Daniel 2

Kamba (Mbivilia) 1956

← Chapter 1 Jump to: Chapter 3 →

1Na mwaka wa kelĩ wa kũsumbĩka kwa Nevukatilesa, Nevukatilesa nĩwaotie ndoto; na veva wake waũũya, na too wake wamwaĩa.

2Nĩvo ĩndĩ mũsumbĩ weaie metwe eki ma syama, na awe, na aoi, na Akalitei, mon’ye mũsumbĩ ndoto syake. Na ĩndĩ mooka na maũngama mbee wa mũsumbĩ.

3Na mũsumbĩ amea, Nĩnĩotie ndoto, na veva wakwa nũkũũũya nĩ kana nĩmanye ĩ ndoto.

4Nĩvo ĩndĩ Akalitei matavisye mũsumbĩ na kĩthyomo kya Asilia, We mũsumbĩ, ĩkala tene na tene: tavya athũkũmi maku ĩ ndoto, naitũ nĩtũkwonan’ya ũalyũlo wayo.

5Mũsumbĩ asũngĩa na amea Akalitei, Ũndũ ũsu nũkũmbaĩa: ethĩwa mũiũmanyĩthya ĩ ndoto na ũlayũlo wayo, mũkatilangwa ilungu, na nyũmba syenyu ikatw’ĩka maũtũnda ma syaa.

6Ĩndĩ ethĩwa nĩmũkwonan’ya ĩ ndoto na ũalyũlo wayo, mũkanengwa ninyie mĩthĩnzĩo na matuvi na ndaĩa nene: kwondũ wa ũu mbon’yai ndoto na ũalyũlo wayo.

7Masũngĩa ĩngĩ ya kelĩ na mamwĩa, Mũsumbĩ natũtavye ithyĩ athũkũmi make ĩ ndoto, naitũ nĩtũkwonan’ya ũalyũlo wayo.

8Mũsumbĩ asũngĩa na amea, Nĩnĩsĩ vyũ nĩmũkwenda kũasavya ĩvinda, nũndũ nĩmũkwona ũndũ ũsu nũkũmbaĩa.

9Ĩndĩ ethĩwa mũikũmanyĩthya ĩ ndoto, ve mwĩao ũmwe kwenyu tũ; nũndũ nĩmwĩyiĩe ndeto sya ũvũngũ na nthũku sya kũneena vala nĩĩ, kũvika ĩvinda yĩalyũlwe: kwondũ wa ũu ndavyai ĩ ndoto, nakwa nĩngũmanya kana nĩmũtonya kũmbon’ya ũalyũlo wayo.

10Akalitei masũngĩa vala ve mũsumbĩ, na mamwĩa, Kũti mũndũ ĩũlũ wa nthĩ ũtonya kwonan’ya ũndũ ũsu wa mũsumbĩ, nũndũ kũti mũsumbĩ, o na mwĩaĩi, o na mũsumbĩki, waakũlya ũndũ ta ũsu kwa mwĩki wa syama, kana kwa mũndũ mũe, kana kwa Mũkalitei.

11Na ũndũ ũsu wĩ vinya ũla mũsumbĩ ũnũkwenda, o na kũti ũngĩ ũtonya kũwonan’ya vala ve mũsumbĩ, ate o ngai, ila itekalaa na mwĩĩ.

12Kwondũ wa ũu mũsumbĩ athata na aĩ na ũthatu mwai mũno, na eeaa andũ oĩ onthe ma Mbaviloni manangwe.

13Na ĩndĩ ũtw’ĩo waumw’a, andũ oĩ moawe; na mamantha Ndanieli na atindan’ya make moawe.

14Nĩvo ĩndĩ Ndanieli ũndũ wa kũsũanĩa na ũndũ wa kĩlĩko wasũngĩie Alioko kavuteni wa nguthu ya asũvĩi ma mũsumbĩ, ũla waĩ anaumaala oae andũ oĩ ma Mbaviloni:

15asũngĩa na amwĩa Alioko kavuteni wa kwa mũsumbĩ, Nũndũ wa kĩ ũtw’ĩo waumw’a kwa mũsumbĩ na mĩtũkĩ ĩana ũu? Na ĩndĩ Alioko amanyĩthya Ndanieli ũla ũndũ.

16Na Ndanieli avota, na enda mũsumbĩ amũnenge ũthei, nake akamanyĩthya mũsumbĩ ũalyũlo.

17Nĩvo ĩndĩ Ndanieli waendie nyũmbanĩ kwake, na amanyĩthya Aanania, na Misaeli, na Asalia, atindan’ya make ũndũ ũsu:

18nĩ kana metye matei kwa Ngai wa ĩtunĩ ũndũnĩ ũũ ũvithe; nĩ kana Ndanieli na atindan’ya make maikoawe vamwe na andũ oĩ angĩ ma Mbaviloni.

