Hosea 13

Kamba (Mbivilia) 1956

← Chapter 12 Jump to: Chapter 14 →

1Yĩla Evalaimu waneenie, kwaĩ kũtetema; eenenevya mwene nthĩnĩ wa Isilaeli; ĩndĩ yĩla wavĩtisye maũndũnĩ ma Mbaali, nĩwakwie.

2Na yu nĩmekaa naĩ mbee na mbee, na meeseũvĩsye mĩvw’anano ya vetha woo matwekethetye, o mĩvw’anano kwĩanana na ũmanyi woo ene, yonthe wĩa wa ndũĩka: maneenaa ũndũ wayo, Andũ ala mathembaa nĩmamumunye tũsaũ.

3Kwondũ wa ũu makeethĩwa ta ĩthweo ya kĩoko, na ta ĩmwe yĩla yĩtw’ĩkaa tene, ta wewa ũla ũtwaawa nĩ kĩlingi kuma kĩvũĩonĩ, na ta syũki yĩla yumaa mũtotenĩ.

4Ĩndĩ ninyie Yeova Ngai waku o kuma nthĩ ya Misili; na ndũkaamanye ngai ĩngĩ ate o nyie, na nde vo nyie vati mũtangĩĩi.

5Nyie nĩnakũmanyĩe weũnĩ, nthĩ yĩ mũnyao mũnene.

6O kwĩanana na kĩsesi kyoo, now’o mavũnie; nĩmavũnie, na ngoo syoo syaneneva: kwondũ wa ũu nĩmolĩtwe ninyie.

7Kwondũ wa ũu kwoo nĩilyĩ ta mũnyambũ; ngooveesya o ta ngo nzĩanĩ;

8ngakomana namo ta nduva ĩvenetwe maswii mayo, na ngatembũa wambũ wa ngoo syoo; na ngamaĩa vu ta mũnyambũ mũka; nyamũ mbai ĩkamatembũanga.

9Nĩ wanangĩko waku, we Isilaeli, nũndũ nũndeete, kũlea mũtethya waku.

10Aĩva yu mũsumbĩ waku, nĩ kana akũtangĩĩe ndũanĩ syaku syonthe? Na asili maku, ala waneenie ũndũ wamo, Nenga mũsumbĩ na anene me mbee ũsumbĩnĩ?

11Nĩnĩkũnengete mũsumbĩ ũthatunĩ wakwa, na namũveta kũthilĩkanĩ kwakwa.

12Ũthũku wa Evalaimu nĩ mwove; naĩ yake nĩyiĩtwe.

13Mawoo ma mũndũ mũka ũnũkwaũnya makamũkwata: nĩ mwana ũte mũĩ; nũndũ nĩ ĩvinda ũtaĩlwe nĩ kwĩkala vandũ va kũsyaĩwa syana.

14Ngamovosya kuma vinyanĩ wa Seoli; ngamatangĩĩa kuma kĩkw’ũnĩ: we kĩkw’ũ, maĩva mothĩn’yo maku? We Seoli, ũĩva wanangi waku? Ũalyũlo wa ngoo ũkavithĩka methonĩ makwa.

15O na akeethĩwa na ũsyao mwingĩ katĩ wa ana‐a‐ĩthe, kĩseve kĩkooka kyumĩte wumĩlonĩ wa syũa, mĩthũmũ ya Yeova ĩkyambata kuma weũnĩ; na mbuluti yake ĩkang’ala, na nthongo yake ĩkang’ala: akatava mũtavo wa ũthwii mwie wa mĩio yonthe mĩseo.

16Samalia akakua ĩvĩtyo yake; nũndũ nĩwamũng’endee Ngai wake: makavalũkw’a na ũvyũ; tũũkenge twoo tũkang’atanganw’a tũtilĩkange tũlungu na aka moo aito makataũwa.

← Chapter 12 Jump to: Chapter 14 →