Daniel 9

Kamba (Mbivilia) 1956

← Chapter 8 Jump to: Chapter 10 →

1Mwaka wa mbee wa kũsumbĩka kwa Ndalio mwana wa Aasuelo, wa nzyawa sya Ametia, ũla waiiwe mũsumbĩ wa ũsumbĩko wa Akalitei,

2mwaka wa mbee wa kũsumbĩka kwake nyie, Ndanieli, nĩnamanyĩiw’e nĩ mavuku ũtalo wa myaka, ĩla kwondũ wayo ndeto ya Yeova yookĩe mwathani Yelemia, kwondũ wa kwĩanĩsya mawanangĩko ma Yelusaleme, o myaka mĩongo mũonza.

3Na nekalya ũthyũ wakwa welekele Mwĩaĩi Ngai ngĩmũmantha na mboya na mawĩsũvano, ngĩtĩĩa ũya na ngĩkĩa makunia na kwĩyũmba mũu.

4Na navoya Yeova Ngai wakwa, na naumbũla, na nasya, Ame Mwĩaĩi, Ngai mũnene na wa kũkĩwa, ũla ũlilikanaa ũtianĩo na ũseo wĩ wendo kwa ala mamwendaa na kũkwataa mĩao yake,

5nĩtuvĩtĩtye, na nĩtwĩkĩte naĩ, na nĩtwĩkĩte ũthũku, na nĩtũng’endete, o na kũvika kwathũkĩa mawĩaĩo maku na motw’ĩo maku;

6o na tũtyaaĩthukĩĩsya athũkũmi maku athani, ala maneenie syĩtwanĩ yaku na asumbĩ maitũ, na anene maitũ me mbee ũsumbĩnĩ, na aasa maitũ, na andũ onthe ma nthĩ.

7Ame Mwĩaĩi, ũlũngalu nĩ waku, ĩndĩ kwitũ nĩ kũsonoka ũthyũnĩ, o ta ũmũnthĩ; kwa andũ ma Yuta, na kwa ala matwĩe Yelusaleme, na kwa Isilaeli onthe, ala me vakuvĩ, na ala me kũasa, nthĩ syonthe ila wamalũngĩlĩĩlye, kwondũ wa ĩvĩtyo yoo yĩla makũvĩtanĩsye.

8Ame Mwĩaĩi, kwitũ nĩ kũsonoka ũthyũnĩ, kwa asumbĩ maitũ, na kwa anene maitũ me mbee ũsumbĩnĩ, na kwa aasa maitũ, nũndũ nĩtwakũvĩtanĩsye.

9Kwa Mwĩaĩi Ngai waitũ ve matei na ũekeo; nũndũ nĩtũmũng’endeete;

10o na tũineew’ĩte wasya wa Yeova Ngai waitũ, nĩ kana tũendae mĩaonĩ yake, ĩla waiie mbee waitũ na athũkũmi make athani.

11Ĩĩ, Isilaeli onthe nĩmavĩtĩtye mĩao yaku, kũvika kwathũka, matikew’e wasya waku: kwondũ wa ũu kĩumo nĩkyonoetwe ĩũlũ waitũ, na wĩvĩto ũla ũandĩkĩtw’e mĩaonĩ ya Mose mũthũkũmi wa Ngai; nũndũ nĩtũmũvĩtanĩsye.

12Na nĩweanĩsye ndeto syake, ila watũneenee ithyĩ, na asili maitũ ala matũsilĩle, nĩ kũtũetee ũthũku mũnene; nũndũ ungu wa ĩtu yonthe kũiaaĩkĩka o tondũ kweekĩkie Yelusaleme.

13O tondũ kũandĩkĩtwe mĩaonĩ ya Mose, ũthũku ũũ w’onthe ũnatũkĩe: ĩndĩ tũiaaĩsũva ĩnee ya Yeova Ngai waitũ, nĩ kana twĩthyũũe kuma mothũkunĩ maitũ. Kũmanya w’o waku.

14Kwondũ wa ũu Yeova nũsyaĩĩasya ũla ũthũku, na akĩtũetee o w’o; nũndũ Yeova Ngai waitũ nĩ mũlũngalu mawĩanĩ make onthe ala wĩkaa, naitũ tũiaaĩw’a wasya wake.

15Na yu, ame Mwĩaĩi Ngai waitũ, ũla waumisye andũ maku nthĩ ya Misili na kw’oko kwĩ vinya, na weeyosea ndaĩa, ta ũmũnthĩ; nĩtũvĩtĩtye, nĩtwĩkĩte ũthũku.

