Joshua 24

Mien Bible (Thai Script) © Thailand Bible Society, 2007

← Chapter 23 Jump to:

1โยซูวา เห่ว ฝีงๆ อิสะลาเอน เมี่ยน ต้าย กั๊บ ฒุ้น เยียม เซเคม ฒี่ง, หย่า เห่ว อิสะลาเอน เมี่ยน เญย เมี่ยน โก๋, เปย๊ย เฒ้ย, เซี้ยม ฒุ์ย เจียน, เหธา อิสะลาเอน เมี่ยน เญย หฒวัง เจียน. นิ่น บัว ฯฒฯ ต้าย เยียม ทิน-ฮู่ง เญย หฑะเฮมียน.

2โยซูวา ฯฒฯ ก๊อง บั๋ว หฒวัง แปะ ฝีง, “ เฒี้ยว, อิสะลาเอน เญย ทิน-ฮู่ง, ฮนั้ง น้าย นอ ก๊อง, ‘โล์-ฮนอย เม่ย บัว เญย อง-ถาย-แงะ เยียม ยูเฟติด ด้าย ตง ปูง แหมง, เซ อับลาฮัม เหธา นาโฮ เญย เตีย, เทลา. นิ่น บัว หย่า หฒั่ง เหญี่ย เญย เฒี่ยน.

3เยีย ต้อ เม่ย บัว เญย อง-ถาย-แงะ, อับลาฮัม, เยียม วั้ว ปูง ด้าย มี่ง โย่ว ก๋อม คานาอัน เต่ย-ปูง, หย่า ปุน นิ่น ม่าย เฒ้ย-ฟุน ธั้ม. เยีย เหธย อีสัก ปุน นิ่น.

4เยีย หย่า เหธย ยาโค้บ เหธา เอซาว ปุน อีสัก. เยีย ปุน เสอี เญย บง-ไอ๊ ต๋อง เอซาว เหว่ย เป๋น นิ่น เญย ป่วน, มป่า ยาโค้บ เหธา นิ่น เญย ตอน-เจว๊ย เหฌี่ย มี่ง เยียม อียิบ เต่ย-ปูง.

5“‘เยีย พ้าย โมเซ เหธา อาโลน มี่ง หย่า ปุน อียิบ เมี่ยน หฒุ ต้ม เหฒะ หน่าน. ฆะฮ้า เยีย ต้อ เม่ย บัว ธ้วด ต้าย.

6เยีย ต้อ เม่ย บัว เญย อง-ถาย ธ้วด อียิบ เต่ย-ปูง, เม่ย บัว ฯฒฯ มี่ง เถา ค้อย. อียิบ เมี่ยน หล่ง เบ๊าะ จ๋า เญย ม์า-เธีย เหธา เก้ ม์า แปง หฒุ่น เจี๊ยน เม่ย บัว เญย อง-ถาย เถา ค้อย-ซิ.

7วั้ว หฒั่น นิ่น บัว ชะ โท้ เฒี้ยว เถง, นิ่น ฯฒฯ ปุน นิ่น บัว เหธา อียิบ เมี่ยน เญย บุด๋ง-ฉัง มับ แม่ง มับ หฮมวัง เญย, แอ๋ง ปุน ค้อย เญย ววม เหยียม เจี๊ยน นิ่น บัว. เม่ย บัว กั้น เญย มฒีง ตุ๊ ปวัด เยีย ฮนั้ง หาย นอ โหฒว ปุน อียิบ เมี่ยน. เม่ย บัว หย่า เยียม เต่ย-ปูง-ฮวาง เล่า เญย.

8“‘เยีย หย่า ต้อ เม่ย บัว ต้าย เถา อาโมไล เมี่ยน เยียม เญย เต่ย-ปูง, เยียม วั้ว หง่าน หฒิ จอแดน ด้าย ตง ปูง แหมง. นิ่น บัว เหธา เม่ย บัว เบ๊าะ จ๋า. เยีย หย่า เฒาะ นิ่น บัว จิว ปุน เยียม เม่ย บัว เญย ปั์ว-เดี๊ย. เม่ย บัว ฯฒฯ ธ้าง ตุ๊ นิ่น บัว เญย เต่ย-ปูง. เยีย หย่า เยียม เม่ย บัว เญย วั้ว ด่าง แหมง เหมียด เหฑ่ง นิ่น บัว.

