Hosea 14

Kamba (Mbivilia) 1956

← Chapter 13 Jump to:

1Ame Isilaeli, syokea Yeova Ngai waku; nũndũ nũvalũkĩte nũndũ wa ũthũku waku.

2Osai ndeto mũthi nasyo, na mũimũsyokea Yeova: mũmwĩe, Veta ũthũku w’onthe, na ũkĩtĩkĩla ũla ũseo: na ĩndĩ tũkathemba nthembo sya ilomo sitũ ta kũthemba tũsalũ twa mũew’a.

3Asuli ndĩkatũtangĩĩa; tũikatũla mbalasi; o na tũikea wĩa wa moko maitũ ĩngĩ, Nĩ inyw’ĩ ngai sitũ; nũndũ ala makw’ĩĩwe nĩ aaĩthe monaa tei kwaku.

4Ngavosya kũsyoka na ĩtina kwoo, ngamenda mũno; nũndũ ũthatu wakwa nũalyũkĩte kuma kwake.

5Ngeethĩwa ta ĩmwe kwa Isilaeli; akalaũka ta ĩlaa ya lili, na akatambũũkya mĩi yake ta Levanoni.

6Mbonge syake ikeenyasya, na wanake wake ũkeethĩwa ta mũthata, na mũuke wake ta Levanoni.

7Ala matũaa ungu wa muunyĩ wake makasyoka; makathayũũka ta mbeke, na kũlaũka ta mũsavivũ: mũuke wake ũkeethĩwa ta mbinyu ya Levanoni.

8Evalaimu akasya, Nĩ ũndũ ũngĩ mwaũ na mĩvw’anano? Nĩnzũngĩĩte, nakwa ngamũsyaĩĩsya: nĩilyĩ ta mũtĩ wa mũsonovali mũthithinĩu; vala nĩĩ ũsyao waku nĩwonekaa.

9Nũũ ũla mũĩ, amanye maũndũ aa? Ũla wĩ kĩlĩko, kana amamanye? Nũndũ nzĩa sya Yeova nĩ ndũngalu, na ala alũngalu makaiendelaa; ĩndĩ avĩtan’ya makavalũkaa nthĩnĩ wasyo.

← Chapter 13 Jump to: