Daniel 7

Kamba (Mbivilia) 1956

← Chapter 6 Jump to: Chapter 8 →

1Mwaka wa mbee wa kũsumbĩka kwa Mbelisasa mũsumbĩ wa Mbaviloni Ndanieli aĩ na ndoto na mawoni ma mũtwe wake e ũkomonĩ wake: na ĩndĩ aandĩka ndoto na aumya ũtalo wa maũndũ asu.

2Ndanieli aneena na asya, Nĩnoonie woninĩ wakwa ũtukũ, na, sisya, iseve inya sya ĩtunĩ syauutana na vinya ĩũlũ wa ũkanga mũnene.

3Na nyamũ inya nene syauma ũkanganĩ, itailyĩ ũndũ ũmwe.

4Ya mbee yailyĩ ta mũnyambũ, na yaĩ na nthwau sya ndiũ: nasyaĩĩsya kũvika nthwau syayo syakũwa, na yookĩlw’a kuma nthĩ, na yaũngamw’a na maũũ elĩ ta mũndũ; na yanengwa ngoo ya mũndũ.

5Na, sisya, nyamũ ĩngĩ, ya kelĩ, ĩtilyĩ ta nduva; nayo yeeyũkĩlya ngalĩ ĩmwe, na mbau itatũ syaĩ kanyw’anĩ wayo katĩ wa maeo mayo: na mamĩa atĩĩ, Ũkĩla, ũkaye nyama nyingĩ.

6Ĩtina wa ũu noona, na, sisya, ĩngĩ, ĩtilyĩ ta ngo, ĩla yaĩ na nthwau inya sya nyũnyi mũongonĩ wayo; na ĩngĩ nyamũ ĩsu yaĩ na mĩtwe ĩna; na yanengwa ũsumbĩko.

7Ĩtina wa ũu noona mawoninĩ ma ũtukũ, na, sisya, nyamũ ya kana, ya ũtĩsya na ya kwĩw’ĩthya w’ĩa, na ya vinya mũnene mũno; na yaĩ na maeo manene ma kĩaa; yamelya na yatũlanga ilungu, na yakinyanga matialyo na maũũ mayo: nayo ndĩailyĩ ta nyamũ syonthe sya mbee; na yaĩ na mbya ĩkũmi.

8Naketeeaa ila mbya, na, sisya, wookĩla katĩ wasyo ũvya ũngĩ, mũnini, ũla mbee waw’o itatũ sya ila mbya sya mbee syakũiwe na mĩi: na, sisya, ũvyanĩ ũsu vaĩ metho ta metho ma mũndũ, na kanyw’a ũineena maũndũ manene.

9Noona kũvika ivĩla sya ũsumbĩ syaiwa, na ũmwe ũla waĩ mũtumĩa wa matukũ ekalĩla: ngũa syake syaĩ nzaũ ta ĩa, na nzw’ĩĩ sya mũtwe wake ta w’ĩa mũtheu wa ĩlondu; kĩvĩla kyake kya ũsumbĩ kyaĩ itw’ĩki sya mwaki, na ndĩa syakyo syaĩ mwaki mwakanu.

10Ũsĩ wa mwaki waumĩla wumĩte kwake: ngili kũndũ ngili mamũthũkũma, na ngili ĩkũmi kũndũ ngili ĩkũmi maũngama mbee wake: ũsilĩlo waiwa, na mavuku mavuanw’a.

11Naketeea ĩvinda yĩu nũndũ wa wasya wa ndeto nene ila ũvya waneenie; naketeea kũvika nyamũ yooawa, na mwĩĩ wayo waanangwa, na wanenganwe ũvĩvw’e na mwaki.

12Na ũndũ wa ila nyamũ syatialile, nĩsyaveniwe ũsumbĩko wasyo: ĩndĩ mathayũ masyo nĩsyongeleelwe kyathĩ na ĩvinda.

13Noona mawoninĩ ma ũtukũ, na, sisya, kwooka na mathweo ma ĩtu ũmwe avw’anene na mwana wa mũndũ, o na ookĩa mũtumĩa wa matukũ, na mamũthengeesya vala ũĩ.

