Daniel 10

Kamba (Mbivilia) 1956

← Chapter 9 Jump to: Chapter 11 →

1Mwaka wa katatũ wa kũsumbĩka kwa Kulusi mũsumbĩ wa Velisia, Ndanieli, ũla wetawa syĩtwa yake Mbelitesasa, avuanĩw’a ũndũ; na ũndũ ũsu waĩ wa w’o, naw’o waĩ kaũ mũnene: nake amanya ũndũ ũsu, na aĩ na ũmanyi wa ũla woni.

2Matukũ asu nyie, Ndanieli, neethĩiwe na kĩmako syumwa itatũ nima.

3Ndyaaya lĩu mũseo, o na nyama o na mbinyu ityaalika kanyw’anĩ wakwa, o na ndyaaĩvaka mauta nongi, mũvaka syumwa itatũ nima syeanĩa.

4Na mũthenya wa mĩongo ĩlĩ na ĩna wa mwei wa mbee, yĩla naĩ ũtee wa ũsĩ mũnene, nĩw’o Itekeli,

5nookĩlya metho makwa, noona, na, sisya, mũndũ ũmwe ekĩĩte ngũa ya katane, na kĩnyunyu kyake kĩvotoetwe thaavu mũtheu wa Uvasi:

6mwĩĩ wake naw’o watilyĩ ta nzumalati ntheu, na ũthyũ wake ta kwoneka kwa ũtisi, na metho make ta mũĩ syakanĩte mwaki, na moko make na maũũ make ta ũthuku mũkute, na wasya wa ndeto syake ta wasya wa wingĩ wa andũ.

7Nakwa, Ndanieli, nĩ nyioka noona woni; nũndũ andũ ala maĩ nakwa maiaaona woni; ĩndĩ kũtetema kũnene kwamavalũkĩla, na makĩa mevithe.

8Nakwa natiwa nyioka, na noona woni ũsu mũnene, o na vaiaatiala vinya nthĩnĩ wakwa; nũndũ ũseo wakwa waalyũkile nthĩnĩ wakwa weethĩwa ũthũku, o na ndyaaĩthĩwa na vinya.

9Ĩndĩ neew’a wasya wa ndeto syake; nakwa yĩla newie wasya wa ndeto syake, nĩvo ĩndĩ nakwatiwe nĩ too mũnene nĩvalũkĩte na ũthyũ wakwa, ũthyũ wakwa welekele nthĩ.

10Na, sisya, kw’oko kwangiita, kũla kwambiie ĩũlũ wa mau makwa na ĩũlũ wa itaa sya moko makwa.

11Nake ambĩa, Ndanieli, we mũndũ wendetwe mũno, manya ndeto ila ngũũtavya, naku ũngama ũlũngele; nũndũ natũmwa kwaku oyu. Na ĩndĩ andavya ndeto ĩsu, naũngama ngĩtetema.

12Nĩvo ĩndĩ wambĩie, Ndanieli, ndũkakĩe; nũndũ kuma mũthenya wa mbee ũla waiie ngoo yaku kũmanya, na kwĩnyivya vala ve Ngai waku, ndeto syaku nĩsyeew’ĩkie: nakwa nooka kwondũ wa ndeto syaku.

13Ĩndĩ mũnene wĩ mbee ũsumbĩnĩ wa ũsumbĩ wa Velisia anziĩĩa mĩthenya mĩongo ĩlĩ na ũmwe; ĩndĩ, sisya, Mikaeli, ũmwe wa anene, ooka kũndethya: nakwa nekala vau na asumbĩ ma Velisia.

14Yu nĩnooka ũkũmanyĩthya ũla ũkakwata andũ maku mĩthenya ya mũminũkĩlyo; nũndũ woni nĩ wa ĩtina wa matukũ maingĩ.

15Nake aneena nakwa ndeto ta isu, neelekelya ũthyũ wakwa nthĩ, ndaneenekya.

16Na, sisya, ũmwe ũla ũilyĩ mũvw’ano wa ana ma andũ angiita ilomo syakwa: na ĩndĩ naathamya kanyw’a wakwa, na naneena na namwĩa ũla waũngyĩ mbee wakwa, We mwĩaĩi wakwa, nũndũ wa ũla woni mawoo makwa nĩmangalyũkĩla, o na ndi na vinya.

17Nũndũ mũthũkũmi wa mwĩaĩi ũũ wakwa atonya ata kũneena na mwĩaĩi ũũ wakwa? Nũndũ ngalĩ ĩ yakwa, oyu kũiaatiala vinya nthĩnĩ wakwa, o na mĩthũmũ ndĩaaĩkala nthĩnĩ wakwa.

18Nĩvo ĩndĩ wangiitie ĩngĩ ũmwe ũilyĩ mũvw’ano wa mũndũ, nake ambĩkĩa vinya.

19Na ambĩa, We mũndũ ũla wendetwe mũno, ndũkakĩe: mũuo nĩwĩthĩwe kwaku, ĩthĩwa na vinya, ĩĩ, wĩthĩwe na vinya. Na akĩneena nakwa, neekĩwa vinya, na namwĩa, Mwĩaĩi wakwa naneene; nũndũ nĩwambĩkĩa vinya.

20Na ĩndĩ angũlya, Nĩwĩsĩ kĩla kyatuma nũka kwaku? Na yu nĩngũsyoka nũkite na mũnene wĩ mbee ũsumbĩnĩ wa Velisia: nakwa yĩla nĩuma kw’o, sisya, mũnene wĩ mbee ũsumbĩnĩ wa Ngiliki akooka.

21Ĩndĩ nĩngũkũtavya ũla ũandĩkĩtwe maandĩkonĩ ma w’o: o na vati wĩyĩkĩa vinya vamwe nakwa kwondũ wa maũndũ aa, ate o Mikaeli mũnene wenyu.

← Chapter 9 Jump to: Chapter 11 →