Daniel 6

Kamba (Mbivilia) 1956

← Chapter 5 Jump to: Chapter 7 →

1Ndalio nĩwendeew’e nĩ kwia ĩũlũ wa ũsumbĩ asumbĩ anini ĩana na mĩongo ĩlĩ, methĩwe ĩũlũ wa ũsumbĩ w’onthe;

2na ĩũlũ wa asu anene atatũ, ũmwe woo aĩ Ndanieli; nĩ kana asumbĩ asu anini maumasye ũtalo kwoo, na nĩ kana mũsumbĩ ndakethĩwe na wasyo.

3Na ĩndĩ Ndanieli ũsu ataĩawa kwĩ anene asu na asumbĩ anini, nĩkwĩthĩwa veva mũseo waĩ nthĩnĩ wake; mũsumbĩ nake asũanĩaa kũmwia ĩũlũ wa ũsumbĩ w’onthe.

4Nĩvo ĩndĩ anene asu na asumbĩ anini mamanthie ũndũ wa kwilĩĩla Ndanieli maũndũnĩ ma ũsumbĩ; ĩndĩ maiaaona ũndũ o na ĩvĩtyo, nĩkwĩthĩwa aĩ na kĩthito, o na kũiaaoneka kwake ĩvĩtyo kana ũndũ ũtaĩle.

5Na ĩndĩ andũ asu masya, Tũikona ũndũ wa kwilĩĩla Ndanieli ũũ, ate o tũiona wa kũmwilĩĩla maũndũnĩ ma mĩao ya Ngai wake.

6Nĩvo ĩndĩ anene asu na asumbĩ anini moombanĩe mũsumbĩ vamwe, na mamwĩa atĩĩ, Mũsumbĩ Ndalio, ĩkala tene na tene.

7Anene onthe ma ũsumbĩ, o na amũli na asumbĩ anini, na atai na makavana, nĩmasũanĩĩte vamwe kwia mwamũlo wa kĩũsumbĩ, na kũtw’a ũtw’ĩo mũlũmu, kana o ũla wĩvoya ũndũ wa ngai o na yĩva kana kwa mũndũ ĩvinda ya matukũ mĩongo ĩtatũ, ate o kwaku, we mũsumbĩ, akekw’a ngunganĩ ya mĩnyambũ.

8Na ĩndĩ, we mũsumbĩ, lũmya ũtw’ĩo, na ũkĩkĩa ũandĩko saii, ndũkaalyũlwe, kwĩanana na mwĩao wa Ametia na Avelisia, ũla ũtaalyũlĩka.

9Kwondũ wa ũu mũsumbĩ Ndalio eekĩa ũandĩko na ũtw’ĩo saii.

10Na yĩla Ndanieli wamanyie kana ũandĩko nĩweekĩwa saii, aenda nyũmbanĩ yake (na ĩndĩ mbũthi sya kasũmba kake syaĩ mbingũe kwelekela Yelusaleme); na atulasya ndu kĩla mũthenya katatũ, aivoya, na aitũngĩa mũvea vu mbee wa Ngai wake, o tondũ weekaa tene.

11Nĩvo ĩndĩ andũ asu moombanie, na mamwona Ndanieli aivoya na akĩĩsũvanĩa vu mbee wa Ngai wake.

12Na ĩndĩ mathengeea, na maneenea mbee wa mũsumbĩ ũndũ wa ũtw’ĩo wa mũsumbĩ: Ndũneekĩa ũtw’ĩo saii, kana kĩla mũndũ ũla wĩvoya ngai o na yĩva kana mũndũ ĩvinda ya matukũ mĩongo ĩtatũ, ate o kwaku, we mũsumbĩ, akekw’a ngunganĩ ya mĩnyambũ? Mũsumbĩ asũngĩa na amea, Ũndũ ũsu nĩ wa w’o, kwĩanana na mwĩao wa Ametia na Avelisia, ũla ũtaalyũlĩka.

13Na ĩndĩ masũngĩa na maneenea vala ve mũsumbĩ, Ndanieli ũsu, wa ma ala matavĩtwe ma Yuta, ndeũkũkĩa, we mũsumbĩ, o na ũla ũtw’ĩo ũneekĩie saii, ĩndĩ nũvoyaa kĩla mũthenya katatũ.

14Na ĩndĩ mũsumbĩ, eew’a ndeto isu, eew’a woo mũno, na eetw’ĩĩa ngoonĩ yake kũvonokya Ndanieli; nake athĩnĩa wĩa kũvika syũa yathũa amũtangĩĩe.