9วั้ว หฒั่น สิบโป เญย ตอน, บาล้าก, โมอับ เต่ย-ปูง เญย ฮู่ง เหธา อิสะลาเอน เมี่ยน เบ๊าะ จ๋า. นิ่น พ้าย เมี่ยน มี่ง เห่ว เบโอ เญย ตอน, บาลาอัม, ต้าย เหฒียว เม่ย บัว.

10มป่า เยีย ไม้ หมวัง บาลาอัม เญย หว่า. เหว่ย น้าย นิ่น หธีง ต้าย ปวัง หว่า เม่ย บัว. เยีย ฯฒฯ เหฌียว เม่ย บัว เปย๋า ดุ๊ด บาล้าก เญย ปั์ว-เดี๊ย.

11“‘เม่ย บัว เจี๋ย จอแดน ด้าย ต้าย เถา เยลีโค ฒี่ง. เยลีโค ฒี่ง เญย เมี่ยน เหธา เม่ย บัว เบ๊าะ จ๋า. แอ๋ง ม่าย อาโมไล เมี่ยน, เปลิดซี เมี่ยน, คานาอัน เมี่ยน, ฮิดไท เมี่ยน, เกกาซี เมี่ยน, ฮีไว เมี่ยน เหธา เยบุด เมี่ยน, หย่า เหธา เม่ย บัว เบ๊าะ จ๋า. เยีย เฒาะ นิ่น บัว จิว ปุน เยียม เม่ย บัว เญย ปั์ว-เดี๊ย.

12เยีย ปุน เมว์ย-เฌ้ย มี่ง ด่าง เม่ย บัว, หฒุ่น วั้ว เต๋ย อาโมไล เมี่ยน เญย อี เต้า ฮู่ง ธ้วด เม่ย บัว เญย วั้ว ด่าง แหมง. ไม้ เฒ์ย เม่ย บัว เญย หฑุ ด๊าว ไฟ เม่ย บัว เญย จวัง-หฒิน โหฒว.

13เยีย เหธย ปุน เม่ย บัว เญย เต่ย-ปูง เซ เม่ย บัว ไม้ ด๊อด ชะ โหฒว หาย หญู่ง เญย เต่ย-ปูง. เยีย เหธย ปุน เม่ย บัว เญย ฒี่ง ไม้ เฒ์ย เม่ย บัว กั้น เหธย มป่า เม่ย บัว ตุ๊ เปียะ มี่ง เยียม. เม่ย บัว ตุ๊ หญั่น ต้ง ไม้ เฒ์ย เม่ย บัว หฒวัง เญย อะหงุ่น หฮวีง เหธา กะลั้น หฮวีง เญย เปี๊ยว.

14“เหว่ย น้าย, เม่ย บัว อ๋อย หฒุ ท่าย เฒี้ยว, หย่า หล่ง เหฑ่ง เฮญี้ยว เหฒียบ ฒัวะ เญย ฟู-สู นิ่น. อ๋อย หฒุ เฒาะ ฒิ่น ด่าง เม่ย บัว เญย อง-ถาย-แงะ เยียม ยูเฟติด ด้าย ตง ปูง แหมง หย่า เยียม อียิบ เต่ย-ปูง หฒั่ง วั้ว เต๋ย เฒี่ยน กวั่ง เหฑ่ง ฟู-สู เฒี้ยว.

15สี ก๊อง เม่ย บัว ไม้ ปวั๊ง เฮญี้ยว ฟู-สู เฒี้ยว, อี้ ฮนอย เม่ย บัว อ๋อย หฒุ กิ๊น เม่ย บัว อ๋อย ฟู-สู หาย เต้า. อ๋อย ฟู-สู เม่ย บัว เญย อง-ถาย-แงะ เยียม ยูเฟติด ด้าย ตง ปูง แหมง วั้ว เต๋ย เฒี่ยน ไฟ อาโมไล เมี่ยน เญย เฒี่ยน, ต้ง เม่ย บัว อี้ หฒั่น เยียม เจี๊ยน น้าย นอม เต่ย-ปูง เญย เฒี่ยน ไฟ? มป่า เยีย กั้น เหธา เยีย เญย เปย๊า ฒง เมี่ยน แอ๊ะ, เยีย บัว อ๋อย ฟู-สู เฒี้ยว.”

