Ezra 7

Kamba (Mbivilia) 1956

← Chapter 6 Jump to: Chapter 8 →

1Na ĩndĩ ĩtina wa maũndũ asu, kũsumbĩkanĩ kwa Alitasasita mũsumbĩ wa Velisia, Esala mwana wa Selaia, mwana wa Asalia, mwana wa Ilikia,

2mwana wa Salumu, mwana wa Nzatoki, mwana wa Aituvu,

3mwana wa Amalia, mwana wa Asalia, mwana wa Melaiothi,

4mwana wa Nzelaia, mwana wa Usisi, mwana wa Mbuki,

5mwana wa Avisua, mwana wa Vineasi, mwana wa Eleasali, mwana wa Aluni, mũthembi mũnene—

6Esala o ũsu nĩwambatie kuma Mbaviloni. Na aĩ maũndĩki mũmanyi mĩaonĩ ya Mose, ĩla Yeova, Ngai wa Isilaeli, wanenganĩte; na mũsumbĩ amũnenga ũndũ w’onthe ũla wamwĩtĩtye, kwĩanana na kw’oko kwa Yeova Ngai wake ĩũlũ wake.

7Na kwambata Yelusaleme amwe ma ana ma Isilaeli, na ma athembi, na Alivai, na aini, na asũvĩi ma mĩomonĩ, na Anethini, mwaka wa mũonza wa kũsumbĩka kwa mũsumbĩ Alitasasita.

8Nake avika Yelusaleme mwei wa katano, mwaka wa mũonza wa kũsumbĩka kwa ũ mũsumbĩ.

9Nũndũ mũthenya wa mbee wa mwei wa mbee nĩw’o wambĩlĩlye kwambata kuma Mbaviloni; na mũthenya wa mbee wa mwei wa katano nĩw’o wavikie Yelusaleme, kwĩanana na kw’oko kũseo kwa Ngai wake ĩũlũ wake.

10Nũndũ Esala eelekeletye ngoo yake amanthe mĩao ya Yeova, na kũmĩka, na kũmanyĩsya Isilaeli myamũlo na motw’ĩo.

11Na ĩndĩ ũũ nĩw’o wumĩĩsyo wa valũa ũla mũsumbĩ Alitasasita wanengie mũthembi Esala, mũandĩki, o mũandĩki wa ndeto sya mĩao ya Yeova, na wa motw’ĩo make kwa Isilaeli:

12Alitasasita, mũsumbĩ wa asumbĩ, valũa ũũ wakwa ũmũvikĩe mũthembi Esala, mũandĩki wa mĩao ya Ngai wa ĩtunĩ, mwĩanĩu, nũvoo.

13Nĩngũtw’a ũtw’ĩo, kana onthe ma andũ ma Isilaeli, na athembi moo, na Alivai, ũsumbĩnĩ wakwa, ala mekwenda na ngoo yoo ene kũthi Yelusaleme, maende naku.

14Nũndũ nũtũmĩtwe nĩ mũsumbĩ na atai make mũonza, ũkũlye ũndũ wa Yuta na Yelusaleme, kwĩanana na mwĩao wa Ngai waku ũla wĩ kw’okonĩ kwaku,

15na ũikua vetha na thaavu, ũla mũsumbĩ na atai make mamumĩsye na ngoo ya kwenda Ngai wa Isilaeli ũla ũtũo wake wĩ Yelusaleme,

16na vetha na thaavu w’onthe ũla wĩona kĩlungunĩ kĩnene kyonthe kya nthĩ kĩtawa Mbaviloni, vamwe na nthembo ya andũ ĩla yaumiw’e na ngoo ya kwenda, na ya athembi, makĩthemba na ngoo ya kwenda kwondũ wa nyũmba ya Ngai woo ĩla yĩ Yelusaleme;

17kwondũ wa ũu ũkathooe mĩtũkĩ na mbesa isu, tũsalũ twa mũew’a, na ndũũme, na tũtena twa malondu, na nthembo sya mũtu na nthembo sya kũnyuwa sya kũthembanĩsya nasyo, na ũkaithembe kĩthembeonĩ kya nyũmba ya Ngai wenyu, ĩla yĩ Yelusaleme.

