ่น บัว เญย กั๊บ-จ๋าย เยียม มาหะนาอิม ฒี่ง, เว่ย ก๋อม เหยียด ฒู้ง บาซาน เต่ย, เซ ต้ง บาซาน เต่ย เญย โอก ฮู่ง เญย เหยียด ฒู้ง กั๊วะ. เยียม บาซาน เต่ย หย่า ม่าย จาอี เญย หลัวะ เหฒียบ นอม ล์าง.

31แอ๋ง ม่าย เหยียด ป่วน กิเลอาด เต่ย เหธา อัดทาโล้ด เหธา เอเดนอี, เซ เกวย บาซาน เต่ย เญย โอก ฮู่ง เญย ต้ม ฒี่ง. น้าย เต๋ย ฒี่ง พ้าย ปุน มะนัดเส เญย ตอน, มาคี เญย เฒ้ย-ฟุน, เซ ปุน เหยียด ป่วน มาคี เมี่ยน หฒิว นิ่น บัว เญย ปู้ง ป่วน.

32น้าย เซ โมเซ เยียม โมอับ เดา-แป้ง จอแดน ด้าย เหธา เยลีโค ฒี่ง เญย ตง ปูง แหมง พ้าย ปุน เมี่ยน หฑิบ เญย ป่วน.

33มป่า โมเซ ไม้ พ้าย หฑิบ เญย ป่วน ปุน เลวี ฝีง. เฒี้ยว, อิสะลาเอน เมี่ยน เญย ทิน-ฮู่ง, เซ นิ่น บัว หฑิบ เญย ป่วน หฒิว เฒี้ยว บั๋ว เจี๋ย นิ่น บัว เญย หว่า.

← Chapter 12 Jump to: Chapter 14 →