15Nĩvo ĩndĩ andũ asu moombanĩe mũsumbĩ vamwe, na meea mũsumbĩ, Manya, we mũsumbĩ, kana nĩ mwĩao wa Ametia na Avelisia, kana ũtw’ĩo o na mwamũlo ũlũlũmĩlw’e nĩ mũsumbĩ ndũalyũlĩkaa.

16Nĩvo ĩndĩ mũsumbĩ weaie, na maete Ndanieli, na mamwĩkya ngunganĩ ya mĩnyambũ. Mũsumbĩ aneena na amwĩa Ndanieli, Ngai waku ũla ũthũkũmaa mavinda onthe, nĩwe wĩkũtangĩĩa.

17Na ĩvia yaetwe, na yaiwa mũomonĩ wa ngunga; na mũsumbĩ asiĩla na ngome yake mwene ya ũvana ũsiĩlo, na ngome ya ũvana ũsiĩlo ya eaĩi ma kwake; nĩ kana ũndũ o na wĩva ndũkaalyũlwe ũndũ wa Ndanieli.

18Na ĩndĩ mũsumbĩ aenda nyũmbanĩ yake nene mbanakavye, na ũtukũ w’onthe atĩĩa ũya; o na syĩndũ sya kũinga ityaaetwe vala ũĩ: na too wake wamwaĩa.

19Na ĩndĩ mũsumbĩ ookĩla kĩoko tene mũno, na aenda na mĩtũkĩ ngunganĩ ya mĩnyambũ.

20Na yĩla wathengeeie ngunganĩ vala ve Ndanieli, aĩa na wasya wa woo; mũsumbĩ aneena na akũlya Ndanieli, We Ndanieli, mũthũkũmi wa Ngai ũla wĩ thayũ, Ngai waku ũla ũthũkũmaa mavinda onthe, nũtonya ũkũtangĩĩa mĩnyambũnĩ?

21Nĩvo ĩndĩ Ndanieli wasũngĩie mũsumbĩ, We mũsumbĩ, ĩkala tene na tene.

22Ngai wakwa nũtũmie mũlaĩka wake, na atumya makanyw’a ma mĩnyambũ, na ndĩnambĩka ũndũ: nũndũ mbee wake nĩnonekete nde na ĩvĩtyo; o na ĩngĩ mbee waku, we mũsumbĩ, ndineevĩtya.

23Nĩvo ĩndĩ mũsumbĩ watanie mũno, na eeaa maumye Ndanieli ngunganĩ. Na ĩndĩ Ndanieli aumw’a ngunganĩ, na ũndũ o na wĩva ndwaaoneka mwĩĩnĩ wake, nũndũ nũmũĩkĩĩĩte Ngai wake.

24Na mũsumbĩ eeaa, na maete andũ asu ala mamũvinganĩsye Ndanieli, mamekya ngunganĩ ya mĩnyambũ, mo, na syana syoo, na aka moo; na mĩnyambũ yamakĩlya vinya, na yatilanga tũlungu mavĩndĩ moo onthe, mbee wa matanavika nthĩ ngunganĩ.

25Nĩvo ĩndĩ mũsumbĩ Ndalio waandĩkĩie ngo syonthe sya andũ, na mbaĩ, na ithyomo, ila syatwĩe nthĩ yonthe: Mũuo wingĩvwe kwenyu.

26Nĩngũtw’a ũtw’ĩo, kana ũsumbĩkonĩ w’onthe wa ũsumbĩ wakwa andũ mateteme na kũkĩa vala ve Ngai wa Ndanieli; nĩkwĩthĩwa nĩwe Ngai ũla wĩ thayũ, na ũla wĩkalaa tene na tene, na ũsumbĩ wake nĩ ũla ũtakanangĩka; na ũsumbĩko wake ũkeethĩwa o na kũvika mũminũkĩlyonĩ.

27Nũvonokasya na kũtangĩĩaa, na nĩwĩkaa mawonan’yo na moseng’yo ĩtunĩ na nthĩ, ũla ũtangĩĩe Ndanieli kuma vinyanĩ wa mĩnyambũ.

28Na ĩndĩ Ndanieli ũsu aathimĩka kũsumbĩkanĩ kwa Ndalio, na kũsumbĩkanĩ kwa Kulusi Mũvelisia.

← Chapter 5 Jump to: Chapter 7 →