Ezra 3

Kamba (Mbivilia) 1956

← Chapter 2 Jump to: Chapter 4 →

1Na yĩla mwei wa mũonza wavikie na ana ma Isilaeli me ndũanĩ, andũ moombana vamwe Yelusaleme o ta mũndũ ũmwe.

2Nĩvo ĩndĩ Yesua mwana wa Yosataki waũngamie, vamwe na athembi ana‐a‐ĩthe make, na Nzeluvaveli mwana wa Sealitieli, na ana‐a‐ĩthe make, na maaka kĩthembeo kya Ngai wa Isilaeli, mathembe nthembo sya kũvĩvw’a ĩũlũ wakyo, o tondũ kũandĩkĩtwe mĩaonĩ ya Mose mũndũ wa Ngai.

3Na mailĩĩla kĩthembeo ĩtinanĩ yakyo; nũndũ maĩ na w’ĩa nũndũ wa andũ ma nthĩ isu: na mamũthembea Yeova nthembo sya kũvĩvw’a ĩũlũ wakyo, o nthembo sya kũvĩvw’a kĩoko na wĩoo.

4Na malilikana mboka ya malwanda, o tondũ kũandĩkĩtwe, na mathemba nthembo sya kũvĩvw’a sya kĩla mũthenya kwa ũtalo wasyo, kwĩanana na ũtw’ĩo, o tondũ kwaaĩlĩte kwĩkawa kĩla mũthenya;

5na ĩtina wa ũu nthembo ya kũvĩvw’a ĩtatw’ĩkanaa, na nthembo sya mĩtiso ya myei, na sya mboka syonthe itw’ĩtwe sya Yeova ila syavathĩtwe syĩthĩwe ntheu, na sya kĩla mũndũ ũla wamũthembee Yeova nthembo na ngoo ya kwenda.

6Kuma mũthenya wa mbee wa mwei wa mũonza mambĩlĩlya kũmũthembea Yeova nthembo sya kũvĩvw’a: ĩndĩ wambĩlĩlyo wa ĩkalũ ya Yeova ndwaĩ ũnamba kwambĩlĩlw’a.

7O na nĩmamanengie aki ma mavia, na aseũvya ma mbwaũ, mbesa; na ala ma Sitoni, na ala ma Tile, mamanenga kya ũya, na kya ũnyw’a, na mauta, makaete mĩtĩ ya mĩkũũ kuma Levanoni kũvika ũkanganĩ, ku Yova, kwĩanana na ũthei ũla manengiwe nĩ Kulusi mũsumbĩ wa Velisia.

8Na ĩndĩ mwaka wa kelĩ wa kũka kwoo nyũmbanĩ ya Ngai Yelusaleme, mwei wa kelĩ, Nzeluvaveli mwana wa Sealitieli, na Yesua mwana wa Yosataki, na ala angĩ ma ana‐a‐ĩthe moo athembi na Alivai, na onthe ala maumĩte kũtavwanĩ makavika Yelusaleme nĩmambĩlĩlye, na maia Alivai, ala mavikĩtye myaka mĩongo ĩlĩ na mbee, methĩwe asyaĩĩsya ma wĩa wa nyũmba ya Yeova.

9Nĩvo ĩndĩ Yesua vamwe na ana make na ana‐a‐ĩthe make, Katimieli na ana make, ana ma Yuta, maũngamie ta mũndũ ũmwe, methĩwe asyaĩĩsya ma athũkũmi nyũmbanĩ ya Ngai: ana ma Enatati, vamwe na ana moo na ana‐a‐ĩthe moo Alivai.

10Na yĩla aki makwatisye wambĩlĩlyo wa ĩkalũ ya Yeova, nĩmaiie athembi mekĩĩte ngũa syoo me na masoo, na Alivai ana ma Asavu me na tũmasaya, mataĩe Yeova, kwĩanana na ũtw’ĩo wa Ndaviti mũsumbĩ wa Isilaeli.

11Na maina makĩtĩkĩanĩsya makĩtaĩa na kũmũtũngĩa Yeova mũvea, makyasya, Nũndũ nĩ mũseo, nũndũ ũseo wake wĩ wendo kwa Isilaeli nĩwĩkalaa tene na tene. Na andũ onthe mookĩlya wasya mũnene, yĩla mamũtaĩe Yeova, nĩkwĩthĩwa mwambĩlĩlyo wa nyũmba ya Yeova waĩ mũkwatye.

12Ĩndĩ aingĩ ma athembi na Alivai na atongoi ma nyũmba sya aaĩthe, atumĩa ala moonie nyũmba ya mbee, yĩla mwambĩlĩlyo wa nyũmba ĩno wakwatiw’e mene, maĩa na wasya mũtũlu; na aingĩ mookĩlya wasya mũnene nũndũ wa ũtanu:

13ũndũ andũ mataĩ matonya kũvathũkan’ya kĩlonzo kya wasya wa ũtanu na kĩlonzo kya kũĩa kwa andũ; nũndũ andũ mookĩlilye wasya mũnene, na kĩlonzo nĩkyeew’ĩkie kũasa.

← Chapter 2 Jump to: Chapter 4 →