Hosea 1

Kamba (Mbivilia) 1956

Jump to: Chapter 2 →

1Ndeto ya Yeova ĩla yamũkĩe Osea mwana wa Veeli, mĩthenya ya Usia, na Yothamu, na Aasu, na Esekia, asumbĩ ma Yuta, na mĩthenya ya Yelovoamu mwana wa Yoasi, mũsumbĩ wa Isilaeli.

2Yĩla Yeova waneenie ĩ ya mbee na kanyw’a wa Osea, Yeova amwĩa Osea, Enda, wĩtwaĩe kĩveti ĩlwaya na syana sya ũmalwaya; nũndũ ĩ nthĩ nĩyĩkaa ũmalwaya mũno, ĩkĩmũtia Yeova.

3Na ĩndĩ aenda na atwaa Ngomeli mwĩĩtu wa Ndivilaimu; nake aitava, na amũsyaĩa mwana.

4Na Yeova amwĩa, Mwĩte syĩtwa yake Yesileeli; nũndũ no vandũ vanini, na ngaĩvanĩsya nthakame ya Yesileeli nyũmbanĩ ya Yeu, na ngatuma ũsumbĩ wa nyũmba ya Isilaeli ũthela.

5Na kũkeethĩwa mũthenya ũsu, ngatũlĩla ũta wa Isilaeli mwandanĩ wa Yesileeli.

6Na aitava ĩngĩ, na asyaa mwĩĩtu. Na Yeova amwĩa, Mwĩte syĩtwa yake Lo‐luama; nũndũ ndikambĩla kwĩw’ĩa nyũmba ya Isilaeli tei ĩngĩ, nĩmaekee kwondũ wa ũndũ o na wĩva.

7Ĩndĩ ngeew’ĩa nyũmba ya Yuta tei, na ngamatangĩĩa na vinya wa Yeova Ngai woo, na ndikamatangĩĩa na ũta, kana ũvyũ, kana kaũ, kana mbalasi, kana ala matũlĩte mbalasi.

8Na ĩndĩ yĩla wamũaĩisye Lo‐luama, aitava na asyaa mwana.

9Na Yeova asya, Mwĩte syĩtwa yake Lo‐amimi; nũndũ inyw’ĩ mũti andũ makwa, na ndikethĩwa Ngai wenyu.

10Ĩndĩ ũtalo wa ana ma Isilaeli ũkeethĩwa ta kĩthangathĩ kya ũkanga, kĩla kĩtathimĩka kana kũtalĩka; na kũkeethĩwa vala meeiwe, Mũti andũ makwa, makeewa, Mwĩ ana ma Ngai ũla wĩ thayũ.

11Na ana ma Yuta na ana ma Isilaeli makoombanw’a vamwe, na makeeyiĩa mũtongoi ũmwe, na makambata kuma nthĩ ĩsu; nũndũ mũthenya wa Yesileeli ũkeethĩwa mũnene.

Jump to: Chapter 2 →