Ezra 5

Kamba (Mbivilia) 1956

← Chapter 4 Jump to: Chapter 6 →

1Na ĩndĩ athani, mwathani Akai, na Nzekalia mwana wa Ito, mamathanĩa Ayuti ala maĩ Yuta na Yelusaleme; syĩtwanĩ ya Ngai wa Isilaeli mamathanĩa.

2Nĩvo ĩndĩ Nzeluvaveli mwana wa Sealitieli, na Yesua mwana wa Yosataki, mookĩlile na mambĩlĩlya kũtũngĩĩa nyũmba ya Ngai ĩla yĩ Yelusaleme; na vamwe nao kwaĩ athani ma Ngai, makĩmatethya.

3Ĩvinda o yĩu Tatenai, ngavana wa mũingo wa ũla Ũsĩ, na Sethali‐mbosenai, na atindan’ya moo, mooka vala maĩ, na mamakũlya, Nũũ wamũnengie ũtw’ĩo wa kũtũngĩĩa nyũmba ĩno, na kũminũkĩlya wako ũũ?

4Nĩvo ĩndĩ twamatavisye atĩĩ, ũndũ masyĩtwa ma andũ ala mekwaka wako ũũ metawa.

5Ĩndĩ itho ya Ngai woo yaĩ ĩũlũ wa atumĩa ma Ayuti, na matyaamaekethya, kũvika ũvoo ũmũvikĩe ndalio, na aimatũngĩa ũsũngĩo na valũa ũndũ wa ũndũ ũsu.

6Wumĩĩsyo wa valũa ũla Tatenai, ngavana wa mũingo wa ũla Ũsĩ, na Sethali‐mbosenai, na atindan’ya make Aavalisaki, ala maĩ mũingo wa ũla Ũsĩ, matwaĩe mũsumbĩ Ndalio;

7nĩmamũtwaĩe valũa ũla waandĩkiwe nthĩnĩ waw’o atĩĩ: Kwa mũsumbĩ Ndalio, mũuo w’onthe.

8Ũmanyĩke kwa mũsumbĩ, atĩ nĩtwaendie Yuta kĩlungu kĩnene kya nthĩ, nyũmbanĩ ya Ngai mũnene, ĩla ĩnĩũtũngĩĩwa na mavia manene, na mĩtĩ yĩkĩtwe mawakonĩ; na wĩa ũsu nũendeee na kĩthing’ĩĩsyo na nũkwaĩla mokonĩ moo.

9Nĩvo ĩndĩ twakũlilye atumĩa asu, na twamea atĩĩ, Nũũ ũla wamũnengie ũtw’ĩo wa kũtũngĩĩa nyũmba ĩno, na kũminũkĩlya wako ũũ?

10O na twamakũlya masyĩtwa moo, tũkũmanyĩthye, nĩ kana tũandĩke masyĩtwa ma andũ ala maĩ atongoi moo.

11Na ũũ nĩw’o ũsũngĩo matũsũngĩie, makyasya, Ithyĩ twĩ athũkũmi ma Ngai wa ĩtunĩ na nthĩ, na nĩtũũtũngĩĩa nyũmba ĩla yaakiwe myaka ĩno mingĩ mĩvĩtu, ĩla mũsumbĩ mũnene wa Isilaeli wakie yathela.

12Ĩndĩ ĩtina wa aaĩthe maitũ mamũthatya Ngai wa ĩtunĩ, nĩwamanenganie kw’okonĩ kwa Nevukatilesa mũsumbĩ wa Mbaviloni, Mũkalitei, ũla wanangie nyũmba ĩno, na amatwaa andũ Mbaviloni.

13Ĩndĩ mwaka wa mbee wa kũsumbĩka kwa Kulusi mũsumbĩ wa Mbaviloni, mũsumbĩ Kulusi nĩwatwie ũtw’ĩo kana nyũmba ĩno ya Ngai ĩtũngĩĩwe.

14O na mĩio ya thaavu na vetha ya nyũmba ya Ngai, ĩla Nevukatilesa waumisye ĩkalũnĩ yĩla yaĩ Yelusaleme, na amĩete ĩkalũni ya Mbaviloni, ĩsu mũsumbĩ Kulusi aumya ĩkalũnĩ ya Mbaviloni, na yanengwa mũndũ ũmwe ũla wetawa syĩtwa yake Sesivasali, ũla wamũtw’ĩkĩthisye ngavana;

15na amwĩa, Osa mĩio ĩno, ũende, ũmĩkĩe ĩkalũnĩ yĩla yĩ Yelusaleme, na nyũmba ya Ngai ĩtũngĩĩwe vandũ vayo.

16Nĩvo ĩndĩ Sesivasali ũsu wokie, na akwatya myambĩlĩlyo ya nyũmba ya Ngai ĩla yĩ Yelusaleme: na kuma ĩvinda yĩu kũvika o na yu no yakawa, ĩndĩ o na yu ndĩnathela.

17Yu kwondũ wa ũu, ethĩwa mũsumbĩ nũkwona nĩ ũseo, nĩkũmanthwe nyũmbanĩ ya kwia mothwii ya mũsumbĩ, ĩla yĩ Mbaviloni, ethĩwa ũũ nĩw’o, atĩ ũtw’ĩo nĩwatwiwe nĩ mũsumbĩ Kulusi kana nyũmba ĩno ya Ngai ĩtũngĩĩwe kũũ Yelusaleme: na mũsumbĩ natũmanyĩthye kwenda kwake ũndũnĩ ũsu.

← Chapter 4 Jump to: Chapter 6 →