Ezra 2

Kamba (Mbivilia) 1956

← Chapter 1 Jump to: Chapter 3 →

1Na ĩndĩ aa nĩo ana ma kĩlungu kĩnene kya nthĩ, ala mambatie kuma kũla kũtavwanĩ kwa ala matavĩtwe, ala Nevukatilesa mũsumbĩ wa Mbaviloni wamatwaie Mbaviloni, ala masyokie Yelusaleme na Yuta, kĩla ũmwe ndũanĩ yoo;

2ala mookie na Nzeluvaveli, nĩ Yesua, na Neemia, na Selaia, na Leelaia, na Molitekai, na Mbilisani, na Misivali, na Mbikivai, na Leumu, na Mbaana. Ũtalo wa aũme ma andũ ma Isilaeli:

3Ana ma Valosi, ngili ilĩ na ĩana na mĩongo mũonza na elĩ.

4Ana ma Sevatia maana atatũ na mĩongo mũonza na elĩ.

5Ana ma Alaa, maana mũonza na mĩongo mũonza na atano.

6Ana ma Vaathi‐moavi, o ma ana ma Yesua na Yoavu, ngili ilĩ na maana nyanya na ĩkũmi na elĩ.

7Ana ma Elamu, ngili na maana elĩ na mĩongo ĩtano na ana.

8Ana ma Nzatu, maana kenda na mĩongo ĩna na atano.

9Ana ma Nzakai, maana mũonza na mĩongo thanthatũ.

10Ana ma Mbani, maana thanthatũ na mĩongo ĩna na elĩ.

11Ana ma Mbevai, maana thanthatũ na mĩongo ĩlĩ na atatũ.

12Ana ma Asikati, ngili na maana elĩ na mĩongo ĩlĩ na elĩ.

13Ana ma Atonikamu, maana thanthatũ na mĩongo thanthatũ na thanthatũ.

14Ana ma Mbikivai, ngili ilĩ na mĩongo ĩtano na thanthatũ.

15Ana ma Atini, maana ana na mĩongo ĩtano na ana.

16Ana ma Ateli, wa Esekia, mĩongo kenda na nyanya.

17Ana ma Mbenzai, maana atatũ na mĩongo ĩlĩ na atatũ.

18Ana ma Yola, ĩana na ĩkũmi na elĩ.

19Ana ma Asumu, maana elĩ na mĩongo ĩlĩ na atatũ.

20Ana ma Ngivali, mĩongo kenda na atano.

21Ana ma Mbethileemu, ĩana na mĩongo ĩlĩ na atatũ.

22Andũ ma Netova, mĩongo ĩtano na thanthatũ.

23Andũ ma Anathothi, ĩana na mĩongo ĩlĩ na nyanya.

24Ana ma Asimavethi, mĩongo ĩna na elĩ.

25Ana ma Kiliathi‐alimu, na Kevila, na Mbeelothi, maana mũonza na mĩongo ĩna na atatũ.

26Ana ma Lama na Ngeva, maana thanthatũ na mĩongo ĩlĩ na ũmwe.

27Andũ ma Mikimasi, ĩana na mĩongo ĩlĩ na elĩ.

28Andũ ma Mbethi‐eli na Ai, maana elĩ na mĩongo ĩlĩ na atatũ.

29Ana ma Nevo, mĩongo ĩtano na elĩ.

30Ana ma Makivisi, ĩana na mĩongo ĩtano na thanthatũ.

31Ana ma Elamu ũla ũngĩ, ngili na maana elĩ na mĩongo ĩtano na ana.

32Ana ma Alimu, maana atatũ na mĩongo ĩlĩ.

33Ana ma Loti, na Atiti, na Ono, maana mũonza na mĩongo ĩlĩ na atano.

34Ana ma Yeliko, maana atatũ na mĩongo ĩna na atano.

35Ana ma Senaa, ngili itatũ na maana thanthatũ na mĩongo ĩtatũ.

36Athembi: ana ma Yetaia, wa nyũmba ya Yesua, maana kenda na mĩongo mũonza na atatũ.

37Ana ma Imeli, ngili na mĩongo ĩtano na elĩ.

38Ana ma Vasuli, ngili na maana elĩ na mĩongo ĩna na mũonza.

39Ana ma Alimu, ngili na ĩkũmi na mũonza.

40Alivai: ana ma Yesua na Katimieli, o ma ana ma Otavia, mĩongo mũonza na ana.

41Aini: ana ma Asavu, ĩana na mĩongo ĩlĩ na nyanya.