18Na ũndũ o na wĩva wĩona wĩ ũseo, we na ana‐a‐ĩthe maku, mwĩke na vetha na thaavu ũla ũkatiala, ĩkai ũu kwĩanana na kwenda kwa Ngai wenyu.

19Na mĩio ĩla ũnengetwe ũndũ wa ũthũkũmi wa nyũmba ya Ngai waku, mĩnengane vala ve Ngai wa Yelusaleme.

20Na kĩla kĩĩthĩawa vata kũvĩtũka isu ũndũ wa nyũmba ya Ngai waku, kĩla wĩĩthĩawa vata kũnengane, kĩnengane kuma nyũmbanĩ ya kwia mothwii ya mũsumbĩ.

21Nakwa, o nyie, mũsumbĩ Alitasasita, nĩngũmatw’ĩa ũtw’ĩo asũvĩi onthe ma ũthwii ala me mũingo wa ũla Ũsĩ, atĩ ũndũ o na wĩva ũla mũthembi Esala, mũandĩki wa mĩao ya Ngai wa ĩtunĩ, ũkenda kwenyu, ũndũ ũsu wĩkwe na kĩthing’ĩĩsyo kyonthe,

22o kũvika talendi ĩana sya vetha, na kũvika ithimi ĩana sya nganũ, na kũvika vathi ĩana sya mbinyu, na kũvika vathi ĩana sya mauta, na mũnyũ vate kũtala ũndũ wĩana.

23O ũla wĩaĩtwe nĩ Ngai wa ĩtunĩ, nĩwĩkwe ki kwondũ wa nyũmba ya Ngai wa ĩtunĩ; nũndũ kwaĩle kĩ kwĩthĩwa ũthilĩku ĩũlũ wa ũsumbĩ wa mũsumbĩ na ana make?

24Na ĩngĩ nĩtũũmũmanyĩthya, ũndũ wa athembi o na meva na Alivai, kana aini, kana asũvĩi ma mĩomonĩ, kana Anethini, kana athũkũmi ma nyũmba ĩsu ya Ngai, kũiosana na mĩao kũmaumĩthya koti, kana mũvothi, kana ũelo.

25Naku we, Esala, kwĩanana na ũĩ wa Ngai waku ũla wĩ kw’okonĩ kwaku, ia amũli na asili, o onthe ala mesĩ mĩao ya Ngai waku, ala matonya kũsilan’ya andũ onthe ala me mũingo wa ũla Ũsĩ; na mũmanyĩsyei ũla ũteũmĩmanya.

26Na o na ũla ũtakeka mĩao ya Ngai waku, na mĩao ya mũsumbĩ, nasilĩlwe na kĩthito kyonthe, ethĩwa nĩ kũawa, kana kumw’a nthĩ yake, kana kwosewa syĩndũ syake, kana kwovwa.

27Yeova, Ngai wa aaĩthe maitũ, nataĩwe, ũla wĩkĩĩte mũsumbĩ ũndũ ta ũsu ngoonĩ, amyanakavye nyũmba ya Yeova ĩla yĩ Yelusaleme;

28na ũmbonee ũseo wĩ wendo vala ve mũsumbĩ, na atai make, na vala ve anene onthe me mbee ũsumbĩnĩ me vinya ma mũsumbĩ. Nakwa nĩneekĩiwe vinya kwĩanana na kw’oko kwa Yeova Ngai wakwa ĩũlũ wakwa, na noomban’ya kuma kwa Isilaeli andũ anene mambate nakwa.

← Chapter 6 Jump to: Chapter 8 →