Daniel 11 — Kamba (Mbivilia) 1956

1Nakwa nyie, mwaka wa mbee wa kũsumbĩka kwa Ndalio Mũmeti, naũngama kũmũlũlũmĩlya na kũmwĩkĩa vinya.

2Na yu nĩngũkwon’ya ũla w’o. Sisya, makaũngama ĩtina asumbĩ atatũ kũu Velisia; na ũla wa kana akeethĩwa na ũthwii mwingĩ kũvĩta angĩ onthe: nake aya vinya kwondũ wa ũthwii wake, akaingĩanĩsya onthe mokite na ũsumbĩ wa Ngiliki.

3Na mũsumbĩ wĩ vinya akaũngama, ũla wĩsumbĩka na ũsumbĩko mũnene, na kwĩka kwĩanana na kwenda kwake.

4Na yĩla wĩũngama, ũsumbĩ wake ũkatilĩkana na ũkaaanw’a kwa iseve inya sya ĩtu, o na ti kwa mosyaanĩo make, o na ti kũatĩĩa ũsumbĩko wake ũla wasumbĩkĩte; nũndũ ũsumbĩ wake ũkakũwa, o na kwondũ wa angĩ eka asu.

5Na mũsumbĩ wa ngalĩ ya ĩtheo akeethĩwa na vinya, na ũmwe wa anene make me mbee ũsumbĩnĩ; nake akeethĩwa na vinya kũmũvĩtũka, na akeethĩwa na ũsumbĩko; ũsumbĩko wake ũkeethĩwa wĩ ũsumbĩko mũnene.

6Na mũminũkĩlyo wa myaka makalũman’ya; na mwĩĩtu wa mũsumbĩ wa ngalĩ ya ĩtheo akooka kwa mũsumbĩ wa ngalĩ ya ĩũlũ kwĩw’ana nake: ĩndĩ mwĩĩtu ndakaendeea na vinya wa kw’oko kwake; o na mũsumbĩ ndakaũngama, o na kw’oko kwake; ĩndĩ ũla mwĩĩtu akavetwa, o na ala mamũetie, o na ũla wamũsyaie, o na ũla wamwĩkĩie vinya mavinda asu.

7Ĩndĩ kuma nthongoonĩ ya mĩi yake ũmwe akaũngama vandũ vake, ũla wĩũka na ita, na akalika ngomenĩ ya mũsumbĩ wa ngalĩ ya ĩũlũ, nake akameka maũndũ, na kũkĩlya vinya.

8O na ngai syoo, vamwe na mĩvw’anano yoo ya syĩndũ itwekethetw’e, na mĩio yoo yĩ vata mũno ya vetha na thaavu, akatava atwae Misili; nake akaekana na mũsumbĩ wa ngalĩ ya ĩũlũ myaka ĩmwe.

9Nake akalika ũsumbĩkonĩ wa mũsumbĩ wa ngalĩ ya ĩtheo, ĩndĩ akasyoka nthĩ yake mwene.

10Na ana make makokita, na makoomban’ya wingĩ wa nguthu ila nene, ala meũka mateũtĩa, na kusũa, na kũvĩta mũkuthũ; namo makasyoka na kũkita, o na kũvika ngomenĩ yake.

11Na mũsumbĩ wa ngalĩ ya ĩtheo akakwatwa nĩ ũthatu, na akaumaala na kũkita nake, o mũsumbĩ ũsu wa ngalĩ ya ĩũlũ; nake akaumya nguthu nene, na ĩla nguthu ĩkanenganwe kw’okonĩ kwake.

12Na amina ũkũa ĩla nguthu, ngoo yake ĩkookĩlw’a; na akavalũkya ngili makũmi, ĩndĩ ndakakĩlya vinya.

13Na mũsumbĩ wa ngalĩ ya ĩũlũ akasyoka, na akaumya nguthu nene kwĩ ĩla ya mbee; na akooka mũminũkĩlyonĩ wa mavinda, no myaka, e na ita nene na ũthwii mwingĩ.

14Na mavindanĩ asu aingĩ makaũngama kũsiĩĩa mũsumbĩ wa ngalĩ ya ĩtheo: na ĩngĩ ana ma ang’endu katĩ wa andũ maku makeeyũkĩlya kũlũlũmĩlya ũla woni; ĩndĩ makavalũka.