19Nĩvo ĩndĩ ũndũ ũsu ũvithe wavuanĩw’e Ndanieli woninĩ wa ũtukũ. Na ĩndĩ Ndanieli ataĩa Ngai wa ĩtunĩ.

20Ndanieli asũngĩa na asya, Syĩtwa ya Ngai yĩtaĩwe tene na tene; nũndũ ũĩ na vinya nĩ syake.

21Nake nũalyũlaa mavinda na syathĩ; nũvetaa asumbĩ, na nĩwũkĩlasya asumbĩ; nũnengae ala oĩ ũĩ, na ũmanyi ala mekũmanya;

22nũvuanasya maũndũ maliku na mavithe; nĩwĩsĩ ala me kĩvindunĩ, na kyeni nĩkĩkalaa nake.

23Nĩngũũtũngĩa mũvea, na ũkũtaĩa, ame Ngai wa aasa makwa, nũndũ nũnengete ũĩ na vinya, na nĩwamanyĩthya oyu ũla tũkwendaa kwaku; nũndũ nĩwatũmanyĩthya ũla ũndũ wa mũsumbĩ.

24Kwondũ wa ũu Ndanieli aenda kwa Alioko, ũla mũsumbĩ wamwiĩte anange andũ oĩ ma Mbaviloni; aenda na amwĩa atĩĩ: Ndũkanange andũ oĩ ma Mbaviloni; ũndwae vala ve mũsumbĩ, nakwa nĩngwon’ya mũsumbĩ ũalyũlo.

25Nĩvo ĩndĩ Alioko wamũtwaie Ndanieli vala ve mũsumbĩ na mĩtũkĩ, na amwĩa atĩĩ, Nĩnoona mũndũ wa ana ma kũtavwa ma Yuta, ũla ũkũmanyĩthya mũsumbĩ ũalyũlo.

26Mũsumbĩ asũngĩa na akũlya Ndanieli, ũla wetawa syĩtwa yake Mbelitesasa, Nũtonya kũmanyĩthya ndoto ĩla nĩnoonie, na ũalyũlo wayo?

27Ndanieli asũngĩa vala ve mũsumbĩ, na amwĩa, Ũndũ ũvithe ũla mũsumbĩ ũkũlĩtye, andũ oĩ, o na awe, o na eki ma syama, o na ala mathanaa maũndũ, maitonya kwon’ya mũsumbĩ;

28ĩndĩ ĩtunĩ ve Ngai ũvuanasya maũndũ mavithe, nake nũmanyĩthĩtye mũsumbĩ Nevukatilesa ũla ũkethĩwa mĩthenya ya mũminũkĩlyo. Ndoto yaku, na mawoni ma mũtwe waku wĩ ũkomonĩ waku, nĩmo aa:

29ũndũ waku, we mũsumbĩ, malilikano maku manakũkĩe ũkomonĩ waku, ũndũ kũkethĩwa ĩtina, na ũla ũvuanasya maũndũ mavithe nũkũmanyĩthĩtye maũndũ ala makethĩwa.

30Ĩndĩ ũndũ wakwa, ũndũ ũũ ũvithe ndũnavuanw’a kwakwa ũndũ wa kwĩthĩwa na ũĩ kwĩ ũngĩ wĩ thayũ, ĩndĩ nĩ kana mũsumbĩ amanyĩthw’e ũalyũlo, na nĩ kana ũmanye malilikano ma ngoo yaku.

31Naku, we mũsumbĩ, nũnoonie, na sisya, mũvw’anano mũnene. Mũvw’anano ũsu, ũla ũnaĩ mũnene mũno, na kũtisa kwaw’o kũnaĩ kũseo mũno, ũnaĩ ũũngamĩte mbee waku; na kwoneka kwaw’o kũnaĩ kwa kũtĩsya.

32Na ũndũ wa mũvw’anano ũsu, mũtwe waw’o ũnaĩ wa thaavu mũtheu, na kĩthũi kyaw’o na moko maw’o manaĩ ma vetha, na ĩvu yaw’o na mawaswa maw’o manaĩ ma ũthuku,

33na maũũ maw’o manaĩ ma kĩaa, na nyaĩĩ syaw’o inaĩ nyunzu ya kĩaa, na nyunzu ya yũmba.

34Naku woona mũvaka ĩvia yatilĩka vate moko, yĩla yĩnakũnie mũvw’anano nyaĩĩnĩ syaw’o ila sya kĩaa na yũmba, na yaitilanga ilungu.

