Joshua 17

Mien Bible (Thai Script) © Thailand Bible Society, 2007

← Chapter 16 Jump to: Chapter 18 →

1มะนัดเส เซ โยเซ้บ เญย ตอน-โฮล. มาคี เซ มะนัดเส เญย ตอน-โฮล หย่า โหฒว กิเลอาด เญย เตีย. น้าย เซ พ้าย ปุน มะนัดเส เมี่ยน เญย เดา. มาคี ตุ๊ จอแดน ด้าย ตง ปูง แหมง เญย กิเลอาด เหธา บาซาน เต่ย เป๋น นิ่น เญย ป่วน เหว่ย หฒุ นิ่น โหฒว เบ๊าะ จ๋า เฮ้น เญย แปง.

2น้าย เซ พ้าย ปุน เหฒ่ง เหฌี่ย เญย มะนัดเส เมี่ยน เญย เดา, หฒิว นิ่น บัว เญย ปู้ง ป่วน, เซ ม่าย อาบีเยเซ, เฮเล้ก, อัดลีเอน, เซเคม, เฮเฟ เหธา เซมิดา. น้าย เต๋ย มจั่ง ตอน เป๋น โยเซ้บ เญย ตอน, มะนัดเส, เญย เฒ้ย-ฟุน หฒิว นิ่น บัว เญย ปู้ง ป่วน.

3เสโลเฟหัด โหฒว เฮเฟ เญย ตอน, เฮเฟ โหฒว กิเลอาด เญย ตอน, กิเลอาด โหฒว มาคีเล เญย ตอน, มาคีเล โหฒว มะนัดเส เญย ตอน. เสโลเฟหัด ไม้ ม่าย ตอน, ขูง ม่าย เซียะ ฮนั้ง. เซียะ เญย บั๋ว เห่ว มาฮาลา, โนยา, โฮ้กลา, มินคา, ทีละซา.

4นิ่น บัว มี่ง ล์อ เอเลอาซา ไซ เมี่ยน เหธา นุน เญย ตอน, โยซูวา, เหธา โหฒว เปย๊ย เฒ้ย เญย เมี่ยน ก๊อง, “ เฒี้ยว พ้าย เหฒียง โมเซ ปุน เยีย บัว เยียม เยีย บัว เญย เธียน-เธะ บุด๋ง ม่าย เยีย บัว เญย ป่วน หฑิบ.” โยซูวา ฯฒฯ ปุน นิ่น บัว เยียม นิ่น บัว เญย เตีย เญย ก๋อ-โย์ว บุด๋ง ตุ๊ นิ่น บัว หฑิบ เญย ป่วน หฒิว เฒี้ยว พ้าย เหฒียง เญย หว่า.

5ฮนั้ง หน่าย มะนัดเส เมี่ยน ตุ๊ เหฒียบ โก๊ว เดา, ไม้ ฝุน เยียม จอแดน ด้าย ตง ปูง แหมง, กิเลอาด เต่ย เหธา บาซาน เต่ย,

6เหว่ย หฒุ มะนัดเส ฝีง เญย เซียะ ตุ๊ เหธา เจี๊ยน มะนัดเส ฝีง เญย ตอน ม่าย ป่วน หฑิบ. มะนัดเส เหฒ่ง เหฌี่ย เญย เฒ้ย-ฟุน ตุ๊ กิเลอาด เต่ย เป๋น นิ่น บัว เญย ป่วน.

7มะนัดเส เญย กั๊บ-จ๋าย เยียม อาเซ เญย กั๊บ-จ๋าย มี่ง เถา เซเคม ฒี่ง ตง ปูง แหมง, มิกเมทัด มู้ง. กั๊บ-จ๋าย แอ๋ง เหฌี่ย น่าม ปูง แหมง เถา เอนทับปูวา เมี่ยน เญย ต๋อง.

8เว่ย ก๋อม ทับปูวา มู้ง เญย เดา เป๋น มะนัดเส เมี่ยน เญย ป่วน, มป่า ทับปูวา มู้ง กั้น เยียม มะนัดเส เญย กั๊บ-จ๋าย, หย่า เป๋น เอฟาอิม เญย เฒ้ย-ฟุน เญย เดา.

9กั๊บ-จ๋าย แอ๋ง เหฌี่ย เถา คานา โด๊ะ. เยียม โด๊ะ เญย น่าม ปูง ม่าย เต๋ย เอฟาอิม เมี่ยน เญย ฒี่ง หฒอบ เจี๊ยน มะนัดเส เมี่ยน เญย ฒี่ง. มะนัดเส เญย กั๊บ-จ๋าย แอ๋ง กัน โด๊ะ เญย ป๊ะ ปูง แหมง เจี๋ย มี่ง ต๋น เจี๊ยน ค้อย.

