Daniel 4

Kamba (Mbivilia) 1956

← Chapter 3 Jump to: Chapter 5 →

1Mũsumbĩ Nevukatilesa, kwa ngo syonthe sya andũ, na mbaĩ, na ithyomo, ila itwĩe nthĩ yonthe: Mũuo wingĩve kwenyu.

2Nĩkwonekete ta nĩ ũseo kwakwa kwonan’ya mawonan’yo na moseng’yo ala Ngai Ũla Wĩ Ĩũlũ wa Onthe wekie kwakwa.

3Mawonan’yo make ũndũ manenevete! Na moseng’yo make ũndũ mean’ya vinya! Ũsumbĩ wake nĩ ũsumbĩ wa tene na tene, na ũsumbĩko wake nĩ kuma nzyawa na nzyawa.

4Nyie, Nevukatilesa, nathũmũĩte nyũmbanĩ yakwa, na kwingĩvĩwa nyũmbanĩ yakwa nene mbanakavye.

5Nĩnoonie ndoto ĩla yambĩkĩie w’ĩa; na malilikano nĩ ũkomonĩ wakwa na mawoni ma mũtwe wakwa nĩmanthĩnisye.

6Kwondũ wa ũu natw’a ũtw’ĩo andũ oĩ onthe ma Mbaviloni maetwe vala nĩĩ, mamanyĩthye ũalyũlo wa ndoto.

7Nĩvo ĩndĩ mookie eki ma syama, na awe, na Akalitei, na ala mathanaa maũndũ; nakwa natavan’ya ĩ ndoto vala maĩ; ĩndĩ matyaamanyĩthya ũalyũlo wayo.

8Ĩndĩ mũminũkĩlyo Ndanieli alika vala nĩĩ, ũla wetawa syĩtwa yake Mbelitesasa, o ta syĩtwa ya ngai yakwa, na ũla nthĩnĩ wake ve veva wa ila ngai ntheu: nakwa natavan’ya ndoto vala ũĩ, ngĩmwĩa,

9We Mbelitesasa, vwana wa eki ma syama, nĩkwĩthĩwa nĩnĩsĩ veva wa ila ngai ntheu wĩ nthĩnĩ waku, na vati ũndũ ũvithe ũkũthĩn’ya, ndavya mawoni ma ndoto yakwa ala nĩnoonie, na ũalyũlo wamo.

10Aa nĩo mawoni ma mũtwe wakwa nĩ ũkomonĩ wakwa: nĩnĩnoonie, na sisya, mũtĩ katĩ wa nthĩ; na ũtũlu waw’o ũnaĩ mũnene.

11Mũtĩ weana, na ũnaĩ na vinya, na ũtũlu waw’o wavika ĩtunĩ, na kwoneka kwaw’o kwavika kĩtulunĩ kya nthĩ yonthe.

12Matũ maw’o manaĩ maseo, na ũsyao waw’o mwingĩ, na nthĩnĩ waw’o vanaĩ lĩu wa onthe: nyamũ sya kĩtheka inaĩ na muunyĩ ĩtina waw’o, na nyũnyi sya yayaya inekalaa mbongenĩ syaw’o, na mĩĩ yonthe ĩnaĩthaw’a nĩw’o.

13Noona mawoninĩ ma mũtwe wakwa nĩ ũkomonĩ wakwa, na, sisya, mũsyaĩĩsya, nake nĩ mũtheu, atheea kuma ĩtunĩ.

14Aneena na wasya mũnene, na asya atĩĩ, Tema mũtĩ ũvalũke, na ũitilanga mbonge syaw’o, thingithya wĩtĩkye matũ maw’o, na ũinyaĩĩkya ũsyao waw’o: nyamũ syume ĩtina waw’o, na nyũnyi mbongenĩ syaw’o.

15Ĩndĩ tia kĩtina kya mĩi kyaw’o nthĩnĩ wa nthĩ, o nyekinĩ nziũ sya kĩsesi, kĩ o na kĩtang’a kya kĩaa na ũthuku; na nĩkĩthĩawe na ũthithu wa ĩmwe ya ĩtunĩ: na kya ũya kyake nĩkĩthĩawe vamwe na nyamũ nyekinĩ sya nthĩ:

16ngoo yake nĩalyũke ndĩkethĩwe ngoo ya mũndũ, na nanengwe ngoo ya nyamũ; na mavinda mũonza mavĩte ĩũlũ wake.