35Nĩvo ĩndĩ kĩaa, na yũmba, na ũthuku, na vetha, na thaavu, inatilanganilw’e ilungu vamwe, na syekala ta wewa wa ivũĩo sya ĩvinda ya syũa; na kĩseve kyaũlũkya, na vaineeoneka vandũ vasyo: na ĩvia yĩla yĩnakũnie mũvw’anano yatw’ĩka kĩĩma kĩnene, yausũa nthĩ yonthe.

36Ĩsu nĩyo ndoto; na ithyĩ nĩtũũneena ũalyũlo wayo vala ve mũsumbĩ.

37Naku, we mũsumbĩ, wĩ mũsumbĩ wa asumbĩ, ũla Ngai wa ĩtunĩ ũkũnengete ũsumbĩ, na ũtonyi, na vinya, na ndaĩa;

38na kw’onthe o kũla kwĩkalaa ana ma andũ, nyamũ sya kĩtheka na nyũnyi sya yayaya nũnenganĩte kw’okonĩ kwaku, na nũkũsumbĩkĩthĩtye ĩũlũ wasyo syonthe: nue mũtwe ũsu wa thaavu.

39Na ĩtina waku vakookĩla ũsumbĩ ũngĩ mũnyivu kwĩ we; na ũsumbĩ ũngĩ wa katatũ wa ũthuku, ũla ũkasumbĩka nthĩ yonthe.

40Na ũsumbĩ wa kana ũkeethĩwa na vinya ta kĩaa, o tondũ kĩaa kĩtilangaa ilungu na kũkĩlya syĩndũ syonthe vinya; na ta kĩaa kĩla kĩkanyangaa ii syonthe, ũkatilanga na kũkanyanga.

41Na o tondũ ũnoonie nyaĩĩ na syaa, nyunzu ya yũmba ya mũmbi, na nyunzu ya kĩaa, ũsumbĩ ũkaolekangana; ĩndĩ nthĩnĩ waw’o vakeethĩwa vinya wa kĩaa, o tondũ ũnoonie kĩaa kĩvulanĩte na yũmba yulue.

42Na o ũndũ syaa sya nyaĩĩ inaĩ nyunzu kĩaa, na nyunzu yũmba, ũsumbĩ ũkeethĩwa nyunzu wĩ na vinya, na nyunzu mũtilĩkanganu o ta ũu.

43Na o tondũ ũnoonie kĩaa kĩvulanĩtw’e na yũmba yulue, makeevulan’ya na ũsyao wa andũ; ĩndĩ maikalũman’ya ene kwa ene, o tondũ kĩaa kĩivulanaa na yũmba.

44Na mĩthenya ya asumbĩ asu Ngai wa ĩtunĩ akaũngamya ũsumbĩ ũtakaanangĩka tene na tene, o na ũsumbĩki waw’o ndũkaatiĩwa ũko ũngĩ wa andũ; ĩndĩ ũkatilanga ilungu na kũmina mosumbĩ asu onthe, naw’o ũkekalaa tene na tene.

45O tondũ ũnoonie ĩvia yatilĩka kĩĩmanĩ vate moko, na yatilanga ilungu kĩaa, na ũthuku, na yũmba, na vetha, na thaavu; Ngai ũla mũnene nũmanyĩthĩtye mũsumbĩ ũla ũkethĩwa ĩtina: na ndoto nĩ ya w’o, na ũalyũlo wayo nĩ wa kũĩkĩĩwa.

46Nĩvo ĩndĩ mũsumbĩ Nevukatilesa wavalũkile nthĩ na ũthyũ wake, na athaitha Ndanieli, na eeaa mamũthembee nthembo na kĩla kĩnyungaa nesa.

47Mũsumbĩ asũngĩa Ndanieli, na amwĩa, Nĩ w’o, Ngai wenyu nĩ Ngai wa ngai, na Mwĩaĩi wa asumbĩ, na mũvuan’ya wa maũndũ mavithe, nũndũ nĩwatonya kũvuan’ya ũndũ ũũ ũvithe.

48Na ĩndĩ mũsumbĩ anenevya Ndanieli, na amũnenga mĩthĩnzĩo mingĩ mĩnene, na amũtw’a mũnene ĩũlũ wa kĩlungu kĩnene kyonthe kya nthĩ kĩtawa Mbaviloni, na ngavana wa mbee ĩũlũ wa andũ oĩ onthe ma Mbaviloni.

49Na Ndanieli avoya mũsumbĩ, na aia Satalaki, na Mesaki, na Aveti‐neko ĩũlũ wa maũndũ ma kĩlungu kyu kĩnene kya nthĩ kĩtawa Mbaviloni: ĩndĩ Ndanieli ekalaa mbingĩlonĩ ya kwa mũsumbĩ.

← Chapter 1 Jump to: Chapter 3 →