10น่าม ปูง แหมง เป๋น เอฟาอิม เมี่ยน เญย เต่ย-ปูง. ป๊ะ ปูง แหมง เป๋น มะนัดเส เญย. หย่า ม่าย ค้อย โหฒว นิ่น บัว เญย กั๊บ-จ๋าย. ป๊ะ ปูง แหมง ต๋าว เจี๊ยน อาเซ เต่ย. ตง ปูง แหมง ต๋าว อิดสาคา เต่ย.

11เยียม อิดสาคา เหธา อาเซ เญย เต่ย กะญั์ว มะนัดเส แอ๋ง ม่าย เบดซาน ฒี่ง, อิบเลอัม ฒี่ง, โดอา ฒี่ง, เอนโด ฒี่ง, ทาอาน้าก ฒี่ง, เมกิดโด ฒี่ง, เหธา เว่ย ก๋อม น้าย เต๋ย ฒี่ง เญย ฟิ้ว-ล์าง. (ตะฟาม วั้ว นอม ฒี่ง เซ นาโฟ้ด.)

12มป่า มะนัดเส เมี่ยน หฒุ่น วั้ว เต๋ย ฒี่ง เญย เมี่ยน ไม้ ธ้วด เหว่ย หฒุ คานาอัน เมี่ยน หธ่อ แหง่ง เจี๊ยน เยียม วั้ว นอม เต่ย-ปูง.

13ฆะฮ้า อิสะลาเอน เมี่ยน เฮ้น ต้าย ฯฒฯ อ๊าบ คานาอัน เมี่ยน หฒุ โหฒว กง โค้ว, มป่า ไม้ หฒุ่น นิ่น บัว ธ้วด เหฑ่ง.

14โยเซ้บ เญย เฒ้ย-ฟุน ก๊อง บั๋ว โยซูวา, “เม่ย เหว่ย หาย ติ่ว พ้าย ดุ โก๊ว เดา ปุน เยีย บัว หฑิบ ฮนั้ง? เยีย บัว ม่าย เมี่ยน ธั้ม, เหว่ย หฒุ เฒี้ยว เหธย ฟุ ปุน เยีย บัว เถา อี้ หฒั่น.”

15โยซูวา เตา นิ่น บัว, “สี ก๊อง เม่ย บัว ม่าย เมี่ยน ธั้ม ไห่, เอฟาอิม เมี่ยน เญย บง-ไอ๊ ต๋อง หย่า เหว่ย เม่ย บัว เหบ ไห่ นอ, กุ๊น ฝาว เปลิดซี เมี่ยน เหธา เลฟาอิม เมี่ยน เญย เก้ม ฒะ ต้าย เหว่ย เม่ย บัว กั้น ม่าะ!”

16โยเซ้บ เญย เฒ้ย-ฟุน ก๊อง, “น้าย เต๋ย บง-ไอ๊ ต๋อง หธ่อ ไม้ เก๋า เยีย บัว เยียม. ตะฟ่าน เยียม วั้ว เดา-แป้ง เญย คานาอัน เมี่ยน หย่า ม่าย เบ๊าะ จ๋า เญย เฮลียะ-เธีย, เลี่ยม เยียม เบดซาน มู้ง เหธา วั้ว นอม มู้ง เญย ฟิ้ว-ล์าง เหธา เยียม ยิดเลเอน ฮ์อง เญย เมี่ยน.”

17โยซูวา ก๊อง บั๋ว โยเซ้บ เญย เฒ้ย-ฟุน, เอฟาอิม เหธา มะนัดเส เมี่ยน, “เม่ย บัว ม่าย เมี่ยน ธั้ม หย่า หฒะเก้ง เฮ้น ไห่. เม่ย บัว ไม้ ตาน อ๋อย ตุ๊ ดุ โก๊ว เดา ฮนั้ง.

18เลี่ยม น้าย เต๋ย บง-ไอ๊ ต๋อง อ๋อย เป๋น เม่ย บัว เญย. ไม้ กุ๊น เป๋น เก้ม หล่ม, เม่ย บัว อ๋อย หฒุ เยียม น้าย ปูง ฒะ ทง เถา วั้ว ปูง กั๊บ-จ๋าย จ่ม. เหยียด ฒู้ง ฯฒฯ เป๋น เม่ย บัว เญย เหฑ่ง. ไม้ กุ๊น คานาอัน เมี่ยน ม่าย เบ๊าะ จ๋า เญย เฮลียะ-เธีย หย่า ม่าย ชะ เฮ้น ไห่, เม่ย บัว ฒู้ง ไฮ่ หฒุ่น นิ่น บัว ธ้วด มี่ง.”

← Chapter 16 Jump to: Chapter 18 →