Ezra 4

Kamba (Mbivilia) 1956

← Chapter 3 Jump to: Chapter 5 →

1Na ĩndĩ yĩla nthũ sya Yuta na Mbenyamini syeewie ana ma ala matavĩtwe nĩmeũmwakĩa Yeova, Ngai wa Isilaeli, ĩkalũ;

2nĩvo ĩndĩ syamũthengeeie Nzeluvaveli, na atongoi ma nyũmba sya aaĩthe, na syamea, Twake vamwe nenyu; nũndũ nĩtũmanthaa Ngai wenyu, o tondũ mwĩkaa; na nĩtũmũthembeaa kuma mĩthenya ya Esali‐atoni mũsumbĩ wa Asuli, ũla watũetie vaa.

3Ĩndĩ Nzeluvaveli, na Yesua, na ala angĩ ma atongoi ma nyũmba sya aaĩthe ma Isilaeli, masyĩa, Mũti ũndũ naitũ tũkĩmwakĩa Ngai waitũ nyũmba; ĩndĩ ithyĩ ene vamwe tũkamwakĩa Yeova, Ngai wa Isilaeli, o tondũ Kulusi mũsumbĩ wa Velisia watwĩaĩe.

4Nĩvo ĩndĩ andũ ma ĩ nthĩ monzethisye moko ma andũ ma Yuta, na mamathĩn’ya makyaka,

5na maandĩka atai, masiĩĩe ũndũ mendaa kwĩka, mĩthenya yonthe ya Kulusi mũsumbĩ wa Velisia, o na kũvika kũsumbĩka kwa Ndalio mũsumbĩ wa Velisia.

6Na kũsumbĩkanĩ kwa Aasuelo, wambĩlĩlyonĩ wa kũsumbĩka kwake, nĩmaandĩkie ndeto sya kũmavinganĩsya ala matwĩe Yuta na Yelusaleme.

7Na mĩthenya ya Alitasasita, Mbisilamu na Mithiletathi na Taveeli, na atindan’ya make ala angĩ mamũandĩkĩa Alitasasita mũsumbĩ wa Velisia; na maandĩko ma valũa maandĩkĩtwe na ndeto sya Kĩsilia, na maalyũlwa kĩthyomonĩ kya Kĩsilia.

8Leumu mũtwi na Simisai mũandĩki mamũandĩkĩa mũsumbĩ Alitasasita valũa ũndũ wa Yelusaleme ũilyĩ ũũ:

9nĩvo ĩndĩ mũtwi Leumu na mũandĩki Simisai maandĩkie, o na atindan’ya moo ala angĩ, Andina, na Aavalisathiki, na Ataliveli, na Aavalisi, na Aalikevi, na Ambaviloni, na Asusaniki, na Andea, na Aelamu,

10na mbaĩ ila ingĩ ila Osinavali mũnene na wa nguma waietie, na asia ndũanĩ ya Samalia, na nthĩ ĩngĩ ĩla yatialile mũingo wa ũla Ũsĩ, o ta ũu.

11Ũũ nĩw’o wumĩĩsyo wa valũa ũla mamũtwaĩe mũsumbĩ Alitasasita: Athũkũmi maku, ithyĩ andũ ala twĩ mũingo wa ũla Ũsĩ, nũvoo.

12Ũmanyĩke kwa mũsumbĩ, kana Ayuti ala mambatie kuma kwaku nĩmookie kwitũ Yelusaleme; nĩmeũtũngĩĩa ĩla ndũa ng’endu na nthũku, na nĩmaminĩte maũvai, na nĩmaseũvĩtye myambĩlĩlyo.

13Na yu ũmanyĩke kwa mũsumbĩ, ethĩwa ndũa ĩsu ĩkatũngĩĩwa, na maũvai makathela, matikaumya koti, kana mũvothi, kana ũelo, na mũminũkĩlyo kũkeethĩwa wasyo kwa asumbĩ.

14Yu ĩndĩ nĩkwĩthĩwa nĩtũĩsaa mũnyũ wumaa nyũmbanĩ nene ya mũsumbĩ, na kũtiaĩle kwitũ kwona mũsumbĩ aianangĩwa ndaĩa, kwondũ wa ũu nĩtũtũmanĩte na kũmanyĩthya mũsumbĩ;

15nĩ kana kũmanthwe ĩvukunĩ ya molilikan’yo ma aaĩthe maku: now’o wĩona ĩvukunĩ ya molilikan’yo na ũkamanya ndũa ĩsu nĩ ndũa ng’endu, na yĩ wasyo kwa asumbĩ o na ilungunĩ nene sya nthĩ, na nĩmambĩlĩĩlye ũng’endu nthĩnĩ wayo kuma tene; na kwondũ wa ũndũ ũsu ndũa ĩno nĩyatw’ĩkĩthiwe ĩanzo.

16Twĩmanyĩthya mũsumbĩ atĩĩ, ethĩwa ndũa ĩno ĩkatũngĩĩwa, na maũvai makathela, kwondũ wa ũndũ ũsu ndũkethĩwa na kĩanda mũingo wa ũla Ũsĩ.

17Nĩvo ĩndĩ mũsumbĩ waetie ũsũngĩo kwa mũtwi Leumu, na kwa mũandĩki Simisai, na atindan’ya moo angĩ ala matwĩe Samalia, na ala angĩ mũingo wa ũla Ũsĩ: Mũuo, nũvoo.

18Valũa ũla mwatũeteie nũsometwe nesa vala nĩĩ.

19Nakwa natw’a, na kwamanthwa, na kwamanyĩka kana ndũa ĩsu tene nĩyamang’endeie asumbĩ, na ũlei na ũng’endu nĩsyeekiwe nthĩnĩ wayo.

20O na kwaĩ asumbĩ maĩ vinya ala masumbĩkie Yelusaleme, ala masumbĩkie nthĩ yonthe mũingo wa ũla Ũsĩ; na maumĩw’a koti, na mũvothi, na ũelo.

21Yu umyai ũtw’ĩo wa kũmaekethya andũ asu, o na ndũa ĩsu ndĩkatũngĩĩwe, kũvika yĩla ngaumya ũtw’ĩo.

22Na sisyai mũtikaleele ũndũnĩ ũsu: wanangĩko wingĩvĩĩa kĩ asumbĩ mone wasyo?

23Na ĩndĩ yĩla wumĩĩsyo wa valũa wa mũsumbĩ Alitasasita wasomewe vala ve Leumu na mũandĩki Simisai, na atindan’ya moo, nĩmamaendee Ayuti ku Yelusaleme mĩtũkĩ, na mamaekethya kwa ũng’endu na vinya.

24Nĩvo ĩndĩ wĩa wa nyũmba ya Ngai ĩla yĩ Yelusaleme waekiwe; na waekiwe kũvika mwaka wa kelĩ wa kũsumbĩka kwa Ndalio mũsumbĩ wa Velisia.

← Chapter 3 Jump to: Chapter 5 →