Daniel 5

Kamba (Mbivilia) 1956

← Chapter 4 Jump to: Chapter 6 →

1Mũsumbĩ Mbelisasa nĩwavokeie eaĩi ngili ma kwake mboka nene, nake anyw’ĩa mbinyu vu mbee wa asu ngili.

2Mbelisasa, akĩsama ĩla mbinyu, eeaa maete mĩio ya thaavu na vetha ĩla ĩthe wake Nevukatilesa waumĩtye ĩkalũnĩ yĩla yaĩ Yelusaleme; nĩ kana mũsumbĩ na eaĩi ma kwake, na iveti syake na aka make ngombo, manyw’e nayo.

3Na ĩndĩ maete mĩio ya thaavu ĩla yaumiwe ĩkalũnĩ ya nyũmba ya Ngai ĩla yaĩ Yelusaleme; na mũsumbĩ na eaĩi ma kwake, na iveti syake na aka make ngombo, manyw’a nayo.

4Manyw’a mbinyu, na mataĩa ngai sya thaavu, na sya vetha, na sya ũthuku, na sya kĩaa, na sya mũtĩ, na sya ĩvia.

5Saa o ũsu syaumĩla syaa sya kw’oko kwa mũndũ, na syaandĩka sokaanĩ wa wakonĩ wa nyũmba nene mbanakavye ya mũsumbĩ syelekele kĩndũ kĩla kĩkĩawa mataa: na mũsumbĩ oona kĩlungu kya kw’oko kĩla kyaandĩkaa.

6Nĩvo ĩndĩ ũthyũ wa mũsumbĩ waalyũkile, na malilikano make mamũthĩn’ya; na maleenyu ma kĩnyunyu kyake maleela na mau make matinangana.

7Mũsumbĩ aneena na wasya mũnene awe, na Akalitei, na ala mathanaa maũndũ maetwe. Mũsumbĩ aneena na amea andũ oĩ ma Mbaviloni, O ũla ũkũsoma ũandĩko ũũ, na kũmbon’ya ũalyũlo waw’o, akeekĩwa ngũa ĩtilyĩ ta ndune, na mũnyoo wa thaavu ngingonĩ yake, na akeethĩwa mũsumbĩki wa katatũ ũsumbĩnĩ.

8Na ĩndĩ andũ oĩ onthe ma mũsumbĩ mooka; ĩndĩ maiaatonya kũsoma ũandĩko, o na kũmanyĩthya mũsumbĩ ũalyũlo waw’o.

9Nĩvo ĩndĩ mũsumbĩ Mbelisasa waũũyie mũno, na ũthyũ wake waalyũka, na eaĩi ma kwake masũanĩwa.

10Na ĩndĩ inyia wa mũsumbĩ nũndũ wa ndeto sya mũsumbĩ na eaĩi ma kwake ooka nyumbanĩ ya mboka: na inyia wa mũsumbĩ aneena na amwĩa, We mũsumbĩ, ĩkala tene na tene; malilikano maku maikakũthĩn’ye, o na ũthyũ waku ndũkaalyũke.

11Ve mũndũ ũsumbĩnĩ waku, wĩ na veva wa ila ngai ntheu nthĩnĩ wake; na mĩthenya ya au waku kyeni na ũmanyi na ũĩ, ta ũĩ wa ila ngai, nĩmoonekie nthĩnĩ wake; na mũsumbĩ Nevukatilesa au waku, o ũsu mũsumbĩ, au waku, amũtw’ĩkĩthya vwana wa eki ma syama, na wa awe, na Akalitei, na ala mathanaa maũndũ;

12nũndũ veva mũseo, na ũĩ, na ũmanyi, na ũalyũlo wa ndoto, na kũvuan’ya nthimo, na kũlingisũkan’ya maũndũ malingisanu, nĩmoonekie nthĩnĩ wa Ndanieli ũsu, ũla mũsumbĩ wamwĩtie Mbelitesasa. Na yu Ndanieli nĩetwe, nake nũnũkwonan’ya ũalyũlo.

13Nĩvo ĩndĩ Ndanieli waetiwe vala ve mũsumbĩ. Mũsumbĩ aneena na akũlya Ndanieli, We nue Ndanieli ũsu wa ana ma ala matavĩtwe ma Yuta, ala mũsumbĩ, asa wakwa, wamaetie kuma Yuta?

14Nyie nĩneew’a ũvoo waku, kana veva wa ila ngai wĩ nthĩnĩ waku, na ĩngĩ kyeni na ũmanyi na ũĩ mũseo nĩmonekete nthĩnĩ waku.

