Daniel 8

Kamba (Mbivilia) 1956

← Chapter 7 Jump to: Chapter 9 →

1Mwaka wa katatũ wa kũsumbĩka kwa mũsumbĩ Mbelisasa woni wanumĩlĩla, o nyie Ndanieli, ĩtina wa ũla wanumĩlĩle mbee.

2Nakwa noona woninĩ; na ĩndĩ kweethĩwa, ngyona, naĩ nyũmbanĩ nene mbanakavye ku Susani, ĩla yĩ kĩlungunĩ kĩnene kya nthĩ kĩtawa Elamu; nakwa noona woninĩ, na naĩ vakuvĩ na ũsĩ wa Ulai.

3Nĩvo ĩndĩ nookĩlilye metho makwa, noona, na, sisya, kwaũngama ndũũme ũtee wa ũsĩ yĩ na mbya ilĩ: na ila mbya ilĩ syaĩ ndasa; ĩndĩ ũmwe waĩ mũasa kwĩ ũngĩ, na ũla mũasa wookĩla ĩtina.

4Noona ndũũme ĩluutĩte kwelekela ũthũĩlonĩ wa syũa, na ngalĩ ya ĩũlũ, na ngalĩ ya ĩtheo; na nyamũ o na syĩva itayaatonya kũũngama mbee wayo, o na kũtyaĩ ũtonya kũtangĩĩa kw’okonĩ kwayo; ĩndĩ yeeka kwĩanana na kwenda kwayo, na yeenenevya.

5Nakwa ngĩsũanĩa, sisya, nthenge yauma ũthũĩlonĩ wa syũa yavĩtĩla ĩũlũ wa nthĩ yonthe, na ndĩakiitĩte nthĩ: na ĩla nthenge yaĩ na ũvya wa ũseng’ya katĩ wa metho mayo.

6Na yookĩa ndũũme ĩla yaĩ na mbya ilĩ, ĩla namyonie ĩũngeme ũtee wa ũsĩ, na yamĩsembea na ũthatu mwai wa ũtonyi wayo.

7Nakwa noona yathengeea ndũũme, na yamĩthatĩa, na yakima ndũũme, na yatũla mbya ilĩ syayo; o na ndũũme ndyaĩ na ũtonyi wa kũũngama mbee wayo; ĩndĩ yamĩvalũkya nthĩ, na yamĩkinyanga; o na kũtyaĩ ũtonya kũtangĩĩa ndũũme kw’okonĩ kwayo.

8Na ĩndĩ nthenge ĩsu yeenenevya mũno: na yĩla yaĩ na vinya, ũvya mũnene watũlĩka; na vandũ vaw’o syookĩla mbya inya sya ũseng’ya syelekele iseve inya sya ĩtu.

9Na nthĩnĩ wa ũmwe wasyo wauma ũvya mũnini, ũla wanenevie mũno, kwelekela ngalĩ ya ĩtheo, na wumĩlonĩ wa syũa, na ngalĩ ya ĩla nthĩ nzeo mũno.

10Na waneneva, o na kũvika nguthu ya ĩtunĩ; na wavalũkya nthĩ imwe sya ĩla nguthu na sya ndata, na waikinyanga.

11Ĩĩ, weenenevya, o na kũvika mũnene wĩ mbee ũsumbĩnĩ wa ĩ nguthu; na wamũvena nthembo ya kũvĩvw’a ĩtatw’ĩkanaa, na vandũ va vala vatheu vake vavalũkw’a.

12Na ĩla nguthu yaumw’a yawũnengwa kwondũ wa ĩvĩtyo vamwe na nthembo ya kũvĩvw’a ĩtatw’ĩkanaa; na wekya w’o kũvika nthĩ, na weeka ũndũ wendete na waunĩka.

13Nĩvo ĩndĩ neewie mũtheu ũmwe aineena; na mũtheu ũngĩ amwĩa ũsu ũmwe ũla waneenaa, Nĩ kũvika ĩndĩĩ woni wa nthembo ya kũvĩvw’a ĩtatw’ĩkanaa, na ĩvĩtyo yanangaa, kũnengane vala vandũ vatheu na nguthu nayo ikinyangwe na nyaĩĩ?

14Nake anzũngĩa, Kũvika mawĩoo na ioko ngili ilĩ na maana atatũ; nĩvo ĩndĩ vala vandũ vatheu vakathew’a.

15Na kweethĩwa, nyie, o nyie Ndanieli, yĩla noonie woni, namantha kũwũmanya; na, sisya, kwaũngama mbee wakwa ta mũvw’ano wa mũndũ.

16Nakwa neew’a wasya wa mũndũ katĩ wa ũsĩ wa Ulai, ũla weetanie, na wasya, Kavilieli, manyĩthya mũndũ ũũ ũla woni.

17Na ĩndĩ athengeea vala naũngyĩ; na ooka, nakwatwa nĩ w’ĩa, na navalũka na ũthyũ wakwa: ĩndĩ ambĩa, Manya, we mwana wa mũndũ; nũndũ ũ woni nĩ wa ĩvinda ya mũminũkĩlyo.

18Na ĩndĩ akĩneena nakwa, nakwatwa nĩ too mũnene ũthyũ wakwa welekele nthĩ; ĩndĩ angiita, na anũngamya vala naũngyĩ.

19Nake ambĩa, Sisya, nĩngũũmanyĩthya ũndũ ũkethĩwa ĩvinda ya mũminũkĩlyo wa ũla ũthatu mũnene; nũndũ nĩ wa ĩvinda yatwiwe ya mũminũkĩlyo.

20Ndũũme ĩla woonie, yĩ na mbya ilĩ, nĩsyo asumbĩ ma Metia na Velisia.

21Nayo nthenge yĩ maw’ĩa maingĩ nĩ mũsumbĩ wa Ngiliki: na ũvya mũnene wĩ katĩ wa metho mayo nĩ mũsumbĩ wa mbee.

22Na ũndũ wa ũvya ũla watũlĩkile, ũla vandũ vaw’o syaũngamie inya, mosumbĩ ana nĩmakaũngama kuma mbaĩnĩ ĩsu, ĩndĩ matikethĩwa na ũtonyi take.

23Na ĩvinda ya mũminũkĩlyo wa ũsumbĩ woo, yĩla avĩtan’ya makeanĩa, mũsumbĩ wĩ ũthyũ mwai, na mũmanyi wa nthimo, nũkaũngama.

24Na ũtonyi wake nũkethĩwa wĩ mũnene mũno, ĩndi ti kwa ũtonyi wake mwene; na nũkananga kũvika kũseng’ya, na nũkaunĩka na kwĩka kwenda kwake; na nũkananga ala me vinya mũno na ala andũ atheu.

25Na kwondũ wa mwĩkĩle wake nũkaingĩvya ũkengani kw’okonĩ kwake; na nũkenenevya ngoonĩ yake, na nũkananga aingĩ meyelele: na ĩngĩ nũkaũngama kũsiĩĩa mũnene wa anene; ĩndĩ nũkatilĩka vate kw’oko.

26Na woni wa mawĩoo na ioko ũla ũneenetwe nĩ wa w’o: ĩndĩ vingĩa woni; nũndũ nĩ wa matukũ maingĩ meũka.

27Nakwa, Ndanieli, nanyala, na nawaa matũkũ amwe; nĩvo ĩndĩ nookĩlile, na natethya wĩa wa mũsumbĩ: na naseng’a nũndũ wa woni, ĩndĩ vati ũmwe waaũmanya.

← Chapter 7 Jump to: Chapter 9 →