Ezra 9

Kamba (Mbivilia) 1956

← Chapter 8 Jump to: Chapter 10 →

1Na ĩndĩ yĩla maũndũ asu mathelile, anene me mbee ũsumbĩnĩ manthengeea, makĩmbĩa, Andũ ma Isilaeli, na athembi na Alivai, matyaaĩvathana na ngo sya andũ ma i nthĩ, ĩndĩ nĩmekaa kwĩanana na mothatyo moo, o ma Akanaani, na Aititi, na Avelisi, na Ayevusi, na Aamimoni, na Amoavi, na Amisili, na Aamoli.

2Nũndũ nĩmatwaĩte eĩtu moo matw’ĩke aka moo ene na makatwaĩa ana moo, na ĩndĩ ũsyao mũtheu nĩwĩvulanĩtye na ngo sya andũ ma nthĩ isu: ĩĩ, moko ma anene me mbee ũsumbĩnĩ na ma asumbĩki nĩmo matongoesye ĩvĩtyonĩ yĩu.

3Na yĩla neewie ũvoo ũsu natembũanga ngũa yakwa, o na ngũa yakwa ndasa, na nakũa nzw’ĩĩ sya mũtwe wakwa na kĩng’ew’a kyakwa, na nekala nthĩ nĩ mũthokoanu.

4Nĩvo ĩndĩ noombanĩwe nĩ kĩla mũndũ ũla watetemiwe nĩ ndeto sya Ngai wa Isilaeli, nũndũ wa ĩvĩtyo ya asu ala matavĩtwe; na nekala nĩ mũthokoanu kũvika kũthemba nthembo ya wĩoo.

5Na ĩvinda ya nthembo ya wĩoo nookĩla kuma kwĩnyivyanĩ kwakwa, ngũa yakwa o na ngũa yakwa ndasa yĩ ndembũange; na navalũka na mau makwa, na namũtambũũkĩsya Yeova Ngai wakwa moko makwa;

6na nasya, Ame Ngai wakwa, nĩngũsonoka na kwonan’ya nthoni ũthyũnĩ wakwa ũndũ wa ũkũkĩlĩlya ũthyũ wakwa, Ngai wakwa; nũndũ mothũku maitũ nĩmaingĩvĩte ĩũlũ wa mĩtwe yaitũ, na kũvĩtan’ya kwitũ nĩkũvikĩte matunĩ.

7Kuma mĩthenya ya aaĩthe maitũ kũvika ũmũnthĩ nĩtwekalile twĩ avĩtan’ya mũno; na nũndũ wa mothũku maitũ, ithyĩ, na asumbĩ maitũ, na athembi maitũ, nĩtũnenganĩtwe kw’okonĩ kwa asumbĩ ma i nthĩ, o kwa ũvyũ, na kũtavwa, na kũvutwa, na kũsonokwa mothyũ, o tondũ tũilyĩ ũmũnthĩ.

8Na yu kavinda kanini mũno mumo nĩwonanĩtwe kuma kwa Yeova Ngai waitũ, atũtiĩe ũtialo wa kũvonoka, na atũnenge kyambo vandũ vake vatheu, nĩ kana Ngai waitũ atonye kũsalukya metho maitũ, na kũtũvuũkya vanini ũkombonĩ witũ.

9Nũndũ twĩ ngombo; ĩndĩ Ngai waitũ ndatũtiĩte o na twĩ ũkombonĩ witũ, ĩndĩ nũtwonea ũseo wĩ wendo methonĩ ma asumbĩ ma Velisia, atũnenga ũvuũkyo, tũtũngĩĩe nyũmba ya Ngai waitũ, na tũseũvye kũla kũomboe kwayo, na atũnenge ũvai ku Yuta na Yelusaleme.

10Na yu, ame Ngai waitũ, twĩasya ata ĩtina wa ũu? Nũndũ nĩtũtiĩte mĩao yaku

11ĩla weaie na makanyw’a ma athũkũmi maku athani, ũkyasya, nthĩ, ĩla mũendete mũmĩmesye, nĩ nthĩ mbuku ũndũ wa ũvuku wa ngo sya andũ ma i nthĩ, nũndũ wa mothatyo moo, ala mamyusũĩtye kuma ngalĩ ĩmwe kũvika ĩla ĩngĩ na ũvuku woo:

12yu kwondũ wa ũu mũtikanengane eĩtu menyu kwa ana moo, o na mũtikatwaĩe ana menyu eitũ moo, o na mũtikamamanthĩe mũuo kana ũuno tene na tene; nĩ kana mwĩthĩwe mwĩ vinya, na mũye ũseo wa ĩ nthĩ, na kũmĩtia yĩthĩwe ũtiĩwa wa syana syenyu tene na tene.

13Na ĩtina wa ũu w’onthe ũla watũkĩtĩkĩe nũndũ wa meko maitũ mathũku, na nũndũ wa kũvĩtan’ya kwitũ kũnene, nĩkwĩthĩwa we Ngai waitũ nũtũkũnĩte ũndũ ũnini kwĩ ũndũ mothũku maitũ maĩlwe, na nũtũnengete ũtialo ũilyĩ ũu,

14ithyĩ tũkatũla mĩao yaku ĩngĩ, na kũkwatanwa tũtwaanĩthw’e na ngo sya andũ ala mekaa mothatyo asu? Ndũkatũthatĩa mũvaka ũtũmine, kũtikethĩwe ũtialo, kana ũmwe wa kũvonoka?

15Ame Yeova, Ngai wa Isilaeli, we wĩ mũlũngalu; nũndũ nĩtũtiele ũtialo ũla mũvonoku, o ũndũ ũilyĩ ũmũnthĩ: sisya, twĩ mbee waku twĩ avĩtan’ya; nũndũ vati ũmwe ũtonya kũũngama mbee waku nũndũ wa ũndũ ũsu.

← Chapter 8 Jump to: Chapter 10 →