16หฒวัง แปะ ฝีง เตา, “เยีย บัว ฒู้ง ไม้ ม่าย เฮญี้ยว กวั่ง เฒี้ยว มี่ง ฟู-สู เหญี่ย เญย เฒี่ยน,

17เหว่ย หฒุ เฒี้ยว, เยีย บัว เญย ทิน-ฮู่ง, ต้อ เยีย บัว เหธา เยีย บัว เญย อง-ถาย เยียม อียิบ เต่ย-ปูง หฒุ โหฒว โน่ว เญย ต๋อง ธ้วด ต้าย. เยีย บัว เญย มฒีง หย่า ตุ๊ ปวัด นิ่น โหฒว วั้ว เต๋ย บัวะ ฮ่อง เญย จั๋ง-โห่. กัน เจ๊า หฒั่ง ไม้ กุ๊น เถา หาย นิ่น เปว เจี๊ยน เยีย บัว, หย่า เปว เจี๊ยน เยีย บัว ยั่ง เจี๋ย วั้ว เต๋ย เหฒีย นอม กั๊วะ บุด๋ง.

18เฒี้ยว หฒุ่น ฝีงๆ เมี่ยน เยียม เยีย บัว เญย วั้ว ด่าง แหมง ธ้วด, เลี่ยม ฒิ่น ด่าง เยียม น้าย นอม เต่ย-ปูง เญย อาโมไล เมี่ยน. เหว่ย น้าย, เยีย บัว หย่า อ๋อย ฟู-สู เฒี้ยว, เหว่ย หฒุ นิ่น โหฒว เยีย บัว เญย ทิน-ฮู่ง.”

19โยซูวา ก๊อง บั๋ว แปะ ฝีง, “เม่ย บัว ไม้ ไฮ่ ฟู-สู เฒี้ยว, เหว่ย หฒุ นิ่น เซ ธีง-เหฑ่ง เญย ทิน-ฮู่ง. นิ่น เซ แฑง เจี๊ยน เมี่ยน วั้ว เต้า ทิน-ฮู่ง. นิ่น ฒู้ง ไม้ กวั่ง เม่ย บัว แหง่ง เจี๊ยน นิ่น เญย สี่ เหธา ป์าม เญย ฒุ์ย.

20สี ก๊อง เม่ย บัว กวั่ง เฒี้ยว, มี่ง ฟู-สู กั้น ฝีง เญย เฒี่ยน นอ, นิ่น ฯฒฯ ต๋าว หฑวน ต้าย ปุน เหฒะ หน่าน ห่อย เม่ย บัว, หย่า เหมียด เหฑ่ง เม่ย บัว, ไม้ กุ๊น นิ่น ฒิ่น ด่าง โหฒว หลง ปุน เม่ย บัว หมี่ อ๊ะ.”

21แปะ ฝีง เตา โยซูวา, “ไม้ เฒ์ย ฮนั้ง หน่าย. เยีย บัว อ๋อย ฟู-สู เฒี้ยว. ”

22โยซูวา แอ๋ง ก๊อง บั๋ว แปะ ฝีง, “เม่ย บัว เถง เม่ย บัว กั้น โหฒว ฒอง-เหฒง เม่ย บัว กิ๊น อ๋อย ฟู-สู เฒี้ยว. ” นิ่น บัว เตา, “เฒ์ย เญย. เยีย บัว โหฒว ฒอง-เหฒง เมี่ยน.”

23โยซูวา ฯฒฯ ก๊อง, “ฮนั้ง หน่าย, เม่ย บัว อ๋อย หฒุ เฒาะ เยียม เม่ย บัว บุด๋ง เญย กั้น ฝีง เมี่ยน เญย เฒี่ยน กวั่ง. เม่ย บัว อ๋อย หฒุ ว้วด เฮญี้ยว หฑวน ต้าย ล์อ เฒี้ยว, อิสะลาเอน เมี่ยน เญย ทิน-ฮู่ง.”

24แปะ ฝีง ก๊อง บั๋ว โยซูวา, “เยีย บัว อ๋อย ฟู-สู เฒี้ยว, เยีย บัว เญย ทิน-ฮู่ง, หย่า หมวัง นิ่น เญย หว่า.”