17Ũsilĩlo ũsu nĩ ũndũ wa ũtw’ĩo wa asyaĩĩsya, na kwenda kũu nĩ kwondũ wa ndeto ya ala atheu; nĩ kana ala me thayũ mamanye Ũla Wĩ Ĩũlũ wa Onthe nũsũmbĩkaa ũsumbĩnĩ wa andũ, na nũmũnengae o ũla wendaa, na nũsumbĩkasya ĩũlũ waw’o ũla wĩ ĩtheo mũno andũnĩ.

18Ndoto ĩsu nyie, mũsumbĩ Nevukatilesa, nĩnĩnoonie; naku, we Mbelitesasa, tavan’ya ũalyũlo wayo, nũndũ andũ oĩ onthe ma ũsumbĩ wakwa maitonya kũmanyĩthya ũalyũlo; ĩndĩ we nũtonya; nũndũ veva wa ila ngai ntheu wĩ nthĩnĩ waku.

19Nĩvo ĩndĩ Ndanieli, ũla wetawa syĩtwa yake Mbelitesasa, ekala ataneenekya ĩvinda ĩnene, na malilikano make mamũthĩn’ya. Mũsumbĩ asũngĩa na amwĩa, Mbelitesasa, ĩ ndoto ndĩkakũthĩn’ye, o na ũalyũlo wayo. Mbelitesasa asũngĩa na amwĩa, Mwĩaĩi wakwa, ndoto ĩsu nĩyĩthĩwe kwa ala makũmenaa, na ũalyũlo wayo kwa nthũ syaku.

20Mũtĩ ũla ũnoonie, ũla ũneanaa, na ũnaĩ na vinya, ũla ũtũlu waw’o ũnavikie ĩtunĩ, na kwoneka kwaw’o kwavika nthĩ yonthe;

21ũla matũ maw’o manaĩ maseo, na ũsyao waw’o ũnaĩ mwingĩ, na nthĩnĩ waw’o vanaĩ lĩu wa onthe; ũla nyamũ sya kĩtheka inekalaa ĩtina waw’o, na nyũnyi sya yayaya inaĩ na wĩkalo wasyo mbongenĩ syaw’o:

22nue, we mũsumbĩ, ũla weanie na waya vinya; nũndũ ũnene waku nĩweanie, na ũvikĩte ĩtunĩ, na ũsumbĩko waku wavika kĩtulunĩ kya nthĩ.

23Na nĩkwĩthĩwa mũsumbĩ nũnoonie mũsyaĩĩsya, nake nĩ mũtheu, atheeete kuma ĩtunĩ, na akyasya, Tema mũtĩ ũvalũke, na ũiwananga; ĩndĩ tia kĩtina kya mĩi kyaw’o nthĩnĩ wa nthĩ, nyekinĩ nziũ sya kĩsesi, kĩ o na kĩtang’a kya kĩaa na ũthuku, na nĩkĩthĩawe na ũthithu wa ĩmwe ya ĩtunĩ; na kya ũya kyake nĩkĩthĩawe vamwe na nyamũ sya kĩtheka, mũvaka mavinda mũonza mavĩte ĩũlũ wake;

24ũalyũlo nĩ ũũ, we mũsumbĩ, na nĩ ũtw’ĩo wa Ũla Wĩ Ĩũlũ wa Onthe, ũmũkĩe mwĩaĩi wakwa mũsumbĩ:

25atĩ ũkalũngw’a wume andũnĩ, na ũtũo waku ũkethĩawa vamwe na nyamũ sya kĩtheka, naku mũvaka ũĩsae nyeki ya ng’ombe, na ũkethĩawa na ũthithu wa ĩmwe ya ĩtunĩ, na mavinda mũonza makavĩta ĩũlũ waku; kũvika yĩla ũkamanya atĩ Ũla Wĩ Ĩũlũ wa Onthe nĩwe ũsumbĩkaa ũsumbĩnĩ wa andũ, na nũnengae o ũla wendaa.