15Na yu andũ oĩ, ala awe, nĩmaetiwe vala nĩĩ nĩ kana masome ũandĩko ũũ, na kũmanyĩthya ũalyũlo waw’o; ĩndĩ mainatonya kũmbon’ya ũalyũlo wa ũndũ ũũ.

16Ĩndĩ nĩneew’a ũvoo waku, kana nũtonya kũalyũla, na kũlingisũkan’ya maũndũ malingisanu; ĩndĩ yu ethĩwa nũtonya kũsoma ũla ũandĩko, na kũmanyĩthya ũalyũlo waw’o, ũkeekĩwa ngũa ĩtilyĩ ta ndune, na mũnyoo wa thaavu ngingonĩ yaku, naku ũkeethĩwa mũsumbĩki wa katatũ ũsumbĩnĩ.

17Nĩvo ĩndĩ Ndanieli wasũngĩie na aneenea vu mbee wa mũsumbĩ, Mĩthĩnzĩo yaku nĩyĩthĩwe yaku mwene, na ũĩnenga ũngĩ matuvi maku; ĩndĩ nakwa nĩngũsomea mũsumbĩ ũandĩko, na kũmũmanyĩthya ũalyũlo.

18Naku, we mũsumbĩ, Ngai Ũla Wĩ Ĩũlũ wa Onthe nĩwanengie au waku Nevukatilesa ũsumbĩ, na ũnene, na ndaĩa, na ũkatho:

19na nũndũ wa ũnene ũla wamũnengie, ngo syonthe sya andũ, na mbaĩ, na ithyomo nĩmatetemaa na kũkĩa mbee wake: ũla wendie kũmũaa aimũaa, na ũla wendie kũmũeka aimũeka e thayũ; ũla wendie kũmũkĩlya aimũkĩlya, na ũla wendie kũmũtheesya aimũtheesya.

20Ĩndĩ yĩla ngoo yake yokĩlilw’e, na veva wake wooma kũvika eeka na ngathĩĩo, aumw’a kĩvĩlanĩ kyake kya ũsumbĩ, na mamũvena ndaĩa yake:

21na alũngw’a auma ananĩ ma andũ na ngoo yake yatw’ĩkĩthw’a ta ya nyamũ, na ũtũo wake waĩ vamwe na mang’oi ma kĩthekanĩ; na aĩthaw’a nyeki ta ng’ombe, na mwĩĩ wake weethĩawa na ũthithu wa ĩmwe ya ĩtunĩ; kũvika yĩla wamanyie kana Ngai Ũla Wĩ Ĩũlũ wa Onthe nĩwe ũsumbĩkaa ũsumbĩnĩ wa andũ, na nĩwiaa ĩũlũ waw’o o ũla wendaa.

22Naku mwanae, we Mbelisasa, ndwaanyivya ngoo yaku, o na wamanya maũndũ asu onthe,

23ĩndĩ nĩweenenevesye Mwĩaĩi wa ĩtunĩ; nao maete mĩio ya nyũmba yake vala ũĩ, naku na eaĩi ma kwaku, na iveti syaku na aka maku ngombo, manyw’a mbinyu nayo; naku nũtaĩĩte ngai sya vetha na thaavu, na ũthuku, na kĩaa, na mũtĩ, na ĩvia, ila itonaa, o na kwĩw’a, o na kũmanya; na Ngai ũla mĩthũmũ yaku ĩ mokonĩ make, na nzĩa syaku syonthe nĩ syake, ndwaamũtaĩa.

24Nĩvo ĩndĩ kĩlungu kya kw’oko kĩetiwe nĩwe, na ũandĩko ũũ waandĩkwa.

25Na ũandĩko nĩ ũũ ũla ũandĩkiwe: MENE, MENE, TEKELI, UVALASINI.

26Ũalyũlo waw’o nĩ ũũ: MENE; Ngai nũtalĩte ũsumbĩ waku, na kũwũmina.

27TEKELI; nũthimĩtwe kĩthiminĩ, na nĩwonekete kwĩthĩwa nũtielye.

28VELESI; ũsumbĩ waku nũaanĩtwe, na nũnengetwe Ametia na Avelisia.

29Nĩvo ĩndĩ Mbelisasa weaie, na meekĩa Ndanieli ngũa ĩtilyĩ ta ndune, na mamwĩkĩa ngingonĩ yake mũnyoo wa thaavu, na matavan’ya ũvoo wake, ethĩwe mũsumbĩki wa katatũ ũsumbĩnĩ.

30Ũtukũ ũsu Mbelisasa mũsumbĩ wa Akalitei ooawa.

31Na Ndalio Mũmetia anengwa ũsumbĩ, e wa myaka ta mĩongo thanthatũ na ĩlĩ.

← Chapter 4 Jump to: Chapter 6 →