15Na ĩndĩ mũsumbĩ wa ngalĩ ya ĩũlũ akooka, na kũmba kĩvumbu, na kwosa ndũa mbiie nesa: o na okiti ma ngalĩ ya ĩtheo maikakĩlya vinya, o na andũ anyuve make, o na kũikethĩwa vinya wa kũkĩlya.

16Ĩndĩ we ũla wũkĩte kũkita nake akeeka kwĩanana na kwenda kwake mwene, o na vati ũkaũngama mbee wake; nake akaũngama ĩla nthĩ nzeo, na kw’okonĩ kwake vakeethĩwa wanangĩko.

17Na akeelekelya ũthyũ wake kũka na vinya wa ũsumbĩ wake w’onthe, na e na maũndũ ma ũlũngalu; nake akeeka ũu: nake akamũnenga mwĩĩtu wa aka, kũmwananga; ĩndĩ ndakaũngama, o na kwĩthĩwa ngalĩ yake.

18Ĩtina wa ũu akathyũũa ũthyũ wake elekele ithama, na akoosa nyingĩ: ĩndĩ mũnene ũmwe wĩ mbee ũsumbĩnĩ akatuma kĩvũthya kĩla kyaetiwe nĩ ũsu kĩthela; ĩĩ, na ĩngĩ, akatuma kĩvũthya kyake kĩmũsyokea mwene.

19Nĩvo ĩndĩ ũkathyũũa ũthyũ wake elekele ngome sya nthĩ yake mwene; ĩndĩ akatũlw’a na kũvalũka, na ndakoneka.

20Nĩvo ĩndĩ ũmwe ũkaũngama vandũ vake ũla ũkavĩtĩlya mumya wa koti ndaĩanĩ ya ũsumbĩ; ĩndĩ ĩvinda ya matukũ mavũthũ akaanangĩka, ti kwondũ wa ũthatu, o na ti kwondũ wa kaũ.

21Na vandũ vake mũndũ mũvũthye akaũngama, ũtaanengwa nĩmo ndaĩa ya ũsumbĩ: ĩndĩ akooka ĩvinda ya mũuo, na akoosa ũsumbĩ kwondũ wa kũkathĩĩanga.

22Na nguthu ila ikĩlasya vinya ikakĩlw’a vinya mũno nĩwe, na ikatũlĩka; ĩĩ, o na mũnene wa ũtianĩo nake.

23Na ĩtina wa kũseũvya wĩw’ano nake akeeka na ũkengani; nũndũ akambata na andũ avũthũ, na akeethĩwa na vinya.

24Ĩvinda ya mũuo akooka o na kũvika kũla kũnou mbee kwa kĩlungu kyu kĩnene kya nthĩ; nake akeeka ũla aaĩthe make mataaĩka, o na aaĩthe ma aaĩthe make; akamaaan’ya syĩndũ sya mbuta, na mũtavo, na ũthwii: ĩĩ, akasũanĩa kwĩka ngome syĩ vinya maũndũ, kũvika ĩvinda.

25Nake akakan’ya ũtonyi wake na ũnyiau wake elekele mũsumbĩ wa ngalĩ ya ĩtheo e na ita nene; nake mũsumbĩ wa ngalĩ ya ĩtheo akokita kaũ e na ita nene mũno, syĩ vinya; ĩndĩ ndakaũngama; nũndũ makamũsũanĩĩa maũndũ.

26Ĩĩ, ala maĩsaa kya ũya kyake kĩseo makamwananga, na ita syake ikausũa itivũke; na aingĩ makavalũka me oae.

27Na ũndũ wa asumbĩ asu elĩ, ngoo syoo ikeethĩwa sya kwĩka ũthũku, nao makaneena movũngũ me mesanĩ ĩmwe: ĩndĩ ndũkaathimĩka; nũndũ mũminũkĩlyo ũkeethĩwa wĩ o wa ĩvinda yĩla yatwiwe.

28Nĩvo ĩndĩ ũkasyoka nthĩ yake na ũthwii mwingĩ; na ngoo yake ĩkeethĩwa yĩ na kĩmena na ũtianĩo mũtheu; na akeeka kwenda kwake, na kũsyoka nthĩ yake mwene.

29Ĩvinda yĩla yatwiwe akasyoka, na kũvika ngalĩ ya ĩtheo; ĩndĩ ndũkethĩwa ĩvinda ya mũminũkĩlyo o tondũ weethĩiwe ĩvinda ya mbee.