26Na nĩkwĩthĩwa nĩmaneeaie kũtia kĩtina kya mĩi kya mũtĩ; ũsumbĩ waku ũkeethĩwa wĩ mũlũmu kwaku, ĩtina wa wamanya kana matu nĩmo masumbĩkaa.

27Kwondũ wa ũu, we mũsumbĩ, ũtao wakwa nĩwĩtĩkĩlwe kwaku, na ũkĩĩva naĩ syaku na ũlũngalu, na mothũku maku na kũmew’ĩa ala ngya tei; ethĩwa nũtonyeka mũuo waku wongeleke.

28Aa onthe mookĩa mũsumbĩ Nevukatilesa.

29Myei ĩkũmi na ĩlĩ yathela, aanganga ĩũlũ wa nyũmba nene mbanakavye ya kĩũsumbĩ ya Mbaviloni.

30Mũsumbĩ aneena na asya, Ĩno ti Mbaviloni nene, ũla naakie nyie na vinya mũnene wa ũtonyi wakwa na nũndũ wa ndaĩa ya ũnene wakwa, yĩthĩwe yĩ ũtũo wa kĩũsumbĩ?

31Yĩla ndeto yaĩ kanyw’anĩ wa mũsumbĩ, kwatheea wasya kuma ĩtunĩ, ũkĩmwĩa, We mũsumbĩ Nevukatilesa, we nũũtavw’a: Ũsumbĩ nĩwauma kwaku:

32naku ũkalũngw’a wume andũnĩ; na ũtũo waku ũkethĩawa vamwe na nyamũ sya kĩtheka; naku mũvaka ũĩsae nyeki ta ng’ombe; na mavinda mũonza makavĩta ĩũlũ waku; kũvika yĩla ũkamanya kana Ũla Wĩ Ĩũlũ wa Onthe nĩwe ũsumbĩkaa ũsumbĩnĩ wa andũ, na nũnengae o ũla wendaa.

33Saa o ũsu ũla ũndũ weanĩw’a ĩũlũ wa Nevukatilesa: na alũngw’a aume andũnĩ, na aĩsaa nyeki ta ng’ombe, na mwĩĩ wake weethĩawa na ũthithu wa ĩmwe ya ĩtunĩ, kũvika nzw’ĩĩ syake syeethĩawa ta maw’ĩa ma ndiũ, na mbwaa syake ta mbwaa sya nyũnyi.

34Na mũminũkĩlyo wa mĩthenya ĩsu nyie, Nevukatilesa, nang’elelya metho makwa ĩtunĩ, na ũmanyi wakwa wanzyokea, nakwa nataĩa Ũla Wĩ Ĩũlũ wa Onthe, na nataĩa na kũkatha ũla wĩkalaa tene na tene; nũndũ ũsumbĩko wake nĩ ũsumbĩko wa tene na tene, na ũsumbĩ wake nĩ kuma nzyawa na nzyawa;

35na andũ onthe ala matwĩe nthĩ matalawa kwĩthĩwa ti kĩndũ; nake ekaa kwĩanana na kwenda kwake nguthunĩ ya kaũ ya matunĩ, na andũnĩ ala matwĩe nthĩ; o na vati ũmwe ũtonya kũsiĩĩa kw’oko kwake, kana kũmũkũlya, Wĩĩka ata?

36Ĩvinda o yĩu ũmanyi wakwa wanzyokea; na kwondũ wa ndaĩa ya ũsumbĩ wakwa, ũnene wakwa na kũtisa kwakwa kwanzyokea; na atai makwa na eaĩi ma kwakwa mamantha makĩmbenda; nakwa nalũlũmĩlw’a ũsumbĩnĩ wakwa, na nongeleelwa ũnene mũseo mbee.

37Na yu nyie, Nevukatilesa, nĩngũtaĩa na kũnenevya na kũkatha Mũsumbĩ wa ĩtunĩ; nũndũ mawĩa make onthe nĩ ma w’o, na mĩendele yake nĩ ya ũsili wa katĩ; na ala maendaa na wĩnenevyo nũtonya kũmanyivya.

← Chapter 3 Jump to: Chapter 5 →