16Ame Mwĩaĩi, kwĩanana na ũlũngalu waku w’onthe, nĩngũkũvoya, ũthatu waku na ũthilĩku waku ũthyũũwe kuma ndũa yaku Yelusaleme, kĩĩma kyaku kĩtheu; nĩkwĩthĩwa Yelusaleme na andũ maku matw’ĩkĩte kĩvũthya kwa onthe ala matũthyũlũlũkĩte ngalĩ sitũ syonthe, nũndũ wa naĩ sitũ, na nũndũ wa mothũku ma aasa maitũ.

17Na yu ĩndĩ, ame Ngai waitũ, kwondũ wa Mwĩaĩi, ĩthukĩĩsye kũvoya kwa mũthũkũmi waku, na kwĩsũvana kwake, na ũitisasya ũthyũ waku ĩũlũ wa vala vandũ vatheu vaku vanangĩtwe.

18Ame Ngai wakwa, tea kũtũ kwaku, wĩw’e; salukya metho maku, wone mawanangĩko maitũ, na ndũa ĩla ĩkwĩtanĩw’a na syĩtwa yaku: nĩkwĩthĩwa tũtiũete mboya sitũ vala ũĩ nũndũ wa ũlũngalu witũ, ĩndĩ nũndũ wa matei maku manene.

19Ame Mwĩaĩi, ĩw’a; ame Mwĩaĩi, ekea; ame Mwĩaĩi, ĩthukĩĩsye, wĩke; kwondũ waku we, ndũketeele, ame Ngai wakwa, nũndũ ndũa yaku na andũ maku nĩmetanĩw’a na syĩtwa yaku.

20Nakwa, ngĩneena, na ngĩvoya, na ngyumbũla naĩ yakwa na naĩ ya andũ makwa Isilaeli, na ngĩete wĩsũvano wakwa vala ve Yeova Ngai wakwa nũndũ wa kĩĩma kĩtheu kya Ngai wakwa;

21ĩĩ, ngĩneena mboyete, mũndũ Kavilieli, ũla namwonie woninĩ wambĩlĩlyonĩ, akĩulũkĩthw’a mĩtũkĩ, angiita ta ĩvinda ya nthembo ya wĩoo.

22Nake amanyĩthya, na aneena nakwa, na ambĩa, We Ndanieli, nĩnaumĩla oyu ngũnenge ũĩ na ũmanyi.

23Wambĩlĩlyonĩ wa mawĩsũvano maku mwĩao nĩwaumiwe, nakwa nĩnooka kũkũtavya; nũndũ we nĩwendetwe mũno: kwondũ wa ũu sũanĩa ũndũ ũũ, na ũimanya woni.

24Syumwa mĩongo mũonza nitw’ĩtwe ĩũlũ wa andũ maku na ĩũlũ wa ndũa yaku ntheu, sya kũminũkĩlya yĩla ĩvĩtyo, na kũvingĩa naĩ, na kwĩw’anĩthya kwondũ wa ũthũku, na kũete ũlũngalu wa tene na tene, na kũsiĩla woni na wathani, na kwĩtĩkĩsya mauta vala vandũ vatheu mbee.

25Manya ĩndĩ ũvathũkan’ye, kana kuma mwĩao waumw’a wa kũtũngĩĩa na kwaka Yelusaleme kũvika ũla mwĩtĩkĩw’a mauta, ũla mũnene, kũkeethĩwa syumwa mũonza, na syumwa thanthatũ na ilĩ: nĩkakwa ĩngĩ, na nzĩa nene na ũvai mũlũmu, o mavindanĩ ma thĩna.

26Na ĩtina wa syumwa mĩongo thanthatũ na ilĩ ũla mwĩtĩkĩw’a mauta nũkavetwa, o na nũkethĩwa ate na kĩndũ: na andũ ma mũnene ũla ũkoka nĩmakananga ndũa na vala vandũ vatheu; na mũminũkĩlyo waw’o nũkethĩwa na kĩw’ũ kingĩ, o na kũvika mũminũkĩlyo nĩkũkethĩwa kaũ; mawanangĩko nĩmatw’ĩtwe.

27Nake nũkatianĩa ũtianĩo mũlũmu na aingĩ vandũ va kyumwa kĩmwe: na kyumwanĩ kyu katĩ nũkamina nthembo ya kũtonywa na nthembo ya mũtu; na nthwaunĩ sya mothatyo ũmwe ũla wĩkaa wanangĩko nũkoka; o na kũvika mũminũkĩlyo ki, naw’o nĩ ũla watwiwe, ũthilĩku nũkonow’a ĩũlũ wa mwene wanangĩko.

← Chapter 8 Jump to: Chapter 10 →