25วั้ว ฮนอย โยซูวา ฯฒฯ เหธา แปะ ฝีง เหลียบ แหง่ง หว่า. เยียม เซเคม ฒี่ง นิ่น เหลียบ เล์ย-หลัด เหธา เล์ย ปุน นิ่น บัว.

26โยซูวา ฯฒฯ เฟี้ย น้าย เต๋ย หว่า เยียม ทิน-ฮู่ง เญย เล์ย-หลัด โซว. นิ่น หย่า เฒาะ นอม ต้ม หละเปย๊ย เหลียบ ต้าย อัน เจี๊ยน ต้ม บะอง เฒวย เดี๋ยง-กอน เดี๊ย, เฒี้ยว เญย สีง ติ่น กะเฮลน.

27โยซูวา ก๊อง บั๋ว หฒวัง แปะ ฝีง, “หมั่ง ม่าะ! น้าย นอม หละเปย๊ย เถง บัว โหฒว ฒอง-เหฒง, เหว่ย หฒุ น้าย นอม หละเปย๊ย ไฮ์ ลิ์ว เฒี้ยว เหธา บัว ก๊อง เญย เหยียด ฒู้ง หว่า. น้าย นอม หละเปย๊ย ฯฒฯ ไฮ่ โหฒว ฒอง-เหฒง โก๋ เม่ย บัว, ปุน เม่ย บัว ไม้ แหง่ง เม่ย บัว เญย ทิน-ฮู่ง.”

28โยซูวา ฯฒฯ เห่ว แปะ ฝีง เก๊าะ-เมี่ยน หฑวน เก๊าะ-เมี่ยน หฑิบ เญย ป่วน ต๋อง หมี่ อ๊ะ.

29น้าย เต๋ย สี่ เจี๋ย ลิ์ว, ฆะฮ้า เฒี้ยว เญย โปว, นุน เญย ตอน, โยซูวา, เญย หฮญัง-เจ๊ย ตุ๊ เหยียด แป๊ะ เหฒียบ หฮญัง นิ่น เกวย เสย หมี่ อ๊ะ.

30อิสะลาเอน เมี่ยน ต้อ นิ่น เญย เซย มี่ง หฒัง เจี๊ยน นิ่น กั้น หฑิบ เญย ป่วน เดา, เยียม ทิมน้าดเสลา มู้ง, เอฟาอิม เมี่ยน เญย บง-ไอ๊ ต๋อง, กาอัด บง ป๊ะ ปูง แหมง.

31เยียม โยซูวา เญย เสย เฒ้ย อิสะลาเอน เมี่ยน ฟู-สู เฒี้ยว. โยซูวา เกวย เสย ลิ์ว, ฆะฮ้า ฮิ้ว ตุ๊ เฒี้ยว เหว่ย อิสะลาเอน เมี่ยน โหฒว เญย หญู่งๆ สี่ วั้ว เต๋ย เมี่ยน โก๋ หธ่อ เฒี่ยง เจี๊ยน เญย เสย เฒ้ย, อิสะลาเอน เมี่ยน หย่า ฟู-สู เฒี้ยว.

32อิสะลาเอน เมี่ยน ธ้วด อียิบ เต่ย-ปูง วั้ว หฒั่น นิ่น บัว ต้อ เจี๊ยน โยเซ้บ เญย บู๊ง ธ้วด. นิ่น บัว หฒัง เจี๊ยน เยียม เซเคม, เซ ต้ง ยาโค้บ เถง เซเคม เญย เตีย, ฮาโม, ม์าย ต้าย เญย เดา, จ๋า-ฒิ่น เหยียด แป๊ะ คว้าย ญ่าน. น้าย เต๋ย เดา เป๋น โยเซ้บ เญย เฒ้ย-ฟุน หฑิบ เญย ป่วน.

33อาโลน เญย ตอน, เอเลอาซา, หย่า เกวย เสย หมี่ อ๊ะ. นิ่น บัว ต้อ มี่ง หฒัง เจี๊ยน กิเบอา, เซ เยียม เอฟาอิม เมี่ยน เญย บง-ไอ๊ ต๋อง พ้าย ปุน เอเลอาซา เญย ตอน, ฟีเนหัด เญย มู้ง.

← Chapter 23 Jump to: