Ezra 6

Kamba (Mbivilia) 1956

← Chapter 5 Jump to: Chapter 7 →

1Nĩvo ĩndĩ mũsumbĩ Ndalio watie ũtw’ĩo, na kwamanthwa nyũmbanĩ ya mavuku, vala syĩndũ syĩ vata siĩtwe Mbaviloni.

2Na kwooneka ku Akimetha, nyũmbanĩ nene ya ũsumbĩ ĩla yĩ kĩlungunĩ kĩnene kya nthĩ kĩtawa Metia, ĩvuku ĩkũnze, na nthĩnĩ wayo kwaĩ kũandĩke ũndũ wa ũlilikan’yo atĩĩ:

3Mwaka wa mbee wa kũsumbĩka kwa mũsumbĩ Kulusi, mũsumbĩ Kulusi nĩwatwie ũtw’ĩo wa atĩĩ: Ũndũ wa nyũmba ya Ngai Yelusaleme, nyũmba nĩkatũngĩĩwe, vandũ va kũthembeaa nthembo, na myambĩlĩlyo yayo ĩkwatwe yĩ vinya; ũtũlu wayo mĩkono mĩongo thanthatũ, na ũthanthau wayo mĩkono mĩongo thanthatũ;

4yĩ na mĩsoa ĩtatũ ya mavia manene, na mũsoa wa mbwaũ nzaũ: na mbesa sya kũĩvĩa nĩsyumw’e nyũmbanĩ ya mũsumbĩ.

5O na mĩio ya thaavu na vetha ya nyũmba ya Ngai, ĩla Nevukatilesa waumisye ĩkalũnĩ yĩla yĩ Yelusaleme, na amĩete Mbaviloni, ĩtũngwe, ĩtwawe ĩngĩ ĩkalũnĩ yĩla yĩ Yelusaleme, kĩla ũmwe vandũ vaw’o; naku ũkamĩkĩe nyũmbanĩ ya Ngai.

6Kwondũ wa ũu yu, Tatenai, ngavana mũingo wa ũla Ũsĩ, na Sethali‐mbosenai, na atindan’ya menyu Aavalisaki, ala me mũingo wa ũla Ũsĩ, ĩvathanei na kw’o:

7ekanai na wĩa wa nyũmba ĩsu ya Ngai; ngavana wa Ayuti na atumĩa ma Ayuti matũngĩĩe nyũmba ĩsu ya Ngai vandũ vayo.

8Na ũndũ ũngĩ nĩngũtw’a ũndũ mwĩĩka atumĩa asu ma Ayuti ũndũ wa kũtũngĩĩa nyũmba ĩsu ya Ngai: mbesa sya kũĩvĩa ninengwe andũ asu na kĩthing’ĩĩsyo kuma syĩndũnĩ sya mũsumbĩ, o sya koti wa mũingo wa ũla Ũsĩ, matikasiĩĩwe.

9Na kĩla me vata nakyo, tũsalũ, o na ndũũme, na tũtena twa malondu, syĩthĩwe nthembo sya kũvĩvĩw’a Ngai wa ĩtunĩ: o na nganũ, na mũnyũ, na mbinyu, na mauta, kwĩanana na ndeto ya athembi ala me Yelusaleme, manengwe syo mũthenya na mũthenya vate kũeka;

10nĩ kana mamũthembee Ngai wa ĩtunĩ nthembo syĩ mũuke mũseo, na maivoyea thayũ wa mũsumbĩ na wa ana make.

11O na nĩnĩtw’ĩte ũtw’ĩo, o ũla ũkaalyũla ndeto ĩno, mũamba wĩumw’a nyũmbanĩ yake, nake nĩeũkĩlw’a na kwambwa ĩũlũ waw’o; na nyũmba yake nĩtw’ĩke ũtũnda wa syaa nũndũ wa ũu:

12na Ngai ũla watumie syĩtwa yake yĩkala vo nang’uthũle asumbĩ onthe na ngo sya andũ ila ikatambũũkya kw’oko kwasyo kũalyũla ndeto isu, syanange nyũmba ĩsu ya Ngai ĩla yĩ Yelusaleme. Nyie Ndalio nĩnĩtw’ĩte ũtw’ĩo, nĩwĩkwe na kĩthing’ĩĩsyo kyonthe.

13Nĩvo ĩndĩ Tatenai, ngavana wa mũingo wa ũla Ũsĩ, na Sethali‐mbosenai na atindan’ya moo, nĩkwĩthĩwa mũsumbĩ Ndalio nũtũmanĩte, meekie ũu na kĩthing’ĩĩsyo kyonthe.

14Na atumĩa ma Ayuti nĩmaakie na maathimĩka, kwondũ wa kwathana kwa mwathani Akai na Nzekalia mwana wa Ito. Na nĩmaakie na yathela, kwĩanana na mwĩao wa Ngai wa Isilaeli, na kwĩanana na ũtw’io wa Kulusi, na Ndalio, na Alitasasita mũsumbĩ wa Velisia.

15Na nyũmba ĩsu yathela mũthenya wa katatũ wa mwei wa Atali ũla waĩ mwakanĩ wa thanthatũ wa kũsumbĩka kwa mũsumbĩ Ndalio.

16Na ana ma Isilaeli, na athembi na Alivai, na ana ala angĩ ma ala matavĩtwe, malilikana na ũtanu kũvathwa kwa nyũmba ĩsu yĩthĩwe ntheu.

17Na makĩvatha nyũmba ĩsu ya Ngai yĩthĩwe ntheu nĩmathembie tũsalũ iana, na ndũũme maana elĩ, na tũtena twa malondu maana ana; na nthenge ĩkũmi na ilĩ syĩthĩwe nthembo kwondũ wa naĩ kwondũ wa Isilaeli onthe, kwĩanana na ũtalo wa mbaĩ sya Isilaeli.

18Na maia athembi nguthunĩ syoo, na Alivai nguthunĩ syoo, kwondũ wa ũthũkũmi wa Ngai, ũla wĩ Yelusaleme; o tondũ kũandĩkĩtwe ĩvukunĩ ya Mose.

19Na ana ma ala matavĩtwe malilikana vasaka mũthenya wa ĩkũmi na ĩna wa mwei wa mbee.

20Nũndũ athembi na Alivai nĩmetheetye vamwe; onthe maĩ atheu; na moaa vasaka kwondũ wa ana onthe ma ala matavĩtwe, na kwondũ wa athembi ana‐a‐ĩthe moo, na kwondũ woo ene.

21Na ana ma Isilaeli ala maumĩte kũtavwanĩ, na onthe ala meevathĩĩe kwoo kuma ũvukunĩ wa mbaĩ sya nthĩ ĩsu, mamanthe Yeova, Ngai wa Isilaeli, asu maya,

22na malilikana na ũtanu mboka ya kĩmũtũ kĩte ĩlawa mĩthenya mũonza; nũndũ Yeova nũmatanĩthĩtye, na nĩwalyũlĩte ngoo ya mũsumbĩ wa Asuli ĩmelekele, ekĩe moko moo vinya wĩanĩ wa nyũmba ya Ngai, Ngai wa Isilaeli.

← Chapter 5 Jump to: Chapter 7 →