30Nũndũ ngalawa sya Kitimu nikoka kwake; nũndũ wa ũu akeew’ĩthw’a woo, na akasyoka, na akathilĩkĩa ũtianĩo mũtheu, na akeeka kwenda kwake: o na akasyoka, na kwĩthukĩĩsya ala matiĩte ũtianĩo mũtheu.

31Na okiti makaũngama ngalĩ yake, nao makavukya vala vandũ vatheu, o na ngome, na makaveta nthembo ya kũvĩvw’a ĩtatw’ĩkanaa, na makaũngamya ũthatyo ũla wanangaa.

32Na ala mekaa ũtianĩo naĩ akamasya na ndeto sya kũkathĩĩanga; ĩndĩ ala mesĩ Ngai woo makeethĩwa na vinya, na makeeka maũndũ manene.

33Na ala me na ũĩ andũnĩ makamanyĩsya aingĩ; ĩndĩ makavalũkw’a mĩthenya mingĩ na ũvyũ na mwaki, na kũtavwa na kũvutwa.

34Na ĩndĩ yĩla mevalũka, makatetheew’a na ũtethyo mũnini; ĩndĩ aingĩ makalũman’ya nao na ndeto sya kũkathĩĩana.

35Na amwe ma ala oĩ makavalũka, matheethw’e, na kũthew’a, na kweũvw’a, o kũvika ĩvinda ya mũminũkĩlyo; nũndũ nĩ wa o yĩla ĩvinda yĩtw’ĩtwe.

36Na mũsumbĩ akeeka kwĩanana na kwenda kwake; na akeetũlya, na kwĩnenevya ĩũlũ wa kĩla ngai, na akaneenea Ngai wa ngai maũndũ ma kũseng’ya; nake akaunĩka kũvika ũthilĩku wĩanĩw’e; nũndũ ũla watwiwe ũkeekwa.

37O na ndakona ngai sya aaĩthe make ta kĩndũ, o na kwenda kwa aka, kana kwona ngai o na yĩva ta kĩndũ; nũndũ akeenenevya ĩũlũ wa syonthe.

38Ĩndĩ vandũ vake akataĩa ngai ya i ngome; na ngai ĩla aaĩthe make matamĩsĩ akataĩa na thaavu, na vetha, na tũvila twĩ thooa mũnene na syĩndũ sya kwendeesya.

39Na akatwaatwaana na ngome ila syĩ vinya mbee kwondũ wa ũtethyo wa ngai ngeni: o ũla wĩmwĩtĩkĩla akamwongela ndaĩa; na akamasumbĩkĩthya aingĩ, na akaaan’ya nthĩ kwondũ wa ĩtuvi.

40Na ĩvinda ya mũminũkĩlyo mũsumbĩ wa ngalĩ ya ĩtheo nũkakĩlan’ya vinya nake; na mũsumbĩ wa ngalĩ ya ĩũlũ nũkoka ta kĩlingi okite nake, e na makasya ma kaũ, na ala matũlĩte mbalasi, na ngalawa nyingĩ; nake nũkavota nthĩ isu, na kusũa na kũvĩtĩla mũkuthũ.

41Nake nũkavota ĩ nthĩ nzeo, na nthĩ nyingĩ nikakũlumanw’a; ĩndĩ ii nikatangĩĩwa kuma kw’okonĩ kwake: Etomu, na Moavi, na ala me mbee ma ana ma Amimoni.

42Na ĩngĩ nũkatambũũkya kw’oko kwake ĩũlũ wa i nthĩ; na nthĩ ya Misili ndĩkavonoka.

43Ĩndĩ nũkethĩwa na ũtonyi mothwiinĩ maie ma thaavu na ma vetha, na syĩndũnĩ syonthe syĩ vata sya Misili; na Alivia na Aethiovia nĩmakethĩwa makĩmũatĩĩa.

44Ĩndĩ maũvoo ala makauma wumĩlonĩ wa syũa na ala makauma ngalĩ ya ĩũlũ nĩmakamũthĩn’ya; nake nũkauma athi na ũthilĩku mũnene kwananga na kũmaveta vyũ aingĩ.

45Na nũkamba maeema ma nyũmba yake nene mbanakavye katĩ wa ũkanga na kĩla kĩĩma kĩseo kĩtheu; ĩndĩ nũkavika mũminũkĩlyo wake, na vati ũmwe ũkamũtethya.