Ezra 1

Kamba (Mbivilia) 1956

Jump to: Chapter 2 →

1Na mwaka wa mbee wa kũsumbĩka kwa Kulusi mũsumbĩ wa Velisia, nĩ kana ndeto ya Yeova na kwanyw’a wa Yelemia yĩanĩe, Yeova aamũkya veva wa Kulusi mũsumbĩ wa Velisia, na ĩndĩ atavan’ya ũsumbĩnĩ wake w’onthe, o na aandĩka, akyasya,

2Ũũ nĩw’o Kulusi mũsumbĩ wa Velisia ũnũkwasya, Yeova, Ngai wa ĩtunĩ, nũnengete mosumbĩ onthe ma nthĩ; na nũmbĩaĩĩte nĩmwakĩe nyũmba Yelusaleme, ĩla yĩ Yuta.

3O ũla wĩ katĩ wenyu wa andũ make onthe, Ngai wake nĩethĩwe vamwe nake, nake nĩambate Yelusaleme, ĩla yĩ Yuta, akatũngĩĩe nyũmba ĩla yĩ Yelusaleme, ĩla ya Yeova, Ngai wa Isilaeli (nake nĩwe Ngai).

4Na o ũla wĩtiwa, vandũ o na va vala wĩkalĩte ũeni, andũ ma vandũ vau mamũtethye na vetha, na thaavu, na isamũ, na nyamũ, eka nthembo ya kumya na ngoo ya kwenda kwondũ wa nyũmba ya Ngai ĩla yĩ Yelusaleme.

5Nĩvo ĩndĩ atongoi ma nyũmba sya aaĩthe ma Yuta na Mbenyamini, na athembi, na Alivai, mookĩlile, o asu onthe ala Ngai waamũkisye maveva moo mambate matũngĩĩe nyũmba ya Yeova ĩla yĩ Yelusaleme.

6Na onthe ala mamathyũlũlũkĩte mamekĩa moko moo vinya nĩ kũmanenga mĩio ya vetha, na thaavu, na isamũ, na nyamũ, na syĩndũ syĩ vata mũno, vamwe na syonthe ila syathembiwe na ngoo ya kwenda.

7O na mũsumbĩ Kulusi aumaalya mĩio ya nyũmba ya Yeova, ĩla Nevukatilesa waetie kuma Yelusaleme, na nĩwamĩkĩĩte nyũmbanĩ ya ngai syake;

8o ĩsu Kulusi mũsumbĩ wa Velisia nĩwaumaalilye na kw’oko kwa Mithiletathi, mũsũvĩi wa ũthwii, na amĩtalĩla Sesivasali, mũnene wĩ mbee ũsumbĩnĩ wa Yuta.

9Na ũũ nĩw’o ũtalo wayo: masaani mĩongo ĩtatũ ma thaavu, na masaani ngili ma vetha, na tũvyũ mĩongo ĩlĩ na kenda,

10na mbakũli mĩongo ĩtatũ sya thaavu, na mbakũli maana ana na ĩkũmi sya vetha sya mũthemba ũngĩ, na mĩio ĩngĩ ngili.

11Mĩio yonthe ya thaavu na vetha yaĩ ngili itano na maana ana. Ĩsu yonthe Sesivasali ambata nayo, yĩla asu mataviwe mambatiw’e Yelusaleme kuma Mbaviloni.

Jump to: Chapter 2 →