14Na anengwa ũsumbĩko, na ndaĩa, na ũsumbĩ, nĩ kana ngo syonthe sya andũ, na mbaĩ, na ithyomo imũthũkũmae: ũsumbĩko wake nĩ ũsumbĩko wa tene na tene, ũla ũtakavĩta, na ũsumbĩ wake ũla ũtakanangĩka.

15Ĩndĩ nyie, Ndanieli, nĩneewie woo vevanĩ wakwa katĩ wa mwĩĩ wakwa, na mawoni ma mũtwe wakwa manthĩn’ya.

16Nathengeea ũmwe wa ala maũngyĩ vakuvĩ, na namũkũlya w’o wa ũndũ ũũ w’onthe. Na ĩndĩ andavya, na amanyĩthya ũalyũlo wa maũndũ asu.

17Nyamũ isu nene, syĩ inya, nĩ asumbĩ ana, ala makokĩla kuma nthĩ.

18Ĩndĩ atheu ma Ũla Wĩ Ĩũlũ wa Onthe nĩmakosa ũsumbĩ, na nĩmakasumbĩka tene na tene, o kũvika tene na tene.

19Nĩvo ĩndĩ nendie kũmanya w’o ũndũ nyamũ ya kana yatilyĩ, ĩla ĩtailyĩ ta ila ĩngĩ syonthe, ya kũtĩsya mũno, ĩla maeo mayo maĩ ma kĩaa, na mbwaa syayo syaĩ sya ũthuku; ĩla yamelilye, na yatilanga ilungu, na yakinyanga matialyo na maũũ mayo;

20na ũndũ wa mbya ĩkũmi ila syaĩ mũtwenĩ wayo, na ũvya ũngĩ ũla wookĩlile, na ũla mbee waw’o itatũ syavalũkile, o ũla ũvya waĩ na metho na kanyw’a ũla waneenaa maũndũ manene, na ũla ũthyũ waw’o waĩ vinya kwĩ ila ingĩ waĩ nasyo.

21Naketeea, na ũvya o ũsu wokita na atheu, na wamakĩlya vinya;

22kũvika yĩla mũtumĩa wa matukũ wokie, na atheu ma Ũla Wĩ Ĩũlũ wa Onthe manengwa ũsili, na ĩvinda yeanĩa yĩla atheu meethĩiwe na ũsumbĩ.

23Ũũ nĩw’o waisye, Nyamũ ya kana nĩkethĩwa ũsumbĩ wa kana ĩũlũ wa nthĩ, ũla ũkethĩwa ũtailyĩ ta mosumbĩ onthe, na nũkamelya nthĩ yonthe, na kũmĩkinyanga, na kũmĩtilanga ilungu.

24Na ũndũ wa mbya ĩkũmi, kuma ũsumbĩ ũsu asumbĩ ĩkũmi nĩmakokĩla: na ũngĩ nũkokĩla ĩtina woo; nake nũkethĩwa atailyĩ ta ũla wa mbee, nake nũkakĩlya asumbĩ atatũ vinya.

25Na nũkamũneenea ndeto Ũla Wĩ Ĩũlũ wa Onthe, na nũkavinyĩthya atheu ma Ũla Wĩ Ĩũlũ wa Onthe; na nũkekwatya kũalyũla ĩvinda na mĩao; nao nĩmakanenganwe mokonĩ make kũvika ĩvinda na mavinda na nyunzu ya ĩvinda.

26Ĩndĩ ũsili nũkekala, nao nĩmakamũvena ũsumbĩko wake, mominũkĩlye na kwananga kũvika mũminũkĩlyo.

27Na ũsumbĩ na ũsumbĩko, na ũnene wa mosumbĩ ala me ungu wa ĩtu yonthe, nĩmakanengwa andũ ma atheu ma Ũla Wĩ Ĩũlũ wa Onthe: ũsumbĩ wake nĩ ũsumbĩ wa tene na tene, na mosumbĩko onthe nĩmakamũthũkũmaa we na kũmwĩw’aa.

28Mũminũkĩlyo wa ũla ũndũ nĩ ũsu. Nakwa, Ndanieli, malilikano makwa manthĩn’ya mũno, na ũthyũ wakwa wangalyũkĩla: ĩndĩ nekalya ũndũ ũsu ngoonĩ yakwa.

← Chapter 6 Jump to: Chapter 8 →