42Ana ma asũvĩi ma mĩomonĩ: ana ma Salumu, na ana ma Ateli, na ana ma Talimoni, na ana ma Akuvu, na ana ma Atita, na ana ma Sovai, onthe nĩ ĩana na mĩongo ĩtatũ na kenda.

43Anethini: ana ma Nziia, na ana ma Aasuva, na ana ma Tavaothi,

44na ana ma Kelosi, na ana ma Siaa, na ana ma Vatoni,

45na ana ma Levana, na ana ma Akava, na ana ma Akuvu,

46na ana ma Akavu, na ana ma Samulai, na ana ma Aananu,

47na ana ma Ngiteli, na ana ma Kaali, na ana ma Leaia,

48na ana ma Lesini, na ana ma Nekota, na ana ma Ngasamu,

49na ana ma Usa, na ana ma Vasea, na ana ma Mbesai,

50na ana ma Asana, na ana ma Ameuni, na ana ma Nevisimu,

51na ana ma Mbakivuki, na ana ma Akuva, na ana ma Aliuli,

52na ana ma Mbasiluthi, na ana ma Meita, na ana ma Alasa,

53na ana ma Mbalikosi, na ana ma Sisela, na ana ma Teema,

54na ana ma Nesia, na ana ma Ativa.

55Ana ma athũkũmi ma Solomoni: ana ma Sotai, na ana ma Sovelethi, na ana ma Veluta,

56na ana ma Yaala, na ana ma Ndalikoni, na ana ma Ngiteli,

57na ana ma Sevatia, na ana ma Atili, na ana ma Vokelethi‐nzevaimu, na ana ma Ami.

58Anethini onthe, na ana ma athũkũmi ma Solomoni, maĩ maana atatũ na mĩongo kenda na elĩ.

59Na aa nĩo ala mambatie kuma Teli‐mela, na Teli‐alasa, na Keluvi, na Atani, na Imeli; ĩndĩ matyaatonya kwĩmanyĩthan’ya nyũmba sya aaĩthe moo, o na mbaĩ yoo, kana nĩ ma Isilaeli:

60ana ma Ndelaia, na ana ma Tovia, na ana ma Nekota, maana thanthatũ na mĩongo ĩtano na elĩ.

61Na ma ana ma athembi: ana ma Avaia, na ana ma Mbalisilai, nomo ana ma Akosi, ũla watwaie mwĩĩtu wa Mbalisilai Mũngileati, na eetanĩw’a na syĩtwa yoo.

62Asu nĩmamanthie ĩvuku yoo yĩla matalĩtwe mosyaanĩo, ĩndĩ yĩtyaaoneka: kwondũ wa ũu nĩmatalilwe kwĩthĩwa nĩ avuku na maumw’a ũthembinĩ.

63Na ngavana amea, matikaye syĩndũ ntheu mũno, kũvika kwaũngama mũthembi wĩ na Ulimu na Thumimu.

64Ũmbano w’onthe vamwe waĩ ngili mĩongo ĩna na ilĩ na maana atatũ na mĩongo thanthatũ,

65eka athũkũmi moo aũme na athũkũmi moo eĩtu, namo maĩ ngili mũonza na maana atatũ na mĩongo ĩtatũ na mũonza: na maĩ na aũme ma kwina na aka ma kwina maana elĩ.

66Mbalasi syoo syaĩ maana mũonza na mĩongo ĩtatũ na thanthatũ; na nyũmbũ syoo, maana elĩ na mĩongo ĩna na itano;

67na ngamĩle syoo, maana ana na mĩongo ĩtatũ na itano; na mang’oi moo, ngili thanthatũ na maana mũonza na mĩongo ĩlĩ.

68Na atongoi amwe ma nyũmba sya aaĩthe, yĩla mavikie nyũmbanĩ ya Yeova yĩ Yelusaleme, nĩmaumisye na ngoo ya kwenda kwondũ wa nyũmba ya Ngai mamĩtũngĩe vandũ vayo:

69manenganie kwĩanana na ũtonyi woo na maia vala vaiawa mbesa sya wĩa ilungu ngili mĩongo thanthatũ na ĩmwe sya thaavu, na latili ngili itano sya vetha, na ngũa ĩana yĩmwe sya athembi.

70Na ĩndĩ athembi, na Alivai, na andũ amwe, na aini, na asũvĩi ma mĩomonĩ, na Anethini, matũaa ndũanĩ syoo, na Isilaeli onthe ndũanĩ syoo.

← Chapter 1 Jump to: Chapter 3 →